1, 2. Mwomwo ika natwambila ngwetu Mwangana Ndavichi atachikijile omwo vapwa vatu vakuhona kushishika?

 MWANGANA NDAVICHI atachikijile omwo vapwa vatu vakuhona kushishika. Halwola lumwe, kwapwile vakwavo vaIsalele vaze vamufumbukilile nakusaka kumutambula wangana. Kutwala muze nawa vamufumbukilile kuli masepa jenyi vahamuchima. Achishinganyeke hali Mikale pwevo lyaNdavichi wakulivanga. Hakavanga Mikale “azangile chikuma Ndavichi,” kaha pamo amukafwilenga namumilimo yawangana. Oloze mukuhita chalwola, “amulumbilishile mumuchima wenyi,” nakumumona “nge hichileya.”—Samwele 1, 18:20; Samwele 2, 6:16, 20.

² Mutu mukwavo nawa shina Ahitofwele sepa lyaNdavichi uze amulwezelenga mangana. Vyuma vyosena ahanjikilenga vavimwenenga nge himazu akufuma kuli Yehova. (Samwele 2, 16:23) Oloze ou mutu vafwelelele alumukilile Ndavichi nakulikata navaze vamufumbukilile. Uno iya aputukile echi kulikanga? Apwile Avasalome, mwana Ndavichi. Ou muka-kulikanga “atwalileho lika kukunyula vaIsalele,” nakulilingisa ivene kupwa mwangana. Vatu vavavulu vakundwijilenga Avasalome, ngocho Mwangana Ndavichi achinyine mangana ayovole mwono wenyi.—Samwele 2, 15:1-6, 12-17.

3. Chuma muka atachikijile Ndavichi?

³ Uno kakwapwile mutu atwalileho kupwa wakushishika kuli Ndavichiko tahi? Ndavichi atachikijile ngwenyi kwapwile uze atwalileho kupwa wakushishika kuli ikiye lwola lwosena amwenenga vihuli. Uno mutu muka?  Ikiye Yehova Kalunga. Ndavichi ahanjikile hali Yehova ngwenyi: “Kuli mutu wakushishika weji kupwanga uwakushishika.” (Samwele 2, 22:26) Uno kushishika chapwa ngachilihi, kaha Yehova ahana ngachilihi chakutalilaho chamwaza chakupwa wakushishika?

4, 5. (a) Uno “kushishika” chapwa ngachilihi? (b) Uno kushishika chavatu chapwa ngachilihi chakulipwila?

⁴ Kweseka naVisoneka VyachiHepeleu, lizu “kushishika” lyatalisa kumutu uze mwalipanjika kuli mutu azanga nakutwalaho kumukafwa. Mutu kana eji kulinganga ngocho mwomwo yazangi, keshi nge mwomwo yakumukanjikizako. a Kaha nawa lizu “kushishika” vanahase kulizachisa kuvyuma vyakuzeneka kuyoya. Chakutalilaho, muka-kwimba jisamu avulukile kakweji ngwenyi, “chinjiho wakushishika wamumelu” mwomwo lwola lwosena eji kupwangako naufuku. (Samu 89:37) Oloze kushishika chakakweji kachapwa ngana muze chapwa  kushishika chamutuko. Mwomwo ika? Mwomwo kakweji keshi kuhasa kusolola zangiko.

⁵ Kweseka naVisoneka, kushishika chatambukila hamwe nazangi. Nge mutu mwapwa wakushishika kuli mukwavo, kaha mwasolola nge azakama sepa lyenyi. Kushishika kana chapwa chakwilila. Kachapwa ngana muze apwa makimba ahakalungalwiji akunganjanga napehoko. Oloze, mutu wakushishika eji kutwalangaho lika kupwa wakushishika, chamokomoko nakala ukalu mwamona.

6. (a) Uno kushishika chakeha ngachilihi muvatu, kahechi vachisolola ngachilihi muMbimbiliya? (b) Jila muka tunahase kulinangwilamo mwalumbunukila kushishika, kaha mwomwo ika?

⁶ Chaluvinda, vatu vavavulu makumbi ano kavapwa vakushishikako. Kakavulu vasepa namutu “vasaka kulilinga mwamupi.” Tweji kwivwanga mijimbu yayivulu ngwavo mutu naseze muka-zuvo yenyi. (Vishimo 18:24; Malaki 2:14-16) Mwomwo yakulisala chavilinga vyavipi, nayetu tunahase kuhanjika mazu ahanjikile kapolofweto Mika ngwenyi: “Vatu vakushishika vanafu hamavu.” (Mika 7:2) Numba tuhu vatu kavavula kupwa vakushishikako, oloze ou muhako wamwaza ngana ukiko atwama nawo Yehova. Jila yamwaza tunahase kulinangwilamo omu chalumbunukila kushishika, shina kukekesa omwo Yehova eji kusolwelangamo zangi yenyi hakupwa wakushishika.

7, 8. Mwomwo ika natuhanjikila ngwetu Yehova ikiye asolola kushishika mujila yakulipwila?

⁷ Yehova nasolola kushishika mujila yakulipwila. Mujila muka? Mwomwo lwola lumwe vangelo navatu vanahononga kupwa vakushishika. (Yopa 1:1; Kusoloka 4:8) Nyi ngachilihi Yesu Kulishitu? Uno ikiye kapwa mutu  waKalunga “wakushishika” wakulipwilako tahi? (Samu 16:10) Jino mwomwo ika natuhanjikila ngwetu Yehova ukawenyi kaha ikiye asolola kushishika mujila yakulipwila?

⁸ Chatete, anuka ngwove kushishika hijila yimwe yakusolwelamo zangi. Hakuwana nge “Kalunga ikiye zangi,” kaha eji kulinganga vyuma vyosena muzangi, ngocho kakweshi mutu apwa wakushishika kuhambakana Yehovako? (WaYowano 1, 4:8) Vangelo navatu vanahase kusolola vilinga vyaKalunga, oloze Yehova kaha ikiye apwa wakushishika mujila yakulipwila. Hakuwana nge “Napungako Kufuma Kushikulu,” ikiye napunga wakushishika halwola lwalusuku kuhambakana vyuma vyakutenga vyosena vyamwilu nahamavu. (Ndanyele 7:9) Ngocho, Yehova ikiye ahana chakutalilaho chakulipwila chakupwa wakushishika. Eji kusololanga ou muhako mujila yakulipwila kuhambakana vatu navangelo. Achitale havyakutalilaho vimwe.

9. Mujila muka Yehova apwila “wakushishika muvyuma vyosena eji kulinganga”?

⁹ Yehova apwa “wakushishika muvyuma vyosena eji kulinganga.” (Samu 145:17) Mujila muka? Natuwana kukumbulula hali Samu 136. MuSamu kana vavulukamo vilinga vyaYehova vyaulwilo, kuhakilako nachuma alingile hakuyovola vaIsalele haKalungalwiji Uchila. Vesi hivesi muSamu kaneyi, yatwama namazu akwamba ngwavo: “Zangi yenyi yakwilila kuyatwama haya myaka yosena.” Eyi samu yili namulipwata lyakwamba ngwavo “ Vihula Vyakuhunananaho” lili halifwo 347. Omu nautanga eji jivesi, nawivwa kuwaha hajijila jize Yehova asolwelelengamo zangi yakwilila kuli vatu jenyi. Chikupu vene, Yehova eji kusololanga kushishika chenyi kuli vangamba  jenyi vakushishika hakwivwilila kukulomba chavo, nakuvakafwa nawa halwola lwakutamo. (Samu 34:6) Zangi yaYehova yakwilila hali vangamba jenyi kayakumako, kachi nge navatwalaho kupwa vakushishika kuli ikiye.

10. Uno Yehova eji kusololanga ngachilihi kushishika kutalisa kujishimbi jenyi?

¹⁰ Yehova eji kusololanga nawa kushishika kuli vangamba jenyi hakuzeneka kwalumuna jishimbi jenyi. Vatu vamwe veji kwalumunanga jila vamwenamo vyuma vyavipi nevi vyamwaza mwomwo yavyuma yafwila michima yavo. Oloze Yehova kalinga ngochoko. Chakutalilaho, kalumuna vishinganyeka vyenyi kutalisa kukupanda, nakukulemesa makombelo naulyanyiko. Hamyaka yayivulu yinahichimo, vishinganyeka vyaYehova havyuma vyakufwana nge kupanda, nakulifukula kutuponya, nakulijiha kavyalumukileko. Ahanjikile kuhichila muli kapolofweto Isaya ngwenyi: “Kangweshi kukalumukako nomu namushinakajiwa.” (Isaya 46:4) Shikaho, twatela kufwelela ngwetu natunganyala chikuma nge natukavangiza jishimbi jakwoloka jamuMazu aKalunga.—Isaya 48:17-19.

11. Hana vyakutalilaho vyakusolola nge Yehova eji kutesangamo jishiko jenyi.

¹¹ Yehova eji kusololanga nawa kushishika hakutesamo jishiko jenyi. Eji kutesangamo vyuma eji kuhanjikanga. Yehova ambile ngwenyi: “Mazu akufuma mukanwa kami . . . kaweshi kukakinduluka kuli ami mavokovokoko, oloze nawakatesamo vyuma vize ngunevwila kuwaha, kaha nawakalinga mwosena muze ngunawatumu kulinga.” (Isaya 55:11) Hakutesangamo mazu enyi, Yehova eji kusololanga kushishika chenyi kuli vatu jenyi. Keshi kuvalingisa vavandamine chuma chize kajinyine kutesamoko. Chikupu vene, Yehova apwa wakuzeneka katenga,  kahechi chikiko chalingishile ngamba yenyi Yoshuwa ahanjike ngwenyi: “Hajishiko josena jize Yehova ashikile vakuzuvo yaIsalele, kahalihonene lushiko numba lumweko, josena jateselemo.” (Yoshuwa 21:45) Shikaho twafwelela ngwetu Yehova keshi kukatwivwisa kupihyako mwomwo keshi kukahona kutesamo vyuma vyosena atushikako.—Isaya 49:23; Wavaka-Loma 5:5.

12, 13. Mujila muka zangi yaYehova yakwilila yapwila yahaya myaka yosena?

¹² Nganomu tunamono lyehi, Mbimbiliya yatulweza ngwayo zangi yaYehova yakwilila “kuyatwama haya myaka yosena.” (Samu 136:1) Mujila muka? Jila yimwe shina yakukonekela vatu nakuhona kwanuka cheka milonga yavo. Nganomu twashimutwilanga muKapetulu 26, Yehova kanuka cheka milonga yamutu yakunyima yize amukonekelele lyehiko. Shikaho hakuwana nge vatu “vosena vanalingi shili, kaha vanahono kuheta haseteko yaupahu waKalunga,” ngocho tuvosena twatela kumusakwilila Yehova mwomwo yazangi yenyi yakwilila.—Wavaka-Loma 3:23.

¹³ Oloze kuli nawa jila yikwavo yasolola nge zangi yaYehova yakwilila kuyatwama haya myaka yosena. Mazu enyi amba ngwawo muka-kwoloka “mwapwanga nge mutondo wakutumba kuvana vatulwiji, mutondo uze weji kwimanga mihako hangonde yawo yakwima. Mafwo awo kaweshi kuzuzako, kaha vyosena mwalinganga navifukilanga.” (Samu 1:3) Achishinganyeke hamutondo wamwaza wamafwo akuzeneka kuzuza. Nayetu nawa, nge kututanganga Mazu aKalunga nakulinangulawo, kaha natupwa nachiyoyelo chamwaza nakupwa navilinga vyamwaza nakuyoya myaka yayivulu. Vyuma vyamwaza eji kuhananga Yehova kuli vangamba jenyi  vakushishika vyapwa vyahaya myaka. Mukaye kakahya kaze mwakaneha Yehova, vatu vakushishika mwakavasolwelanga zangi yenyi yakwilila haya myaka.—Kusoloka 21:3, 4.

14. Yehova eji kusololanga ngachilihi ngwenyi asakwilila vangamba jenyi hakushishika chavo?

¹⁴ Kushikulu, Yehova asolwelenga kushishika chenyi mapapa kakavulu. Hakuwana nge Yehova kalumukako, ngocho keshi kukecha kusolwelanga vangamba jenyi zangi yakwililako. Muka-kwimba jisamu asonekele ngwenyi: “Ngwapwile ngukanyike, oholyapwa ngunakolo jino, oloze kanda ngumonengaho lyehi muka-kwoloka vanamusuvilila, chipwe kumona vana venyi navalombalomba mboloko. Mwomwo Yehova azanga chiyulo, kaha keshi kusuvilila vatu jenyi vakushishikako.” (Samu 37:25, 28) Yehova hakupwa ikiye Tengi, ngocho atamo kumulemesanga. (Kusoloka 4:11) Chipwe ngocho, Yehova hakupwa wakushishika, eji kwivwanga kuwaha hakumona vilinga vyetu vyamwaza.—Malaki 3:16, 17.

15. Lumbununa omwo vyuma alingile Yehova kuli vaIsalele vyasolola nge apwa wakushishika.

¹⁵ Yehova eji kukafwanga vatu jenyi nge vali muukalu, mwomwo yazangi yenyi yakwilila. Muka-kwimba jisamu atulweza ngwenyi: “[Yehova] eji kulamanga vatu jenyi vakushishika. Eji kuvapulululanga mumavoko avaka-kuhuka.” (Samu 97:10) Achanuke omwo akafwile vaIsalele. Hanyima yakuvayovola haKalungalwiji Uchila, vaIsalele vembililile Yehova mwaso ngwavo: “Vatu jove vaze unasokola unavatetekela nazangi yove yakwilila.” (Kulovoka 15:13) Yehova hakuyovola vaIsalele haKalungalwiji Uchila, asolwele nge akwechi zangi yakwilila. Ngocho  Mose alwezele vaIsalele ngwenyi: “Keshi nge mwavulile chikuma havatu vosena vahamavu numba Yehova amizange nakumisakulako, enu mwapwile muvatu vavandende chikuma havatu vosena. Yehova amilowele nalivoko lyenyi lyangolo mangana amisokole muzuvo yaundungo, mulivoko lyaFwalo mwangana waEjipitu, mwomwo Yehova amizangile, kaha nawa asakile kulama lushingo alishingile kuli vakakuluka jenu.”—Lushimbi lwamuchivali 7:7, 8.

16, 17. (a) Uno vaIsalele vasolwele ngachilihi muchima wakuhona kusakwilila, oloze Yehova avatetelelele ngachilihi? (b) Uno vaIsalele vavavulu vasolwele ngachilihi nge “chapwile chachikalu kuvahindula,” kaha vyuma muka natulinangulako?

¹⁶ Chipwe ngocho, vaIsalele vahonene kusakwilila Yehova hazangi yenyi yakwilila, mwomwo hanyima yakuvayovola, “valingilenga lika shili kuli ikiye hakulikanga kuli Ou Wakulitulaho Chikuma.” (Samu 78:17) Hamakulukaji amyaka yakavangijileho, vatwalileho lika kulikanga, nakuseza Yehova, kaha valemeselenga tulunga vamakuli, chuma kana chavapihishile. Chipwe ngocho, Yehova kahokwele chivwasano chenyiko. Oloze Yehova alembelelele vatu jenyi kuhichila muli kapolofweto Yelemiya ngwenyi: “Kinduluka ove Isalele wakuhungumuka . . . Kangweshi kukutala nautenuko mwomwo ngwatwama nalikoji.” (Yelemiya 3:12) Nganomu twamonanga muKapetulu 25, vaIsalele vavavulu kavalumukileko. Chikupu vene, “vatolekelenga valuwa jaKalunga wamuchano, valumbilishilenga vyuma ahanjikilenga, kaha vahendelenga nawa vapolofweto jenyi.” Vyuma muka vyafuminemo? Kutwala muze, “chapwile chachikalu kuvahindula. Ngocho utenu waYehova wejile hali vakiko.”—Mijimbu 2, 36:15, 16.

¹⁷ Uno vyuma muka natulinangulako? Kushishika  chaYehova kachalumbununa nge eji kuliulanga vilinga vyavipi vyavatu chipwe kulumbununa nge vatu vanahase kumwongako. Chikupu vene, Yehova atwama ‘nazangi yakwilila’ kaha afwila kusolwela vatu keke nge chinatemo kulinga ngocho. Jino Yehova eji kulinganga ngachilihi nge mutu mwatwalaho lika nakupwa navilinga vyakuhuka? Halwola lwangana, Yehova eji kukavangizanga jishimbi jenyi jakwoloka nakuzangamisa mutu kana. Ngana muze valwezele Mose, Yehova “keshi kukahona kuzangamisa vatu vakuzeneka kupihilila nakwalumukako.”—Kulovoka 34:6, 7.

18, 19. (a) Uno Yehova mwakasolola ngachilihi ngwenyi apwa wakushishika hakuzangamisa vaka-kuhuka? (b) Mujila muka Yehova mwakasolwelamo kushishika chenyi kuli vangamba jenyi vaze vafwa mwomwo yakuvayanjisa?

¹⁸ Kuzangamisa vaka-kuhuka wapwa unjiho wakusolola nge Kalunga apwa wakushishika. Mujila muka? Jila yimwe shina yize yatwama mumukanda waKusoloka muze Yehova alwezele vangelo 7 ngwenyi: “Yenu mukahingunwine viloso 7 vyamatoto aKalunga hamavu.” Omu kangelo wamuchitatu ahingunwinyine chiloso chenyi “hatulwiji nahatuselwoke vameya,” meya alumukile manyinga. Kaha uze kangelo ahanjikile kuli Yehova ngwenyi: “Ove wapwako, ove wapwileko, ove wakushishika, unapu uwakwoloka hakuwana nge unayulu mujila kaneyi, mwomwo vamwangile manyinga avaka-kujila nawawa avapolofweto, kaha unavahane manyinga vanwenga. Kaha chinatemo kuvalinga ngocho.”—Kusoloka 16:1-6.

¹⁹ Tachikiza ngwove omwo uze kangelo apwile nakuhanjika mujimbu wakusopesa, avulukile Yehova ngwenyi “wakushishika.” Mwomwo ika? Mwomwo hakunongesa vaka-kuhuka, Yehova mwasolola nge apwa wakushishika kuli vangamba jenyi, kaha havangamba kana vavavulu vanavayanjisanga nakuvajiha. Yehova eji kwanukanga  vatu kana. Eji kufwilanga kukamona cheka ava vangamba jenyi vakushishika, kaha Mbimbiliya yatulweza ngwayo ajina kukavasangula. (Yopa 14:14, 15) Yehova kavulyama vangamba jenyi vakushishika mwomwo yakushinganyeka ngwenyi kaveshi nakuyoyako. Oloze “kuli ikiye vosena vavatonyi.” (Luka 20:37, 38) Kujina chaYehova chakukasangula vafu vaze vali muvishinganyeka vyenyi hichinjikizo chize chasolola kushishika chenyi.

20. Veya vapwa “vyuma vyakutetela,” kaha Yehova apwa ngachilihi wakushishika kuli vakiko?

²⁰ Kufuma vene kushikulu, Yehova napunga wakushishika kuli vatu vakushishika. Hamyaka yayivulu, Yehova ‘nomikanga nakutalilila chikoki vyuma vyautenu vatela kunongesa.’ Mwomwo ika? “Alingile ngocho mangana upahu wenyi waunene akausolole havyuma vyakutetela vize awahishile chimweza mangana vikapwenga naupahu.” (Wavaka-Loma 9:22, 23) Evi “vyuma  vyakutetela” vakiko vatu vaze vatongwela kuyoya chahaya myaka yosena, vaze vatongola nashipilitu yajila, vaswana muvaswanyina hamwe naKulishitu muWangana wenyi. (Mateu 19:28) Hakulingisa vyuma kanevi vyakutetela vakavilwile, Yehova apwile wakushishika kuli Apalahama, uze alishikile nenyi lushiko ngwenyi: “Vaka-mafuchi ahamavu vosena navakavakisula kuhichila muli muka-tanga yove, mwomwo unevwilila mulizu lyami.”—Kuputuka 22:18.

21. (a) Uno Yehova asolola ngachilihi kushishika chenyi “[ku]liyongomena lyalinene” lyavatu vaze vali nalutalililo lwakukayovoka “luyando lwalunene”? (b) Uno kushishika chaYehova nachikukunyula ulinge ika?

²¹ Yehova asolola kushishika chochimwe “[ku]liyongomena  lyalinene” lyavatu vaze vali nalutalililo lwakukayovoka “luyando lwalunene” nakukayoya haya myaka mupalachise hamavu. (Kusoloka 7:9, 10, 14) Numba tuhu vangamba jenyi kavapwa vakukupukako, oloze Yehova avahana kutokwa chakukayoya haya myaka mupalachise hamavu. Uno eji kulinganga ngachilihi ngocho? Eji kulinganga ngocho kuhichila mundando yakusokola yize yapwa jila yayinene yize Yehova asolwelamo kushishika chenyi kuvatu. (Yowano 3:16; Wavaka-Loma 5:8) Kushishika chaYehova cheji kulingisanga vatu vaze vasaka kwoloka vapandame kuli ikiye. (Yelemiya 31:3) Uno unakwivwa ngachilihi hali Yehova omu unatachikiza jino vyavivulu kutalisa kujila napwilamo wakushishika kuli yove oholyapwa nakulutwe? Hakuwana nge twafwila kupandama kuli Kalunga, ngocho twatela kumusakwilila hazangi yenyi yakwilila hakumuzachilanga nakashishi.