1-3. (a) Ano an manunudan niyato manungod sa naturalesa nin tawo paagi sa pag-obserbar sa interaksiyon nin mga magurang asin kan saindang umboy? (b) Ano an normal na nangyayari kun may magpahiling sa sato nin pagkamuot, asin anong importanteng hapot an puwede niyatong ihapot sa satong sadiri?

 UGMAHON an mga magurang na mahiling na magngirit an saindang bagong mamundag na umboy. Parati nindang irinarani an saindang lalawgon sa lalawgon kan umboy; nagtataram sinda nin maluway asin ugmahon na nagngingirit. Gustong-gusto nindang mahiling an magigin reaksiyon kan umboy. Asin dai mahaloy, mahihiling na ninda iyan—an lusot (dimple) sa pisngi kan umboy, an garo pagkurikot kan mga ngabil, asin an magayunon na ngirit kaini. Garo man sana ipinapahayag kan mga ngirit na iyan an kapadangatan, na iyong kapinunan kan pagpahiling kan pagkamuot kan umboy bilang balos sa pagkamuot kan mga magurang.

² An ngirit kan umboy nagpapagirumdom sa sato nin sarong bagay na importante manungod sa naturalesa nin tawo. An normal na balos niyato sa pagkamuot, pagkamuot. Arog nanggad kaiyan an pagkagibo sa sato. (Salmo 22:9) Mantang nagdadakula kita, mas nanunudan ta an mas dakul na paagi kun paano babalusan an pagkamuot na ipinapahiling sa sato. Tibaad nagigirumduman mo kan ika aki pa kun paano ka pinahilingan nin pagkamuot kan saimong mga magurang, mga paryente, o mga amigo. An mamumuton na pagmati nagpuon na makagamot sa puso mo, nagtalubo, asin nagpahiro sa saimo na ipahiling iyan. Ipinahiling mo an saimong pagkamuot bilang balos. Arog man daw kaiyan an nangyayari sa saimong relasyon sa Diyos na Jehova?

³ Sinasabi kan Bibliya: “Kita namumuot, huli ta inot niya  kitang namutan.” (1 Juan 4:19) Sa Seksiyon 1 sagkod 3 kan librong ini, ipinagirumdom sa saimo na ginamit kan Diyos na Jehova an saiyang kapangyarihan, hustisya, asin kadunungan sa mamumuton na mga paagi para sa saimong kapakinabangan. Asin sa Seksiyon 4, nanudan mo na direkta niyang ipinahiling an saiyang pagkamuot sa katawuhan—asin sa saimo mismo—sa pambihirang mga paagi. Minalataw ngunyan an sarong hapot. Posibleng marhay na iyo ini an pinakaimportanteng hapot na maihahapot mo sa saimong sadiri: ‘Paano ko babalusan an pagkamuot ni Jehova?’

4. Ano an paghuna nin mga tawo manungod sa kahulugan kan pagkamuot sa Diyos?

⁴ Aram na marhay ni Jehova, an Gikanan nin pagkamuot, na an pagkamuot igwa nin makusog na puwersa para mapaluwas an pinakamarahay na mga kuwalidad nin iba. Kaya sa ibong kan padagos na pagrebelde nin bakong maimbod na katawuhan, danay siyang nagtitiwala na may mga tawo na babalusan an saiyang pagkamuot. Asin aram niyato na ginibo iyan nin minilyon na tawo. Pero, makamumundo ta an mga tawo tinukduan kan mga relihiyon kan maraot na kinaban na ini nin salang mga ideya manungod sa kahulugan kan pagkamuot sa Diyos. Dakulon na tawo an nagsasabi na namumutan ninda an Diyos, pero an paghuna ninda an siring na pagkamuot saro sanang sabuot na ipinapahayag sa tataramon. An pagkamuot sa Diyos puwedeng magpuon nin arog kaiyan, kun paanong an pagkamuot nin umboy sa saiyang mga magurang puwedeng sa primero nahahayag sa sarong ngirit. Minsan siring, sa adultong mga tawo, bako sana iyan an kalabot sa pagkamuot.

5. Paano ipinapaliwanag kan Bibliya an kahulugan kan pagkamuot sa Diyos, asin taano ta gusto ta an kahulugan na iyan?

⁵ Ipinapaliwanag ni Jehova an kahulugan kan pagkamuot  sa saiya. Sinasabi kan saiyang Tataramon: “Ini an kahulugan kan pagkamuot sa Diyos, an utubon ta an saiyang mga tugon.” Kun siring, an pagkamuot sa Diyos kaipuhan na ipahiling sa gibo. Totoo, dakul na tawo an habo sa ideya nin pagigin masinunod. Pero may kabuutan man na sinasabi kan bersikulong iyan: “Alagad ta an saiyang mga tugon bakong pagabat.” (1 Juan 5:3) An mga pagbuot asin prinsipyo ni Jehova dinisenyo para makinabang kita, bako na para pasakitan kita. (Isaias 48:17, 18) An Tataramon nin Diyos pano nin mga prinsipyo na nakakatabang sa sato na urog na rumani sa saiya. Paano? Repasuhon ta an tulo sa mga bagay na kaipuhan niyatong gibuhon para maparani sa Diyos. Kalabot digdi an pakikikomunikar, pagsamba, asin pag-arog sa saiya.

6-8. (a) Sa anong paagi puwede niyatong madangog si Jehova? (b) Paano niyato magigibong buhay an Kasuratan pag binabasa niyato iyan?

⁶ An Kapitulo 1 nagpuon sa hapot na, “Naiimahinar mo daw an saimong sadiri na nakikipag-ulay sa Diyos?” Naaraman niyato na bako ining imahinasyon sana. Si Moises nagkaigwa kan siring na pakikipag-ulay paagi sa sarong anghel. Kumusta man kita? Bako ini an panahon para magsugo si Jehova kan saiyang mga anghel tanganing makipag-ulay sa mga tawo. Pero may marahayon na paagi si Jehova nin pakikikomunikar sa sato ngunyan. Paano ta madadangog si Jehova?

⁷ Huling “an bilog na Kasuratan ipinasabong nin Diyos,” nagdadangog kita ki Jehova paagi sa pagbasa kan saiyang Tataramon, an Bibliya. (2 Timoteo 3:16) Sa siring, sinadol kan salmista an mga lingkod ni Jehova na gibuhon an siring na pagbasa “aldaw asin banggi.” (Salmo 1:1, 2) An paggibo kaiyan nangangaipo nin paghihinguwa niyato. Alagad an gabos na paghihinguwang iyan kapaki-pakinabang. Arog kan nasabutan ta sa Kapitulo 18, an Bibliya siring sa mahalagang  marhay na surat sa sato kan satong Ama sa langit. Kaya an pagbasa kaiyan dapat na dai magin pagabat sa sato. Dapat na gibuhon niyatong buhay an Kasuratan pag binabasa niyato iyan. Paano ta iyan magigibo?

⁸ Iladawan sa isip an mga pagkasaysay sa Bibliya mantang nagbabasa ka. Purbaran na imahinaron an mga karakter sa Bibliya bilang tunay na mga tawo. Pagmaigutan na masabutan an background ninda, an saindang mga kamugtakan, asin an mga motibo ninda. Dangan, hurop-hurupon na marhay an saimong binabasa, na ihinahapot sa sadiri an mga hapot na arog kan: ‘Ano an itinutukdo sa sako kan pagkasaysay na ini manungod ki Jehova? Arin sa mga kuwalidad niya an nahihiling ko? Anong prinsipyo an gusto ni Jehova na manudan ko, asin paano ko iyan maiaaplikar sa sakong buhay?’ Magbasa, maghurop-hurop, asin mag-aplikar—mantang ginigibo mo iyan, an Tataramon nin Diyos magigin buhay para sa saimo.—Salmo 77:12; Santiago 1:23-25.

9. Siisay an “maimbod asin mapagmansay na uripon,” asin taano ta importante na atentibo kitang magdangog sa “uripon” na iyan?

⁹ Si Jehova nagtataram man sa sato paagi sa “maimbod asin mapagmansay na uripon.” Siring sa ihinula ni Jesus, sarong sadit na grupo nin linahidan na Kristiyanong mga lalaki an ninombrahan na magtao nin espirituwal na “kakanon sa tamang panahon” durante kan masakit na huring mga aldaw na ini. (Mateo 24:45-47) Pag nagbabasa kita nin mga literatura na inandam tanganing tabangan kita na magkaigwa nin tamang kaaraman sa Bibliya asin pag nag-aatender kita sa Kristiyanong mga pagtiripon asin kumbensiyon, pinapakakan kita sa espirituwal na paagi kan uripon na iyan. Huling uripon iyan ni Cristo, may kadunungan na inaaplikar niyato an mga tataramon ni Jesus: “Tawan nindo nin atensiyon kun paano kamo nagdadangog.” (Lucas 8:18) Atentibo kitang nagdadangog huling minimidbid niyato an maimbod na uripon bilang saro sa mga paagi ni Jehova para makipagkomunikar sa sato.

10-12. (a) Taano ta an pamibi sarong marahayon na regalo hali ki Jehova? (b) Paano kita makakapamibi sa paagi na ikakaugma ni Jehova, asin taano ta makakapagtiwala kita na pinapahalagahan niya an satong mga pamibi?

 ¹⁰ Kumusta man kun manungod sa pakikikomunikar sa Diyos? Puwede daw kitang makipag-ulay ki Jehova? Garo baga nakakatakot isip-isipon an bagay na iyan. Kun pupurbaran mong dumulok sa pinakamakapangyarihan na tagapamahala sa saindong nasyon tanganing ipakipag-ulay an sarong bagay na ikinakapurisaw mo, ano daw an tsansa na makakaulay mo siya? Sa nagkapirang kamugtakan, tibaad magin peligroso pa ngani an mismong pagpurbar na gibuhon iyan! Kan panahon ni Esther asin Mardokeo, puwedeng ipagadan an sarong tawo na madulok sa hadi kan Persia na dai man inimbitaran. (Esther 4:10, 11) Imahinara ngunyan an pag-atubang sa Soberanong Kagurangnan kan uniberso, na kun ikukumparar sa saiya dawa an pinakamakapangyarihan sa mga tawo, “garo mga lukton” sana sinda. (Isaias 40:22) Dapat daw kitang matakot na dumulok sa saiya? Dai nanggad!

¹¹ Nagtao si Jehova nin bukas pero simpleng paagi nin pagdulok sa saiya—an pamibi. Dawa an akion pang marhay puwedeng mamibi ki Jehova na may pagtubod, na ginigibo iyan sa pangaran ni Jesus. (Juan 14:6; Hebreo 11:6) Paagi sa pamibi, masasabi niyato an kauruirarumi saka komplikadong marhay na mga kaisipan asin pagmati niyato—dawa an mga kakulugan ta na nasasakitan kitang ipahayag paagi sa mga tataramon. (Roma 8:26) Mayong nagigibong karahayan sa sato an pagpurbar na pahangaon si Jehova paagi sa paggamit nin mga tataramon na magayunon pagdangugon o halawigon na pagpamibi. (Mateo 6:7, 8) Pero, dai linilimitaran ni Jehova kun gurano kita kahaloy na makikipag-ulay sa saiya o kun gurano iyan kaparati. Inaagda pa ngani kita kan saiyang Tataramon na “pirming mamibi.”—1 Tesalonica 5:17.

¹² Girumduma na si Jehova sana an inaapod na “Paradangog  nin pamibi,” asin nagdadangog siya na may tunay na empatiya. (Salmo 65:2) Nagigin pagabat daw sa saiya an mga pamibi kan maimbod na mga lingkod niya? Dai, ikinakaugma niya an mga iyan. An siring na mga pamibi ikinukumparar kan saiyang Tataramon sa insenso, na pag pigtututong nag-iitaas an aso kaiyan na may mahamot saka nakakaginhawang parong. (Salmo 141:2; Kapahayagan 5:8; 8:4) Bako daw nakakarangang isipon na an satong sinserong mga pamibi nag-iitaas man asin ikinakaugma kan Soberanong Kagurangnan? Kaya kun gusto mong maparani ki Jehova, mapakumbabang mamibi sa saiya nin parati, aroaldaw. Lubos mong ipahayag sa saiya an nasa saimong puso; sabihon mo an gabos na gusto mong sabihon. (Salmo 62:8) Sabihon mo sa saimong Ama sa langit an mga ikinakapurisaw mo, an saimong kagaya-gayahan, an saimong pasasalamat, asin an saimong pag-umaw. Bilang resulta, urog kang mapaparani sa saiya asin urog man siyang marani sa saimo.

13, 14. Ano an kahulugan kan pagsamba ki Jehova, asin taano ta angay na gibuhon niyato iyan?

¹³ Pag nakikikomunikar kita sa Diyos na Jehova, dai sana kita basta nagdadangog asin nakikipag-ulay nin arog sa pagdangog asin pakikipag-ulay niyato sa sarong amigo o paryente. An totoo, nagsasamba talaga kita ki Jehova, na itinatao sa saiya an onra na maninigo nanggad sa saiya. An tunay na pagsamba may epekto sa bilog niyatong buhay. Iyan an paagi na ipinapahayag niyato ki Jehova an satong bilog na kalag na pagkamuot asin debosyon, asin pinagsasararo kaiyan an gabos na maimbod na linalang ni Jehova sa langit asin sa daga. Sa sarong bisyon, nadangog ni apostol Juan an sarong anghel na ibinabalangibog an pagbuot na ini: “Sambahon nindo an Saro na naggibo kan langit asin kan daga asin kan dagat saka kan mga burabod nin tubig.”—Kapahayagan 14:7.

 ¹⁴ Taano ta dapat niyatong sambahon si Jehova? Isip-isipa an mga kuwalidad na tinukar niyato, arog kan kabanalan, kapangyarihan, pagpupugol sa sadiri, hustisya, kusog nin buot, pagkahirak, kadunungan, kapakumbabaan, pagkamuot, pagmalasakit, kaimbudan, asin karahayan. Nanudan ta na ipinapahiling ni Jehova an lambang magayon na kuwalidad na ini sa pinakahalangkaw na lebel. Pag hinihinguwa tang sabuton an kabilugan kan saiyang mga kuwalidad, narerealisar niyato na nakakalabing marhay siya sa sarong bantog asin hinahangaan na Persona. Pambihira nanggad an saiyang kamurawayan, dai nanggad niyato iyan mapapantayan. (Isaias 55:9) Daing duda na si Jehova an may deretso na magin Soberano niyato, asin maninigo nanggad siya sa satong pagsamba. Pero, paano ta dapat sambahon si Jehova?

15. Paano ta masasamba si Jehova “sa espiritu asin katotoohan,” asin anong mga oportunidad an itinatao sa sato kan Kristiyanong mga pagtiripon?

¹⁵ Sinabi ni Jesus: “An Diyos sarong Espiritu, asin an mga nagsasamba sa saiya dapat na sumamba sa espiritu asin katotoohan.” (Juan 4:24) Tanganing masamba an Diyos “sa espiritu,” dapat na yaon sa sato an saiyang espiritu asin magpagiya kita diyan. An pagsamba ta dapat na kauyon man kan katotoohan, an tamang kaaraman na yaon sa Tataramon nin Diyos. Igwa kita nin mahalagang marhay na oportunidad na sambahon si Jehova “sa espiritu asin katotoohan” pag nakikipagtipon kita sa mga kapwa parasamba. (Hebreo 10:24, 25) Pag kita nagkakanta nin mga pag-umaw ki Jehova, iribang namimibi sa saiya, asin nagdadangog saka nakikikabtang sa pag-urulay sa saiyang Tataramon, ipinapahayag ta an satong pagkamuot sa saiya sa dalisay na pagsamba.

16. Ano an saro sa pinakamahalagang pagbuot na itinao sa tunay na mga Kristiyano, asin taano ta gustong-gusto niyatong sunudon iyan?

¹⁶ Sinasamba man niyato si Jehova pag ipinapakipag-ulay ta sa iba an manungod sa saiya, na inuumaw siya sa publiko.  (Hebreo 13:15) Sa katunayan, an saro sa pinakamahalagang mga pagbuot na itinao sa tunay na mga Kristiyano iyo an paghuhulit kan maugmang bareta manungod sa Kahadian ni Jehova. (Mateo 24:14) Sinusunod tang marhay iyan huling namumutan ta si Jehova. Pag iniisip niyato kun paano “binuta kan diyos kan sistemang ini nin mga bagay,” si Satanas na Diyablo, “an isip kan mga dai nagtutubod,” na pinapalakop an grabeng mga kaputikan manungod ki Jehova, dai daw niyato minamawot na maglingkod bilang mga Saksi para sa satong Diyos, na itinatanos an siring na mga pagpakaraot? (2 Corinto 4:4; Isaias 43:10-12) Asin pag hinuhurop-hurop ta an makangangalas na mga kuwalidad ni Jehova, dai daw kita nakakamati nin makusog na pagmawot na sabihon sa iba an manungod sa saiya? Talagang mayo na nin malabi pa sa pribilehiyo niyato na tabangan an iba na mamidbid asin mamutan an satong Ama sa langit.

17. Ano an kalabot sa pagsamba niyato ki Jehova, asin taano ta dapat kitang magsamba na may integridad?

 ¹⁷ Labi pa diyan an kalabot sa pagsamba niyato ki Jehova. May epekto iyan sa lambang aspekto kan satong buhay. (Colosas 3:23) Kun talagang inaako ta si Jehova bilang satong Soberanong Kagurangnan, hihinguwahon niyatong gibuhon an kabutan niya sa gabos na bagay—sa satong buhay pampamilya, sa satong sekular na trabaho, sa satong pagtratar sa iba, asin pag nagsosolo kita. Hihinguwahon niyatong paglingkudan si Jehova “nin bilog na puso,” na may integridad. (1 Cronica 28:9) An siring na pagsamba daing lugar para sa nababangang puso o dobleng pamumuhay—an sagin man ngayang paglilingkod ki Jehova pero pasekretong naggigibo nin magabat na mga kasalan. Nungka tang gigibuhon iyan kun may integridad kita; ikakabaldi ta iyan huli sa pagkamuot. Makakatabang man an diyosnon na pagkatakot. Ikinokonektar kan Bibliya an siring na hararom na paggalang sa dayupot na pakikiamigo niyato ki Jehova.—Salmo 25:14.

18, 19. Taano ta realistikong isipon na magigibo nin bakong perpektong mga tawo na arugon an Diyos na Jehova?

¹⁸ An kada seksiyon kan librong ini nagtatapos sa sarong kapitulo manungod sa kun paano ‘magigin paraarog sa Diyos, bilang mga aking namumutan.’ (Efeso 5:1) Mahalagang marhay na girumdumon na dawa bako kitang perpekto, talagang maaarog niyato an perpektong paagi ni Jehova sa paggamit nin kapangyarihan, pagsagibo nin hustisya, paghiro na may kadunungan, asin pagpahiling nin pagkamuot. Paano niyato naaraman na talagang posible na arugon an Makakamhan sa Gabos? Girumduma na an kahulugan kan pangaran ni Jehova nagtutukdo sa sato na pinapangyari niya na siya magin ano man na gustuhon niya tanganing mautob an saiyang mga katuyuhan. Tama sana na makamati kita nin hararom na paggalang huli sa kakayahan niyang iyan, pero imposible daw na maarog ta siya? Bako.

 ¹⁹ Ginibo kita sa ladawan nin Diyos. (Genesis 1:26) Huli kaiyan, an tawo bakong kapareho nin iba pang mga linalang digdi sa daga. Dai kita minahiro nin huli sana sa instinct, sa satong minanang ugali, o sa impluwensiya kan mga nakapalibot sa sato. Tinawan kita ni Jehova nin mahalagang marhay na regalo—an libertad na magdesisyon. Sa ibong kan satong mga limitasyon asin pagkabakong perpekto, libre kitang pumili kun magigin ano kita. Saro pa, girumdumon na an pangaran nin Diyos nangangahulugan man na puwede niyang pangyarihon na an saiyang mga parasamba magin ano man na gustuhon niya. Kaya gusto mo daw na magin mamumuton, madunong, may hustisyang tawo na ginagamit nin tama an kapangyarihan? Sa tabang kan espiritu ni Jehova, puwede ka nanggad na magin arog kaiyan! Isip-isipa an magigibo mong karahayan paagi kaiyan.

20. Anong karahayan an nagigibo niyato pag inaarog ta si Jehova?

²⁰ Mapapauyunan mo an saimong Ama sa langit asin mapapaugma an saiyang puso. (Talinhaga 27:11) Puwede mo pa nganing “lubos siyang mapaugma,” huling nasasabutan niya an saimong mga limitasyon. (Colosas 1:9, 10) Asin mantang padagos kang nagpapatalubo nin marahay na mga kuwalidad bilang pag-arog sa saimong namumutan na Ama, bebendisyunan ka nin dakulang pribilehiyo. Sa sarong madiklom na kinaban na suway sa Diyos, magigin kang paradara nin ilaw. (Mateo 5:1, 2, 14) Matabang kang ipalakop sa daga an nagkapirang repleksiyon kan mamuraway na personalidad ni Jehova. Dakulaon na onra nanggad iyan!

21, 22. Anong garo daing katapusan na pagbiyahe an naghahalat sa gabos na namumuot ki Jehova?

²¹ An simpleng sadol na nasusurat sa Santiago 4:8 bako sanang sarong pasuhan. Garo iyan pagbiyahe. Sagkod na nagdadanay kitang maimbod, nungka na matatapos an  pagbiyaheng iyan. Dai kita nuarin man mapundo sa urog na pagrani ki Jehova. Kun sa bagay, pirming dakul pang manunudan manungod sa saiya. Dai ta dapat isipon na naitukdo na kan librong ini an gabos na dapat tang maaraman manungod ki Jehova. Iyo, haros dai pa ngani niyato napupunan na tukaron an gabos na sinasabi kan Bibliya manungod sa satong Diyos! Asin dawa an Bibliya mismo dai nagsasabi sa sato kan gabos na dapat tang maaraman manungod ki Jehova. Sinabi ni apostol Juan na kun isinurat an gabos na ginibo ni Jesus durante kan ministeryo niya digdi sa daga, “dai magkakahusto sa kinaban an mga rolyong pinagsuratan” kaiyan. (Juan 21:25) Kun totoo iyan manungod sa Aki, mas totoo iyan manungod sa Ama!

²² Dawa pag nabuhay kita nin daing sagkod, dai nanggad kita mapundo sa pakanuod manungod ki Jehova. (Eclesiastes 3:11) Kaya, isip-isipa an paglaom na naghahalat sa sato. Pakatapos na mabuhay nin ginatos, rinibo, minilyon, binilyon pa nganing taon, mas dakul pang marhay an maaaraman niyato manungod sa Diyos na Jehova kisa sa ngunyan. Alagad mamamatian pa man giraray niyato na dakulon pang  makangangalas na mga bagay na dapat manudan. Mauugma kitang makanuod nin urog pa huling pirmi kitang igwa nin dahilan na mamati an arog kan namatian kan salmista, na nagkanta: “An pagrani sa Diyos marahay sa sako.” (Salmo 73:28) An buhay na daing sagkod magigin makahulugan asin maugma sa paaging dai ta maiimahinar—asin an urog na pagrani ki Jehova pirming iyo an magigin pinakanakakakontentong kabtang kaiyan.

23. Dinadagka ka na gibuhon an ano?

²³ Lugod na balusan mo ngunyan an pagkamuot ni Jehova paagi sa pagkamuot sa saiya sa bilog mong puso, kalag, isip, asin kusog. (Marcos 12:29, 30) Lugod na magin maimbod asin marigon an saimong pagkamuot. Lugod na an mga desisyon na ginigibo mo aroaldaw, puon sa pinakasadit sagkod sa pinakadakulang desisyon, gabos magpabanaag kan saro sanang naggigiyang prinsipyo—na pirmi mong pipilion an dalan na magiya sa saimo pasiring sa mas makusog na relasyon sa saimong Ama sa langit. Urog sa gabos, lugod na urog ka pang rumani ki Jehova, asin lugod na urog pa siyang rumani sa saimo—sa bilog na panahon na daing kasagkudan!