1, 2. Kumbi mbayani wo ayanduwa ndi umampha waku Yehova, nanga Bayibolu likambanji vakukwaskana ndi jalidu laku Chiuta lenili?

 YERUZGIYANI kuti muwona munthu munyaki ndi mabwezi ngaki aryiya limoza chakurya pabwalu lumwi lepafupi kusere. Yiwu acheza, kuseka kweniso akondwa kuwona kutowa kwa lumwi lichisere. Ku chigaŵa chinyaki pataliku ndi po yiwu ŵali, mlimi waleresa munda waki ndipu wasekere kuwona kuti vuwa yayamba kuwa chifukwa mbewu zaki zingwamba kufota. Ndipu kuchigaŵa so chinyaki, munthu ndi muwolu waki akondwa kuwona kuti mwana wawu wayamba kwenda.

² Kwali ŵanthu ŵenaŵa aziŵa pamwenga cha, yiwu akondwa ndi vinthu venivi chifukwa chakuti Yehova Chiuta ngwamampha. Ŵanthu anandi akwanja vakusopa atanja kukamba kuti “Chiuta ngwamampha.” Kweni Bayibolu likamba vinandi kuluska penapa. Ilu likamba kuti: “Iyu ngwamampha ukongwa!” (Zekariya 9:17) Kweni viwoneka kuti mazuŵa nganu, mbanthu amanavi ŵaka wo aziŵa vo mazu ngenanga ngang’anamuwa. Sonu, kumbi fundu yakuti Yehova Chiuta ngwamampha ying’anamuwanji, nanga munthu weyosi wangayanduwa wuli ndi umampha waku Yehova?

3, 4. Kumbi umampha ntchinthu wuli, nanga ntchifukwa wuli tingakamba kuti fundu yakuti Yehova ngwamampha yilongo kuti iyu ngwachanju?

³ Mu vineneru vinandi mazuŵa nganu, mazu ngakuti, “umampha” atingagwiriskiya ntchitu waka pa chechosi. Kweni, Bayibolu lilongo kuti umampha ndi jalidu pakulija. Kanandi, mazu ngenanga ngang’anamuwa kuja ndi mijalidu yamampha ukongwa. Mwaviyo, tingakamba kuti Yehova ngwamampha ukongwa pa chechosi. Mijalidu yaki yosi kusazgapu nthazi zaki, urunji waki kweniso zeru zaki, yosi njamampha ukongwa. Kweni, fundu yakuti Yehova ngwamampha yilongo kuti iyu ngwachanju. Chifukwa wuli tikamba viyo?

⁴ Munthu yo ngwamampha wachitiya anyaki vamampha. Wakutumika  Paulo wangulongo kuti ŵanthu akondwa ukongwa ndi munthu wamampha kuluska murunji. (Aroma 5:7) Munthu murunji walondo marangu mwakugomezgeka, kweni munthu wamampha wachita vinandi kuphara kulondo waka marangu. Watamba ndiyu kuchitapu kanthu ndipu wafufuza nthowa zo wangawovye ŵanthu anyaki. Nge mo tiwoniyengi, Yehova ngwamampha mu nthowa yeniyi. Vakuwoneke limu kuti iyu walongo jalidu lenili chifukwa cha chanju chikulu cho wenachu.

5-7. Ntchifukwa wuli Yesu wangukana kudanika kuti “Msambizi Wamampha,” nanga ndi fundu niyi yakukhumbika ukongwa yo wangusambiza penapa?

⁵ Yehova ngwamampha so ukongwa munthowa yinyaki yapade ukongwa. Kwati kwaja mazuŵa ngamanavi kuti Yesu wafwi, munthu munyaki wanguluta kwaku iyu kuti wakamufumbi fumbu, ndipu wangwamba ndi mazu ngakuti: “Msambizi wamampha.” Yesu wangumuka kuti: “Ntchifukwa wuli utindidana kuti wamampha? Wamampha walipu yumoza pe, yo ndi Chiuta.” (Mariko 10:17, 18) Panyaki mungazizwa ndi mo Yesu wangumukiya. Chifukwa wuli wangumumuka viyo munthu uyu? Kumbi Yesu wenga nadi “Msambizi wamampha” cha?

⁶ Viwoneka kuti munthu mwenuyu wangudana Yesu kuti msambizi wamampha pakukhumba kupereka ulemu waboza. Kweni Yesu, mwakujiyuyuwa wangupereka ulemu kwa Awisi akuchanya ŵeniwo mbamampha kuphara munthu weyosi. (Nthanthi 11:2) Kusazgiyapu yapa, Yesu wangusambiza fundu yinyaki yakukhumbika ukongwa. Fundu yaki njakuti, ndi Yehova pe yo we ndi wanangwa wakujalikiska fundu zakukwaskana ndi chamampha ndi chiheni. Ndipuso ndiyu pe wangatikambiya cho ntchamampha ndi chiheni. Adamu ndi Heva ŵati atondeka kuvwiya dangu lo Yehova wanguŵapaska lakuti angaryanga cha vipasu va muchimiti chakuziŵisa chamampha ndi chiheni, angulongo kuti akhumbanga wanangwa wakujisankhiya ŵija chamampha ndi chiheni. Kweni mwakupambana ndi yiwu, Yesu mwakujiyuyuwa wanguzomereza kuti Mbawisi pe ŵija wo ŵe ndi wanangwa wakukambiya ŵanthu cho ntchamampha ndi chiheni.

⁷ Kweniso, Yesu waziŵanga kuti chinthu chechosi chamampha chituliya kwaku Yehova. Iyu ndiyu watitipasa “mphasu yeyosi yamampha ndipuso yakufikapu.” (Yakobe 1:17) Tiyeni sonu tikambiskani mo Yehova walongore kuti ngwamampha mwakuja wakupaska.

8. Kumbi Yehova walongo wuli kuti ngwamampha kwaku weyosi?

⁸ Munthu weyosi yo wakujaku ndi umoyu pacharu chapasi wakuyanduwapu ndi umampha waku Yehova. Lemba la Salimo 145:9 likamba kuti: “Yehova ngwamampha kwaku weyosi.” Kumbi vakuyeruzgiyapu vinyaki nivi vo vilongo kuti Yehova ngwamampha kwaku weyosi? Bayibolu likamba kuti: “Wanguleka cha kuŵapaska ukaboni waku iyu mweneku wakuti wachita vinthu vamampha. Iyu watikupaskani vuwa kutuliya kuchanya ndipuso nyengu za vipasu, watikupaskani so vakurya vinandi kweniso wazaza mitima yinu ndi likondwa.” (Machitidu 14:17) Kumbi mukuryapu chakurya chakunowa cho mungukondwa nachu ukongwa? Pacharu chapasi, patingi paŵengevi chakurya chechosi asani Yehova wengavi jalidu la umampha kweniso asani wangunozga charu ichi munthowa yakuti vuwa yingawanga cha ndipuso kuti paleki kuja “nyengu za vipasu.” Yehova wachitiya munthu weyosi vinthu vamampha kusazgapu wo aleka kumuyanja.  Pakukamba va Awisi, Yesu wangukamba kuti: “Yiwu aŵaliskiya lumwi lawu ŵanthu aheni ndi amampha, ndipu awisiya vuwa ŵanthu arunji ndi ambula urunji.”—Mateyu 5:45.

9. Kumbi vipasu va maapozi vilongo wuli kuti Yehova ngwamampha?

⁹ Ŵanthu anandi awonga cha vinthu vinandi vamampha vo tisaniya chifukwa cha lumwi, vuwa ndipuso nyengu za vipasu. Mwakuyeruzgiyapu, aŵanaŵaniyani vipasu va maapozi. Vipasu venivi visanirika ukongwa muvigaŵa vo kufunda ukongwa. Vipasu ivi vakutowa, vinowa kweniso ve ndi maji nganandi kweniso vinthu vinyaki vakukhumbika muliŵavu la munthu. Kweni muziŵa kuti pacharu chosi pe mitundu pafufupi 7,500 ya maapozi? Pe maapozi nganyaki ngayera, ngagolide, ngantcheti kweniso ngagirini ndipu ngapambanapambana so kukuwa kwaki mwakuti nganyaki ngakulungakulu penipo nganyaki ngamanangamana. Kanje ka apozi nkhamana kweniso nkhapepu  ukongwa mwakuti asani mwakaŵika pajanja, vija nge kuti palivi cho mwako. Kweni asani kanje kenaka kame, kakuwa ndi kuja chimiti chakukondwesa ukongwa. (Sumu Yaku Solomoni 2:3) Chaka chechosi, vimiti va maapozi vija ndi maluŵa nganandi ngakutowa ukongwa ndipu pakumaliya paki vipasa vipasu. Ndipu pa chaka, chimiti chimoza cha maapozi chipasa vipasu vakukwana makatoni pafufupi 20, katoni yeyosi yakukwana makilogilamu 19 uzitu waki ndipu chichita venivi kwa vyaka 75.

10, 11. Kumbi mo liŵavu lidu likupangikiya, vilongo wuli kuti iyu ndi Chiuta wamampha?

¹⁰ Chifukwa cha umampha waki wambula kumala, Yehova wakutipasa liŵavu lo ‘likupangika mwakuziziswa.’ Liŵavu lidu likupangika ndi lusu lakusambira vinthu vinandi kweniso kukondwa ndi vo Yehova wakulenga. (Salimo 139:14) Aŵanaŵaniyani so vakuyeruzgiyapu viya vakonkhoskeka mu ndimi yakwambiriya. Namwi mukaŵengepu, kumbi ndi vinthu nivi vo mwatingi mukondwengi navu asani mwaviwona. Kumbi mwatingi mukondwengi kuwona mwana wachimwemwete, vuwa pamwenga kutowa kwa lumwi lichisere? Masu ngidu ngakupangika kuti ngapambanisengi mitundu ya vinthu masauzandi nganandi pamwenga so mamiliyoni. Makutu ngidu ngakupangika ndi lusu lakuziŵa mazu ngakukondwesa ngo tituvwa nga munthu yo titimuyanja, kuseka kwa mwana yo wakondwa kweniso kuvwa kachiwawa ka mphepu yo yiputa muvimiti. Ntchifukwa wuli tikondwa ndi vinthu vo tiwona kweniso kuvwa? Bayibolu likamba kuti: “Gutu lakuvwiya kweniso jisu lakuwone, vosi vikupangika ndi Yehova.” (Nthanthi 20:12) Kweni kupatuwa pa kuvwa ndi kuwona, pe vinthu vinyaki so vo tichita vo vititiwovya kuti tikondwengi ndi umoyu.

¹¹ Ukaboni unyaki wo ulongo kuti Yehova ngwamampha ngwakuti iyu wakutilenga ndi lusu lakuti tivwengi fungu la chinthu. Mphunu ya munthu yingapambanisa mitundu yakupambanapambana ya fungu yakukwana pafufupi 1 tililiyoni. Mwakuyeruzgiyapu, aŵanaŵaniyani fungu lo mutuvwa asani munthu munyaki wabika chakurya cho yimwi mutanja, fungu la maluŵa, fungu la mani ngo ngambotoka pasi kweniso fungu la josi lo lituliya pa motu wo ukole umampha. Liŵavu lidu liziŵa so asani takwaska pamwenga chinthu chinyaki chatikwaska. Mwakuyeruzgiyapu, tituvwa umampha asani kamphepu kakuzizira umampha kaputa kumasu kwidu, asani munthu yo titimuyanja watihaga kweniso asani tako chinthu chinyaki chakusilirika umampha. Asani muturya chipasu cho tachikonkhoskapu  kali, mutuvwa kunowa mumulomu ndipu kunowa kwenuku kuchita kuseleriyana mumatakama mwinu. Kukamba uneneska, te ndi vifukwa vinandi kweniso vakuvwika vakuthamikiya Yehova ndi kukamba kuti: “Umampha winu ngunandi ukongwa! Mwawusungiya ŵanthu wo atikuwopani.” (Salimo 31:19) Kweni kumbi fundu yakuti Yehova wasungiya umampha ŵanthu wo atimuwopa ying’anamuwanji?

12. Kumbi ndi vinthu vakukhumbika nivi vo Yehova watitipasa, nanga ntchifukwa wuli?

¹² Yesu wangukamba kuti: “Malemba ngakamba kuti: ‘Munthu wangaja ndi umoyu ndi chiŵandi pe cha, kweni ndi mazu ngosi ngakutuliya mumulomu mwaku Yehova.’” (Mateyu 4:4) Mazu ngaku Yehova ngo ngasanirika mu Bayibolu ngangatiwovya ukongwa kuluska chakurya chakuliŵavu chifukwa yingu ngangatiwovya kuti tizisaniyi umoyu wamuyaya. Mu Mutu 8 mu buku ili, tingusambira kuti mazuŵa nganu ngakumaliya Yehova wagwiriskiya ntchitu nthazi zaki zakuweziyapu vinthu kuti wajalikiski paradayisu wauzimu. Chimoza mwa vinthu vakukhumbika ukongwa mu paradayisu mwenuyu ntchakurya chinandi chauzimu.

13, 14. (a) Kumbi mchimi Ezekiyeli wanguwonanji muchiwona, nanga vo wanguwona ving’anamuwanji kwaku isi mazuŵa nganu? (b) Kumbi ndi vinthu nivi vo Yehova wapaska ateŵeti ŵaki akugomezgeka kuti azije ndi umoyu wamuyaya?

¹³ Mu uchimi unyaki wakukhumbika ukongwa wa mu Bayibolu wakukwaskana ndi kuweziyapu vinthu, mchimi Ezekiyeli wanguwona chiwona cha nyumba yakusopiyamu yaunkhankhu yo yinguwezekiyapu so. Pa nyumba yakusopiyamu yeniyi patuwanga maji ndipu ngangupanga msinji wo ungukuwa ukongwa kweniso wenga wandimba. Kwekosi ko msinji uwu walutanga, walutanga ndi vitumbiku. Mumphepeti mwaki mungume vimiti vo vapasanga vipasu ndipu vipasu venivi venga chakurya kweniso munkhwala. Msinji wenuwu unguchitisa so kuti mu Nyanja Yakufwa yo yenga yamche kweniso mwengavi vamoyu, muje vinthu vamoyu. (Ezekiyeli 47:1-12) Kumbi vinthu vosi venivi vang’anamuwanganji?

¹⁴ Chiwona cha nyumba yakusopiyamu chang’anamuwanga kuti Yehova wazamuweziyapu kusopa kwauneneska. Ndipu ŵanthu azamukwamba so kumusopa mwakukoliyana ndi fundu zaki zaurunji.  Mwakuyanana ndi msinji wa mu chiwona chenichi, vinthu vamampha vo Yehova wazamupaska ŵanthu ŵaki venivo vazakuŵawovya kuti azije ndi umoyu wamuyaya, vazamusazgikiyangakusazgikiyangaku. Venivi ndivu vaja vichichitika nadi. Kwambiya waka po kusopa kwauneneska kunguwezekiyapu so mu 1919, Yehova watumbika ŵanthu ŵaki ndi vinthu vinandi vakupasa umoyu. Kumbi wachita wuli venivi? Ŵanthu anandi asambira uneneska kuziya mu kusambira Bayibolu, mabuku ngo ngakonkhoska Bayibolu, maunganu ngampingu kweniso maunganu ngakulungakulu. Ndipu mwakugwiriskiya ntchitu vinthu venivi, Yehova wasambiza ŵanthu fundu zakukhumbika ukongwa zakukwaskana ndi sembi yaku Khristu. Sembi yeniyi yitovya ŵanthu wo atanja Chiuta kweniso kumuwopa kuti ajengi ndi njuŵi yamampha kweniso kuti aje ndi chilindizga chakuzija ndi umoyu wamuyaya. a Mwaviyo, mu nyengu ya mazuŵa ngakumaliya iyi, po ŵanthu asuzgika ndi nja yauzimu, ŵanthu aku Yehova akondwa ndi chakurya chinandi ukongwa chauzimu.—Yesaya 65:13.

15. Kumbi Yehova wazamulongo wuli umampha waki ku ŵanthu akugomezgeka mu Ulamuliru wa vyaka 1,000 waku Khristu?

¹⁵ Kweni msinji wo Ezekiyeli wanguwona muchiwona uleka cha kwenda po charu chiheni ichi chiluta kukumala. Kweni wazamulutirizga mbwenu kwenda kweniso kukuwa mu Ulamuliru waku Khristu wa vyaka 1,000. Pa nyengu yo, kuziya mu Ufumu wa Umesiya, Yehova wazamugwiriskiya ntchitu sembi yaku Yesu pakovya ŵanthu akugomezgeka kuti azije akufikapu ndipu venivi vazamuchikanga kamanakamana. Kukamba uneneska, tazamukondwa ukongwa ndi umampha waku Yehova!

16. Kumbi Bayibolu lilongo wuli kuti Yehova we ndi mijalidu so yinyaki yamampha, nanga mijalidu yeniyi ndi niyi?

¹⁶ Kusazgiyapu pa kuja ndi jalidu lakupaska, Yehova walongo so kuti ngwamampha munthowa so zinyaki. Iyu wangukambiya Mozesi kuti: “Ndikulongongi umampha wangu wosi, ndipuso ndipharazgengi zina langu lakuti Yehova kwaku yiwi.” Nkhani iyi yilutirizga kukamba kuti:  “Yehova wajumphanga panthazi paku Mozesi ndipu wapharazganga kuti: ‘Yehova, Yehova, Chiuta walisungu kweniso wawezi, wambula kukwiya liŵi ndipuso wakuzaza ndi chanju chambula kumala kweniso uneneska.’” (Ekisodo 33:19; 34:6) Mwaviyo, chinanga kuti Yehova ngwamampha, kweni we ndi mijalidu so yinyaki yamampha. Tiyeni tikambiskanepu ŵaka mijalidu yiŵi.

17. Kumbi wezi ntchinthu wuli, nanga kumbi Yehova walongo wuli kuti ngwawezi ku ŵanthu ambula kufikapu?

¹⁷ “Wawezi.” Jalidu lenili lo lifwatulikiya so kuti “lisungu,” lititisambiza vinandi vakukwaskana ndi mo Yehova wachitiya ndi ŵanthu. Ŵanthu wo ŵe ndi maudindu, kanandi achita vinthu mwankhaza kweniso mwaukali. Kweni nyengu zosi, Yehova wachita vinthu mwakufwasa kweniso mwalisungu ndi ŵanthu. Mwakuyeruzgiyapu, Yehova wangukambiya Abramu kuti: “Yunuska chisku chaku, ndipu kutuliya penipo uli, lereska kunkhondi ndi kumwera, kuvuma ndi kuzambwi.” (Genezesi 13:14) Akaswiri anandi a Bayibolu akamba kuti mu Chiheberi chakwambiriya, mazu nga pa lemba ili ngalongo kuti Yehova wachitanga kumulamula cha Abramu, kweni wamupemphanga mwaulemu. Pe so malemba nganyaki ngo ngalongo kuti Yehova wapempha mwaulemu. (Genezesi 31:12; Ezekiyeli 8:5) Aŵanaŵaniyani waka, Wakulamuliya wachilengedu chosi walongoro mwaulemu ndi ŵanthu mumalu mwakuchita kuŵalamula. Mucharu ichi ŵanthu anandi mbakali, mbankhaza kweniso mbakunyoza, kweni vakukondwesa kuziŵa kuti Yehova Chiuta widu ngwawezi.

18. Kumbi mazu ngakuti Yehova ‘ngwakuzaza ndi . . . uneneska’ ngang’anamuwanji, nanga ntchifukwa wuli mazu ngenanga ngakuchiska kwaku isi?

¹⁸ “Wakuzaza ndi . . . uneneska.” Mazuŵa nganu, ŵanthu anandi achita vinthu mwauneneska cha. Kweni Bayibolu lititikumbusa kuti: “Chiuta ndi munthu cha kuti wapusiki.” (Numeri 23:19) Ndipu lemba la Tito 1:2 nalu likamba kuti “Chiuta . . . wangapusika cha.” Yehova ngwamampha ukongwa kuphara munthu weyosi ndipu wangachita cha venivo. Mwaviyo, malayizgu ngaku Yehova ngakugomezgeka ndipu mazu ngaki, nyengu zosi ngafiskika. Yehova wadanika kuti ndi “Chiuta wauneneska.” (Salimo 31:5) Iyu watcheŵa ŵaka kukamba boza cha, kweni watitikambiya so fundu zinandi zauneneska. Iyu wabisa cha vo waziŵa pamwenga kuchita vinthu mwakubisa, mumalu mwaki wakambiyaku ateŵeti ŵaki akugomezgeka zeru zapachanya  zo wenazu. b Ndipuso watiŵakambiya vo angachita kuti agwiriskiyengi ntchitu uneneska wo wakuŵasambiza ndi chilatu chakuti ‘alutirizgi kwenda mu uneneska.’ (3 Yohane 3) Kumbi kuziŵa kuti Yehova ngwamampha kutenere kutichitiska kuŵanaŵananji, kweniso kuchitanji?

19, 20. (a) Kumbi Satana wanguchita wuli kuti Heva wayambi kukayikiya umampha waku Yehova, nanga ntchinthu wuli chinguchitika? (b) Kumbi mutuvwa wuli mumtima asani muŵanaŵaniya umampha waku Yehova, ndipu chifukwa wuli?

¹⁹ Pa nyengu yo Satana wayesanga Heva mumunda wa Edeni, wangwamba dankha kumuchitiska kuti wayambi kukayikiya kuti Yehova ngwamampha. Pa nyengu iyi ndipu Yehova wamukambiya kali Adamu kuti: “Ungarya vipasu va muchimiti chechosi cha mumunda mo wakhumbiya.” Pa vimiti vosi vo venga mumunda wo, Yehova wanguŵakanizapu waka chimiti chimoza mbwenu. Kweni wonani fumbu lo Satana wangufumba Heva lakuti: “Kumbi mbuneneska kuti Chiuta wakukamba kuti mungaryanga cha vipasu va muchimiti chechosi cha mumunda uwu?” (Genezesi 2:9, 16; 3:1) Satana wangubendezge dala mazu ngo Yehova wangukamba ndi chilatu chakuti Heva waŵanaŵani kuti Yehova waŵanolanga chinthu chinyaki chamampha. Ntchachitima kuti Heva wangugomezga nadi vo Satana wangukamba. Iyu wangwamba kukayikiya asani Chiuta ngwamampha chinanga kuti chechosi cho wenga nachu chingutuliya kwaku iyu. Ndipu kutuliya ŵaka pa nyengu yeniyi mpaka sonu anthulumi kweniso anthukazi anandi akayikiya kuti Chiuta ngwamampha nge mo Heva wanguchitiya.

²⁰ Tiziŵa kuti kukayikiya kwenuku ndiku kukuchitiska kuti tosi tikumanengi ndi masuzgu. Mwaviyo, tingaluwanga cha mazu ngo Yeremiya wangulemba pa Yeremiya 31:12 kuti: “Yiwu . . . azamuŵala chifukwa cha umampha waku Yehova.” Titenere nadi kukondwa pamwenga kuti kuŵala ukongwa chifukwa cha umampha waku Yehova. Ndipu tingakayikiyanga cha vilatu vaku Chiuta widu mweniyo ngwamampha  pa chechosi. Titenere kumugomezga nyengu zosi chifukwa nyengu zosi watiŵakhumbiya vamampha ŵanthu wo atimuyanja.

21, 22. (a) Kumbi ndi vinthu wuli vo mukhumba kuchita kuti muyezgi umampha waku Yehova? (b) Kumbi ndi jalidu linyaki nili lo tazamusambira mu mutu wakulondopu, nanga lipambana wuli ndi umampha?

²¹ Tikondwa so ukongwa mumtima asani tasaniya mwaŵi wakukambiyaku ŵanthu anyaki vakukwaskana ndi umampha waku Yehova. Pakukamba va ŵanthu aku Chiuta, lemba la Salimo 145:7 likamba kuti: “Yiwu atuzgengi mazu nganandi achikumbuka umampha winu ukulu.” Zuŵa lelosi, tiyanduwa ndi umampha waku Yehova. Zuŵa lelosi musaniyengi nyengu yakumuwonge Yehova chifukwa cha umampha waki ndipu muzumbuwengi vinthu chayivu vo mutimuwonga. Ndipu kuŵanaŵaniya va umampha waku Yehova, kumuwonga zuŵa lelosi kweniso kukambiyaku ŵanthu anyaki vakukwaskana ndi jalidu lenili, kungatiwovya kuti tiyezgengi Chiuta widu wamampha mwenuyu. Mwaviyo, asani titesesa kuchita vamampha nge mo Yehova wachitiya, tijengi nayu pa ubwezi wakukho ukongwa. Wakutumika Yohane wangulemba kuti: “Wakwanjiwa, ungayezganga vinthu viheni cha, kweni uyezgengi vinthu vamampha. Mweniyo wachita vinthu vamampha ngwakutuliya kwaku Chiuta.”—3 Yohane 11.

²² Umampha waku Yehova utende so limoza ndi mijalidu yaki yinyaki. Mwakuyeruzgiyapu, Chiuta ‘ngwakuzaza ndi chanju chambula kumala.’ (Ekisodo 34:6) Jalidu ili ndapade ukongwa ndipu lipambana ndi umampha, chifukwa Yehova watililongo kwa ateŵeti ŵaki pe akugomezgeka. Mu mutu wakulondopu tiwonengi mo wachitiya venivi.