1, 2. Xoossaa loˈˈotettay ay keena daroo, qassi Geeshsha Maxaafay ha eeshshaa waati loytti qonccissii?

DARO wodiyawu siiqettiya laggeti away wulliyo wode pooˈiya ufayssiya pooˈuwan karen issippe qumaa miiddi beˈiyoobaa ufayssan nashshoosona, miiccoosonanne haasayoosona. Etappe haahuwan, issi goshshanchchay ba gadiyaa xeelliiddi, shullida kattan saˈay gaappottin iray bukkiyoogaa doommido gishshawu ufayttidi noocu gees. Harasan, issi azinaynne machchiyaa eta guutta naˈay tuchchanawu maliyoogaa beˈiyoogan ufayttoosona.

² Eti erin woy erana xayin, he asati ubbaykka Xoossaa Yihoowa loˈˈotettaappe goˈettiiddi deˈoosona. Haymaanootiyaa kaalliya issi issi asay darotoo zaari zaaridi “Xoossay loˈˈo” gees. Geeshsha Maxaafay hegaappe aaruwan mintti qonccissees. Hagaadan gees: “A loˈˈotettay keehi daro!” (Zakkaariyaasa 9:17, NW) SHin he qaalatu suure birshshettaa eriyaageeti ha wodiyan guutta milatoosona. Xoossaa Yihoowa loˈˈotettay aybiira gayttidabee, qassi he eeshshay nuna huuphiyan huuphiyan waati maaddii?

3, 4. Loˈˈotettay aybee, qassi Yihoowa loˈˈotettay Xoossaa siiquwaa loytti qonccissees gaana danddayiyoy aybissee?

³ Ha wodiyan deˈiya daro doonatun, “loˈˈotettaa” giya qaalay xaaxi waaxi qonccissiya qaala. Gidoppe attin, Geeshsha Maxaafan qonccidaagaadan loˈˈotettay xaaxi waaxi qonccissiya qaala gidenna. He qaalay waanna qonccissiyoobay suuretettaanne kandduwaa geeshshatettaa. Loˈˈotettay Yihooway oottiyo ubbaban qonccees gaana danddayoos. A wolqqaa, A suure pirddaanne A aadhdhida eratettaa gujjin, A eeshshati ubbay  keehi loˈˈo. SHin, loˈˈotettay Yihoowa siiquwaa loytti qonccissees gaana danddayettees. Aybissi?

⁴ Loˈˈotettay haratuyyo oottiyooban loytti qoncciya eeshsha. Loˈˈo asa gidiyoogee xillo asa gidiyoogaappe keehi ufayssiyoogaa kiitettida PHawuloosi qonccissiis. (Roome 5:7) Xillo asi higgee yootiyoogaadan ammanettidi oottanaagee sirissenna; shin loˈˈo asi hegaappe aarobaa oottees. Kasetidi harata maaddiyo ogeta I koyees. Nuuni beˈanaagaadan, Yihooway tumukka hegaadan oottiyoogan loˈˈo. He loˈˈotettawu denddoy zawi baynna Yihoowa siiquwaa gidiyoogee qoncce.

5-7. Yesuusi “lo77o tamaarissiyaagoo” geetetti xeegettanawu koyibeennay aybissee, qassi Yesuusi hegan mintti yootido gita tumay aybee?

⁵ Loˈˈotettankka Yihooway ooppenne aadhdhees. Yesuusi hayqqanaappe guuttaa kasetidi, issi bitanee akko shiiqidi A “lo77o tamaarissiyaagoo” giis. Yesuusi hagaadan zaariis: “Aissi tana lo77uwau gai? Xoossaa xalaalaappe attin, hara lo77oi ooninne baawa.” (Marqqoosa 10:17, 18) He zaaroy neeyyo akeekanawu metana danddayees. Yesuusi he bitaniyaa seeridoy aybissee? Yesuusi ‘loˈˈo tamaarissiyaagaa’ gidennee?

⁶ He bitanee sabbanawu “Lo77o tamaarissiyaagoo” giidi bonchcho sunttaa goˈettidoogee qoncce. Loˈˈo gidiyoogan saluwan deˈiya ooppenne aadhdhiya ba aawaassi he bonchchoy bessiyoogaa Yesuusi ashkketettan yootiis. (Leemiso 11:2) Qassi, Yesuusi issi gita tumaa mintti yootiis. Loˈˈobawu likkee Yihoowa xalaala. Aybi loˈˈokko, qassi aybi iitakko kuuyiyo maatay Yihoowa xalaalawu deˈees. Addaameenne Hewaana makkalidi loˈˈuwaanne iitaa erissiya mittaa miyoogan he maataa banttawu ekkanawu koyidosona. Etappe dumma hanotan, Yesuusi ba Aaway maaraa kessanaadan ashkketettan aggi bayiis.

⁷ Hegaa bollikka, loˈˈoba ubbawu pulttoy Yihoowa gidiyoogaa Yesuusi erees. ‘Loˈˈo imo ubbaanne kumetta woyto ubbaa’ immiyay Yihoowa. (Yaaqooba 1:17) Yihoowa loˈˈotettay I kehatettan immiyooban waani qonccidaakko ane pilggoos.

8. Yihooway ubba asawu loˈˈotettaa waati bessidee?

⁸ Ay wodekka deˈida asay ubbay Yihoowa loˈˈotettaappe goˈettiis. Mazamure 145:9y hagaadan gees: “GODAI ubbau keha.” I ubbawu loˈˈo gidiyoogaa qonccissiya amarida leemisoti aybee? Geeshsha Maxaafay hagaadan gees: “Intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77obaa oottiiddi, ubba wodekka bau markka xayibeenna.” (Oosuwaa 14:17) Neeni malˈˈiya qumaa maydda keehi ufaytta eray? Yihooway ba loˈˈotettan saˈan geeshsha haattay ubbatoo deˈanaadaaninne gidi palahiya ‘kattay wodiyan wodiyan’ mokkanaadan oottennaakko, ayba qumikka deˈenna. Yihooway hegaa mala loˈˈotettaa bana siiqiyaageetu xallawu gidennan, ubbawu  bessiis. Yesuusi hagaadan giis: “Iita asaukka lo77o asaukka Xoossai ba awaa awaxxissees; qassi xillotuyyookka nagaranchchatuyyookka ba iraa bukissees.”—Maatiyoosa 5:45.

9. Appilee Yihoowa loˈˈotettaa waati qonccissii?

⁹ Yihooway kehatettan immiyo ubbatoo awaxxiya awaa, bukkiya iraanne wodiyan wodiyan mokkiya kattaa metootennan demmiyo gishshawu, daroti hegaa nashshennan aggana danddayoosona. Leemisuwawu, appiliyaabaa qoppa. Kumetta saˈan barggottiya heeran appilee asay meezettido mittaa ayfe. Appilee beˈanawu loˈˈees, maanawu malˈˈees, qassi wozanan irxxi giya haattaynne bollawu keehi koshshiyaabati an deˈoosona. Kumetta saˈan 7,500 gidiya appiliyaa qommoy deˈiyoogaa eray? Appiliyawu zoˈo, adilˈˈe mala, maata malanne hara daro  meray deˈees, qassi appiliyaa yesoy woyniyaa ayfiyaappe biidi gita burttukkaaniyaa gakkanaashin dumma dumma. Neeni appiliyaa zerettaa qiibaa kushiyan oyqqikko, hegee pattennaba milatees. SHin he zerettay mokkidi keehi loˈˈiya mitta gidees. (Siiquwaa Sabaa 2:3) Ofinttan appiliyaa mittay keehi ciiyyees; qassi badhdheesan ayfees. Appiliyaa mittay 75 layttawu, layttan layttan 20 karttoone ayfiyaa ayfees; issi karttoonee 19 kilo graame.

10, 11. Issibaa eranaadan maaddiya bollaa qommoti Xoossaa loˈˈotettaa waati qonccissiyoonaa?

¹⁰ Yihooway nuuni A oosota akeekanaadaaninne etan ufayttanaadan maaddiya ‘maalaalissiya ogiyan merettida’ bollaa zawi baynna ba loˈˈotettan nuussi immiis. (Mazamure 139:14) Ha shemppuwaa doomettan qonccida hanotaa zaarettada qoppa. Hegaa mala wodetun ufayssiyaabaa ay beˈiyoo? Ufayttidi miicciya guutta naˈaa, gaden iray bukkiyoogaa, qassi away wulliyo wode dumma dumma merata beˈoos. Asaa ayfee 10,000,000 gidiya dumma dumma meraa beˈana danddayees! Nu dosiyo asi haasayiyo wode, carkkoy mittaa giddoora kanttiyo wodenne tuchchiya naˈay miicciyo wode nuuni dumma dumma cenggurssata siyana danddayoos. Hegaa malabaa beˈiyoogaaninne siyiyoogan nuuni ufayttiyoy aybissee? Geeshsha Maxaafay hagaadan gees: “Siyiya haittaanne xeelliya aifiyaanne, eta naa77aakka GODAI medhdhiis.” (Leemiso 20:12) SHin hageeti nuuni akeekanaadan maaddiyabatuppe naaˈˈa xalla.

¹¹ Nuuni singgiyoogee Yihoowa loˈˈotettaa qonccissiya haraba. Asaa siiree issi triliyoone gidiya dumma dumma peenuwaa shaakkana danddayees geetettiidi qofettees. Hegeetuppe amaridaageeta, hegeetikka neeni dosiyo qumaa, ciishshaa, saˈan wodhdhida bonccuwaanne eexxiya tamaa cuwaa qoppa. Qassi ufayssiya carkkoy ne bollan carkkiyoogan, siiqiya uri nena qoommidi minttettiyoogaaninne teerida mittaa ayfiyaa ne kushiyan oyqqiyoogan ne ufayttanaadan oottiyay bochchiyoogan issibaa akeekiyo imotaa. Neeni appe guuttaa baara beˈiyo wode shonggay ay malakko shaakka eraasa. Ne inxxarssan deˈiyaabati  he ayfiyaa teeran deˈiya dumma dumma keemikaaliyaa shaakkiyo wode hegee nena keehi malˈˈees. Ee, nuuni Yihoowa hagaadan galatanaadan oottiya darobay deˈees: “Neessi yayyiyaageetuyyo neeni minjjidonne . . . neeni oottido ne kehatettai aiba daroo!” (Mazamure 31:19) SHin Yihooway baassi yayyiyaageetussi loˈˈobaa waati ‘minjjidee’?

12. Yihooway giigissiyo keehi koshshiyaabati aybee, qassi aybissi?

¹² Yesuusi hagaadan giis: “Xoossaa maxaafai, ‘Asi Xoossai haasayiyo qaala ubban de7anaappe attin, oitta xalaalan de7enna’” yaagees. (Maatiyoosa 4:4) Yihooway giigissiyo ayyaanaabaa qumay nuuni merinaa deˈuwaa demmanaadan oottiyo gishshawu, asatettawu maaddiyaabaappe aadhdhiyaaba. Ha wurssetta gallassatun Yihooway kase sohuwawu zaariyo ba wolqqan ayyaanaabaa gannatiyaa essidoogaa ha maxaafan shemppo 8n beˈida. He gannatiyan waannatiya issibay ayyaanaabaa qumay gidi palahiyoogaa.

13, 14. (a) Hananabaa yootiya Hizqqeeli ajjuutan beˈidobay aybee, ha wodiyan hegee ay qonccissii? (b) Baassi ammanettidi oottiyaageetuyyo Yihooway giigissiyo deˈuwaa demissiya imotati aybee?

¹³ Ooraxissiyo gitabaa yootiya Geeshsha Maxaafaa hiraagatuppe issuwan, hananabaa yootiya Hizqqeeli ooraxxidanne bonchchettida beeta maqidasiyaa ajjuutan beˈiis. Beeta maqidasiyaappe pulttidi goggiya haattay gita ‘shaafa’ gidana gakkanaashin aakkiisinne ciimmatiis. He shaafay goggiyoosa ubban, keehi maaddiis. He shaafaa doonan deˈiya mittay ayfido ayfeti qumanne xale gididosona. Qassi he shaafay deˈuwan deˈiyaabi baynna Maxine Abban deˈiyaabi paxa deˈanaadan oottiis! (Hizqqeela 47:1-12) SHin ha ubbabay ay qonccissii?

¹⁴ Ha ajjuutay beeta maqidasiyaabaa Hizqqeeli beˈidoogan qonccidaagaadan, Yihooway tumu goynuwaa zaarettidi essanaagaa bessiyaaba. Ajjuutan beˈido he shaafaadan, Xoossay ba asawu immiyoobay awudeegaappenne aaruwan gidi palahiyaagee goggees. Tumu goynoy 1919n zaarettidi eqqido  wodiyaappe doommidi, Yihooway deˈuwaa demissiya imotata ba asawu giigissiis. Waatidi? Geeshsha Maxaafay, Geeshsha Maxaafaa qofay deˈiyo xuufeti, gubaaˈe shiiqotinne gita shiiqoti miilooniyan qoodettiya asawu tumay gakkanaadan keehi maaddidosona. Hegeetu baggaara Yihooway aybippenne aadhdhiya imota gidida Kiristtoosa wozuwaa yarshshuwaabaa asaa tamaarissiis. He imotay asay Yihoowa sinttan geeshsha gidanaadaaninne tumuppe Xoossaa siiqiyanne ayyo yayyiya ubbawu merinaa deˈuwaa hidootay deˈanaadan oottiis. * Yaatiyo gishshawu, ha wurssetta gallassatun alamee ayyaanaaban keehi namisettikkonne, Yihoowa asawu gidi palahiya ayyaanaabaa qumay deˈees.—Isiyaasa 65:13.

15. Yihoowa loˈˈotettay ammanettiya asawu Kiristtoosa SHaˈu Layttaa Haaruwaa wode ayba hanotan gogganee?

¹⁵ Ha alamee xayiyo wodekka Hizqqeeli ajjuutan beˈido shaafay goggiyoogaa aggenna. Ubba qassi Kiristtoosa SHaˈu Layttaa Haaruwaa wode he shaafay kaseegaappe aaruwan goggana. He wode Yihooway Mase Kawotettaa baggaara, ammanettida asay loddan loddan wottiyoobi baynnaagaa gidanawu Yesuusa yarshshuwaa kumetta goˈˈaa demmanaadan oottana. He wode nuuni Yihoowa loˈˈotettan keehi ufayttana!

16. Yihoowa loˈˈotettay hara eeshshata xaaxi waaxiyoogaa Geeshsha Maxaafay waati qonccissii, qassi hegeetuppe amaridaageeti aybee?

¹⁶ Yihoowa loˈˈotettay kehatettan immiyoogaa xalla gidenna. Xoossay Muusa hagaadan giis: “Taani ta phooliya bonchchuwaa [“loˈˈotettaa,” NW] qonccetta ubbaa ne sinttaara kanttissana; ta geeshsha sunttaakka ne achchan awaajjana.” Guyyeppe hagaadan giis: “GODAI Muuse sinttaara hagaadan yaagidi awaajjiiddi kanttiis; ‘Taani GODAA; taani GODAA; qaretainne  maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa [“tumay keehi daridoogaa,” NW].’” (Kessaabaa 33:19; 34:6) Hegaa gishshawu Yihoowa loˈˈotettay daro loˈˈo eeshshata xaaxi waaxees. Hegeetuppe naaˈˈata ane beˈoos.

17. Yihooway nagaranchcha asaa waati oyqqii, qassi I yaatanaadan oottiya eeshshay awugee?

¹⁷ ‘Qaretaa.’ Ha eeshshay Yihooway haratussi ashkkenne eta baakko shiishshiyaagaa gidanaadan oottees. Yihooway maatay deˈiyo asatudan kehennaagaa, qarettennaagaa, woy meqetti baynnaagaa gidenna; I ashkkenne keha. Leemisuwawu, Yihooway Abrahaamayyo hagaadan giis: “[“Hayyanaa,” NW] xoqqu gaada neeni de7iyoosaappe arshsho bagginne arggo baggi, qassi huuphessa bagginne tohossa baggi xeella.” (Doomettaa 13:14) Daro birshshettati “hayyanaa” giya qaalaa goˈettokkona. SHin Ibraawettuwan koyro xaafettidaagan he qofaa azazuwaappe ashkketettan oychchiyo oyshawu laammiya issi qaalay deˈiyoogaa Geeshsha Maxaafaa eranchchati yootoosona. Ubbaa haariyaagee issi asa “hayyanaa” giyoogaa qoppa! Kehenna, wolqqanttiyaanne ashkke gidenna asay kumido ha alamiyan, qarettiya nu Xoossaa Yihooway harati baakko shiiqanaadan oottiyoogaa wotti dentti qoppiyoogee minttettiyaaba gidiyoogee tuma.

18. Yihooway “tumay keehi daridoogaa” gidiyoy ayba ogiyaanee, qassi he qaalati ammanttiyaageeta gidiyoy aybissee?

¹⁸ “Tumay keehi daridoogaa.” Alamiyan ha wodiyan ammanettennaagee meeze gididaba. SHin Geeshsha Maxaafay hagaadan gees: “Xoossai worddotanau asa gidenna.” (Qoodaabaa 23:19) Tiitu 1:2y ‘Xoossay worddotenna’ yaagees. Yihoowa loˈˈotettay I worddotennaadan oottees. Hegaa gishshawu, Yihooway qaalaa gelidobay awudenne ammanttiyaaba; I yootidobay polettennan mule attenna. Ubba qassi Yihooway ‘tumaa Xoossaa’ geetettees. (Mazamure 31:5) I worddobaa yootennaagaa xalla gidennan, tuma gidida darobaa yootees. I genttenna, hara uri erennaadan diggenna woy qottenna; shin zawi  baynna ba aadhdhida eratettaa bawu ammanettidi haggaaziyaageetuyyo kehatettan tamaarissees. * ‘Eti tuman hemettana’ mala, I yootiyo tumaara maayettiya ogiyan waani deˈanaakkokka eta tamaarissees. (3 Yohaannisa 3, NW) Yihoowa loˈˈotettay nuna huuphiyan huuphiyan waati maaddii?

19, 20. (a) Hewaana Yihoowa loˈˈotettan ammanettiyoogaa agganaadan Seexaanay waatidee, qassi hegee ay kaalettidee? (b) Yihoowa loˈˈotettay nuna waati maaddii, qassi aybissi?

¹⁹ Seexaanay Edene ataakiltte sohuwan Hewaana Yihoowa loˈˈotettan ammanettiyoogaa agganaadan oottanawu O paacciyoogaa doommiis. Yihooway Addaama hagaadan giis: “Gannatiyaa mittaa teeraa ubbaappe neeni maana giikko ma.” He ataakiltte sohuwan deˈiya xeellanawu loˈˈiya shaˈan qoodettiya mittatuppe bitanee meennaadan Yihooway diggidoy issuwaa xalla. SHin Seexaanay Hewaano koyro oyshaa woygi oychchidaakko akeeka: “Xoossai tumu inttena, ‘Gannatiyan de7iya mittaa teeraa ubbaappekka mooppite’ giidee?” (Doomettaabaa 2:9, 16; 3:1) Hewaana Yihooway loˈˈobaa diggidabadan qoppanaadan oottiyoogan Seexaanay Yihooway yootidobaa geellayiis. Hegan A cimettidoogee azzanttiyaaba. Ha wodiyan deˈiya daro asatuugaadan, Hewaana baayyo ubbabaa immida Xoossaa loˈˈotettaa siriyoogaa doommaasu.

²⁰ He siriyaa gaasuwan keehi iita azzanoynne waayee gakkidoogaa eroos. Hegaa gishshawu, Ermmaasa 31:12y yootiyo zoriyaa akeeka: ‘Eti Yihooway immiyo kehatettan (woy Yihoowa loˈˈotettan) ufayttana.’ Yihoowa loˈˈotettay nuuni keehi ufayttanaadan oottana koshshees. Loˈˈotettan kumida nu Xoossaa halchchuwaa nuuni mule sirana koshshenna. Xoossay bana siiqiyaageetuyyo loˈˈobaa amottiyo  gishshawu, nuuni an wozanappe ammanettana koshshees.

21, 22. (a) Neeni loˈˈotettan Yihoowa milatana koyiyo amarida ogeti aybee? (b) Kaalliya shemppuwan nuuni beˈana eeshshay aybee, qassi he eeshshay loˈˈotettaappe waani dummatii?

²¹ Hegaa bollikka, nuuni Xoossaa loˈˈotettaabaa haratussi yootiyo wode keehi ufayttoos. Yihoowa asaa xeelliyaagan, Mazamure 145:7y hagaadan gees: “Eti ne kehatettaa daruwaabaa yootana.” Nuuni galla galla Yihoowa loˈˈotettan goˈettoos. Yihooway loˈˈotettan immido issibaa dummayi qonccissidi galla galla galatiyoogaa meezettiyoogee loˈˈo. Loˈˈotettaabaa qoppiyoogee, ubba galla he eeshshaa gishshawu Yihoowa galatiyoogeenne hegaabaa haratuyyo yootiyoogee nu loˈˈo Xoossaa milatanaadan nuna maaddees. Yihoowagaadan loˈˈobaa oottiyo ogeta nuuni koyikko, kaseegaappe aaruwan akko shiiqana. Cimida kiitettida Yohaannisi hagaadan giis: “Ta siiquwau, lo77obaappe attin, iitabaa milatoppa. Lo77obaa oottiya ooninne Xoossaa asa.”—3 Yohaannisa 11.

²² Yihoowa loˈˈotettay hara eeshshatuurakka gayttidaba. Leemisuwawu, Xoossay “aggenna siiqoi daridoogaa.” (Kessaabaa 34:6) Yihooway baassi ammanettidi haggaaziyaageetu xallawu ha eeshshaa bessiyo gishshawu, ha eeshshay loˈˈotettaappe dummatees. I hegaadan waatidi oottiyaakko kaalliya shemppuwan tamaarana.