1, 2. Ke ka baka la’ng go ka thwe Kgoši Dafida e be e le yo a tsebago go se botege?

KGOŠI Dafida e be e le yo a tsebago go se botege. Ka nako e nngwe pušo ya gagwe e dubegilego e ile ya hlaselwa ke boradia, moo ditho tša setšhaba sa gagwe di ilego tša mo logela maano-mabe. Go feta moo, Dafida o ile a ekwa ke ba bangwe bao re bego re ka lebelela gore e be bagwera ba gagwe ba kgaufsi. Nagana ka Mikala e lego mosadi wa pele wa Dafida. Mathomong o “be a rata Dafida” gomme ka ntle le pelaelo a mo thekga medirong ya gagwe e le kgoši. Lega go le bjalo, ka morago o ile a thoma go “mo nyatša pelong ya xaxwe,” gaešita le go lebelela Dafida a le ‘bjalo ka yo mongwe wa banna ba šilofetšego megopolo.’—1 Samuele 18:20; 2 Samuele 6:16, 20, bapiša le NW.

² Le gona, go be go na le moeletši wa Dafida e lego Ahitofele. Keletšo ya gagwe e be e tšeelwa godimo bjalo ka ge eka e be e le lentšu la Jehofa ka noši. (2 Samuele 16:23) Eupša ge nako e dutše e e-ya, motho yo yo a bego a botwa le yo a bego a ka tšhollelwa sa mafahleng o ile a fetoga moeki gomme a tsenya letsogo borabeleng bjo bo rulagantšwego malebana le Dafida. Ka gona, ke mang yo e bego e le mohlohleletši wa maano-mabe a? E be e le Abesalomo, morwa wa Dafida ka noši! Motho yo yo a ikholago ka dibaka yo a logago maano-mabe o ile a “[tšwela pele] xo utswa dipelo tša banna ba Isiraele,” a ipea kgoši yeo e lego lenaba la e nngwe. Phetogelo ya Abesalomo e ile ya gola kudu mo e lego gore Kgoši Dafida o ile a gapeletšega gore a tšhabiše bophelo bja gagwe.—2 Samuele 15:1-6, 12-17.

3. Ke kgodišego efe yeo Dafida a bego a e-na le yona?

³ Na go be go se na yo a ilego a dula a botegela Dafida ka go se kwanantšhe? Tlaišegong ya gagwe ka moka, Dafida o be a tseba gore o gona e le ka kgonthe. E be e le mang? E be e se yo mongwe ge e se Jehofa Modimo. Dafida o ile a bolela ka Jehofa gore: “Go motho yo a botegago ka go se kwanantšhe o tla dira ka potego  e sa kwanantšhego.” (2 Samuele 22:26, NW) Potego e sa kwanantšhego ke eng, gomme ke bjang Jehofa e lego mohlala o phagamego kudu wa seka se?

4, 5. (a) “Potego e sa kwanantšhego” ke eng? (b) Potego e sa kwanantšhego e fapana bjang le go botega?

⁴ Go etša ge e dirišwa ka Mangwalong a Sehebere, “potego e sa kwanantšhego” ke botho bjo bo ikgomaretšago go selo ka lerato go fihla morero wa bjona bakeng sa selo seo o fihlelelwa. Go akaretšwa se se fetago go botega. Go feta moo, motho a ka botega feela ka gobane a ikwa a gapeletšega. Ka mo go fapanego, potego e sa kwanantšhego e theilwe ka mo go tseneletšego leratong. * Le gona, polelwana “go botega” e ka dirišwa dilong tše di sa phelego. Ka mohlala, mopsalme o ile a bitša kgwedi gore ke “hlatse-thereši-marung” ka baka la go tšwelela ga yona ka mehla bošego. (Psalme 89:37) Eupša kgwedi e ka se ke ya hlaloswa e le yeo e botegago ka go se kwanantšhe. Ka baka la’ng? Ka gobane potego e sa kwanantšhego ke pontšho ya lerato—selo seo dilo tše di sa phelego di sa kgonego go se bontšha.

⁵ Ka kgopolo ya yona ya Mangwalo, potego e sa kwanantšhego ke e borutho. Go bontšhwa ga yona ga kgonthe go bontšha gore  go na le tswalano magareng ga motho yo a bontšhago seka se le motho yo se bontšhwago go yena. Potego e bjalo e sa kwanantšhego ga se yeo e feto-fetogago. Ga e swane le maphoto a lewatle ao a akga-akgwago ke diphefo tše fokelago mahlakoreng ohle. Ka mo go fapanego, potego e sa kwanantšhego goba lerato le sa kwanantšhego ke le tsepamego le le matla go ka fenya mapheko a thata kudu.

6. (a) Potego e sa kwanantšhego ke e hwetšwago ka sewelo gakaaka’ng gare ga batho, gomme se se bontšhwa bjang ka Beibeleng? (b) Tsela e botse ya go ithuta seo se akaretšwago ke potego e sa kwanantšhego ke efe, gomme ka baka la’ng?

⁶ Ke therešo gore potego e bjalo e sa kwanantšhego e hwetšagala ka sewelo mehleng yeno. Gantši bagwera ba kgaufsi kudu ba atiša go “tliša thsenyêxêlô.” Re atiša go kwa ka batho ba lego lenyalong bao ba tlogelago balekane ba bona. (Diema 18:24; Maleaki 2:14-16) Ditiro tša boradia ke tše tlwaelegilego kudu mo e lego gore re ka ikhwetša re bušeletša mantšu a moporofeta Mika a rego: “Mmotegi yo a sa kwanantšhego ga a sa le gona lefaseng.” (Mika 7:2, NW) Gaešita le ge batho gantši ba palelwa ke go bontšha botho bjo lerato, potego e sa kwanantšhego e hlaola Jehofa ka mo go kgethegilego. Ge e le gabotse, tsela e botse ya go ithuta seo gabotse-botse potego e sa kwanantšhego e se akaretšago ke go hlahloba kamoo Jehofa a bontšhago sebopego se se sebotse sa lerato la gagwe.

7, 8. Ke bjang go ka thwego Jehofa a nnoši ke yo a botegago ka go se kwanantšhe?

⁷ Beibele e bolela ka Jehofa gore: “Yo a botegago ka go se kwanantšhe ke wena o nnoši.” (Kutollo 15:4, NW) Seo se ka ba bjalo bjang? Na batho gotee le barongwa ka dinako tše dingwe ga se ba ka ba bontšha potego e sa kwanantšhego ka tsela e lemogegago? (Jobo 1:1; Kutollo 4:8) Le gona go thwe’ng ka Jesu Kriste? Na ga se yena “mmotegi yo a sa kwanantšhego” yo mogolo wa Modimo? (Psalme 16:10, NW) Ka gona, ke bjang go ka thwego Jehofa a nnoši ke yo a botegago ka go se kwanantšhe?

⁸ Sa pele, gopola gore potego e sa kwanantšhego ke sebopego sa lerato. Ka ge ‘Modimo e le lerato’—e le yena mothofatšo wa seka se—ke mang yo a bego a ka bonagatša potego e sa kwanantšhego  ka mo go feletšego kudu go feta Jehofa? (1 Johane 4:8) Ka kgonthe, barongwa le batho ba ka bonagatša dika tša Modimo, eupša Jehofa a nnoši ke yo a botegago ka go se kwanantšhe ka tekanyo e feletšego. E le “Motála-wa-mabaka,” o be a dutše a bonagatša botho bjo lerato ka nako e telele go feta sebopiwa le ge e le sefe sa lefaseng goba sa legodimong. (Daniele 7:9) Ka gona, Jehofa ke yena mothofatšo wa potego e sa kwanantšhego. O bontšha seka se ka mokgwa woo go se nago sebopiwa seo se ka swanago le yena. Ela hloko mehlala e mengwe.

9. Ke bjang Jehofa e lego yo a ‘botegago medirong ya gagwe ka moka’?

⁹ Jehofa “o a botega medirong ya gagwe ka moka.” (Psalme 145:17, NW) Ka tsela efe? Psalme 136 e nea karabo. Moo go tsopolwa ditiro tše mmalwa tša go phološa ga Jehofa, go akaretša go phološwa mo go kgahlišago ga ba-Isiraele go phatša Lewatle le Lehwibidu. Ka mo go lemogegago, temana e nngwe le e nngwe ya psalme ye e gatelelwa ka polelwana e rego: “Xobane botho bya xaxwe [bjo lerato, NW] [goba potego e sa kwanantšhego] ké bya neng le neng.” Psalme ye e akareditšwe go Dipotšišo Bakeng sa go Naganišiša go letlakala 289. Ge o dutše o bala ditemana tšeo, o tla kgahlišwa kudu ke ditsela tše dintši tšeo ka tšona Jehofa a bontšhitšego botho bjo lerato bathong ba gagwe. Ee, Jehofa o bontšha potego e sa kwanantšhego go bahlanka ba gagwe bao ba botegago ka go kwa dillo tša bona tša go kgopela thušo le ka go gata mogato ka nako e beilwego. (Psalme 34:6) Lerato la Jehofa le le sa kwanantšhego bakeng sa bahlanka ba gagwe ga le tekeme ge feela ba dula ba mmotegela ka go se kwanantšhe.

10. Jehofa o bonagatša bjang potego e sa kwanantšhego mabapi le ditekanyetšo tša gagwe?

¹⁰ Go oketša moo, Jehofa o bonagatša potego ya gagwe e sa kwanantšhego go bahlanka ba gagwe ka go dula a botegela ditekanyetšo tša gagwe. Ka go se swane le batho ba bangwe bao ba feto-fetogago, bao ba hlahlwago ke mokgwa feela wa go tšeega maikwelong, Jehofa ga a akga-akgege tseleng yeo a lebelelago ka gona se se nepagetšego le se se fošagetšego. Go theoša le nywaga-kete, pono ya gagwe ka dilo tše bjalo ka go dirišana le meoya, borapedi bja medimo ya diswantšho le go bolaya e dutše e le yeo e sa fetogago. O boletše ka moporofeta wa gagwe Jesaya gore: “Le tlo ba la tšofala kè sa fêla kè le Yêna-é.” (Jesaya 46:4) Ka  gona, re ka ba le kgodišego ya gore re tla holega ka go latela tlhahlo e kwagalago ya boitshwaro yeo e hwetšwago ka Lentšung la Modimo.—Jesaya 48:17-19.

11. Nea mehlala bakeng sa go bontšha gore Jehofa o botegela dikholofetšo tša gagwe.

¹¹ Le gona Jehofa o bontšha potego ya gagwe e sa kwanantšhego ka go dula a botegela dikholofetšo tša gagwe. Ge a boletše selo e sa le pele, se a phethagala. Ka gona Jehofa o boletše gore: “Le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.” (Jesaya 55:11) Ka go dula a botegela lentšu la gagwe, Jehofa o bontšha go botegela batho ba gagwe ka go se kwanantšhe. Ga a ba dire gore ba dule ba letile ka go tshwenyega ka selo se sengwe seo a sa rerago go se dira. Botumo bja Jehofa tabeng ye ke bjo bo se nago bosodi mo e lego gore mohlanka wa gagwe Jošua o be a ka kgona go bolela gore: “Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.” (Jošua 21:45) Ka gona, re ka kgodišega gore le ka mohla re ka se ke ra nyamišwa ka baka la go palelwa mo go itšego ga Jehofa ke go phethagatša dikholofetšo tša gagwe.—Jesaya 49:23; Ba-Roma 5:5.

12, 13. Ke ka ditsela dife botho bja Jehofa bjo lerato e lego “bya neng le neng”?

¹² Bjalo ka ge go boletšwe pejana, Beibele e re botša gore botho bja Jehofa bjo lerato “ké bya neng le neng.” (Psalme 136:1) Se se bjalo bjang? Gare ga dilo tše dingwe, go lebalela ga Jehofa dibe ke ga sa ruri. Go etša ge go ahla-ahlilwe go Kgaolo 26, Jehofa ga a latišiše diphošo tša nakong e fetilego tšeo motho a di lebaletšwego. Ka ge “ba dirile dibe bohle, ba hlaya letaxô la Modimo,” yo mongwe le yo mongwe wa rena o swanetše go leboga gore botho bjo lerato bja Jehofa ke bja neng le neng.—Ba-Roma 3:23.

¹³ Eupša botho bjo lerato bja Jehofa ke bja neng le neng ka kgopolo e nngwe gape. Lentšu la gagwe le bolela gore moloki “[o tla] swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.” (Psalme 1:3) Nagana ka sehlare seo se enywago kudu seo matlakala a sona a sa kego a pona le ka mohla! Ka gona le rena ge e ba re thabela Lentšu la Modimo e le ka  kgonthe, maphelo a rena e tla ba a matelele, a khutšo le ao a enywago kudu. Ditšhegofatšo tšeo Jehofa a di neago bahlanka ba gagwe ba botegago ka potego e sa kwanantšhego ke tša ka mo go sa felego. Ka kgonthe, lefaseng le lefsa la go loka leo Jehofa a tlago go le tliša, batho ba kwago ba tla thabela botho bja gagwe bjo lerato go iša ka mo go sa felego.—Kutollo 21:3, 4.

14. Jehofa o bontšha bjang go leboga potego e sa kwanantšhego ya bahlanka ba gagwe?

¹⁴ Jehofa o bonagaditše gantši potego ya gagwe e sa kwanantšhego. Ka ge Jehofa e le yo a sa feto-fetogego ka tsela e phethagetšego, potego e sa kwanantšhego yeo a e bontšhago bahlanka ba gagwe ba botegago ga e fele le ka mohla. Mopsalme o ngwadile gore: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila. Xobane Morêna ó rata tša tokô; [batho ba gagwe bao ba botegago ka go se kwanantšhe, NW] xa’ ba lahle; o tlo ba lôtôla neng le neng.” (Psalme 37:25, 28) Ke therešo gore e le Mmopi, Jehofa o swanelwa ke gore re mo rapele. (Kutollo 4:11) Lega go le bjalo, ka ge e le yo a botegago ka go se kwanantšhe, Jehofa o tšeela godimo ditiro tša rena tša go botega.—Maleaki 3:16, 17.

15. Hlalosa kamoo ditirišano tša Jehofa le Isiraele di phagamišago go botega ga Gagwe ka go se kwanantšhe.

¹⁵ Ka botho bja gagwe bjo lerato, Jehofa o thuša batho ba gagwe leboelela ge ba le tlalelong. Mopsalme o re botša gore: “Ké Yêna Molotodi wa meôya ya baratwa [babotegi] b’axwe; ó ba namolêla diatleng tša bakxôpô.” (Psalme 97:10) Nagana ka ditirišano tša gagwe le setšhaba sa Isiraele. Ka morago ga go phološwa ga bona ka mohlolo go phatša Lewatle le Lehwibidu, ba-Isiraele ba ile ba opelela Jehofa ka gore: “Xomme sethšaba sa baphološwa ba xaxo, O se etetša ka botho [goba “lerato le sa kwanantšhego,” mongwalo wa ka tlase wa NW].” (Ekisodo 15:13) Go phološwa Lewatleng le Lehwibidu e be e tloga e le tiro ya lerato le sa kwanantšhego la Jehofa. Ka baka leo, Moše o ile a botša ba-Isiraele gore: “Xe Morêna à Le ratile, à Le hlaotše, xa se ka xobane Le feta dithšaba tše dingwê ka bontši, xobane Le be Le le sethšaba se senyenyane xo dithšaba ka moka; Morêna ó dirilwe ke leratô; ó be a rata xo phêtha  kênô ye a e enetšexo bô-tata-weno, ’me a Le khuduša ka seatla se matla, a Le namolêla kwa ngwakong wa bohlanka letsoxong la Farao kxoši ya Egipita.”—Doiteronomio 7:7, 8.

16, 17. (a) Ke go hloka tebogo gofe mo go šiišago moo go ilego gwa bontšhwa ke ba-Isiraele, lega go le bjalo, Jehofa o ile a ba bontšha bjang kwelobohloko? (b) Ba-Isiraele ba bantši ba ile ba bontšha bjang gore go ile “xwa hlôkwa moreku” bakeng sa bona, gomme ke mohlala ofe wa temošo woo se se o neago bakeng sa rena?

¹⁶ Ee, ba-Isiraele e le setšhaba ba ile ba palelwa ke go bontšha tebogo bakeng sa botho bja Jehofa bjo lerato ka gobane ka morago ga go phološwa ga bona ba ile “ba fela ba iša pele go senya go Yena, ba rumola Yo-godimo-dimo.” (Psalme 78:17, PK) Go theoša le nywaga-kgolo, ba ile ba rabela leboelela, ba tlogela Jehofa le go retologela medimong ya maaka le mekgweng ya boheitene yeo e bego e ba tlišetša feela kgobogo. Lega go le bjalo, Jehofa ga se a ka a roba kgwerano ya gagwe. Go e na le moo, ka moporofeta Jeremia, Jehofa o ile a lopa batho ba gagwe ka gore: “Boa, wene Isiraele moaroxi. . . . Nka se Xo xerule, xobane ke yo botho.” (Jeremia 3:12) Lega go le bjalo, go etša ge go bontšhitšwe go Kgaolo 25, ba-Isiraele ba bantši ga se ba ka ba tutueletšega go dira diphetogo. Ruri, “[ba ile ba tšwela pele] ba dira bahlanka ba Modimo sekwêrô, ba nyatša se ba se boletšexo, ba fôtla baporofeta ba xaxwe.” Mafelelo e ile ya ba afe? Mafelelong “kxalefô ya Morêna ya ba ya xolêla sethšaba sa xaxwe, xwa hlôkwa moreku.”—2 Koronika 36:15, 16.

¹⁷ Ke eng seo re ithutago sona go se? Gore potego ya Jehofa e sa kwanantšhego ke e sa belaelwego goba e fora-foretšegago. Ke therešo gore Jehofa ke “yo a tletšego botho bjo lerato,” gomme o thabela go bontšha kgaugelo ge go e-na le lebaka la go dira bjalo. Eupša go direga’ng ge mofoši a ipontšha e le yo kgopo wa go se fetoge? Maemong a bjalo, Jehofa o kgomarela ka go tia ditekanyetšong tša gagwe ka noši tša go loka gomme o nea kahlolo e šoro. Go etša ge Moše a ile a botšwa, “[Jehofa a ka] se kê a lesa xo ôtla mosenyi.”—Ekisodo 34:6, 7.

18, 19. (a) Ke bjang go otla ga Jehofa bakgopo ka bogona e lego tiro ya go bontšha potego e sa kwanantšhego? (b) Ke ka tsela efe Jehofa a bontšhago potego ya gagwe e sa kwanantšhego go bahlanka ba gagwe bao ba ilego ba tlaišwa go fihla lehung?

¹⁸ Go otla ga Modimo batho ba kgopo ka bogona ke tiro ya go  bontšha potego e sa kwanantšhego. Bjang? Tšhupetšo e nngwe e hwetšwa ka pukung ya Kutollo ditaelong tšeo Jehofa a di neago barongwa ba šupago: “Sepelang Le y’o thšolla merufsi yeo e šupaxo ya boxale bya Modimo kwa lefaseng.” Ge morongwa wa boraro a tšhollela morufsi wa gagwe “dinokeng le didibeng tša meetse,” meetse a ile a fetoga madi. Ke moka morongwa a botša Jehofa gore: “O ahlotše ka tokô, Wene Mo-ba-xôna, Mo-hwetšwa-à-le-xôna, Wene [Yo a botegago ka go se kwanantšhe, NW], xe O ahlotše ka mokxwa woo; xobane ba thšolotše madi a bakxêthwa ba xaxo; byale O ba file madi xore ba nwê ôna; ké sôna se ba swanetšexo.”—Kutollo 16:1-6.

¹⁹ Ela hloko gore ge a dutše a le gare a fetišetša molaetša woo wa kahlolo, morongwa o bitša Jehofa gore ke “Yo a botegago ka go se kwanantšhe.” Ka baka la’ng? Ka gobane ka go fediša batho ba kgopo, Jehofa o bontšha go botegela ga gagwe bahlanka ba gagwe ka go se kwanantšhe, bao ba bantši ba bona ba ilego ba tlaišwa go fihla lehung. Ka potego Jehofa o bolokile ba bjalo e le ba phelago kgopolong ya gagwe. O hlologetšwe go bona gape babotegi ba bao ba se sa lego gona gomme Beibele e tiišetša gore morero wa gagwe ke go ba putsa ka go ba tsoša bahung. (Jobo 14:14, 15) Jehofa ga a lebale bahlanka ba gagwe bao ba botegago ka go se kwanantšhe feela ka gobane ba se sa phela. Ka mo go fapanego, “go Yena bohle ke ba ba phelago.” (Luka 20:37, 38, PK) Morero wa  Jehofa wa go bušetša bao ba lego kgopolong ya gagwe bophelong ke bohlatse bjo matla bja potego ya gagwe e sa kwanantšhego.

20. ‘Dibja tša go bonagatša kgaugelo’ ke bomang, gomme ke bjang Jehofa a bontšhago potego e sa kwanantšhego bakeng sa tšona?

²⁰ Go theoša le histori, Jehofa o bontšhitše potego e sa kwanantšhego e lemogegago go batho ba botegago. Ge e le gabotse, ka nywaga e dikete, Jehofa ‘o ile a kgotlelela ka go se fele pelo dibja tša go bontšhwa bogale tšeo di diretšwego go senywa.’ Ka baka la’ng? “Xore a bônaxatšê lehumô la letaxô la xaxwe ka dibya tšeo tša xo bônaxatša kxauxêlô, tše a di lokišeditšexo xo tlo išwa letaxong.” (Ba-Roma 9:22, 23, bapiša le NW.) “Dibya tšeo tša xo bônaxatša kxauxêlô” ke batho bao ba sekametšego go lokeng bao ba tloditšwego ka moya o mokgethwa gore e be baja-bohwa gotee le Kriste Mmušong wa gagwe. (Mateo 19:28) Ka go bulela dibja  tše tša go bonagatša kgaugelo tsela ya phološo, Jehofa o bile yo a botegago ka go se kwanantšhe go Aborahama yo a ilego a dira kholofetšo ye ya kgwerano le yena: “Dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.”—Genesi 22:18.

21. (a) Jehofa o bontšha bjang potego e sa kwanantšhego go “lešaba le lexolo” leo le nago le tebelelo ya go phologa “tlaišexong e kxolo”? (b) Potego ya Jehofa e sa kwanantšhego e go tutueletša go dira’ng?

²¹ Jehofa o bontšha potego e swanago e sa kwanantšhego go “lešaba le lexolo” leo le nago le tebelelo ya go phologa “tlaišexong e kxolo” le go phela ka mo go sa felego lefaseng la paradeise. (Kutollo 7:9, 10, 14) Gaešita le ge bahlanka ba gagwe ba sa phethagala, ka potego e sa kwanantšhego Jehofa o fetišetša go bona sebaka sa go phela ka mo go sa felego lefaseng la paradeise. O dira bjang seo? Ka topollo—pontšho e kgolo kudu ya potego e sa kwanantšhego ya Jehofa. (Johane 3:16; Ba-Roma 5:8) Potego ya Jehofa e sa kwanantšhego e gogela bao dipelong tša bona ba swerwego ke tlala ya go loka. (Jeremia 31:3) Na ga o ikwe o le kgaufsi le Jehofa kudu ka baka la potego e tseneletšego e sa kwanantšhego yeo a e bontšhitšego le yeo a sa tlago go e bontšha? Ka ge kganyogo ya rena e le go batamela kgaufsi le Modimo, eka re ka arabela leratong la gagwe ka go matlafatša boikemišetšo bja rena bja go mo hlankela ka potego e sa kwanantšhego.