1—3. ა) რას ვიგებთ ადამიანის ბუნების შესახებ მშობლებისა და ჩვილის ურთიერთობიდან? ბ) რა რეაქციაა ბუნებრივი, როდესაც ვინმე ჩვენდამი სიყვარულს ავლენს და რა მნიშვნელოვანი კითხვა უნდა დავუსვათ საკუთარ თავს?

 ᲛᲨᲝᲑᲚᲔᲑᲡ ახარებთ თავიანთი ახალშობილის ღიმილი. ხშირად სახე ჩვილის სახესთან ახლოს მიაქვთ, ეჩურჩულებიან, უღიმიან და ცდილობენ, პატარაც გააღიმონ. აი, სანატრელი ღიმილიც, პატარას მთელ სახეზე რომ დასთამაშებს. ეს ხომ მშობლების სიყვარულზე ჩვილის პირველი რეაქციაა.

² ჩვილის ღიმილი ადამიანის ბუნების ერთ მნიშვნელოვან თავისებურებას გვაგონებს. ჩვენთვის ბუნებრივია სიყვარულზე სიყვარულითვე პასუხი. უბრალოდ, ასე ვართ შექმნილი (ფსალმუნი 22:9). როდესაც ვიზრდებით, თანდათანობით გვიყალიბდება სიყვარულზე რეაგირების უნარი. ალბათ, გახსოვს, როცა პატარა იყავი, როგორ გამოხატავდნენ შენდამი სიყვარულს მშობლები, ნათესავები ან მეგობრები. ეს თბილი გრძნობა შენს გულამდე აღწევდა, ვითარდებოდა და შემდეგ საპასუხო მოქმედებაში ვლინდებოდა. სიყვარულზე სიყვარულით რეაგირებდი. ხდება მსგავსი რამ შენსა და იეჰოვა ღმერთს შორის?

³ ბიბლიაში ნათქვამია: „ჩვენ გვიყვარს, რადგან ჯერ მან შეგვიყვარა“ (1 იოანე 4:19). ამ წიგნის 1—3 ნაწილებში განვიხილეთ, რომ იეჰოვა ღმერთი, ჩვენდა სასიკეთოდ, სიყვარულით ავლენს ძალას, სამართლიანობასა და სიბრძნეს. მე-4 ნაწილში დავინახეთ, რომ მან უდიდესი სიყვარული გამოავლინა ადამიანებისადმი, მათ შორის შენდამი. ამიტომაც იბადება კითხვა; შეიძლება ითქვას, რომ ეს ყველაზე მნიშვნელოვანი კითხვაა, რომელიც საკუთარ თავს უნდა დაუსვა: რით ვუპასუხო იეჰოვას სიყვარულს?

4. რა მცდარი შეხედულება აქვს ბევრს იმის თაობაზე, თუ რას ნიშნავს, გიყვარდეს ღმერთი?

⁴ იეჰოვამ, სიყვარულის წყარომ, შესანიშნავად იცის, რომ სიყვარულს უდიდესი ძალა აქვს, ადამიანს საუკეთესო თვისებები გამოავლენინოს. ამიტომაც, კაცობრიობის დაუმორჩილებლობის მიუხედავად, ის დარწმუნებული იყო, რომ სიყვარულის საპასუხოდ, ზოგი მისადმი სიყვარულს გამოავლენდა. ასეც მოხდა — მილიონობით ადამიანმა შეიყვარა ღმერთი. სამწუხაროდ, ამ გადაგვარებულ წუთისოფელში არსებულმა რელიგიებმა მცდარი აზრი შეუქმნა ხალხს იმის თაობაზე, თუ რას ნიშნავს ღვთის სიყვარული. დღეს ბევრი ამბობს, რომ უყვარს ღმერთი, მაგრამ, როგორც ჩანს, ფიქრობენ, რომ სიყვარული მხოლოდ სიტყვიერად უნდა გამოხატონ. თავიდან ღვთის სიყვარული შეიძლება სწორედ ასეც გამოვხატოთ, ჩვილიც ხომ მხოლოდ ღიმილით გამოხატავს მშობლების სიყვარულს. მოგვიანებით კი სიყვარულის გამოვლენამ უფრო დიდი მნიშვნელობა უნდა შეიძინოს.

5. როგორ განიმარტება ბიბლიაში ღვთის სიყვარული და რატომ უნდა იყოს ეს განმარტება ჩვენთვის მიმზიდველი?

⁵ იეჰოვა თავად გვიხსნის, თუ რას ნიშნავს მისი სიყვარული. მის სიტყვაში ნათქვამია: „ღვთის სიყვარული ისაა, რომ ვიცავდეთ მის მცნებებს“. აქედან ჩანს, რომ ღვთის სიყვარული მოქმედებაში უნდა გამოვლინდეს. მართალია, ბევრს არ იზიდავს მორჩილების იდეა, მაგრამ იმავე მუხლში შემდეგ სიტყვებსაც ვკითხულობთ: „მისი მცნებები დამამძიმებელი არ არის“ (1 იოანე 5:3). იეჰოვას კანონები და პრინციპები ჩვენ სასიკეთოდაა შედგენილი და არა იმისთვის, რომ დავითრგუნოთ (ესაია 48:17, 18). ღვთის სიტყვაში მოცემულია ბევრი პრინციპი, რომლებიც ღმერთთან დაახლოებაში გვეხმარება. როგორ? მოდი განვიხილოთ ღმერთთან ჩვენი ურთიერთობის სამი მხარე — აზრების ურთიერთგაზიარება, თაყვანისცემა და ღვთის მიბაძვა.

6—8. ა) როგორ შეგვიძლია, მოვუსმინოთ იეჰოვას? ბ) როგორ უნდა გავაცოცხლოთ გონებაში წაკითხული?

⁶ 1-ელი თავი შემდეგი სიტყვებით იწყება: „შეგიძლია წარმოიდგინო, რომ ღმერთთან საუბრობ?“. როგორც დავინახეთ, ღმერთთან საუბარი ფანტაზია არ ყოფილა. მოსე ელაპარაკა ღმერთს. მაგრამ დღეს იეჰოვა თავის ანგელოზებს აღარ გზავნის, რომ ადამიანებს დაელაპარაკოს. ამისათვის ახლა ის სხვა შესანიშნავ საშუალებას იყენებს. მაშ, როგორ უნდა მოვუსმინოთ იეჰოვას?

⁷ „მთელი წმინდა წერილი ღვთისგან არის შთაგონებული“, ამიტომაც იეჰოვას მოსმენა მისი სიტყვის, ბიბლიის, კითხვით შეგვიძლია (2 ტიმოთე 3:16). მეფე დავითმა ღვთის მსახურებს ღვთის სიტყვის „დღედაღამ“ კითხვისკენ მოუწოდა (ფსალმუნი 1:1, 2). ამას ძალისხმევა სჭირდება, მაგრამ შედეგისთვის შრომა ნამდვილად ღირს. როგორც მე-18 თავში დავინახეთ, ბიბლიას შეიძლება ჩვენი ზეციერი მამისგან მიღებული ძვირფასი წერილი ეწოდოს. ამიტომაც ის უხალისოდ არ უნდა ვიკითხოთ. გონებაში უნდა გავაცოცხლოთ წაკითხული. როგორ შეგვიძლია ამის გაკეთება?

⁸ გააცოცხლე წაკითხული. შეეცადე, რეალურად წარმოისახო ის ადამიანები, ვის შესახებაც ბიბლია მოგვითხრობს. დაფიქრდი მათ წარსულზე, გარემოზე, რომელშიც ცხოვრობდნენ, და იმაზე, თუ რა განაპირობებდა მათ მოქმედებებს. შემდეგ ღრმად გაიაზრე ის, რაც წაიკითხე და საკუთარ თავს ჰკითხე: რა ვისწავლე აქედან იეჰოვას შესახებ? მისი რა თვისებები დავინახე? რა პრინციპი დამანახვა იეჰოვამ და როგორ უნდა გამოვიყენო ეს პრინციპი ცხოვრებაში? წაიკითხე, დაფიქრდი და გაიაზრე, როგორ გამოიყენებ წაკითხულს; მხოლოდ ამ შემთხვევაში გაცოცხლდება შენთვის ღვთის სიტყვა (ფსალმუნი 77:12; იაკობი 1:23—25).

9. ვინ არის „ერთგული და გონიერი მონა“ და რატომ არის მნიშვნელოვანი, რომ ყურადღებით ვუსმინოთ ამ „მონას“?

⁹ იეჰოვა „ერთგული და გონიერი მონის“ მეშვეობითაც გველაპარაკება. როგორც იესომ იწინასწარმეტყველა, ამ მშფოთვარე ბოლო დღეებში ცხებულ ქრისტიანთა მცირე ჯგუფი დროულად  გვაწვდის სულიერ საზრდოს (მათე 24:45—47). როდესაც ვკითხულობთ ლიტერატურას, რომელიც ბიბლიის საფუძვლიანი ცოდნის შეძენაში გვეხმარება, და ვესწრებით ქრისტიანულ შეხვედრებსა და კონგრესებს, „ერთგული და გონიერი მონის“ მიერ მომზადებული სულიერი საზრდოთი ვიკვებებით. ისინი ქრისტეს მონები არიან, ამიტომაც გონივრულად ვიქცევით, თუ ყურად ვიღებთ იესოს სიტყვებს: „დაუკვირდით, როგორ ისმენთ“ (ლუკა 8:18). ყურადღებით ვისმენთ, რადგანაც გვესმის, რომ იეჰოვა მათი მეშვეობითაც გველაპარაკება.

10—12. ა) რატომ არის ლოცვა იეჰოვას ძღვენი? ბ) როგორ უნდა ვილოცოთ, რომ იეჰოვასათვის სასიამოვნო იყოს მოსმენა და რატომ შეგვიძლია დარწმუნებული ვიყოთ, რომ იეჰოვა დააფასებს ჩვენს ლოცვებს?

¹⁰ ჩვენ როგორღა უნდა ველაპარაკოთ ღმერთს? შესაძლებელია კი ეს? ღმერთთან ლაპარაკის შესახებ გაფიქრებაზეც კი შიშისა და მოწიწების გრძნობა გვეუფლება. შენს ქვეყანაში ყველაზე გავლენიან პირთან პირად პრობლემაზე დალაპარაკება რომ დაგჭირვებოდა, შეძლებდი კი მასთან შეხვედრას? შესაძლებელია, ეს სახიფათოც კი ყოფილიყო! ესთერისა და მორდოქაის დროს შეიძლებოდა სიკვდილით დაესაჯათ ის, ვინც მიწვევის გარეშე ეახლებოდა სპარსეთის მეფეს (ესთერი 4:10, 11). ახლა წარმოიდგინე უზენაესი უფლის წინაშე წარდგომა, რომელთან შედარებით ძლევამოსილი ადამიანებიც კი „კალიებივით არიან“ (ესაია 40:22). უნდა შეგვაძრწუნოს მასთან მიახლოებამ? არავითარ შემთხვევაში!

¹¹ იეჰოვამ ყველას მოგვცა შესაძლებლობა, რომ ლოცვით ველაპარაკოთ. პატარა ბავშვსაც კი შეუძლია რწმენით ილოცოს იეჰოვასადმი იესო ქრისტეს სახელით (იოანე 14:6; ებრაელები 11:6). ლოცვა გვეხმარება, ღმერთს იდუმალი აზრები და გრძნობები გავანდოთ და უდიდესი გულისტკივილიც კი გავუზიაროთ, რომლის სიტყვებით გადმოცემაც გვიჭირს (რომაელები 8:26). აზრი არა აქვს იმის მცდელობას, რომ შთაბეჭდილება მოვახდინოთ იეჰოვაზე ჩვენი მჭევრმეტყველებით, ლამაზი სიტყვებით ან გრძელი ლოცვებით (მათე 6:7, 8). მეორე მხრივ, იეჰოვა არ გვზღუდავს იმასთან დაკავშირებით, თუ რამდენ ხანს და რამდენად ხშირად ვილოცოთ. მისი სიტყვა განუწყვეტლივ ლოცვისკენაც მოგვიწოდებს (1 თესალონიკელები 5:17).

 ¹² გახსოვდეს, რომ „ლოცვების მომსმენი“ ეწოდება მხოლოდ იეჰოვას, რომელიც დიდი თანაგრძნობით გვისმენს (ფსალმუნი 65:2). იქნებ უბრალოდ მოვალეობის მოხდის მიზნით ისმენს თავისი ერთგული მსახურების ლოცვებს? არა, მას სიამოვნებს მათი ლოცვების მოსმენა. ღვთის სიტყვაში ასეთი ლოცვები შედარებულია საკმეველს, რომლის კმევისას ცაში სურნელოვანი კვამლი ადის (ფსალმუნი 141:2; გამოცხადება 5:8; 8:4). განა არ გვამხნევებს ის, რომ ჩვენი ლოცვებიც საკმევლის სურნელებასავით ადის ზეცაში და სიამოვნებას ანიჭებს უზენაეს უფალს?! ამიტომაც, თუ გსურს, რომ დაუახლოვდე იეჰოვას, თავმდაბლურად ილოცე ხშირად, ყოველდღე. გული გადაუშალე იეჰოვას, ნურაფერს დაუმალავ (ფსალმუნი 62:8). გაუზიარე შენი დარდი და სიხარული, უთხარი, რისთვის ხარ მადლობელი და ხოტბა შეასხი შენს ზეციერ მამას. თუ ასე მოიქცევი, თანდათანობით განამტკიცებ ღმერთთან შენს ურთიერთობას.

13, 14. რას ნიშნავს, თაყვანი ვცეთ იეჰოვას და რატომ არის მართებული მისი თაყვანისცემა?

¹³ იეჰოვას მოსმენა და მასთან ლაპარაკი განსხვავდება მეგობრის ან ნათესავის მოსმენისგან და მათთან ლაპარაკისგან. როცა ვუსმენთ იეჰოვას და ვსაუბრობთ მასთან, თაყვანს ვცემთ და პატივს მივაგებთ, რასაც ნამდვილად იმსახურებს. ჭეშმარიტ თაყვანისმცემლობას ჩვენს ცხოვრებაში უმნიშვნელოვანესი ადგილი უჭირავს. ის იეჰოვასადმი სიყვარულისა და ერთგულების გამოვლენის შესაძლებლობას გვაძლევს და, როგორც ცაში, ისე დედამიწაზე, იეჰოვას ყველა ერთგულ ქმნილებას აერთიანებს. იოანე მოციქულის ხილვაში ანგელოზმა ყველას ხმამაღლა მოუწოდა: „თაყვანი ეცით ცისა და დედამიწის, ზღვისა და წყაროების შემქმნელს!“ (გამოცხადება 14:7).

¹⁴ რატომ უნდა ვცეთ თაყვანი იეჰოვას? დაფიქრდი იმ თვისებებზე, რომლებიც ამ წიგნში განვიხილეთ — სიწმინდეზე, ძლიერებაზე, თავშეკავებაზე, სამართლიანობაზე, გამბედაობაზე, გულმოწყალებაზე, სიბრძნეზე, თავმდაბლობაზე, სიყვარულზე, თანაგრძნობაზე, ერთგულებასა და სიკეთეზე. როგორც დავინახეთ, იეჰოვა სრულყოფილად ავლენს თითოეულ ამ ძვირფას  თვისებას. მისი თვისებების გაანალიზებისას ვხედავთ, რამდენად დიდებული და მიმზიდველია იეჰოვა. შეუდარებელია მისი სიდიადე. იეჰოვა ჩვენზე წარმოუდგენლად მაღლა დგას (ესაია 55:9). უეჭველია, რომ ის უზენაესი მმართველია და ნამდვილად იმსახურებს თაყვანისცემას. მაგრამ როგორ უნდა ვცეთ თაყვანი?

15. როგორ უნდა ვცეთ იეჰოვას თაყვანი „სულითა და ჭეშმარიტებით“ და რა შესაძლებლობას გვაძლევს ქრისტიანული შეხვედრები?

¹⁵ იესომ თქვა: „ღმერთი სულია და მისი თაყვანისმცემლები მას სულითა და ჭეშმარიტებით უნდა სცემდნენ თაყვანს“ (იოანე 4:24). ეს იმას ნიშნავს, რომ იეჰოვას სულითა და გულით, დიდი რწმენითა და სიყვარულით უნდა ვეთაყვანებოდეთ და ღვთის სული უნდა გვხელმძღვანელობდეს. გარდა ამისა, ჩვენი თაყვანისცემა ჭეშმარიტებაზე, ღვთის სიტყვის საფუძვლიან ცოდნაზე უნდა იყოს დაფუძნებული. შესანიშნავი შესაძლებლობა გვეძლევა, „სულითა და ჭეშმარიტებით“ ვცეთ თაყვანი  იეჰოვას, როდესაც თანამორწმუნეებთან ერთად ვიკრიბებით (ებრაელები 10:24, 25). როცა იეჰოვას სიმღერით განვადიდებთ, ერთად ვლოცულობთ, გამომსვლელებს ვუსმენთ და მონაწილეობას ვიღებთ ღვთის სიტყვის განხილვაში, მისადმი სიყვარულს ვავლენთ.

16. რა უდიდესი პასუხისმგებლობა აქვთ დაკისრებული ჭეშმარიტ ქრისტიანებს და რა აღგვძრავს მის შესასრულებლად?

¹⁶ იეჰოვას მაშინაც ვცემთ თაყვანს, როდესაც მის შესახებ სხვებთან ვლაპარაკობთ და საჯაროდ ვაქებთ და ვადიდებთ (ებრაელები 13:15). იეჰოვას სამეფოს შესახებ სასიხარულო ცნობის ქადაგება ყველაზე მნიშვნელოვანი პასუხისმგებლობაა, რომელიც ჭეშმარიტ ქრისტიანებს აქვთ დაკისრებული (მათე 24:14). იეჰოვას სიყვარული აღგვძრავს ამ პასუხისმგებლობის შესასრულებლად. როდესაც ვხედავთ, თუ როგორ „დაუბრმავა გონება“ ურწმუნოებს „ამ ქვეყნიერების ღმერთმა“, სატანა ეშმაკმა, რომელიც სიცრუეს ავრცელებს იეჰოვაზე, განა სურვილი არ გვიჩნდება, იეჰოვას მოწმეებად ვიმსახუროთ და გამოვააშკარავოთ ეს სიცრუე?! (2 კორინთელები 4:4; ესაია 43:10—12). თუ იეჰოვას შესანიშნავ თვისებებზე ვიფიქრებთ, განა არ აღვიძვრებით, მის შესახებ ვილაპარაკოთ?! ნამდვილად უდიდესი ბედნიერებაა, ადამიანებს დავეხმაროთ, გაიცნონ და შეიყვარონ ჩვენი ზეციერი მამა!

17. რას მოიცავს იეჰოვას თაყვანისცემა და რატომ უნდა ვემსახუროთ ღმერთს უმწიკვლოდ?

¹⁷ იეჰოვას თაყვანისცემა უფრო მეტსაც ნიშნავს. ის ჩვენი ცხოვრების ყველა მხარეს მოიცავს (კოლოსელები 3:23). თუ იეჰოვას ნამდვილად ვაღიარებთ უზენაეს უფლად, შევეცდებით, რომ მისი ნებისამებრ მოვიქცეთ ყველგან და ყოველთვის — ოჯახში, სამსახურში, სხვებთან ურთიერთობისას და თავისუფალ დროს. შევეცდებით მას მთელი გულით, უმწიკვლოდ ვემსახუროთ (1 მატიანე 28:9). ასეთი თაყვანისცემა გამორიცხავს ორმაგ ცხოვრებას — იეჰოვასთვის თვალთმაქცურ მსახურებას და ფარულად სერიოზული ცოდვების ჩადენას. უმწიკვლო ადამიანი შეუძლებელია თვალთმაქცი იყოს; სიყვარული გამორიცხავს თვალთმაქცობას. ამ მხრივ, ღვთის შიშიც დამხმარეა. ბიბლიაში  ღვთის შიში იეჰოვასთან ახლო მეგობრობას უკავშირდება (ფსალმუნი 25:14).

18, 19. რატომ არის რეალური, რომ არასრულყოფილმა ადამიანებმა სრულყოფილ იეჰოვა ღმერთს მიბაძონ?

¹⁸ ამ წიგნის ყოველი ნაწილის ბოლო თავში განხილული იყო, თუ როგორ უნდა მივბაძოთ ღმერთს, როგორც საყვარელმა შვილებმა (ეფესოელები 5:1). უნდა გვახსოვდეს, რომ არასრულყოფილების მიუხედავად, შეგვიძლია მივბაძოთ იეჰოვას, რომელიც სრულყოფილად ავლენს ძალას, სამართლიანობას, სიბრძნესა და სიყვარულს. საიდან ვიცით, რომ რეალურია, მივბაძოთ ყოვლისშემძლე ღმერთს? გაიხსენე, რას გვასწავლის იეჰოვას სახელი — თავისი განზრახვის განსახორციელებლად იეჰოვას შეუძლია გახდეს ის, რაც უნდა. ნამდვილად განსაცვიფრებელია მისი ეს უნარი, მაგრამ ნუთუ სრულიად შეუძლებელია ამაშიც მივბაძოთ მას? არა.

¹⁹ ჩვენ ღვთის მსგავსად ვართ შექმნილი (დაბადება 1:26). სწორედ ამით განსხვავდებიან ადამიანები დედამიწაზე არსებული ნებისმიერი ქმნილებისგან. ჩვენს ქცევას უბრალოდ ინსტინქტი, გენები ან გარემო არ განსაზღვრავს. იეჰოვამ ნების თავისუფლება გვიბოძა. ჩვენი შეზღუდული შესაძლებლობებისა და არასრულყოფილების მიუხედავად, არჩევანი ჩვენს ხელშია, თუ როგორი ადამიანი გავხდებით. როგორც უკვე გავიგეთ, ღმერთს შეუძლია თავისი მსახურებიც აქციოს იმად, რადაც მისი განზრახვების შესასრულებლადაა საჭირო. ასე რომ, გინდა იყო მოსიყვარულე, ბრძენი, სამართლიანი ადამიანი, რომელიც სწორად იყენებს საკუთარ ძალას? იეჰოვას სულის დახმარებით შეგიძლია სწორედ ასეთი ადამიანი გახდე! წარმოიდგინე ამ შემთხვევაში რამდენი კეთილი საქმის გაკეთებას შეძლებ.

20. რა შესაძლებლობა მოგვეცემა, თუ იეჰოვას მივბაძავთ?

²⁰ შესაძლებლობა მოგეცემა, ასიამოვნო და გული გაუხარო შენს ზეციერ მამას (იგავები 27:11). იმასაც კი შეძლებ, რომ „ყოველმხრივ ასიამოვნო“ იეჰოვას, რადგან მან იცის შენი შესაძლებლობები (კოლოსელები 1:9, 10). თუ განაგრძობ იმ დადებითი თვისებების განვითარებას, რომლებიც ჩვენს საყვარელ მამას  აქვს, უდიდესი პატივი გხვდება წილად. ამ ბნელით მოცულ ქვეყნიერებაში, რომელიც ღმერთს ჩამოშორებულია, სინათლესავით გაანათებ (მათე 5:1, 2, 14). შენც შეიტან წვლილს იმაში, რომ მთელ მსოფლიოში ყველამ დაინახოს, რაოდენ დიდებული პიროვნებაა იეჰოვა. რამხელა პატივია!

21, 22. რა გზით სიარულის შესაძლებლობა აქვს ყველას, ვისაც იეჰოვა უყვარს?

²¹ იაკობის 4:8-ში ჩაწერილი მოწოდება ჩვენი ცხოვრების გზაა და არა უბრალოდ მიზანი. თუ ღვთის ერთგულებას შევინარჩუნებთ, მუდამ ამ გზით ვივლით. არასდროს შევწყვეტთ იეჰოვასთან დაახლოებას. ყოველთვის გვექნება მის შესახებ რაღაც ახლის გაგების შესაძლებლობა. არ უნდა ვიფიქროთ, რომ ამ წიგნმა ყველაფერი გვასწავლა იეჰოვას შესახებ. ჩვენ მხოლოდ დავიწყეთ იმის განხილვა, რასაც ბიბლია გვეუბნება ღმერთზე! მაგრამ იეჰოვას შესახებ ბიბლიაშიც კი არ არის ყველაფერი ნათქვამი. იოანე მოციქულის სიტყვების თანახმად, ყველაფერი რომ დაწერილიყო, რაც იესომ დედამიწაზე მსახურებისას გააკეთა, „ქვეყნიერებაც ვერ დაიტევდა დაწერილ გრაგნილებს“ (იოანე 21:25). თუ ღვთის ძის შესახებ ასეთი რამ არის ნათქვამი, ცხადია, მამაზე ბევრად მეტის თქმა შეიძლება!

 ²² მარადიული სიცოცხლის განმავლობაშიც კი ვერ შევძლებთ იეჰოვას შესახებ ყველაფრის გაგებას (ეკლესიასტე 3:11). დაფიქრდი, რა გველოდება. ასი, ათასი, მილიონი და მილიარდი წლის შემდეგ იეჰოვას შესახებ ბევრად მეტი გვეცოდინება, ვიდრე ახლა ვიცით, მაგრამ დავინახავთ, რომ კვლავაც ბევრი საინტერესო რამ გვექნება სასწავლი. ყოველთვის გვექნება უფრო მეტის სწავლის სურვილი, რადგან სულ უფრო მეტად დავრწმუნდებით, რომ მართალს ამბობდა ფსალმუნმომღერალი: „ჩემთვის კარგია ღმერთთან დაახლოება“ (ფსალმუნი 73:28). დღეს ვერც კი წარმოვიდგენთ, თუ რამდენად საინტერესო და აზრიანი იქნება მარადიული სიცოცხლე. ღმერთთან დაახლოება ყოველთვის იქნება ცხოვრების საუკეთესო ნაწილი!

23. რის გასაკეთებლად ხარ აღძრული?

²³ გამოეხმაურე იეჰოვას სიყვარულს და მთელი გულით, სულით, გონებითა და ძალით შეიყვარე ის (მარკოზი 12:29, 30). შეეცადე, ყოველთვის შეინარჩუნო სიყვარული. დაე შენ მიერ უმნიშვნელო თუ მნიშვნელოვან საკითხებთან დაკავშირებით მიღებულ გადაწყვეტილებებში ჩანდეს, თუ რა პრინციპით ხელმძღვანელობ ყოველდღიურ ცხოვრებაში — გინდა, ყოველთვის იარო გზით, რომელიც სულ უფრო გაახლოებს შენს ზეციერ მამასთან. დაუახლოვდი იეჰოვას და ისიც დაგიახლოვდება მთელი მარადიულობის განმავლობაში!