1-3. (a) Wetin bin mek Jizɔs want fɔ falamakata in Papa? (b) Us tri we dɛn we Jizɔs bin sho lɔv we wi de kam tɔk bɔt?

YU DƆN ɛva si smɔl bɔbɔ we de tray fɔ falamakata in papa? Sɔntɛm di bɔbɔ go de tray fɔ falamakata di we aw in papa de waka, aw i de tɔk, ɔ aw i de du sɔntin. As tɛm de go, di bɔbɔ go ivin bigin du di gud tin dɛn we in papa de du ɛn di tin dɛn we i de du fɔ mek i gɛt tayt padi biznɛs wit Gɔd. We bɔypikin lɛk in papa ɛn we i de kɔle am, dat de mek i want fɔ bi lɛk in papa.

² Wetin wi go se bɔt di rileshɔnship we de bitwin Jizɔs ɛn in Papa we de na ɛvin? Wan tɛm Jizɔs bin se: “A lɛk di Papa.” (Jɔn 14:​31) Nɔbɔdi nɔ de we lɛk Jiova pas Jizɔs we bin dɔn de wit am lɔn lɔn tɛm bifo I mek ɛni ɔda tin. Na dis lɔv we Jizɔs bin gɛt fɔ in Papa bin mek i nɔ kɔmɔt biɛn am, ɛn i bin want fɔ falamakata am.—Jɔn 14:​9.

³ Insay di fɔs chapta dɛn na dis buk, wi bin tɔk bɔt aw Jizɔs bin falamakata in Papa pafɛkt wan. I bin falamakata di we aw Jiova de yuz in pawa, in jɔstis, ɛn in sɛns. Bɔt aw Jizɔs bin sho se i gɛt di lɔv we in Papa gɛt? Lɛ wi tɔk bɔt tri we dɛn aw Jizɔs bin sho lɔv. I bin sho se i nɔ jɔs bisin bɔt insɛf, i bin gɛt sɔri-at, ɛn i bin rɛdi fɔ fɔgiv.

4. Aw Jizɔs bin sho se i lɛk wi ɛn bisin bɔt wi pas ɛni ɔda mɔtalman?

⁴ Jizɔs bin sɛt fayn ɛgzampul fɔ sho se i lɛk pipul dɛn ɛn i nɔ jɔs bisin bɔt insɛf. We pɔsin nɔ jɔs bisin bɔt insɛf, dat min se i de put wetin ɔda pipul dɛn want bifo wetin in want. Aw Jizɔs bin sho se i gɛt dis kayn lɔv? Insɛf sɛf bin  tɔk se: “Nɔbɔdi nɔ gɛt lɔv pas di pɔsin we gi in layf fɔ in padi dɛn.” (Jɔn 15:​13) Jizɔs bin gri fɔ gi in pafɛkt layf fɔ wi. No ɔda mɔtalman nɔ de we dɔn sho se i lɛk wi dis kayn we. Bɔt Jizɔs bin du ɔda tin dɛn bak we sho se i lɛk wi ɛn i nɔ jɔs bisin bɔt insɛf.

5. Wetin mek wi go se Gɔd in Pikin bin sho se i lɛk wi we i lɛf ɛvin fɔ kam de na dis wɔl?

⁵ Jizɔs we na di wangren Pikin we Jiova insɛf sɛf mek, bin gɛt ay ay pozishɔn na ɛvin bifo i kam na dis wɔl. I bin gɛt tayt padi biznɛs wit Jiova ɛn ɔl di enjɛl dɛn. Bɔt pan ɔl we Jizɔs bin de ɛnjɔy dɛn tin dɛn ya, i bin “lɛf ɔltin we i gɛt ɛn tan lɛk slev ɛn bi mɔtalman.” (Filipians 2:​7) I bin gri fɔ kam de na dis wɔl we de “na di wikɛd wan in an” ɛn fɔ de wit mɔtalman dɛn we de sin. (1 Jɔn 5:​19) Dis tin we Gɔd in Pikin bin du bin sho se i rili lɛk wi.

6, 7. (a) Us we dɛn we Jizɔs bin sho se i lɛk pipul dɛn ɛn i nɔ jɔs bisin bɔt insɛf we i bin de prich na dis wɔl? (b) Us fayn ɛgzampul de na Jɔn 19:​25-27 we de sho se Jizɔs gɛt lɔv ɛn i nɔ jɔs bisin bɔt insɛf?

⁶ We Jizɔs bin de prich na dis wɔl, difrɛn we dɛn de we i bin sho se i lɛk pipul dɛn ɛn i nɔ jɔs bisin bɔt insɛf. I bin rili put wetin ɔda pipul dɛn want bifo wetin in want. I bin so lɛk di prichin wok dat i nɔ bin de wɔri fɔ gɛt di nɔmal tin dɛn we pipul dɛn bin gɛt. I bin se: “Fɔks dɛn gɛt ol ɛn bɔd dɛn we de flay na di skay gɛt bɔd os, bɔt mɔtalman Pikin nɔ gɛt ɛnisay fɔ le in ed.” (Matyu 8:​20) Bikɔs Jizɔs bin sabi du kapɛnta wok, i fɔ bin dɔn yuz sɔm pan in tɛm fɔ mek fayn os fɔ insɛf, ɔ fɔ mek fayn fɔnichɔ dɛn we i go sɛl fɔ gɛt ɛkstra mɔni. Bɔt i nɔ bin yuz di tin dɛn we i sabi du fɔ gɛda mɔni ɛn prɔpati.

⁷ Jɔn 19:​25-27 ɛp wi fɔ si wan fayn we aw Jizɔs bin sho se i gɛt lɔv ɛn i nɔ jɔs bisin bɔt insɛf. Imajin aw di tin dɛn we Jizɔs bin de tink bɔt bifo i day go dɔn bɔku. Dɔn we i bin de sɔfa na di tik, i bin de wɔri bɔt in disaypul dɛn ɛn  di prichin wok. Di men tin we i bin de wɔri bɔt na fɔ lɛ i kɔntinyu fɔ du wetin rayt na in Papa in yay so dat i nɔ go gi Am badnem. Di tin dɛn we go apin to mɔtalman tumara bambay bin gɛt fɔ du wit wetin Jizɔs du da de de. Bɔt smɔl tɛm bifo Jizɔs day, i bin sho bak se i bisin bɔt in mama, Meri. Ɛn i go mɔs bi se Meri in man bin dɔn day da tɛm de. Jizɔs bin tɛl apɔsul Jɔn fɔ kia fɔ Meri lɛk in mama. Leta, apɔsul Jɔn bin go wit Meri na in os. So Jizɔs bin arenj fɔ lɛ in mama gɛt wetin i nid so dat i go kɔntinyu fɔ liv ɛn gɛt tayt padi biznɛs wit Jiova. Dis na fayn we aw Jizɔs bin sho se i gɛt lɔv ɛn i nɔ jɔs bisin bɔt insɛf.

8. Wetin na di minin fɔ di Grik wɔd we di Baybul yuz fɔ tɔk bɔt Jizɔs in sɔri-at?

⁸ Jizɔs bin gɛt sɔri-at lɛk in Papa. Di Baybul tɛl wi se Jizɔs bin de ɛp pipul dɛn we bin gɛt prɔblɛm bikɔs i bin de rili sɔri fɔ dɛn. Fɔ tɔk bɔt di sɔri-at we Jizɔs bin gɛt, di Baybul yuz wan Grik wɔd we min “fɔ sɔri fɔ pɔsin.” Wan masta sabi bukman se: “Dis wɔd de sho aw pɔsin kin fil dip insay in at we kin mek i want fɔ du sɔntin. Dis wɔd we dɛn yuz insay Grik de sho aw pɔsin kin rili sho sɔri-at.” Lɛ wi tɔk bɔt sɔm tɛm dɛn we sɔri-at bin mek Jizɔs du sɔntin fɔ ɛp pipul dɛn.

9, 10. (a) Wetin bin mek Jizɔs ɛn in apɔsul dɛn go na kwayɛt ples? (b) Wetin Jizɔs bin du we pipul dɛn nɔ bin gi am chans fɔ rɛst? Wetin mek?

⁹ I bin sɔri fɔ pipul dɛn we want fɔ lan bɔt Gɔd. Mak 6:​30-34 bin sho di men rizin we mek Jizɔs bin sho sɔri-at. Imajin wetin bin apin. Di apɔsul dɛn bin gladi bikɔs dɛn bin prich to bɔku pipul dɛn na fa fa say dɛn. Dɛn go bak to Jizɔs ɛn gladi fɔ tɛl am ɔl wetin dɛn bin dɔn si ɛn yɛri. Bɔt bɔku pipul dɛn bin kam usay Jizɔs ɛn in apɔsul dɛn bin de, ɛn dɛn nɔ ivin gi dɛn chans fɔ it. Bikɔs Jizɔs kin notis wetin  de apin to in apɔsul dɛn ɔltɛm, i bin si se dɛn taya. So i tɛl dɛn se: “Una kam lɛ wi go na ples we pipul dɛn nɔ de so dat una go rɛst smɔl.” Dɛn go insay wan bot ɛn krɔs di nɔt pat na di Si na Galili fɔ go na wan kwayɛt ples. Bɔt di pipul dɛn si we dɛn de go. Ɛn ɔda wan dɛn bin yɛri bɔt dat. Dɛn ɔl rɔn go usay Jizɔs ɛn in apɔsul dɛn bin de go, ɛn dɛn rich bifo dɛn.

¹⁰ Yu tink se Jizɔs bin vɛks bikɔs di pipul dɛn nɔ bin gi am chans fɔ rɛst? Nɔ, i nɔ bin vɛks atɔl. Infakt, we i bin si aw di pipul dɛn we bin de wet fɔ am bin bɔku, i bin sɔri fɔ dɛn. Mak rayt se: “I si bɔku bɔku pipul dɛn ɛn i sɔri fɔ dɛn, bikɔs dɛn bin tan lɛk ship dɛn we nɔ gɛt shɛpad. So i bigin fɔ tich dɛn bɔku tin.” Jizɔs bin si se dɛn pipul dɛn de bin rili nid fɔ lan bɔt Gɔd. Dɛn bin tan lɛk ship dɛn we dɔn lɔs, ɛn we nɔ gɛt shɛpad fɔ gayd ɛn protɛkt dɛn. Na di bigman dɛn pan rilijɔn fɔ bin dɔn bi di shɛpad dɛn we de kia fɔ dɛn. Bɔt Jizɔs bin no se di bigman dɛn pan rilijɔn nɔ bin gɛt sɔri-at, ɛn dɛn nɔ bin de kia fɔ di pipul dɛn. (Jɔn 7:​47-49) So Jizɔs bin sɔri fɔ di pipul dɛn ɛn i stat fɔ tich dɛn “bɔt Gɔd in Kiŋdɔm.” (Lyuk 9:​11) Notis se Jizɔs bin sɔri fɔ di pipul dɛn ivin bifo i si wetin dɛn go du bɔt wetin i go tich dɛn. So di sɔri-at we Jizɔs bin gɛt nɔto bikɔs ɔf wetin i si di pipul dɛn de du afta we i tich dɛn, bɔt na dat bin muv am fɔ tich di pipul dɛn.

11, 12. (a) Insay di tɛm we dɛn bin de rayt di Baybul, aw dɛn bin de trit pipul dɛn we gɛt lɛprɔsi? Aw Jizɔs bin trit wan man “we [bin] gɛt lɛprɔsi we dɔn bad-ɔf”? (b) Aw di man we gɛt lɛprɔsi go dɔn fil we Jizɔs bin tɔch am? Aw wan dɔktɔ in ɛkspiriɛns ɛp wi fɔ no dis?

¹¹ I bin du sɔntin fɔ mek pipul dɛn lɛf fɔ sɔfa. Pipul dɛn we bin gɛt difrɛn sik dɛn bin no se Jizɔs gɛt sɔri-at, na dat mek dɛn bin lɛk fɔ go to am. Dis bin apin wan tɛm we bɔku bɔku pipul dɛn bin de fala Jizɔs, ɛn wan man “we [bin] gɛt lɛprɔsi we dɔn bad-ɔf” bin go mit am. (Lyuk 5:​12) Di tɛm  we dɛn bin de rayt di Baybul, dɛn bin de kwarantin pipul dɛn we gɛt lɛprɔsi so dat di sik nɔ go prɛd. (Di Nɔmba Dɛm 5:​1-4) Bɔt leta, di Ju lɔ ticha dɛn bin de maltrit pipul dɛn we gɛt lɛprɔsi ɛn dɛn bin de fos ɔda pipul dɛn fɔ fala dɛn yon lɔ dɛn we bin at fɔ fala. * Bɔt notis aw Jizɔs bin trit di man we gɛt lɛprɔsi. Di Baybul se: “Wan man we gɛt lɛprɔsi kam to am ɛn nil dɔŋ ɛn beg am se: ‘If yu want, yu kin mek a wɛl.’ I fil sɔri fɔ am ɛn stret in an ɛn tɔch am. Dɔn i tɛl am se: ‘A want fɔ mek yu wɛl! Wɛl.’ Wantɛm wantɛm, di lɛprɔsi kɔmɔt pan di man ɛn i wɛl.” (Mak 1:​40-42) Jizɔs bin no se di man we gɛt lɛprɔsi nɔ gɛt rayt fɔ go usay pipul dɛn de. Bɔt Jizɔs nɔ bin drɛb am, bifo dat i bin rili sɔri fɔ am ɛn du sɔntin we pɔsin nɔ go tink se i go du. Jizɔs bin tɔch di man.

¹² Aw yu tink se di man we bin gɛt lɛprɔsi go dɔn fil we Jizɔs bin tɔch am? Fɔ lɛ wi no di ansa, lɛ wi tɔk bɔt wan ɛkspiriɛns. Dɔktɔ Pɔl Brand we de trit lɛprɔsi peshɛnt dɛn bin tɔk bɔt wan man we i bin trit na India. We i bin de tray fɔ no wetin du di man, i tɔch am na in sholda, dɔn i yuz intaprita fɔ tɛl am aw i gɛt fɔ trit am. Di man bigin fɔ kray. So di dɔktɔ aks se: “A tɔk bad?” Di intaprita aks di man dis kwɛstyɔn insay in langwej ɛn i ansa se: “Nɔ-o dɔktɔ. Di man se i de kray bikɔs yu tɔch am na in sholda, ɛn i dɔn te we pɔsin tɔch am.” Di man we bin gɛt lɛprɔsi we Jizɔs bin tɔch bin fil gud pas di man we di dɔktɔ bin  tɔch, bikɔs afta we Jizɔs tɔch am, i bin wɛl ɛn pipul dɛn nɔ bin nid fɔ de trit am bad igen.

13, 14. (a) Udat dɛn Jizɔs bin mitɔp we i bin de nia di siti we nem Nen? Wetin mek di tin we i si bin sɔri? (b) Wetin Jizɔs in sɔri-at bin mek i du fɔ di uman na Nen we in man bin dɔn day?

¹³ I bin du sɔntin fɔ ɛp pipul dɛn we gɛt pwɛl-at. Jizɔs bin de rili sɔri fɔ pipul dɛn we gɛt pwɛl-at. Lɛ wi tɔk bɔt wan ɛgzampul we de na Lyuk 7:​11-15. Di tin we wi de kam tɔk bɔt bin apin afta we Jizɔs bin dɔn bigin du in prichin wok fɔ sɔm tɛm. Jizɔs bin de nia wan siti na Galili we nem Nen. As i rich nia di get na di siti, i mitɔp pipul dɛn we bin de go bɛr pɔsin. Di bɛrin bin rili sɔri. Na wan uman in wangren bɔypikin day, ɛn di uman in man insɛf bin dɔn day. I go mɔs bi se di tɛm we in man bin day na so i bin de wit di pipul dɛn we bin de go bɛr am. Naw na in bɔypikin i de go bɛr, ɛn i go mɔs bi se na da in pikin de nɔmɔ bin de sɔpɔt am. Sɔm pan di pipul dɛn we bin de go wit am go dɔn bi pipul dɛn we de kray sɔri wan ɛn ple dɛn sɔri myuzik dɛn. (Jɛrimaya 9:​17, 18; Matyu 9:​23) Bɔt Jizɔs bin de wach di mama we i de waka nia di wan dɛn we tot in pikin in dedebɔdi.

¹⁴ Jizɔs bin “sɔri” fɔ di uman we in pikin bin dɔn day. Fɔ kɔrej di uman, i tɛl am se: “Lɛf fɔ kray.” Jizɔs go nia di pipul dɛn we tot di bɔdi ɛn tɔch di strɛcha. We i du dat, di pipul dɛn we bin tot di bɔdi, ɛn sɔntɛm di ɔda pipul dɛn sɛf bin tinap. Na in Jizɔs kɔmand di bɔdi ɛn tɔk se: “Yɔŋman, grap!” Wetin bin apin afta dat? “Di man we bin dɔn day grap sidɔm ɛn bigin fɔ tɔk,” lɛk se i grap pan slip. Di tin we sɔri na we “Jizɔs gi am to in mama.”

15. (a) Aw di stori dɛn na di Baybul we tɔk bɔt Jizɔs in sɔri-at de sho se sɔri-at de mek pɔsin du sɔntin? (b) Aw wi go falamakata Jizɔs?

¹⁵ Wetin wi lan frɔm dɛn stori dɛn ya? Notis se insay ɛniwan pan dɛn stori dɛn ya sɔri-at bin mek Jizɔs du  sɔntin. Jizɔs nɔ bin de si pipul dɛn de sɔfa i nɔ sɔri fɔ dɛn, ɛn in sɔri-at bin de mek i du sɔntin fɔ ɛp dɛn. Aw wi go falamakata in ɛgzampul? As Kristian dɛn, wi wok na fɔ prich di gud nyuz ɛn mek disaypul dɛn. Di men rizin we mek wi de du dis wok na bikɔs wi lɛk Gɔd. Bɔt lɛ wi mɛmba bak se wi de du dis wok bikɔs wi gɛt sɔri-at. We wi de sɔri fɔ pipul dɛn lɛk Jizɔs, dat go mek wi du ɔl wetin wi ebul fɔ prich di gud nyuz to dɛn. (Matyu 22:​37-39) Bɔt aw wi go sho se wi de sɔri fɔ wi kɔmpin Kristian dɛn we de sɔfa ɔ we gɛt pwɛl-at? Na tru se wi nɔ go pafɔm mirekul fɔ mek dɛn lɛf fɔ sɔfa ɔ fɔ gi layf bak to dɛn padi ɔ fambul we dɔn day. Bɔt wi go sho se wi de sɔri fɔ dɛn bay we wi de tɔk fayn to dɛn ɛn ɛp dɛn wit tin dɛn we dɛn nid.—Ɛfishians 4:​32.

16. Aw Jizɔs bin sho se i rɛdi fɔ fɔgiv pan ɔl we i bin de na di tik we i bin de sɔfa pan?

¹⁶ Wan ɔda impɔtant we aw Jizɔs bin sho lɔv lɛk in Papa na we i bin rɛdi fɔ “fɔgiv.” (Sam 86:​5) Jizɔs bin sho se i rɛdi fɔ fɔgiv ivin we i bin de na di tik we i sɔfa pan. We Jizɔs bin de day shemful wan, wetin i tɔk bɔt pan ɔl we dɛn nel in an ɛn fut dɛn pan tik? I bin tɛl Jiova fɔ pɔnish di wan dɛn we kil am? Nɔ, Jizɔs nɔ du dat. Bifo dat, sɔm pan di las wɔd dɛn we i tɔk na: “Papa, fɔgiv dɛn, bikɔs dɛn nɔ no wetin dɛn de du.”—Lyuk 23:​34. *

17-19. Wetin-ɛn-wetin Jizɔs bin du fɔ sho se i dɔn fɔgiv apɔsul Pita we bin dinay Am tri tɛm?

 ¹⁷ Di we aw Jizɔs bin trit apɔsul Pita de ɛp wi fɔ rili no se i rɛdi fɔ fɔgiv. Wan dawt nɔ de se Pita bin rili lɛk Jizɔs. Insay Naysan 14, di las nɛt bifo Jizɔs day, Pita bin tɛl am se: “Masta, a rɛdi fɔ go wit yu na prizin ɛn fɔ day wit yu.” Bɔt smɔl tɛm afta we Pita tɔk dat, i dinay se i nɔ no Jizɔs tri tɛm. Di Baybul tɛl wi wetin bin apin we Pita dinay Jizɔs fɔ di tɔd tɛm. I se: “Di Masta tɔn ɛn luk Pita na in yay.” Pita bin rili fil bad bikɔs i bin no se na siriɔs sin i dɔn kɔmit, so i “go na do ɛn kray bita bita wan.” We Jizɔs bin day leta da de de, Pita go dɔn de wɔnda if in Masta bin fɔgiv am.—Lyuk 22:​33, 61, 62.

¹⁸ Pita nɔ bin nid fɔ wet fɔ lɔng fɔ sabi di ansa. We Jizɔs bin gɛt layf bak na mɔnin Naysan 16, i bin go fɛn Pita da sem de de. (Lyuk 24:​34; 1 Kɔrintians 15:​4-8) Wetin mek Jizɔs bin trit dis apɔsul da kayn spɛshal we de pan ɔl we i bin dɔn dinay Am? I go bi se Jizɔs bin want fɔ mek Pita no se i stil lɛk am ɛn valyu am. Bɔt Jizɔs bin du ɔda tin fɔ sho Pita se i stil lɛk am ɛn valyu am.

¹⁹ Leta, Jizɔs bin apia to di disaypul dɛn na di Si na Galili. Ɛnti Pita bin dɔn dinay Jizɔs tri tɛm, so Jizɔs bin aks Pita tri tɛm if i lɛk am. Afta di tɔd tɛm, Pita bin ansa se: “Masta, yu no ɔltin; yu no se a rili lɛk yu.” Jizɔs ebul fɔ no wetin de na pɔsin in at, so i bin no se Pita rili lɛk am. Bɔt stil, Jizɔs bin gi Pita chans fɔ tɛl am se i lɛk am. Apat frɔm dat, Jizɔs bin gi Pita di wok fɔ “fid” ɛn “mɛn” In “smɔl ship dɛn.” (Jɔn 21:​15-17) Jizɔs bin dɔn tɛl Pita fɔ prich. (Lyuk 5:​10) Bɔt naw fɔ sho se i biliv am, i gi am ɔda wok, dat na fɔ kia fɔ di wan dɛn we go bi Krays in disaypul dɛn. Jɔs afta dat, Jizɔs bin gi Pita wan impɔtant wok fɔ de bifo pan di prichin wok we di disaypul dɛn go de du.  (Akt 2:​1-41) Pita go mɔs dɔn fil fayn fɔ no se Jizɔs dɔn fɔgiv am ɛn stil biliv am.

20, 21. Wetin go ɛp wi fɔ lɛ wi rili “no di lɔv we di Krays gɛt”?

²⁰ Fɔ tru, Jiova in Wɔd rili de sho aw Krays de sho lɔv. Wetin wi fɔ du fɔ sho se wi gladi fɔ we Jizɔs lɛk wi? Di Baybul ɛnkɔrej wi fɔ “no di lɔv we di Krays gɛt, we impɔtant pas fɔ no sɔntin.” (Ɛfishians 3:​19) Frɔm wetin wi dɔn lan, di tin dɛn we dɛn rayt na di Gɔspɛl bɔt Jizɔs in layf ɛn prichin wok de tich wi bɔku tin bɔt Krays in lɔv. Bɔt fɔ lɛ wi rili “no di lɔv we di Krays gɛt,” wi nɔ fɔ jɔs lan wetin di Baybul tɔk bɔt am.

²⁰ Di Grik wɔd fɔ “no” min fɔ “lan sɔntin bay ɛkspiriɛns.” Wi go kam fɔ ɔndastand aw Jizɔs bin de rili fil we wisɛf sho se wi lɛk pipul dɛn bay we wi nɔ jɔs bisin bɔt wisɛf, we wi de fɔgiv dɛn wit ɔl wi at, ɛn we wi de sɔri fɔ dɛn ɛn du sɔntin fɔ ɛp dɛn. We wi du ɔl dɛn tin ya, wi go “no di lɔv we di Krays gɛt, we impɔtant pas fɔ no sɔntin.” Ɛn lɛ wi nɔ ɛva fɔgɛt se di mɔ we wi de tray fɔ falamakata Krays, na di mɔ wi go kam nia Jiova wi Gɔd we lɛk wi, we Jizɔs de falamakata pafɛkt wan.