1, 2. Tubtob diin nakakaabot an pagkamaopay han Dios, ngan paonan-o pinabubug-atan han Biblia ini nga kalidad?

 HA MAPASO nga lamrag han pagtunod han adlaw, an pipira nga maiha na nga magsarangkay urosa nga nagpapahimulos han panihapon ha gawas, nagkakatatawa ngan nag-iiristorya samtang gindadayaw nira an maopay nga palibot. Ha hirayo nga lugar, usa nga parauma an nagkikita ha iya uma ngan nahiyom ha katagbaw tungod han madulom nga mga dampog ngan an siyahan nga mga turo han uran nahuhulog ngada ha iya mga tanom. Ha lain nga lugar, usa nga mag-asawa an malipayon nga nagkikita ha ira anak nga nagkikiling-kiling ha pangalimbasog han iya siyahan nga mga pitad.

² Maaram man hira hito o diri, ito ngatanan nga mga tawo nagpapahimulos han usa nga butang—an pagkamaopay ni Jehova nga Dios. An iba nga relihiyoso nga mga tawo agsob nga nagyayakan han mga pulong nga “an Dios maopay.” An Biblia mas mapuwersa gud. Ito nasiring: “Duro an iya pagkamaopay!” (Zacarias 9:17) Kondi baga in gutiay la yana an maaram gud kon ano an kahulogan hiton nga mga pulong. Ano gud an nahiuupod ha pagkamaopay ni Jehova nga Dios, ngan paonan-o ini nga kalidad han Dios nakakaapekto ha kada usa ha aton?

3, 4. Ano an pagkamaopay, ngan kay ano nga an pagkamaopay ni Jehova mahimo ihulagway hin gimaopayi sugad nga kapahayagan han iya gugma?

³ Ha damu nga moderno nga mga yinaknan, an “pagkamaopay” baga in kabug-osan nga pulong. Kondi, sugad han  iginpapahayag ha Biblia, an pagkamaopay matin-aw gud an kahulogan. Siyahan, nagpapasabot ito hin pagkahitaas ha moral. Salit, ha usa nga punto, mahimo kita sumiring nga lukop hi Jehova han pagkamaopay. An ngatanan han iya mga kalidad—upod na an iya gahum, an iya hustisya, ngan an iya kinaadman—maopay gud ngatanan. Kondi, an pagkamaopay mahimo ihulagway hin gimaopayi sugad nga kapahayagan han gugma ni Jehova. Kay ano?

⁴ An pagkamaopay usa ka aktibo, makisangkayon nga kalidad. Ipinakita ni apostol Pablo nga ha mga tawo mas makaruruyag pa ngani ito kay ha pagkamatadong. (Roma 5:7) An matadong nga tawo mahimo laoman nga matinumanon nga masunod ha mga kinahanglanon han balaud, kondi labaw pa an ginbubuhat han maopay nga tawo. Hiya an nag-uuna, aktibo nga namimiling hin mga paagi nga mapulsanon ha iba. Sugad han makikita naton, hi Jehova maopay gud hito nga paagi. Matin-aw, an sugad nga pagkamaopay nagtitikang ha waray-tubtoban nga gugma ni Jehova.

5-7. Kay ano nga nagdumiri hi Jesus nga tawagon hiya nga “Maopay nga Magturutdo,” ngan ano nga hilarom nga kamatuoran an iya ginpamatud-an?

⁵ Hi Jehova naiiba liwat ha iya pagkamaopay. Han hirani na mamatay hi Jesus, usa nga lalaki an dinaop ha iya basi magpakiana, tinatawag hiya nga “Maopay nga Magturutdo.” Hi Jesus binaton: “Kay ano nga gintatawag mo ako nga maopay? Waray bisan hin-o nga maopay labot la han Dios.” (Marcos 10: 17, 18) Yana, bangin magupong ka hiton nga baton. Kay ano nga gintadong ni Jesus an ginsiring han tawo? Diri ba hi Jesus, ha pagkamatuod, usa nga “Maopay nga Magturutdo”?

⁶ Matin-aw, ginamit han lalaki an mga pulong nga “Maopay nga Magturutdo” sugad nga titulo han daku nga pagdayaw. Mapainubsanon nga iginhatag ni Jesus an sugad nga himaya ha iya langitnon nga Amay, nga maopay ha gihitaasi  nga kahulogan. (Proberbios 11:2) Kondi ginpapamatud-an liwat ni Jesus an hilarom nga kamatuoran. Hi Jehova gud la an suruklan ha kon ano an maopay. Hiya la an may soberano nga katungod ha pagsiguro kon ano an maopay ngan kon ano an maraot. Hi Adan ngan Eva, pinaagi han rebelyoso nga pagkaon tikang ha kahoy han kahibaro han maopay ngan han maraot, nagtinguha ha pag-angkon hiton nga katungod. Diri pariho ha ira, mapainubsanon nga igintatapod ni Jesus ha iya Amay an pagbutang han mga suruklan.

⁷ Dugang pa, maaram hi Jesus nga hi Jehova an Surok han ngatanan nga totoo nga maopay. Hiya an Humaratag han “tagsa nga maopay nga regalo ngan [han] tagsa nga perpekto nga hatag.” (Santiago 1:17) Aton usisahon kon paonan-o nakikita an pagkamaopay ni Jehova ha iya pagkamahinatagon.

8. Paonan-o ipinapakita ni Jehova an iya pagkamaopay ha ngatanan nga mga tawo?

⁸ An ngatanan nga buhi nagpapahimulos han pagkamaopay ni Jehova. An Salmo 145:9 nasiring: “Hi Jehova maopay ha ngatanan.” Ano an pipira nga mga ehemplo han iya pagkamaopay ha ngatanan? An Biblia nasiring: “Waray niya pasagdi nga waray pamatuod mahitungod ha iya tungod kay nagbuhat hiya hin maopay pinaagi ha paghatag ha iyo hin  uran tikang ha langit ngan hin mabungahon nga mga panahon, nga gintatagan kamo hin damu nga pagkaon ngan ginpupuno an iyo kasingkasing hin kalipay.” (Buhat 14:17) Nalilipay ka ba kon nagpapahimulos ka han makaruruyag nga pangaon? Kon diri tungod han pagkamaopay ni Jehova ha pagdisenyo hini nga tuna upod an nagpapadayon nga sikolo han pagsuplay hito hin presko nga tubig ngan han “mabungahon nga mga panahon” ha paghatag hin hura nga karaunon, waray unta mga pangaon. Ipinapakita ni Jehova an sugad nga pagkamaopay diri la ha mga nahigugma ha iya kondi ha ngatanan. Hi Jesus nagsiring: “Iya ginpapasirang an iya adlaw ngada ha magraot ngan ha mag-opay ngan nagpapauran ha magtadong ngan ha diri magtadong.”—Mateo 5:45.

9. Paonan-o igin-iilustrar han mansanas an pagkamaopay ni Jehova?

⁹ Damu an nagbabalewaray han duro nga pagkamahinatagon nga ipinapakita ha katawohan tungod han padayon nga nahihimo han adlaw, han uran, ngan han mabungahon nga mga panahon. Pananglitan, tagda an mansanas. Ha ngatanan nga mga rehiyon han tuna nga kasadangan an klima, ordinaryo ito nga prutas. Kondi, maopay ito pagkit-on, marasa kaunon, ngan puno hin nakakarepresko nga tubig ngan importante nga mga sustansya. Maaram ka ba nga ha bug-os nga kalibotan may-ada mga 7,500 nga magkalainlain nga klase han mansanas, may-ada pula, bulaw, dulaw, berde ngan magkalainlain nga kadaku, tikang ha darodaku la han lumboy ngadto ha sugad kadaku han suwa? Kon kaptan mo an gutiay hinduro nga liso han mansanas ha imo kamot, baga in diri ito importante. Kondi tikang hito nagtutubo an usa han pinakamaopay pagkit-on nga mga kahoy. (Kanta ni Solomon 2:3) Kada panahon han katsaringsing an mansanas nga kahoy namumukad hin mag-opay nga mga urapong han mga bukad; kada panahon han katrakdag namumunga ito. Kada tuig—tubtob 75 ka tuig—an mansanas  nga kahoy mamumunga tubtob nga mapuno an 20 nga kahon nga 19 ka kilo an bug-at han kada usa!

10, 11. Paonan-o ipinapakita han mga sentido an pagkamaopay han Dios?

¹⁰ Ha iya waray kataposan nga pagkamaopay, gintagan kita ni Jehova hin usa nga lawas nga “maopay hinduro an pagkahimo,” nga may-ada mga sentido nga dinisenyo ha pagbulig ha aton nga masabtan an iya mga buhat ngan malipay hito. (Salmo 139:14) Hunahunaa utro iton nga mga kahimtang nga iginhulagway ha tinikangan hini nga kapitulo. Ano nga mga kiritaon an nagdadara hin kalipay ha sugad nga mga takna? An mapula nga mga bayhon han malipayon nga bata. An pagturo han uran ha kaumhan. An pula, bulaw, ngan ube nga mga kolor han pagtunod han adlaw. An mata han tawo dinisenyo ha pagkita hin yinukot, o minilyon pa ngani, nga iba-iba nga kolor! Ngan an aton sentido ha pamati nakakabati han magkalainlain nga tunog han maopay-gud nga tingog, han huyuhoy han hangin ha kakahoyan, han duro nga pagtawa han usa nga bata. Kay ano nga nalilipay kita ha sugad nga mga kiritaon ngan mga tunog? An Biblia nasiring: “An talinga nga nakakabati ngan an mata nga nakakakita—pariho ito ginhimo ni Jehova.” (Proberbios 20:12) Kondi duha la ito han mga sentido.

¹¹ An sentido han paghamot usa pa nga pamatuod han pagkamaopay ni Jehova. An irong han tawo nakakakilala hin damu hinduro nga magkalainlain nga hamot—ginbabanabana nga maabot ito hin yinukot tubtob usa ka trilyon. Hunahunaa an pipira la: an ginluluto nga paborito mo nga pagkaon, mga bukad, nagkataktak nga mga dahon, an gutiay nga aso tikang ha kalayo nga komportable an kapaso. Ngan an imo sentido han pag-abat nakakahimo ha imo nga umabat han huyuhoy han hangin ha imo nawong, han nagpapasarig nga paghangkop han usa nga hinigugma, han makapatagbaw nga kahamis han usa nga prutas ha imo kamot.  Ha imo pagkagat hito, an imo sentido han panrasa nagios. An magkalainlain nga rasa nagpapagios ha imo samtang nakikilala han mga durho han imo dila an magkalainlain nga rasa han prutas tungod han komplikado nga mga sangkap han pagkahimo hito. Oo, may-ada kita han ngatanan nga hinungdan nga magsinggit mahitungod kan Jehova: “Hura gud an imo pagkamaopay! Gintipigan mo ito para ha mga may kahadlok ha imo.” (Salmo 31:19) Kondi, paonan-o gintipigan ni Jehova an pagkamaopay para hadton may-ada diosnon nga kahadlok?

12. Ano nga mga tagana tikang kan Jehova an pinakaimportante, ngan kay ano?

¹² Hi Jesus nagsiring: “Nahisurat na: ‘An tawo nabubuhi, diri la ha tinapay, kondi ha tagsa nga pulong nga nagawas ha baba ni Jehova.’” (Mateo 4:4) Oo, an espirituwal nga mga tagana ni Jehova makakahatag ha aton hin labaw pa gud nga kaopayan kay han mahihimo han materyal nga mga tagana, kay nagtutugway ito ngadto ha kinabuhi nga waray kataposan. Ha Kapitulo 8 hini nga libro, natigamnan naton nga ginagamit ni Jehova an iya gahum ha pagpahiuli durante hinin kataposan nga mga adlaw basi mag-uswag an espirituwal nga paraiso. An importante nga bahin hiton nga paraiso amo an kaabunda han espirituwal nga pagkaon.

13, 14. (a) Ano an hinkit-an ni propeta Ezekiel ha bisyon, ngan ano an kahulogan hito para ha aton yana? (b) Ano nga naghahatag-kinabuhi nga espirituwal nga mga tagana an ginhihimo ni Jehova para ha iya matinumanon nga mga surugoon?

¹³ Ha usa han daku nga mga tagna ha Biblia mahitungod han pagpahiuli, tinagan hi propeta Ezekiel hin usa nga bisyon han gintukod-utro ngan ginhimaya nga templo. Tikang hito nga templo naawas an sapa han tubig, nga nagtikahiluag ngan nagtikahilarom tubtob nga nagin salog ito. Diin man ito umawas, iton nga salog naghatag hin mga kapulsanan.  Ha ligid hito marampag an kakahoyan nga naghatag hin pagkaon ngan pagtambal. Ngan an salog nagpahinabo pa ngani nga magkaada kinabuhi ngan produkto ha maasin, waray kinabuhi nga Patay nga Dagat! (Ezekiel 47:1-12) Kondi ano an kahulogan hito ngatanan?

¹⁴ An bisyon mahitungod ha templo nangahulogan nga ibabalik ni Jehova an putli nga pagsingba. Makakaabot ito utro ha iya matadong nga mga suruklan. Pariho hiton nga salog ha bisyon, an mga tagana han Dios para han kinabuhi maawas ngada ha iya katawohan ha mas duro nga kaabunda. Tikang nga iginpahiuli an putli nga pagsingba han 1919, ginbibendisyonan ni Jehova an iya katawohan hin naghahatag-kinabuhi nga mga tagana. Paonan-o? Bueno, an mga Biblia, mga literatura han Biblia, mga katirok, ngan mga kombensyon ngatanan nakakabulig ha paghatag han importante nga mga kamatuoran ha minilyon nga mga tawo. Pinaagi hito gintututdoan ni Jehova an katawohan mahitungod han iya pinakaimportante nga tagana para han kinabuhi—an halad lukat han Kristo, nga pinaagi hito nagigin posible an pagkaada limpyo nga kahimtang ha atubangan ni Jehova ngan paglaom ha kinabuhi nga waray kataposan ha ngatanan nga totoo nga nahigugma ngan nahahadlok ha Dios. a Salit, hinin kataposan nga mga adlaw, samtang an kalibotan nag-aantos hin espirituwal nga kagutom, an katawohan ni Jehova nagpapahimulos han espirituwal nga piyesta.—Isaias 65:13.

15. Ha ano nga paagi maawas an pagkamaopay ni Jehova ngada ha matinumanon nga katawohan durante han Milenyo nga Pagmando han Kristo?

¹⁵ Kondi an salog ha bisyon ni Ezekiel diri maundang ha pag-awas kon matapos na inin daan nga sistema han mga  butang. Ha kabaliktaran, maawas ito hin labi pa kaabunda durante han Milenyo nga Pagmando han Kristo. Katapos, pinaagi han Mesianiko nga Ginhadian, ipapadapat ni Jehova an bug-os nga bili han halad ni Jesus, hinayhinay nga babayawon an matinumanon nga katawohan ngadto ha kahingpitan. Hito nga panahon magrarayhak gud kita ha pagkamaopay ni Jehova!

16. Paonan-o ipinapakita han Biblia nga an pagkamaopay ni Jehova nag-uupod han iba nga mga kalidad, ngan ano an pipira hini?

¹⁶ An pagkamaopay ni Jehova nag-uupod hin labaw pa kay han pagkamahinatagon. An Dios nagsiring kan Moises: “Papalabyon ko an ngatanan nga akon pagkamaopay ha atubangan han imo nawong, ngan ipapasamwak ko ha imo atubangan an ngaran ni Jehova.” Ha urhi an asoy nasiring: “Hi Jehova linabay ha iya atubangan ngan nagpasamwak: ‘Hi Jehova, hi Jehova, usa nga Dios nga maloloy-on ngan makonsiderasyon, diri madagmit masina ngan hura hin maunungon nga gugma ngan kamatuoran.’” (Exodo 33:19; 34:6, footnote) Salit an pagkamaopay ni Jehova nag-uupod han damu, mag-opay nga mga kalidad. Aton paghisgotan an duha la hini.

17. Ano an pagin makonsiderasyon, ngan paonan-o ipinapakita ito ni Jehova ha diri-hingpit nga mga tawo?

¹⁷ “Makonsiderasyon.” Ini nga kalidad, nga tikang ha pulong nga ginhubad liwat nga “mapinairon,” nagsusumat ha aton hin damu mahitungod han pagtrato ni Jehova ha iya mga linarang. Imbes nga magin waray-pagtahod, waray pagtagad, o matalumpiguson, sugad han agsob nga ginbubuhat han mga tawo nga may-ada gahum, hi Jehova malumo ngan buotan. Pananglitan, hi Jehova nagsiring kan Abraham: “Alayon, isiplat an imo mga mata ngan kitaa tikang ha imo hinmumutangan, an norte ngan sur, este ngan weste.”  (Genesis 13:14) Damu nga mga hubad an nagkuha han pulong nga “alayon.” Kondi natigamnan han mga eskolar han Biblia nga an mga pulong ha orihinal nga Hebreo nag-uupod han usa nga pulong nga nagbabag-o han pagkasaysay tikang ha sugo ngadto ha matinalahuron nga hangyo. May-ada iba, pariho nga mga hitabo. (Genesis 31:12; Ezekiel 8:5) Hunahunaa, an Soberano han uniberso nasiring hin “alayon” ha ubos nga mga tawo! Ha kalibotan diin kaylap an kapintas, kaagresibo, ngan pagin bastos, diri ba nakakarepresko an paghunahuna han pagin makonsiderasyon han aton Dios, hi Jehova?

18. Ha ano nga paagi hi Jehova “hura hin . . . kamatuoran,” ngan kay ano nga nagpapasarig iton nga mga pulong?

¹⁸ “Hura hin . . . kamatuoran.” An pagkadiri-tangkod nagin uso na ha kalibotan yana. Kondi an Biblia nagpapahinumdom ha aton: “An Dios diri kay tawo nga nagbubuwa.” (Numeros 23:19) Ha pagkamatuod, an Tito 1:2 nasiring nga an “Dios . . . diri makakagbuwa.” An pagkamaopay ni Jehova diri natugot ha iya nga magbuwa. Salit, an mga saad ni Jehova bug-os nga masasarigan; an iya mga pulong, sigurado nga pirme matutuman. Hi Jehova tinatawag pa ngani nga “Dios han kamatuoran.” (Salmo 31:5) Diri la kay naglilikay hiya ha pagsumat han buwa kondi iginhahatag niya an hura nga kamatuoran. Diri hiya sarado, nagtatago han impormasyon, o masekreto; lugod, hura nga ginlalamragan niya an iya matinumanon nga mga surugoon tikang ha iya waray-tubtoban nga surok han kinaadman. b Iya gintututdoan pa ngani hira kon paonan-o magkinabuhi uyon ha mga kamatuoran nga iya iginhahatag basi hira ‘makapadayon paglakat ha kamatuoran.’ (3 Juan 3) Ha kabug-osan, paonan-o  sadang makaapekto an pagkamaopay ni Jehova ha aton sugad nga indibiduwal?

19, 20. (a) Paonan-o nangalimbasog hi Satanas ha pagpaluya han pagsarig ni Eva ha pagkamaopay ni Jehova, ngan ano an resulta? (b) An pagkamaopay ni Jehova sadang magkaada ano nga epekto ha aton, ngan kay ano?

¹⁹ Han ginsulay ni Satanas hi Eva ha garden ha Eden, nagtikang hiya pinaagi han tuso nga pagpaluya han iya pagsarig ha pagkamaopay ni Jehova. Hi Jehova nagsiring kan Adan: “Tikang ha tagsa nga kahoy ha garden puydi ka kumaon han bunga hito tubtob nga mabusog.” Ha yinukot nga kahoy ha garden, usa la an igindiri ni Jehova nga kaunon. Kondi, tigamni an mga pulong ni Satanas ha iya siyahan nga pakiana kan Eva: “Nagsiring gud ba an Dios nga ayaw kamo pagkaon han bunga han tagsa nga kahoy ha garden?” (Genesis 2:9, 16; 3:1) Ginbaliko ni Satanas an mga pulong ni Jehova basi hunahunaon ni Eva nga ginpupugngan ni Jehova an usa ka butang nga maopay. Makasurubo, epektibo an taktika. Hi Eva, pariho han damu hinduro nga tawo katapos niya, nagtikang magruhaduha ha pagkamaopay han Dios, nga naghatag ha iya han tanan nga may-ada hiya.

²⁰ Maaram kita han duro nga kasubo ngan kakurian nga resulta han sugad nga pagruhaduha. Salit sundon ta an mga pulong ha Jeremias 31:12: “Malilipay hira tungod han pagkamaopay ni Jehova.” An pagkamaopay ni Jehova dapat gud magin rason nga malipay kita. Diri gud kita sadang magruhaduha ha mga motibo han aton Dios, nga puno han pagkamaopay. Makakasarig gud kita ha iya, kay karuyag niya an gimaopayi para hadton nahigugma ha iya.

21, 22. (a) Ano an pipira nga mga paagi nga karuyag mo pasalamatan an pagkamaopay ni Jehova? (b) Ano nga kalidad an paghihisgotan ha masunod nga kapitulo, ngan paonan-o naiiba ito tikang ha pagkamaopay?

²¹ Dugang pa, kon naisusumat ta ha iba an pagkamaopay  han Dios, nalilipay gud kita. Mahitungod han katawohan ni Jehova, an Salmo 145:7 nasiring: “An ira mga pulong han pagdayaw maawas sugad hin burabod samtang ira nahinunumdoman an imo hura nga pagkamaopay.” Kada adlaw nga kita buhi, nagpapahimulos kita ha pagkamaopay ni Jehova. Kay ano nga diri pasalamatan hi Jehova kada adlaw tungod han iya pagkamaopay, ngan magin espisipiko kon posible? An paghunahuna ngan pagpasalamat kan Jehova kada adlaw tungod hito nga kalidad ngan an pagsumat ha iba mahitungod hito mabulig ha aton nga subaron an aton maopay nga Dios. Ngan samtang namimiling kita hin mga paagi ha pagbuhat han maopay, sugad han ginbubuhat ni Jehova, magigin mas duok kita ha iya. An lagas nga hi apostol Juan nagsurat: “Hinigugma nga bugto, ayaw pagsubad han maraot, lugod pagsubad han maopay. An nagbubuhat hin maopay nagtitikang ha Dios.”—3 Juan 11.

²² An pagkamaopay ni Jehova konektado liwat ha iba nga kalidad. Pananglitan, an Dios “hura hin maunungon nga gugma.” (Exodo 34:6) Mas espisipiko ini kay ha pagkamaopay, kay iginpapahayag ini ni Jehova labi na ha iya matinumanon nga mga surugoon. Ha masunod nga kapitulo, hibabaroan ta kon paonan-o niya ito ginbubuhat.