CAPITULO 28
“Abo So Ta Leal”
1, 2. Dicon nos por bisa cu Rei David tawata sa bon kico kiermen deslealtad?
REI DAVID tawata sa bon kico kiermen deslealtad. Na un dado momento su reinado turbulento tawata manera den un neishi di intriga. Asta su propio paisanonan tawata traha complot contra dje. De echo, algun di esnan cu a traiciona David tawata hende cu lo mester tawata su compañeronan di mas intimo. Tuma por ehempel Mical, e prome casa di David. Na cuminsamento e tawata “enamora di David”, y sin duda el a apoya David cu su responsabilidadnan di Rei. Pero despues el a cuminsa “despreci’e den su curason.” Asta el a considera David “manera un di e hombernan cabes bashi.”—1 Samuel 18:20; 2 Samuel 6:16, 20, NW.
2 Otro ehempel ta David su consehero personal, Ahitofel. E tawata un homber respeta. Ora e duna conseho, hende tawata considera nan mescos cu declaracion direct di Yehova. (2 Samuel 16:23) Pero cu tempo e homber di confiansa aki a bira un traido, y a uni cu un rebelion organisa pa tumba David. Anto ta ken a instiga e conspiracion ei? Absalon, David su propio yiu! E oportunista traido ei “a horta curason di e hombernan di Israel” y a lanta como un Rei rival. E rebelion di Absalon a haya asina tanto forsa cu Rei David a hay’e forsa di hui pa su bida.—2 Samuel 15:1-6, 12-17.
3. Ki confiansa David tawatin?
3 No tawatin ningun hende cu a keda leal na David? Den tur su adversidadnan, David tawata sa cu tawatin un persona cu si ta leal. Ken? Ken mas sino Yehova Dios. David a bisa tocante Yehova: “Na e hende misericordioso [“leal”, NW] bo ta mustra bo mes misericordioso [“leal”, NW].” (2 Samuel 22:26) Kico ta lealtad, y con Yehova ta duna nos e ehempel mas eleva di e cualidad aki?
Kico Ta Lealtad?
4, 5. (a) Kico ta “lealtad”? (b) Ki diferencia tin entre lealtad y fieldad?
4 Caminda e Scritura Hebreo ta uza e palabra “lealtad”, e kiermen un bondad cu bo ta keda mustra na algo te ora cu e proposito p’e bira realidad. E ta encera mas cu fieldad. Un persona por ta fiel simplemente debi na un sentido di responsabilidad. Na contraste, ta amor ta produci lealtad. Ademas, por uza e palabra “fiel” pa describi cierto obhetonan sin bida tambe. Por ehempel, e salmista a bisa cu luna ta ‘un testigo fiel na shelo’, door cu e ta aparece regularmente den anochi. (Salmo 89:37) Pero bo no por bisa cu luna ta leal. Dicon no? Debi cu lealtad ta un muestra di amor, y un obheto sin bida no por mustra amor.
Bijbel ta yama luna un testigo fiel, pero ta criaturanan inteligente so por refleha Yehova su lealtad
5 Den e sentido cu Bijbel ta uz’e, lealtad ta un cualidad mara na un sintimento di cariño profundo. Caminda lealtad ta ser mustra, bo sa tambe cu ta existi un relacion entre dos persona; esun cu ta mustra lealtad y esun na ken lealtad ta ser mustra. Y e tipo di lealtad ei no ta varia. E no ta manera ola di lama cu biento ta benta p’aki y p’aya. Al contrario, lealtad of amor leal ta fuerte y stabil, y e por vence e obstaculonan di mas dificil.
6. (a) Con scars lealtad ta den hende, y con Bijbel ta indica esaki? (b) Cua ta e miho manera pa nos siña kico lealtad ta encera, y dicon?
6 Ta berdad cu awendia e tipo di lealtad ei ta scars. Demasiado biaha compañeronan intimo ta “dispuesto pa kibra otro na pida-pida.” Cada bes nos ta tende di mas hende cu ta bandona nan casa. (Proverbionan 18:24, NW; Malakias 2:14-16) Actonan di traicion ta asina comun cu nos por haya nos mes ta ripiti e palabranan di profeta Mikeas: “E persona fiel [“leal”, NW] a perece for di e tera.” (Mikeas 7:2) Apesar cu hopi bes hende ta keda sin mustra bondad amoroso, lealtad ta un caracteristica tipico di Yehova. De echo, e miho manera pa nos siña kico exactamente lealtad ta encera, ta door di studia con Yehova ta expresa e gran faseta aki di su amor.
Yehova Su Lealtad Incomparabel
7, 8. Den ki sentido nos por bisa cu ta Yehova so ta leal?
7 Tocante Yehova Bijbel ta bisa: “Abo so ta leal.” (Revelacion 15:4, NW) Pero, con por ta? Acaso hende y angel no a yega di demostra lealtad remarcabel? (Job 1:1; Revelacion 4:8) Y kico di Hesucristo? Acaso e no ta e “leal” principal di Dios? (Salmo 16:10, NW) Pues, dicon anto Bijbel ta bisa cu ta Yehova so ta leal?
8 Na prome luga, tene na mente cu lealtad ta un faseta di amor. Ya cu “Dios ta amor”, siendo e personificacion mes di e cualidad aki, ta ken otro por demostra lealtad na un manera mas completo cu Yehova? (1 Huan 4:8) Ta berdad cu angel y hende por refleha Dios su cualidadnan, pero ta Yehova su lealtad so no tin comparacion. Como e “Anciano di Dianan”, e ta esun cu a demostra bondad amoroso pa mas tanto tempo cu tur criatura den shelo of riba tera. (Daniel 7:9) Pesei, ta Yehova ta e esencia mes di lealtad. E ta demostra e cualidad aki na un manera cu ningun criatura no por iguala. Ban wak algun ehempel.
9. Den ki sentido Yehova ta leal “den tur su obranan”?
9 Yehova ta leal “den tur su obranan.” (Salmo 145:17) Con asina? Salmo 136 ta duna e contesta. E ta menciona varios di e biahanan cu Yehova a actua pa salba su pueblo, incluso e biaha cu el a libra nan na un manera dramatico door di laga nan pasa door di Lama Cora. Ta interesante pa nota cu cada versiculo di e salmo aki ta caba cu e expresion: “Pasobra su misericordia [of, lealtad] ta pa semper.” E salmo aki ta inclui den e cuadro Pregunta pa Medita Ariba na pagina 289. Bo no por lesa e versiculonan aki sin keda impresiona door di e cantidad di maneranan cu Yehova a mustra bondad amoroso na su pueblo. Si, Yehova ta mustra lealtad na su sirbidonan fiel door di tende nan sclamacionnan pa ausilio y door di tuma accion na e momento indica. (Salmo 34:6) Tanten cu su sirbidonan keda leal na dje, Yehova su amor leal pa nan no ta faya.
10. Con Yehova ta mustra su lealtad den loke ta toca su normanan?
10 Ademas, Yehova ta demostra lealtad na su sirbidonan door di keda fiel na su normanan. E no ta manera cierto hendenan cu ta laga capricho momentaneo y sentimentalismo controla nan. Yehova no ta varia den su punto di bista tocante loke ta bon y loke ta malo. Atrabes di tur milenio, su punto di bista tocante por ehempel spiritismo, idolatria y asesinato no a cambia. Pa medio di su profeta Isaias el a declara: “Te na boso biehes ami lo ta mescos.” (Isaias 46:4) Pesei, nos por confia cu si nos sigui e guia moral splica claramente den e Palabra di Dios, nos lo saca beneficio sigur.—Isaias 48:17-19.
11. Duna algun ehempel cu ta mustra cu Yehova ta fiel na su promesanan.
11 Tambe Yehova ta mustra lealtad door di keda fiel na su promesanan. Ora e predeci algo, esei ta sosode tambe. Pesei Yehova a bisa: “Mi palabra cu ta sali for di mi boca . . . lo no bolbe bashi serca mi, sin cumpli cu loke mi ta desea, y sin alcansa e proposito cu cual mi a mand’e.” (Isaias 55:11) Door di keda fiel na su promesanan, Yehova ta mustra lealtad na su pueblo. E no ta laga nan keda anhela algo cu e no tin intencion di laga sosode. Yehova su reputacion ta asina impecabel den e aspecto aki cu su sirbido Hosue por a bisa: “Ni un di e bon promesanan cu SEÑOR a haci na e cas di Israel no a faya; tur a keda cumpli.” (Hosue 21:45) Pesei, nos por tin confiansa cu nunca nos lo no keda desapunta debi cu Yehova a keda sin cumpli cu un di su promesanan.—Isaias 49:23; Romanonan 5:5.
12, 13. Den ki sentidonan e bondad amoroso di Yehova ta “pa semper”?
12 Manera nos a bisa caba, Bijbel ta mustra nos cu Yehova su bondad amoroso ta “pa semper.” (Salmo 136:1) Dicon nos por bisa asina? Pa cuminsa, ora Yehova pordona un pica, e ta pordon’e pa semper. Manera a bin dilanti na Capitulo 26, Yehova no ta bai bek riba fayonan cu un hende a comete den pasado si el a pordona e picanan ei caba. Debi cu nos “tur a peca y ta falta e gloria di Dios”, nos tur mester ta gradicido cu Yehova su bondad amoroso ta pa semper.—Romanonan 3:23.
13 Pero Yehova su bondad amoroso ta pa semper den un otro sentido tambe. Su palabra ta bisa cu e hende husto “lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” (Salmo 1:3) Imagina bo un palo grandi cu su blachinan no ta seca nunca! Mescos asina, si di berdad nos tin delicia den e Palabra di Dios, nos bida lo ta largo, pacifico y fructifero. E bendicionnan cu Yehova ta drama lealmente riba su sirbidonan fiel ta eterno. Si, den e husto mundo nobo cu Yehova lo trece, humanidad obediente lo experimenta su bondad amoroso pa semper.—Revelacion 21:3, 4.
‘Yehova No Ta Bandona Esnan Leal na Dje’
14. Con Yehova ta mustra cu e ta aprecia cu su sirbidonan ta leal na dje?
14 Bes tras bes Yehova a yega di demostra cu e ta leal. Debi cu Yehova ta perfectamente consistente, e lealtad cu e ta mustra na su sirbidonan fiel tampoco no ta cambia. Un salmista a skirbi: “Mi tawata jong, y awor mi ta bieu; ma nunca mi no a mira e husto desampara, ni su desendientenan ta pidi pan. Pasobra SEÑOR ta stima husticia y no ta bandona su santonan [“esnan leal na dje”, NW].” (Salmo 37:25, 28) Ta berdad cu Yehova ta nos Creador y e merece pa nos ador’e. (Revelacion 4:11) Pero toch, debi cu Yehova ta leal, e ta aprecia ora nos actua cu fieldad na dje.—Malakias 3:16, 17.
15. Splica con e manera cu Yehova a trata cu Israel ta hala atencion na su lealtad.
15 Den Yehova su bondad amoroso e ta cla pa yuda hende bes tras bes ora nan ta pasa den dificultad. Un salmista ta bisa nos cu “e ta preserva alma di su santonan; e ta libra nan for di man di e malbado.” (Salmo 97:10) Tuma por ehempel e manera cu el a trata cu e nacion di Israel. Despues cu el a libra nan door di laga nan pasa milagrosamente door di Lama Cora, e Israelitanan a canta y proclama tocante Yehova: “Den bo misericordia [of, lealtad] bo a guia e pueblo cu bo a redimi.” (Exodo 15:13) Sin duda, e liberacion na Lama Cora tawata un expresion di amor leal di Yehova su parti. Pesei Moises a bisa e Israelitanan: “SEÑOR no a stima boso ni scohe boso . . . pasobra boso tawata mas hopi cu cualkier otro pueblo, pasobra boso tawata esun di mas poco di tur pueblo, ma pasobra SEÑOR tawata stima boso y a warda e huramento cu el a hura na boso tatanan, pesei SEÑOR a saca boso pa medio di un man poderoso y a redimi boso for di e cas di sclabitud, for di man di Farao, rei di Egipto.”—Deuteronomio 7:7, 8.
16, 17. (a) Ki gran falta di aprecio e Israelitanan a mustra, y sinembargo con Yehova a trata nan cu compasion? (b) Con mayoria Israelita a mustra cu “no tawatin remedi mas” pa nan, y ki spiertamento e ehempel ei ta duna nos?
16 Ta berdad si cu como nacion e Israelitanan no a mustra aprecio pa e bondad amoroso di Yehova, pasobra despues cu el a libra nan “toch nan a sigui haci pica contra dje door di rebeldia contra e Haltisimo den desierto.” (Salmo 78:17) Atrabes di siglonan, bes tras bes nan a rebela. Nan tawata bandona Yehova pa sigui tras di diosnan falso y practicanan pagano cu no a haci nada otro pa nan sino degrada nan. Toch, ainda Yehova no a kibra su pacto. En bes di esei Yehova a suplica nan asta mas via profeta Yeremias, bisando: “Bolbe, Israel infiel . . . Lo mi no mira riba bo cu rabia, pasobra mi ta misericordioso [“leal”, NW].” (Yeremias 3:12) Pero manera Capitulo 25 ta mustra, esaki no a conmove mayoria Israelita. De echo, “continuamente nan tawata haci bofon di e mensaheronan di Dios, y tawata desprecia su palabranan y haci bofon di su profetanan.” Cu ki resultado? Finalmente, “e furia di SEÑOR a lanta contra su pueblo, te ora cu no tawatin remedi mas.”—2 Cronicanan 36:15, 16.
17 Kico esei ta siña nos? Cu maske Yehova ta leal, e no ta ciego ni bo no por tum’e haci kens. Ta berdad cu Yehova ta “yen di bondad inmereci”, y cu e ta masha contento di por mustra misericordia ora tin base pa e haci esei. Pero, kico ta pasa si un malechor ta duna evidencia di ta un malbado incorigibel? Den tal caso Yehova ta pega na su normanan husto y ta dicta sentencia contra un hende asina. Ta manera Dios a bisa Moises: “Di ningun manera [Yehova] lo no laga di castiga e culpabel.”—Exodo 34:6, 7.
18, 19. (a) Con, riba su mes caba, e echo cu Yehova ta castiga malbadonan ta un acto di lealtad? (b) Di ki manera Yehova ta bai demostra su lealtad na su sirbidonan cu a ser persigui te na morto?
18 Riba su mes caba, e echo cu Dios ta castiga malbadonan ta un acto di lealtad. Con asina? Nos por haya un indicacion di esaki den e buki di Revelacion, caminda Yehova ta duna shete angel e siguiente ordo: “Bai y basha e shete conchinan di e furia di Dios riba tera.” Ora e di tres angel ta basha su conchi “den e riunan y e fuentenan di awa”, esakinan ta bira sanger. E ora ei e angel ta bisa Yehova: “Husto bo ta, o Señor, kende ta y kende tawata, o abo, Esun cu ta [“leal”, NW], pasobra bo a husga e cosnan aki; pasobra nan a drama e sanger di e santonan y e profetanan, y bo a duna nan sanger pa bebe. Nan ta merece esaki.”—Revelacion 16:1-6.
Yehova lo corda lealmente riba esnan cu a keda leal te na morto, y e lo resusita nan
19 Ripara cu e angel, pronunciando e mensahe di huicio ei, ta yama Yehova ‘Esun leal.’ Dicon? Debi cu, door di destrui malbadonan Yehova ta mustra lealtad na su sirbidonan, pasobra malbadonan a yega di persigui hopi di nan te na morto. Den lealtad Yehova ta tene sirbidonan asina bibo den su memoria. E ta anhela di mira e hendenan fiel aki bek, y Bijbel ta confirma cu Dios su proposito ta di recompensa nan cu un resureccion. (Job 14:14, 15) Yehova no ta lubida su sirbidonan leal djis pasobra nan no ta na bida mas. Al contrario, ‘p’e nan tur ta bibo.’ (Lucas 20:37, 38) Yehova su proposito di restaura bida di tur esnan cu ta den su memoria ta un prueba poderoso di su lealtad.
Bernard Luimes (ariba) y Wolfgang Kusserow (meimei) a ser ehecuta door di Nazi
Un grupo politico a mata Moses Nyamussua cu lansa
Yehova Su Amor Leal Ta Habri Caminda pa Salbacion
20. Ken ta e “obhetonan di misericordia”, y con Yehova ta mustra lealtad na nan?
20 Atrabes di historia, Yehova a mustra un grado remarcabel di lealtad na hende fiel. De echo, pa miles di aña Yehova a “soporta cu hopi pasenshi e obhetonan di furia, prepara pa destruccion.” Pakico? “Pa e por haci conoci e rikesa di su gloria riba e obhetonan di misericordia, cuanan el a prepara di antemano pa gloria.” (Romanonan 9:22, 23) E “obhetonan di misericordia” aki ta hende cu e actitud corecto, ungi cu spirito santo pa bira coheredero cu Cristo den su Reino. (Mateo 19:28) Door di habri caminda pa e obhetonan di misericordia aki por haya salbacion, Yehova a mustra lealtad na Abraham, pasobra pa medio di un pacto el a primintie: “Den bo desendientenan tur e nacionnan di e tera lo ta bendiciona, pasobra bo a obedece mi bos.”—Genesis 22:18.
Debi na e lealtad di Yehova, tur su sirbidonan fiel ta carga un speransa confiabel pa futuro
21. (a) Con Yehova ta mustra lealtad na e “multitud grandi” cu tin speransa di sali for di e “gran tribulacion”? (b) Kico Yehova su lealtad ta motiva bo pa haci?
21 Yehova ta mustra lealtad na e “multitud grandi” tambe, esta, esnan cu tin speransa di sali for di e “gran tribulacion” y biba pa semper den paradijs riba tera. (Revelacion 7:9, 10, 14) Maske Yehova su sirbidonan ta imperfecto, lealmente e ta duna nan oportunidad di biba pa semper den paradijs riba tera. Di ki manera e ta hacie? Pa medio di e rescate—e prueba di mas grandi di Yehova su lealtad. (Huan 3:16; Romanonan 5:8) Yehova su lealtad ta atrae hende cu ta cana cu hamber pa husticia den nan curason. (Yeremias 31:3) Ora bo pensa riba e lealtad profundo cu Yehova a mustra caba y lo mustra na bo den futuro, bo no ta sinti bo mas serca dje? Ya cu nos tin deseo di hala serca Dios, laga nos reacciona riba su amor door di fortalece nos determinacion di sirbie cu lealtad.
