NDIMA YA 27
‘Vhuḓi Hawe Ndi Vhuhulu’
1, 2. Vhuḓi ha Yehova ndi vhuhulwane lungafhani, nahone Bivhili i ombedzela yeneyi pfaneleo u swika kha vhuimo vhufhio?
MUSI ḓuvha ḽi tshi vho tota tombo, khonani dzi si gathi dzi khou ḽa zwiḽiwa dzo ḓi dzulela nnḓa dzo ora masana a ḓuvha, nahone dzi tshi khou sea na u amba, dzo sedza lunako lwa mupo. Nga ngei kule, mulimi u khou ṅwethuwa o sedza masimu awe nahone u takadzwa nga u vhona uri hu vho thoma u nzwinzwimala nahone marotha a mvula a vho thoma u ṋukadza zwimela zwawe. Huṅwe fhethu, munna na musadzi vha takadzwa nga u vhona ṅwana wavho a tshi vho thoma u dedengela.
2 Hu sa londwi uri vha a zwi ḓivha kana a vha zwi ḓivhi, vhenevho vhathu vha khou vhuyelwa nga tshithu tshithihi—vhuḓi ha Yehova Mudzimu. Zwo ḓowelea u pfa vhathu vha vhurereli vha tshi ri “Mudzimu u na vhuḓi.” Fhedzi Bivhili i zwi ombedzela nga nḓila khulwane. I ri: ‘Vhuḓi hawe ndi vhuhulu.’ (Sakaria 9:17) Fhedzi zwi vhonala uri a si vhanzhi vhane vha ḓivha uri eneo maipfi a amba mini zwa vhukuma. Vhuḓi ha Yehova Mudzimu vhu katela mini zwa vhukuma, nahone yeneyi pfaneleo ya Mudzimu i kwama hani muṅwe na muṅwe washu?
Pfaneleo I Swayeaho Ya Lufuno Lwa Mudzimu
3, 4. Vhuḓi ndi mini, nahone ndi ngani vhuḓi ha Yehova vhu tshi nga ṱaluswa sa nḓila ine Mudzimu a sumbedza ngayo lufuno lwawe?
3 Kha nyambo nnzhi dza musalauno, “vhuḓi” ndi ipfi ḽine ḽa angaredza zwithu zwinzhi. Naho zwo ralo, nga he ḽa shumiswa ngaho Bivhilini, ipfi ḽine ḽa ri vhuḓi a ḽi sokou angaredza zwithu. Ḽeneḽi ipfi zwihuluhulu ḽi amba matshilele a vhuimo ha nṱha. Nga zwenezwo, ri nga amba uri Yehova o ḓala vhuḓi. Pfaneleo dzawe dzoṱhe—u katela maanḓa awe, khaṱulokwayo yawe, na vhuṱali hawe—ndi dzavhuḓi nga nḓila yo fhelelaho. Naho zwo ralo, vhuḓi vhu nga dovha ha ṱaluswa sa nḓila ya Yehova ya u sumbedza lufuno. Ndi ngani?
4 Vhuḓi ndi pfaneleo ine ya tshimbidzana na u itela vhaṅwe zwithu zwavhuḓi. Muapostola Paulo o sumbedza uri vhathu vha funa yeneyi pfaneleo u fhira u luga. (Vha-Roma 5:7) Muthu o lugaho u a fulufhedzea musi zwi tshi ḓa kha u tevhedza ṱhoḓea dza mulalo, fhedzi muthu a re na vhuḓi u ita zwi fhiraho zwenezwo. U thusa vhaṅwe a songo vhuya a humbelwa. Samusi ri tshi ḓo zwi vhona, Yehova u na vhuḓi vhukuma nga wonoyo muhumbulo. Zwi khagala uri vhuḓi ho raloho vhu bva kha lufuno lwa Yehova lu sa vhambedzwi na tshithu.
5-7. Ndi ngani Yesu o hana u vhidzwa “Mufunzi wavhuḓi,” nahone ndi ngoho ifhio yo khwaṱhaho ye a i ombedzela nga zwenezwo?
5 Vhuḓi ha Yehova ho khethea. Musi Yesu a tsini na u fa, ho ḓa muṅwe munna a mu vhudzisa mbudziso, a mu vhidza nga maipfi ane a ri “Mufunzi wavhuḓi.” Yesu a fhindula a ri: “Ndi mini U tshi ṋyamba, wa ri: wavhuḓi? A huna wavhuḓi arali e si Mudzimu fhedzi.” (Marko 10:17, 18) Yeneyi phindulo i nga ni mangadza. Ndi ngani Yesu o khakhulula onoyo munna? Naa Yesu o vha e si “Mufunzi wavhuḓi”?
6 Zwi vhonala uri onoyo munna o vha a tshi khou shumisa maipfi “Mufunzi wavhuḓi” sa dzina ḽa u hoya. Nga u ḓiṱukufhadza, Yesu a livhisa yeneyo khuliso kha Khotsi awe wa ṱaḓulu, ane a vha wavhuḓi nga nḓila yo fhelelaho. (Mirero 11:2) Fhedzi nga u ita zwenezwo Yesu o dovha a ombedzela ngoho yo khwaṱhaho. Ndi Yehova e eṱhe ane a vhea tshilinganyo tsha zwo lugaho. Ndi ene fhedzi ane a vha na ndugelo i sa vhambedzwi na tshithu ya u amba uri zwo lugaho na zwivhi ndi zwifhio. Musi Adamu na Eva vha tshi ita vhushandukwa nga u ḽa mutshelo wa muri wa vhuḓi na vhuvhi, vho vha vha tshi khou ṱoḓa u ḓiṋea yeneyo ndugelo. Yesu ho ngo fana navho, nga u ḓiṱukufhadza o litsha mafhungo a u vhea zwilinganyo zwanḓani zwa Khotsi awe.
7 Zwiṅwe hafhu, Yesu o vha a tshi zwi ḓivha uri zwoṱhe zwo lugaho zwi bva kha Yehova. Ndi Muṋei wa “zwifhiwa zwoṱhe zwavhuḓi na zwoṱhe.” (Yakobo 1:17) Kha ri ṱolisise nḓila ine vhuḓi ha Yehova ha vhonala ngayo kha mafunda awe.
Musumbedzo Wa Vhuḓi Vhunzhi Ha Yehova
8. Yehova o sumbedza hani vhuḓi kha vhathu vhoṱhe?
8 Vhathu vhoṱhe vhe vha vhuya vha tshila vho no vhuyelwa nga vhuḓi ha Yehova. Psalme ya 145:9 i ri: “Yehova vhoṱhe u vha ita nga vhuthu.” (Maḽeḓeretsendama ndi ashu.) Ndi dzifhio dziṅwe tsumbo dza vhuḓi vhune a vhu sumbedza vhathu vhoṱhe? Bivhili i ri: “Naho ene á so ngo litsha u ḓi-ṱanziela nga u ri tonda nga zwithu zwinzhi, a tshi ri ṋea mvula i bvaho ṱaḓulu na zwifhinga zwa mufuro. A fusha dzimbilu dzashu nga zwiḽiwa na nga dakalo.” (Mishumo 14:17) Ni ḓipfa hani musi ni khou ḽa zwiḽiwa zwi ḓifhaho vhukuma? Arali Yehova nga vhuḓi hawe a songo ita uri ḽino ḽifhasi ḽi vhe na maḓi o kunaho na “zwifhinga zwa mufuro” uri hu vhe na zwiḽiwa zwinzhi, ho vha hu sa ḓo vha na zwiḽiwa. Yehova ho ngo sumbedza honoho vhuḓi kha vhane vha mu funa fhedzi, fhedzi kha muṅwe na muṅwe. Yesu o ri: “U ṱavhisela ḓuvha ḽawe vhavhi na vhavhuya; u nisela mbvula vho lugaho na vha songo lugaho.”—Mateo 5:45.
Yehova u ni “ṋea mvula i bvaho ṱaḓulu na zwifhinga zwa mufuro”
9. Apula ḽi sumbedza vhuḓi ha Yehova nga nḓila-ḓe?
9 Vhathu vhanzhi a vha dzhieli nṱha zwithu zwinzhi zwine vha zwi wana nga ṅwambo wa uri ḓuvha, mvula, na zwifhinga zwa mufuro, zwi dzula zwi hone. Sa tsumbo, edzani u humbula nga apula. Ḽi wanala zwipiḓani zwoṱhe zwa ḽifhasi hune ha vha na mutsho wo linganelaho. Fhedzi ḽo naka, ḽi a ḓifha, nahone ḽi na maḓi a homolosaho na pfushi dza ndeme. Naa ni a zwi ḓivha uri shangoni ḽoṱhe hu na mifuda i ṱoḓaho u vha 7 500 ya maapula, matswuku, a musuku, a ṱaḓa, madala na uri maṱuku ndi mahulwanenyana kha huyu nahone maṅwe a nga lingana na bambahosi? Thambo yaḽo ndi ṱhukhu, i vhonala i si tshithu. Fhedzi i tshi mela i vha muri wavhuḓi vhukuma. (Ngosha ya Dzingosha 2:3, vhambedzani NW.) Muapula u vha na maluvha avhuḓi musi u tshi kulukusha nga tshimedzi; u aṋwa mitshelo tshifhefho tshiṅwe na tshiṅwe. Ṅwaha muṅwe na muṅwe—miṅwaha i ṱoḓaho u vha 75—muapula u aṋwa maapula ane a nga ḓadza mabogisi a 20, nahone bogisi ḽiṅwe na ḽiṅwe ḽi lemela khilogiramu dza 19!
Heyi thambo ṱhukhu i mela ya vha muri muhulwane une wa nga kanzwa na u takadza vhathu mahumi a miṅwaha
10, 11. Zwipfi zwi sumbedza hani vhuḓi ha Mudzimu?
10 Nga ṅwambo wa vhuḓi hawe vhu sa fheli, Yehova o ri ṋea muvhili wo ‘vhumbwaho lwa vhuṱolo,’ u re na zwipfi zwo itelwaho u ri thusa uri ri pfesese mishumo yawe na u i takalela. (Psalme ya 139:14) Dovhani ni humbule nga vhathu vhe ra vha ṱalusa mathomoni a yeneyi ndima. Ndi mini zwine vha zwi vhona zwine zwa vha takadza nga tshenetsho tshifhinga? Zwirama zwi penyaho zwa ṅwana o takalaho. Mvula ine ya khou na masimuni. Mivhala mitswuku, ya musuku na ya lutombo ya ḓuvha ḽine ḽa khou kovhela. Iṱo ḽa muthu ḽo itwa nga nḓila ine ḽa kona u vhona mivhala i fhiraho 300 000! Nahone vhukoni hashu ha u pfa hu ita uri ri kone u pfa ipfi ḽavhuḓi ḽa ṋambi, muya une wa khou vhudzula maṱari, na tshiseo tsha ṅwana. Ndi ngani ri tshi kona u takalela zwithu zwine ra zwi pfa na zwine ra zwi vhona? Bivhili i ri: “Nḓevhe ya u pfa na iṱo ḽa u vhona, vhuvhili hazwo zwi itwa nga Yehova.” (Mirero 20:12) Fhedzi zwenezwo ndi zwipfi zwivhili fhedzi.
11 Tshipfi tshashu tsha u nukhedzela ndi muṅwe musumbedzo wa vhuḓi ha Yehova. Ningo ya muthu i kona u fhambanya minukho i ṱoḓaho u vha 10 000. Elekanyani nga i si gathi: zwiḽiwa zwine na zwi funesa, maluvha, maṱari o waho, mutsi wa mulilo une na khou ora. Nahone tshipfi tshaṋu tsha u kwama tshi ita uri ni kone u pfa lumuya lune lwa ni vhudzula khofheni, u kuvhatedzwa nga mufunwa waṋu, u suvhelela ha mutshelo tshanḓani tshaṋu. Musi ni tshi ṅenza mutshelo, tshipfi tshaṋu tsha muthetshelo tshi ita mushumo watsho. Musi ni tshi khou ḽa mutshelo, lulimi lwaṋu lu kona u fhambanya miḓifho yo fhamba-fhambanaho ya mutshelo une na khou u ḽa. Ee, ri na zwiitisi zwi pfalaho zwa u renda Yehova nga maipfi ane a ri: “Vhuthu hau ndi vhuhulu-hulu he wa vhetshela avho vhané vha U ofha, vhuné avho vha khudaho nga Iwe wa vha tonda ngaho’, vhana vha vhathu vha tshi zwi vhona.” (Psalme ya 31:19) Naho zwo ralo, Yehova o “vhetshela” hani vhuḓi vhane vha mu ofha?
Vhuḓi Vhu Re Na Mbuyelo Dzi Sa Fheli
12. Ndi dzifhio ndugiselelo dza ndeme vhukuma dza Yehova, nahone ndi ngani dzi dza ndeme?
12 Yesu o ri: “Ho ṅwaliwa u pfi: Muthu ha tshili nga vhuswa fhedzi; u tshila nga maipfi oṱhe a bvaho mulomoni wa Mudzimu.” (Mateo 4:4) Vhukuma, ndugiselelo dza Yehova dza muya dzi nga ri vhuyedza vhukuma u fhira dza ṋama, ngauri dzi isa vhutshiloni vhu sa fheli. Kha Ndima ya 8 ya ino bugu, ro guda uri Yehova o shumisa maanḓa awe a u vusulusa kha ano maḓuvha a vhufhelo, uri a ite paradiso ya muya. Tshithu tshihulwane tsha yeneyo paradiso ndi vhunzhi ha zwiḽiwa zwa muya.
13, 14. (a) Muporofita Hesekiele o vhona mini kha bono, zwenezwo zwi amba mini kha riṋe ṋamusi? (b) Ndi dzifhio ndugiselelo dzi ṋeaho vhutshilo dze Yehova a dzi itela vhashumeli vhawe vha fulufhedzeaho?
13 Kha vhuṅwe vhuporofita vhuhulwane ha Bivhili ha u vusulusa, muporofita Hesekiele o sumbedzwa bono ḽa thembele yo vusuluswaho nahone ya ṋewa vhugala. Ho vha hu na mulambwana u elelaho u tshi bva kha yeneyo thembele, wa ṱanḓavhuwa nahone wa tsa u swika u tshi vha “mulambo.” Wo vha u tshi vhuyedza vhathu vhoṱhe huṅwe na huṅwe hune wa eletshela hone. Khunzikhunzini dzawo ho vha ho mela miri i re na mitshelo i ḽiwaho na ine ya ilafha. Nahone wonoyu mulambo u ita uri hu vhe na vhutshilo Lwanzheni lwo Faho lu re na muṋo! (Hesekiele 47:1-12) Fhedzi, zwenezwo zwoṱhe zwo vha zwi tshi amba mini?
14 Ḽeneḽo bono ḽo vha ḽi tshi amba uri Yehova u ḓo vusulusa ndugiselelo yawe ya vhurabeli ho kunaho, samusi zwo fanyiselwa nga thembele ye Hesekiele a i vhona. U fana na wonoyo mulambo wa kha bono, ndugiselelo dza Mudzimu dza vhutshilo dzi ḓo eletshela kha vhathu vhawe nga vhunzhi. U bva tshee ha vusuluswa vhurabeli ho kunaho nga 1919, Yehova o fhaṱutshedza vhathu vhawe nga ndugiselelo dzi ṋeaho vhutshilo. Nga nḓila-ḓe? Ee, Dzibivhili, khandiso dzo thewaho Bivhilini, miṱangano, na mabuthano zwoṱhe zwi shuma u ṋea vhathu vha dzimilioni mafhungo-ngoho a ndeme. Yehova o shumisa zwenezwi zwithu u itela u funza vhathu vhawe nga ha ndugiselelo dza ndeme vhukuma dzi ṋeaho vhutshilo—tshiṱhavhelo tshi rengululaho tsha Kristo, tshine tsha ita uri ri vhe na vhuimo ho kunaho phanḓa ha Yehova na fulufhelo ḽa vhutshilo vhu sa fheli kha vhoṱhe vhane ngangoho vha funa Mudzimu na u mu ofha. * Nga zwenezwo, kha enea maḓuvha oṱhe a vhufhelo, naho shango ḽi tshi khou sika nga nḓala ya muya, vhathu vha Yehova vha khou ḓiphina nga tshimima tsha zwiḽiwa zwa muya.—Yesaya 65:13.
15. Vhuḓi ha Yehova vhu ḓo eletshela vhathu vha fulufhedzeaho nga muhumbulo ufhio tshifhingani tsha Vhuvhusi ha Kristo ha Miṅwaha ya Tshigidi?
15 Fhedzi mulambo wa bononi ḽa Hesekiele a u xi wa si tsha elela musi ano maitele a zwithu a tshi fhela. U ḓo elela u fhira naho hu lini tshifhingani tsha Vhuvhusi ha Kristo ha Miṅwaha ya Tshigidi. Nga zwenezwo, nga Muvhuso wa Vhumessia, Yehova u ḓo shumisa nga vhuḓalo tshiṱhavhelo tsha Yesu, a ita uri vhathu vha fulufhedzeaho vha fhelele nga zwiṱuku nga zwiṱuku. Ri ḓo takala lungafhani musi ri tshi vhona vhuḓi ha Yehova!
Dziṅwe Pfaneleo Dzi Tshimbidzanaho Na Vhuḓi Ha Yehova
16. Bivhili i sumbedza hani uri vhuḓi ha Yehova vhu katela na dziṅwe pfaneleo, nahone dziṅwe dzadzo ndi dzifhio?
16 Vhuḓi ha Yehova a vhu kateli mafunda fhedzi. Mudzimu o vhudza Mushe a ri: “Vhuḓi hanga hoṱhe ndi ḓo vhu fhirisa phanḓa hau, nda huwelelisa dzina ḽa Yehova phanḓa hau.” Eneo mafhungo a tshi bvela phanḓa a ri: “Yehova a fhira henefho phanḓa hawe, a vhidzelela a ri: Yehova, Yehova! Mudzimu wa khathutshelo na wa vhuthu, wa u sa fhela mbilu, wa vhuhwavho vhuhulu na u fulufhedzea.” (Ekisodo 33:19; 34:6) Nga zwenezwo, vhuḓi ha Yehova vhu na pfaneleo nnzhi dzavhuḓi. Kha ri ṱhogomele mbili fhedzi dzadzo.
17. Vhuthu ndi mini, nahone Yehova o vhu sumbedza hani kha vhathu zwavho vha songo fhelelaho?
17 “Vhuthu.” Heyi pfaneleo i ri vhudza zwinzhi nga ha nḓila ine Yehova a shumisana ngayo na zwivhumbiwa zwawe. Nṱhani ha uri a halifhe, a ite zwithu nga nḓila i si ya lufuno, kana a vhe na tshiṱuhu u fana na vhathu vha re vhuimoni ha nṱha, Yehova u na vhulenda na vhuhwavho. Sa tsumbo, Yehova o vhudza Abramu a ri: “Zwino iwe [“nga khumbelo,” NW] lavhelesa wó ima henefho U ise maṱo thungo ya Ḽivhuya na thungo ya Vhurwa na thungo ya Vhubvaḓuvha na thungo ya Vhukovhela.” (Genesi 13:14) Ṱhalutshedzelo nnzhi a dzi na ipfi “nga khumbelo.” Fhedzi vhagudi vhanzhi vha Bivhili vha amba uri Luheberu lwa u thoma lu na maipfi ane a shandula wonoyo mubulo wa si tsha vha ndaela wa vho vha khumbelo ya vhulenda. Hu na dziṅwe tsumbo dzi fanaho na dzenedzo. (Genesi 31:12; Hesekiele 8:5) Edzani u humbula Muvhusahoṱhe a tshi ri “nga khumbelo” kha vhathu zwavho! Shangoni ḽo ḓalaho vhathu vha re na vhuhali na tshiṱuhu, naa a zwi homolosi u elekanya nga ha vhuthu ha Yehova, Mudzimu washu?
18. Yehova u ‘fulufhedzea nga nḓila khulwane’ nga muhumbulo ufhio, nahone ndi ngani eneo maipfi a tshi khwaṱhisa?
18 ‘U fulufhedzea huhulwane.’ U sa fulufhedzea ho anda shangoni ṋamusi. Fhedzi Bivhili i a ri fulufhedzisa: “Mudzimu ha ngi muthu, ha nga zwifhi.” (Numeri 23:19) Zwi re zwone ndi uri Tito 1:2 i ri: ‘Mudzimu ha zwifhi.’ (Maḽeḓeretsendama ndi ashu.) U na vhuḓi lune a nga si vhuye a zwifha. Nga zwenezwo, mafulufhedziso a Yehova a a fulufhedzea vhukuma; maipfi awe a ḓo ḓadzea ngangoho. Yehova u vhidzwa “Mudzimu wa ngoho.” (Psalme ya 31:5, NW) Ha iledzi mazwifhi fhedzi, fhedzi u bvukulula ngoho nga vhuḓalo. Ha na tshidzumbe, kana u tshivha mafhungo; fhedzi u shumisa vhuṱali hawe vhuhulwane u itela u vhonetshela vhashumeli vhawe vha fulufhedzeaho. * U ita na u vha funza uri vha tshile u tendelana na mafhungo-ngoho ane a a bvukulula u itela uri vha “tshimbil[e] kha mafhungo-ngoho.” (3 Yohane 3) Nga zwenezwo-ha, vhuḓi ha Yehova vhu fanela u kwama hani muṅwe na muṅwe washu?
‘Takalelani Vhuḓi Ha Yehova’
19, 20. (a) Sathane o zwi itisa hani uri Eva a timatime vhuḓi ha Yehova, nahone ha vha na mvelelo dzifhio? (b) Vhuḓi ha Yehova vhu fanela u ri kwama hani, nahone ndi ngani?
19 Musi Sathane a tshi linga Eva tsimuni ya Edeni, o shumisa vhukwila u mu ita uri a timatime vhuḓi ha Yehova. Yehova o vhudza Adamu a ri: “Miri yoṱhe ya tsimu i ḽe zwau.” Kha miri ya zwigidi ye ya vha yo temba kha yeneyo tsimu, ndi muthihi fhedzi we Yehova a vha vhudza uri vha songo u ḽa. Fhedzi, ṱhogomelani nḓila ye Sathane a vhudzisa ngayo Eva mbudziso ya u thoma: “Nangoho Mudzimu o amba a ri: miri yoṱhe ya tsimuni ni songo i ḽa?” (Genesi 2:9, 16; 3:1) Sathane o shanda maipfi a Yehova u itela uri Eva a humbule uri Yehova u khou mu tshivha tshiṅwe tshithu. Zwi ṱungufhadzaho ndi uri eneo maano o shuma. U fana na vhanna na vhafumakadzi vhanzhi vhe vha ḓa murahu hawe, Eva o thoma u timatima vhuḓi ha Mudzimu, we a mu ṋea zwoṱhe zwe a vha e nazwo.
20 Ri a zwi ḓivha uri honoho u timatima ho ḓisa vhuṱungu na tshengelo khulwane. Nga zwenezwo, kha ri thetshelese maipfi a Yeremia 31:12: ‘Vha ḓo takalela zwivhuya [vhuḓi] zwa Yehova.’ Vhukuma, vhuḓi ha Yehova vhu fanela u ri ita uri ri dzule ro takala. Ri songo vhuya ra timatima zwiṱuṱuwedzi zwa Mudzimu washu, a re na vhuḓi vhuhulwane. Ri fanela u mu fulufhela tshoṱhe, ngauri vhane vha mu funa u vha tamela mashudu.
21, 22. (a) Ndi dzifhio dziṅwe nḓila dzine na nga tama ngadzo u sumbedza uri ni livhuha vhuḓi ha Yehova? (b) Ndi ifhio pfaneleo ine ra ḓo i haseledza kha ndima i tevhelaho, nahone yo fhambana hani na vhuḓi?
21 Zwiṅwe hafhu, ri a takala musi ri tshi wana tshibuli tsha u amba na vhaṅwe nga ha vhuḓi ha Yehova. Malugana na vhathu vha Yehova, Psalme ya 145:7 i ri: “Vha pfadza mafhungo a vhulenda [vhuḓi] hau vhuhulu, vha takalela u lulamisa hau.” Ḓuvha ḽiṅwe na ḽiṅwe, ri a vhuyelwa nga vhuḓi ha Yehova. Ndi ngani ri sa ḓiḓowedzi u livhuha vhuḓi ha Yehova ḓuvha ḽiṅwe na ḽiṅwe, ri bule zwithu nga ho livhaho zwe a ri itela zwone? U humbula nga ha yeneyo pfaneleo, u livhuha Yehova ḓuvha ḽiṅwe na ḽiṅwe, na u i vhudza vhaṅwe zwi ḓo ri thusa uri ri edzise Mudzimu washu a re na vhuḓi. Nahone musi ri tshi ṱoḓa nḓila dza u ita vhuḓi, u fana na Yehova, ri ḓo sendela tsini-tsini nae. Muapostola Yohane wa mukalaha o ṅwala a ri: “U songo edzisa vhuvhi, edzisa zwivhuya. Mu-ita-zwivhuya o davhuka kha Mudzimu, mu-ita-vhuvhi ho ngo vhona Mudzimu.”—3 Yohane 11.
22 Vhuḓi ha Yehova vhu tshimbidzana na dziṅwe pfaneleo. Sa tsumbo, Mudzimu u na “vhuhwavho vhuhulu.” (Ekisodo 34:6) Heyi pfaneleo yo fhambana vhukuma na vhuḓi, ngauri Yehova u i sumbedza nga ho khetheaho kha vhashumeli vhawe vha fulufhedzeaho. Kha ndima i tevhelaho, ri ḓo guda nḓila ine a i sumbedza ngayo.
^ phar. 14 Tshirengululi ndi tsumbo khulwane u fhira dzoṱhe dza vhuḓi ha Yehova. Kha zwivhumbiwa zwoṱhe zwa muya zwa dzimilioni zwe a vha a tshi nga vha o khetha khazwo, Yehova o khetha Murwa mubebwa eṱhe wawe uri a ri fele.
^ phar. 18 Zwo tea uri Bivhili i ṱumanye mafhungo-ngoho na tshedza. Mupsalme o imba a ri: “Ruma tshedza tshau na u fulufhedzea hau.” (Psalme ya 43:3) Yehova u vhonetshela tshedza tshawe tshihulwane kha vhane vha ṱoḓa u funzwa, kana u vhonetshelwa ngae.—2 Vha-Korinta 4:6; 1 Yohane 1:5.
