1, 2. O vai tei faufaahia i te maitai rahi o te Atua e eaha ta te Bibilia e parau ra no nia i tera huru o Iehova?

 TE TAMAA ra te tahi mau hoa i rapaeau, te ataata e te paraparau ra ratou a mataitai noa ˈi i te toparaa mahana. Te oaoa ra te hoê taata faaapu a topa ˈi te ûa o te pîpî i te maa ta ˈna i tanu. Te oaoa roa ra te hoê tane e ta ˈna vahine a ite ai i ta raua aiû ia haere no te taime matamua.

² Te fanaˈo ra teie feia atoa i teie mau mea no te maitai rahi o te Atua ra o Iehova. E faahiti pinepine te tahi mau taata e haapaoraa ta ratou i te parau: “Mea maitai te Atua.” Mea hau aˈe râ ta te Bibilia e parau, oia hoi: “E maitai rahi hoi to ˈna.” (Zekaria 9:17) Mea iti râ i teie tau o te haafaufaa ra i te reira. Eaha te auraa ia parauhia e maitai rahi to Iehova? E nafea tatou e faufaahia ˈi i to Iehova maitai rahi?

3, 4. Eaha te maitai e no te aha e parauhia ˈi e tuhaa faahiahia te reira o te here o Iehova?

³ Na mua roa, te parau ra te Bibilia e tuhaa faahiahia te maitai o te huru o te tahi taata aore ra o te tahi mea. E nehenehe ïa e parau e itehia te maitai o Iehova i roto i te mau mea atoa ta ˈna e rave e to ˈna mau huru atoa. E itehia te maitai i roto i to ˈna puai, ta ˈna parau-tia e to ˈna paari. E te mea faufaa roa ˈˈe, e itehia to ˈna maitai i roto i to ˈna here. Eaha te tumu?

⁴ Te maitai, o te hoê ïa huru e faaitehia na roto i te ohipa. Ia au i te aposetolo Paulo, mea au aˈe te taata maitai i te taata parau-tia. (Roma 5:7) E haapao maite te taata parau-tia i te ture a te Atua. Area te taata maitai, e imi o  ˈna i te ravea no te hamani maitai ia vetahi ê. Tera te tumu mea tano ia parau e Atua maitai rahi Iehova e e faaite o ˈna i tera huru no to ˈna here rahi.

5-7. No te aha aita Iesu i farii ia piihia oia “Orometua maitai” e eaha te haapiiraa faufaa ta ˈna i horoa?

⁵ Aita ˈtu mai ia Iehova te maitai. Ua haapapu Iesu i te reira i te piiraa mai te tahi taata ia ˈna “Orometua maitai.” Ua pahono atu hoi Iesu: “Eaha oe e pii ai ia ˈu e Orometua maitai? Aita hoê aˈe e mea maitai, o te Atua anaˈe râ.” (Mareko 10:17, 18) No te aha Iesu i aˈo ai i teie taata? E ere anei Iesu i te hoê Orometua maitai?

⁶ Ma te pii ia Iesu “Orometua maitai,” ua hinaaro teie taata e faahanahana ia Iesu. Ma te aau faahaihai, ua faahoˈi Iesu i te hanahana i to ˈna Metua i te raˈi, o ˈna anaˈe hoi te mea maitai roa ˈˈe. (Maseli 11:2) Ua horoa atoa râ Iesu i te hoê haapiiraa faufaa mau: Tei ia Iehova anaˈe te tiaraa no te faaoti eaha te mea maitai e eaha te mea ino. I to Adamu raua Eva amuraa i to te tumu raau e ite ai i te maitai e te ino, ua hinaaro raua na raua iho e faaoti eaha te mea maitai e eaha te mea ino. Area o Iesu, ua farii ïa ma te haehaa tei to ˈna Metua anaˈe tera tiaraa.

⁷ Hau atu â, ua ite Iesu o Iehova te tumu o te mau mea maitatai atoa. Na ˈna i horoa mai i “te mau ô maitatai atoa e te mau mea tia roa.” (Iakobo 1:17) E hiˈo anaˈe e nafea te huru horoa noa o Iehova e haapapu ai i to ˈna maitai rahi.

8. Mea nafea to Iehova faaiteraa i to ˈna maitai i nia i te huitaata atoa?

⁸ Ua fanaˈo te taata atoa i te maitai o Iehova. Te na ô ra te Salamo 145:9: “Mea maitai o Iehova i nia i te mau mea ora atoa.” Mea nafea? Te na ô ra te Bibilia: “Ua faaite mai râ o ˈna i to ˈna hamani maitai, ma te horoa mai  i te ûa mai te raˈi mai e te tau auhune, a fanaˈo rahi atu ai outou i te maa, a oaoa ˈtu ai to outou aau.” (Ohipa 14:17) Aita anei oe i oaoa aˈenei i te amuraa i te hoê maa au mau? Ua fanaˈo oe i te reira no te mea ua hamani Iehova i te fenua ma te faahiahia mau a horoa atoa mai ai i “te ûa” e “te tau auhune” o te faatupu i te maa rahi. Aita Iehova i na reira noa no te feia e here ra ia ˈna, no te taata atoa râ. Ua parau Iesu no Iehova: “E faahiti hoi oia i to ˈna mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa.”​—Mataio 5:45.

9. E nafea te maitai o Iehova e itehia ˈi na roto i te apara?

⁹ Mea iti o te tâuˈa ra te fanaˈo ra ratou i teie mau maitai maoti te mahana, te ûa e te tau auhune. A feruri na i te apara, e maa hotu teie matauhia i te fenua e rave rahi.  Mea nehenehe, mea monamona e mea maitai te reira no to tatou tino. Ua ite anei oe fatata 7 500 hohoˈa apara, te vai ra te mea uteute, te mea rearea, te mea matie, te mea nainai aˈe i te taporo tahiti e te mea rahi aˈe i te anani rarahi? Mea nainai roa te huero apara, ia tupu mai râ te reira, e tumu raau faahiahia ïa e te nehenehe mau. (Sire a Solomona 2:3) Mea nehenehe roa ia tiarehia te tumu apara. No te hoê maororaa 75 matahiti, e nehenehe te hoê tumu apara e horoa mai 400 kilo apara i te matahiti hoê!

10, 11. Mea nafea te hamaniraa o to tatou tino e haapapu ai i te maitai rahi o te Atua?

¹⁰ No to ˈna maitai rahi, ua hamani Iehova ia tatou ma  te “faahiahia” ia haapii e ia oaoa tatou i ta ˈna mau ohipa. (Salamo 139:14) A feruri faahou na i te mau tupuraa faahitihia i te omuaraa o teie pene. Ahani o oe aˈe tera, eaha te mau mea o te faaoaoa ia oe? Te mata ataata anei o te aiû? Te ûa anei e topa ra i nia i te faaapu? Te mau û huru rau anei e itehia i te toparaa mahana? Ua hamanihia te mata taata ia nehenehe te reira e ite e rave rahi roa û taa maitai! Hau atu â, ua hamanihia to tatou tariˈa ia nehenehe te reira e faataa ê i te mahanahana o te reo o te hoê taata herehia, te muhumuhu o te mataˈi e na roto atura i te uru raau e te ata o te hoê aiû iti. Eaha te tumu e oaoa ˈi tatou i ta tatou i ite e i faaroo? Te na ô ra te Bibilia: “Te tariˈa e faaroo ra e te mata e ite ra, na Iehova i hamani i tera e piti.” (Maseli 20:12) E piti noa râ tera o te mau tumu ite.

¹¹ O te ihu te tahi atu haapapuraa o te maitai o Iehova. E nehenehe te ihu taata e faataa ê e miria e e miria hauˈa huru rau. A feruri na i te noˈanoˈa o te maa ta oe e au roa ˈˈe aore ra o te mau tiare. Ua hamani atoa Iehova te tahi atu tumu ite ia nehenehe tatou e taa i te taa-ê-raa o te puihau o te mataˈi, te tauahi mahanahana a tei herehia aore ra te mǎrû o te tahi maa hotu. Mea faahiahia atoa te hamaniraa o to tatou vaha e arero, maoti hoi te reira e taa ˈi ia tatou te monamona o te tahi maa hotu. Oia, e rave rahi tumu e hinaaro ai tatou e parau ia Iehova: “Auê te rahi o to maitai! Ua faaherehere oe i te reira no te feia e mǎtaˈu ra ia oe.” (Salamo 31:19) Eaha nei râ te mau maitai ta Iehova i faaherehere no te feia e mǎtaˈu ra ia ˈna?

12. Eaha te mea maitai aˈe i te maa pae tino e eaha te tumu?

¹² Ua parau Iesu: “Ua papaihia: ‘Eita te taata e ora i te maa anaˈe, i te mau parau atoa râ no roto mai i te vaha o  Iehova.’” (Mataio 4:4) Oia mau, e maitai rahi aˈe ta te mau parau a Iehova i roto i te Bibilia e nehenehe e hopoi mai, maoti hoi te reira e fanaˈo ai tatou i te ora mure ore. I roto i te pene 8 o teie buka, ua haapii tatou, i te anotau hopea, ua faaohipa Iehova i to ˈna puai ia fanaˈo ta ˈna mau tavini i te hoê paradaiso pae varua. Te hoê tuhaa faahiahia o te reira, o te fanaˈoraa ïa i te maa pae varua e rave rahi.

13, 14. (1) Eaha ta te peropheta Ezekiela i ite orama e eaha te auraa no tatou i teie tau? (2) Eaha te mau faanahoraa ta Iehova i rave ia fanaˈo ta ˈna mau tavini i te maitai e a muri noa ˈtu?

¹³ I roto i te hoê o te mau parau tohu o tei faaite atea e nafea Iehova ia hamani i te mau mea apî, ua ite orama te peropheta Ezekiela i te hoê hiero apî e te hanahana mau. Mai roto mai i taua hiero ra e tahe mai ai te pape o te aano noa ˈtu e o te hohonu noa ˈtu e riro roa mai nei ei tahora. E maitai rahi anaˈe tei itehia i te mau vahi atoa e tahe ai taua pape ra. I na pae e piti o te hiti pape, e rave rahi tumu raau tei tupu e tei horoa mai i te hotu ei maa e ei rapaauraa. E ua nehenehe atoa te miti Pohe avaava e oraora faahou mai e ua aere â te iˈa. (Ezekiela 47:1-12) Eaha te auraa o teie orama?

¹⁴ Te faaite ra te orama e haamau faahou Iehova i te haamoriraa viivii ore ia nehenehe te taata e haamori ia ˈna ia au i ta ˈna mau titauraa. Mai te pape o te haere noa ˈtu i te aanoraa e te hohonuraa, e fanaˈo to Iehova nunaa i te mau maitai o te haere noa ˈtu â i te rahi e a muri noa ˈtu. Ua haamata te reira i te tupu mai te matahiti 1919 a haamori faahou ai te mau Kerisetiano mau ia Iehova mai ta ˈna e titau ra. Ua faaohipa Iehova i te Bibilia, te mau papai, te mau putuputuraa e tairururaa no te haapii i te taata e rave rahi i te pue parau mau faufaa roa. Te tahi hiˈoraa, no nia ïa i te faufaaraa o te tusia  taraehara o te Mesia no te riro ei taata fariihia i te aro o Iehova e no te fanaˈo i te tiaturiraa o te ora mure ore ta Iehova e horoa i te feia atoa e here e e mǎtaˈu ia ˈna. a I te roaraa o teie anotau hopea, te mauiui ra to teie ao no te mea aita ratou e farii ra i te mau parau no ǒ mai ia Iehova, area te nunaa o Iehova, te oaoa ra ïa i te fanaˈo i te mau mea atoa no te vai piri noa ia ˈna.​—Isaia 65:13.

15. E nafea Iehova ia faaite i te maitai rahi i ta ˈna mau tavini haapao maitai i te roaraa o na 1 000 matahiti?

¹⁵ Eita te pape faahitihia i roto i te orama a Ezekiela e faaea i te tahe ia mou teie ao. E tahe puai roa ˈtu râ te reira i te roaraa o na 1 000 matahiti e faatere ai te Mesia. I reira hoi Iehova e faaohipa hope roa ˈi i te tusia o Iesu no te tauturu mǎrû noa i ta ˈna mau tavini haapao maitai ia riro ei feia tia roa. E tau tera e oaoa roa ˈi tatou i te maitai rahi o Iehova!

16. No te maitai o Iehova, eaha te tahi atu mau huru maitatai ta ˈna e faaite?

¹⁶ Eita te maitai o Iehova e ite-noa-hia na roto i te mau mea ta ˈna e horoa. Ua parau te Atua ia Mose: “E faahaere au i to ˈu maitai atoa na mua i to aro, e e faaite au i mua ia oe i te iˈoa ra o Iehova.” I muri aˈe, te na ô ra te faatiaraa: “Te haere noa ra Iehova na mua ia ˈna a na ô ai: ‘Iehova, Iehova, e Atua aroha hamani maitai e te aumihi, o te ore e riri oioi, o tei rahi i te here taiva ore e te parau mau.’” (Exodo 33:19; 34:6) E ite-atoa-hia ïa te maitai o Iehova na roto i te tahi atu mau huru maitatai ta ˈna e faaite. E hiˈo anaˈe mai e piti.

17. Eaha to Iehova huru i nia i te taata e no te aha o ˈna e na reira ˈi?

 ¹⁷ “Te aumihi.” E haapii rahi mai te reira i te huru o Iehova. Pinepine te feia e mana to ratou i te iria aore ra i te haavî ia vetahi ê. Area o Iehova, mea mǎrû ïa e te hamani maitai. Ua itehia te reira a paraparau ai oia ia Aberama. Ua na ô atu Iehova: “A hiˈo haere na, e mai te vahi to reira oe, a hiˈo na i te pae apatoerau e apatoa, i te pae hitia o te râ e tooa o te râ.” (Genese 13:14) Ia au i te tahi mau aivanaa, te haapapu ra te parau Hebera i faaohipahia i roto i teie irava, e ere teie i te faaueraa, e taparuraa râ. Hoê â faanahoraa i roto i te tahi atu mau irava mai te Genese 31:12 e te Ezekiela 8:5. A feruri na, noa ˈtu o Iehova te Arii hau ê, e paraparau o ˈna i te taata ma te faatura e te hamani maitai! E ere anei i te mea mahanahana ia ite i te maitai rahi o to tatou Atua ra o Iehova?

18. Eaha te auraa e Atua Iehova “tei rahi i . . . te parau mau” e no te aha mea mahanahana ia ite i te reira?

¹⁸ “Tei rahi i . . . te parau mau.” I teie tau, ua riro te huru haavarevare ei mea matauhia i roto i teie ao. Tera râ, te haamanaˈo mai ra te Bibilia: “E ere te Atua i te taata e haavare ai oia.” (Numera 23:19) Oia mau, te na ô ra te Tito 1:2 e Atua Iehova o “te ore e nehenehe e haavare.” Eaha te tumu? No te mea e Atua maitai rahi o ˈna. No reira, e nehenehe mau e tiaturi i te mau parau fafau a Iehova, e faatupu noa iho â o ˈna i ta ˈna i parau. O Iehova “te Atua parau mau.” (Salamo 31:5) Eita ïa o ˈna e haavare. Hau atu â, e faaite atoa o ˈna i te parau mau e rave rahi. Eita o ˈna e tapea noa i te pue parau mau na ˈna, e haamaramarama râ o ˈna i ta ˈna mau tavini haapao maitai ia fanaˈo atoa ratou i te paari rahi. b E haapii atoa o ˈna ia  ratou e nafea ia ora ia au i ta ˈna mau haapiiraa e ia “pee noa . . . i te parau mau.” (Ioane 3, 3) I teie nei, ua papu ia tatou i te maitai rahi o Iehova, eaha ïa to tatou huru e tia ˈi?

19, 20. (1) Mea nafea to Satani faatiaturiraa ia Eva e ere Iehova i te Atua maitai rahi e eaha te faahopearaa? (2) A feruri ai i to Iehova maitai rahi, eaha to oe huru e no te aha oe e pahono ai mai tera?

¹⁹ I to Satani faahemaraa ia Eva i roto i te ô i Edene, ua haamata na mua oia i te faatiaturi ia ˈna e ere Iehova i te Atua maitai. Ua parau Iehova ia Adamu: “E nehenehe oe e amu i to te mau tumu raau atoa o te ô e paia noa ˈtu oe.” I roto i te mau rahiraa tumu raau o te ô, hoê anaˈe ta Iehova i opani. Teie râ, a tapao na eaha ta Satani i ani na mua ia Eva: “Ua parau iho â anei te Atua eiaha roa orua e amu i te maa hotu o te mau tumu raau atoa o te ô?” (Genese 2:9, 16; 3:1) Ua taviri Satani i te mau parau a Iehova ia manaˈo Eva te faaere ra Iehova ia ˈna i te tahi maitai. Ma te peapea, ua manuïa Satani. Noa ˈtu na Iehova i horoa ia Eva te mau mea atoa ta ˈna e fanaˈo ra, ua tiaturi te vahine matamua, e na reira atoa e rave rahi i muri mai ia ˈna, e ere Iehova i te Atua maitai rahi!

²⁰ Ua ite tatou i te ati e te peapea rahi ta Eva i hopoi mai i nia i te huitaata no to ˈna tiaturiraa e ere Iehova i te Atua maitai rahi. No reira, e pee anaˈe i te faaitoitoraa i roto i te Ieremia 31:12 ia “oaoa. . . no te maitai o Iehova.” E tamau anaˈe i te haamanaˈo e Atua maitai rahi Iehova o te rave noa i te mau mea atoa no te maitai o te feia e here ia ˈna.

21, 22. (1) No to Iehova maitai rahi, mai te aha to tatou huru e tia ˈi? (2) Eaha te huru maitai ta tatou e hiˈopoa i roto i te pene i muri nei e no te aha mea taa ê te reira i te maitai?

²¹ Hau atu â, e oaoa roa tatou i te paraparau ia vetahi ê  no nia i te maitai o te Atua. Te na ô ra te Salamo 145:7 no te nunaa o Iehova: “E manii mai ta ratou mau parau arueraa ia haamanaˈo ratou i to maitai rahi.” I te mau mahana atoa, e fanaˈo tatou i te mau maitai no ǒ mai ia Iehova. No te aha e ore ai e haamatau i te haamauruuru ia Iehova no ta ˈna e horoa mai ra i te mau mahana atoa? Ma te feruri, ma te haamauruuru e ma te faaite ia vetahi ê i to Iehova maitai, e tauturu te reira ia tatou ia pee i to ˈna maitai rahi. A na reira noa ˈi, e piri roa ˈtu â tatou ia Iehova. I roto i to ˈna matahiti rahi, ua papai te aposetolo Ioane: “To ˈu taeae here, eiaha e pee i te ino, e pee râ i te maitai. Te taata e rave i te maitai, no te Atua ïa o ˈna.”​—Ioane 3, 11.

²² E tuatiraa atoa te vai ra i roto i te maitai o Iehova e te tahi atu mau huru maitatai to ˈna. Ei hiˈoraa, te parauhia ra e Atua Iehova o “tei rahi i te here taiva ore.” (Exodo 34:6) Mea taa ê roa teie huru maitai, e faaite noa hoi Iehova i te reira i nia i ta ˈna mau tavini haapao maitai. I roto i te pene i muri nei, e haapii tatou e nafea Iehova ia faaite i te here taiva ore.