1-3. (a) Nĩ ũndũ ũrĩkũ tũngĩĩruta wĩgiĩ andũ twerorera wendo gatagatĩ-inĩ ka aciari na mwana? (b) Twĩkaga atĩa rĩrĩa tuona atĩ mũndũ ũngĩ nĩ atwendete, na nĩ kĩũria kĩrĩkũ kĩa bata twagĩrĩirũo kwĩyũria?

 ACIARI nĩ mendaga mũno kuona kaana kao kanini gagĩtheka. Magakuhagĩrĩria ũthiũ-inĩ, na makambĩrĩria gũgathekia na gũkaarĩria na njĩra ya wendo. Thutha wa kahinda kanini, kaana kau o nako gakambĩrĩria kũmathekia gacanjamũkĩte. Gĩtheko kĩu kĩonanagia atĩ kaana kau nĩ kambĩrĩirie kwenda aciari ako nĩ ũndũ wa ũrĩa makendete.

² Gĩtheko kĩa mwana nĩ gĩtũririkanagia ũndũ ũmwe wa bata wĩgiĩ andũ. Tũmbĩtwo na njĩra ya atĩ mũndũ angĩtwenda, o na ithuĩ tũiguaga kũmwenda. (Thaburi 22:9) O ũrĩa tũrakũra, noguo tũhotaga gũthiĩ tũkĩonanagia wendo na njĩra njega makĩria. No kũhoteke nĩ ũririkanaga ũrĩa aciari aku, andũ a famĩlĩ, kana arata maakuonagia wendo rĩrĩa warĩ mũnini. Ũndũ ũcio nĩ watũmire ũkenio nĩo. Wendo mũnene ũkĩgĩa mĩri, ũgĩkũra ngoro-ini yaku, na ũkĩambĩrĩria kũmonia na ciĩko atĩ nĩ ũmendete. Hihi ũndũ ta ũcio nĩ ũrekĩka ũhoro-inĩ wĩgiĩ ũrata waku na Jehova Ngai?

³ Bibilia yugaga ũũ: “Ithuĩ twendanaga tondũ nĩwe waambire gũtwenda.” (1 Johana 4:19) Thĩinĩ wa Gĩcigo kĩa 1 nginya gĩa 3 kĩa ibuku rĩrĩ, nĩ ũraririkanirio atĩ Jehova Ngai atongoragio nĩ wendo hĩndĩ ĩrĩa arahũthĩra hinya wake, kĩhooto gĩake, na ũũgĩ wake, nĩguo ũgunĩke. Na Gĩcigo-inĩ gĩa 4, nĩ ũronire atĩ nĩ onanĩtie wendo wake harĩ andũ na njĩra cia magegania, wee ũrĩ ũmwe wao. Rĩu kĩũria kĩa bata kĩrĩa wagĩrĩirũo kwĩyũria nĩ gĩkĩ: ‘Ngwĩka atĩa nĩguo nyonanie atĩ nĩ nyendete Jehova?’

4. Nĩ na njĩra ĩrĩkũ andũ matukanĩirũo makaga kũmenya kwenda Ngai nĩ kuuga atĩa?

⁴ Jehova arĩ we Kĩhumo kĩa wendo, nĩ oĩ atĩ wendo nĩ ũrĩ ũhoti wa gũtũma andũ monanie ngumo iria njega biũ irĩ thĩinĩ wao. Kwoguo o na gũtuĩka andũ aingĩ nĩ magĩte wĩhokeku na makamũremera, nĩ akoragwo na ma atĩ andũ amwe nĩ mekũmwenda tondũ nĩ amendete. Na andũ aingĩ mũno nĩ mekĩte ũguo. No ũndũ wa kĩeha nĩ atĩ, ndini iria irĩ thĩinĩ wa thĩ ĩno njũru nĩ itũmĩte andũ matukanĩrũo, nginya makaaga kũmenya kwenda Ngai nĩ kuuga atĩa. Andũ aingĩ mũno nĩ moigaga atĩ nĩ mendete Ngai, no meciragia atĩ kuuga ũguo na kanua nĩ kũiganu. Kwenda Ngai no kwambĩrĩrie na kuuga atĩ nĩ tũmwendete, o ta ũrĩa mwana ambagĩrĩria kuonania wendo kwerekera aciari ake na njĩra ya gũtheka. No o ũrĩa tũrakũra, nĩ tũbataraga kuonania wendo na njĩra ingĩ.

5. Bibilia ĩtaaragĩria kwenda Ngai nĩ kuuga atĩa, na twagĩrĩire kũgucĩrĩrio nĩ ciugo icio nĩkĩ?

⁵ Jehova nĩ atũtaarĩirie kũmwenda nĩ kuuga atĩa. Kiugo gĩake gĩtwĩraga ũũ: “Kwenda Ngai nĩ atĩrĩ, tũrũmagĩrĩre maathani make.” Ũndũ ũcio ũratuonia atĩ wendo kwerekera Ngai wonanagio na ciĩko. Nĩ ma, andũ aingĩ nĩ monaga gwathĩka arĩ ũndũ mũritũ. No mũhari ũcio ũrĩkagĩrĩria na ciugo ici: “Na maathani make ti mũrigo.” (1 Johana 5:3) Watho wa Jehova na ũtaaro wake ũkoragwo ũhaarĩrĩirio nĩguo ũtũgune, no ti gũtũhinyĩrĩria. (Isaia 48:17, 18) Kiugo kĩa Ngai kĩiyũire motaaro mangĩtũteithia kũmũkuhĩrĩria makĩria. Na njĩra ĩrĩkũ? Reke tũthuthurie maũndũ matatũ megiĩ ũrata witũ na Ngai. Nĩmo kwaranĩria nake, kũmũthathaiya, na kwĩgerekania nake.

6-8. (a) Tũngĩthikĩrĩria Jehova atĩa? (b) Nĩ kĩĩ kĩngĩtũteithia gũkenagĩra ũthomi wa Bibilia?

⁶ Gĩcunjĩ kĩa 1 kĩambĩrĩirie na ciugo ici: “Ta hũũra mbica mũgĩteereta na Ngai.” Na nĩ tuoonire atĩ ũcio ti ũndũ ũtangĩhoteka, tondũ Musa nĩ aaranĩirie na Ngai. Ĩ ithuĩ na ithuĩ?  Mahinda-inĩ maya Jehova ndatũmaga araika nĩguo maranĩrie na andũ. No nĩ akoragwo na njĩra njega mũno cia kwaranĩria na ithuĩ. Ahũthagĩra njĩra irĩkũ, na tũngĩthikĩrĩria mũgambo wake atĩa?

⁷ Tondũ “rĩandĩko o rĩothe, rĩtongoretio nĩ roho wa Ngai,” tũthikagĩrĩria Jehova hĩndĩ ĩrĩa twathoma Kiugo gĩake, Bibilia. (2 Timotheo 3:16) Nĩ ũndũ ũcio, mwandĩki wa Thaburi eerire ndungata cia Jehova ithomage Kiugo kĩa Ngai “ũtukũ na mũthenya.” (Thaburi 1:1, 2) Ũndũ ũcio nĩ ũbataraga twĩkĩre kĩyo. Na kĩyo ta kĩu nĩ kĩrĩ uumithio. O ta ũrĩa Gĩcunjĩ gĩa 18 kĩonanĩtie, Bibilia nĩ ta marũa ma bata mũno tũtũmĩirũo nĩ Ithe witũ wa igũrũ. Kwoguo tũtiagĩrĩirũo kũigua ũrĩ ũndũ mũritũ kũmĩthoma. Twagĩrĩirũo gũthoma na njĩra tũrĩkenagĩra. Tũngĩka ũguo atĩa?

⁸ Ũgĩthoma, hũũra mbica meciria-inĩ maũndũ marĩa ũrathoma. Geria kuona andũ arĩa magwetetwo ũhoro-inĩ ũcio ũrathoma. Geria gũtaũkĩrũo nĩ mĩikarĩre yao, maũndũ marĩa maragerera, na mĩoroto yao. Ũcoke wĩcũranie na njĩra ndikĩru ũhoro wa maũndũ marĩa ũrathoma, ũkĩyũragia ũũ: ‘Ũhoro ũyũ ũranduta ũndũ ũrĩkũ wĩgiĩ Jehova? Nĩ ngumo irĩkũ ciake ndĩrona ũhoro-inĩ ũcio? Hihi Jehova arenda ngĩe na ũtaaro ũrĩkũ kuumana na ũhoro ũyũ, na ingĩũhũthĩra atĩa ũtũũro-inĩ wakwa?’ Nĩ ũrĩkenagĩra Kiugo kĩa Ngai ũngĩthomaga, ũgecũrania, na ũkahũthĩra ũtaaro wa kĩo.—Thaburi 77:12; Jakubu 1:23-25.

9. “Ngombo ĩrĩa njĩhokeku na njũgĩ” nũũ, na nĩkĩ nĩ ũndũ wa bata kũmĩthikĩrĩria?

⁹ Jehova ningĩ nĩ aragia na ithuĩ akĩhũthĩra “ngombo ĩrĩa njĩhokeku na njũgĩ.” O ta ũrĩa Jesu aarathĩte, nĩ harĩ gakundi kanini ka Akristiano aitĩrĩrie maguta arĩa mamũrĩtwo kũheana irio cia kĩĩroho “ihinda rĩrĩa rĩagĩrĩire,” mahinda-inĩ maya maritũ ma kũrigĩrĩria. (Mathayo 24:45-47) Rĩrĩa twathoma mabuku marĩa mahaarĩrĩirio nĩguo matũteithie kũgĩa na ũmenyo ũrĩa wa ma wa Bibilia, na twathiĩ mĩcemanio na igomano, tũkoragwo tũkĩheo irio cia kĩĩroho nĩ ngombo ĩyo. Na tondũ nĩ ngombo ya Kristo, no ũkorũo ũrĩ ũndũ wa ũũgĩ gwathĩkĩra  ũtaaro ũyũ wa Jesu: “Mwĩmenyagĩrĩrei ũrĩa mũthikagĩrĩria.” (Luka 8:18) Tũthikagĩrĩria ngombo ĩyo njĩhokeku na kinyi, tondũ nĩ tũmenyaga atĩ nĩ njĩra ĩmwe ya Jehova ya kwaranĩria na ithuĩ.

10-12. (a) Nĩkĩ mahoya nĩ kĩheo kĩa bata kuuma kũrĩ Jehova? (b) Nĩ mahoya marĩkũ makenagia Jehova, na nĩkĩ no tũkorũo na ũũma atĩ nĩ onaga mahoya maitũ marĩ ma bata?

¹⁰ Nĩ tuona ũrĩa Jehova atwaragĩria. No hihi ithuĩ no tũhote kwarĩria Jehova? Tũngĩciria ũhoro ũcio, twahota gwĩtigĩra. Ũngĩenda gũthiĩ kũrĩ mũtongoria ũrĩa mũnene thĩinĩ wa bũrũri wanyu nĩguo mwarĩrĩrie ũndũ mũna ũragũthumbũra-rĩ, hihi nĩ ũkuona ta ũngĩhota? Rĩmwe, kũgeria kuo gwiki no gũkorũo kũrĩ ũgwati mũnene! Matukũ-inĩ ma Esiteri na Moridekai, mũndũ nĩ angĩoragirũo angĩageririe gũthiĩ kũrĩ mũthamaki wa Perisia atarĩ na rũtha rwake. (Esiteri 4:10, 11) Rĩu ta hũũra mbica ũgĩthiĩ mbere ya Mwathani Mũnene wa igũrũ na thĩ, ũrĩa Bibilia yonanagia atĩ o na andũ arĩa me hinya makĩria, “matariĩ o ta ndaahi” makĩringithanio nake! (Isaia 40:22) Hihi nĩ twagĩrĩirũo gwĩtigĩra kũmũkuhĩrĩria? Aca o na hanini!

¹¹ Jehova nĩ ahingũrĩte njĩra njega na hũthũ ya gũtũhotithia kwaranĩria nake, na nĩyo mahoya. O na kaana kanini no kahote kũhoya Jehova karĩ na wĩtĩkio, kũgerera rĩĩtwa rĩa Jesu. (Johana 14:6; Ahibirania 11:6) O na kũrĩ ũguo, mahoya nĩ matũhotithagia gũitũrũra maũndũ maritũ marĩa marĩ ngoro-inĩ citũ, nginya marĩa matũiguithagia ũũru mũno tũkaremwo kũmataarĩria na ciugo. (Aroma 8:26) Hatirĩ ũndũ tũngĩkorũo tũkĩhingia tũngĩgeria gũkenia Jehova na njĩra ya kũgemia mahoya maitũ na ciugo nyingĩ thaka na kũmaraihia. (Mathayo 6:7, 8) O na kũrĩ ũguo, Jehova ndatũigagĩra mĩhaka ya maita marĩa twagĩrĩirũo kwaria nake kana ũraihu wa mahoya maitũ. O na Kiugo gĩake gĩtwĩraga ũũ: “Hoyagai hingo ciothe.”—1 Athesalonike 5:17.

¹² Ririkana atĩ no Jehova wiki tu wĩtagwo “Mũigua wa mahoya,” na nĩ amathikagĩrĩria. (Thaburi 65:2) Hihi nĩ anogaga gũthikĩrĩria mahoya ma ndungata ciake njĩhokeku? Aca, ũrĩa  kũrĩ nĩ atĩ nĩ akenagĩra gũthikĩrĩria. Kiugo gĩake kĩringithanagia mahoya ta macio na ũbumba ũrambatia mũtararĩko mwega wa kũmũhooreria. (Thaburi 141:2; Kũguũrĩrio 5:8; 8:4) Na githĩ ti ũndũ wa gũtũũmĩrĩria kũmenya atĩ mahoya maitũ ma kuuma ngoro nĩ makinyagĩra Mwathani Mũnene na makamũkenia? Nĩ ũndũ ũcio, ũngĩenda gũkuhĩrĩria Jehova, aragia nake na njĩra ya mahoya o mũthenya wĩnyihĩtie. Mũitũrũragĩre ngoro yaku, na ndũgetigĩre kũmwĩra ũndũ o na ũrĩkũ. (Thaburi 62:8) Mwĩrage maũndũ marĩa magũtangaga, marĩa magũkenagia, ũkamũcokagĩria ngatho, na ũkamũgoocaga mahoya-inĩ maku. Ũngĩka ũguo, ũrata waku hamwe nake ũgũthiĩ ũkũrĩte.

13, 14. Gũthathaiya Jehova nĩ kuuga atĩa, na nĩkĩ nĩ twagĩrĩirũo gwĩka ũguo?

¹³ Rĩrĩa tũraranĩria na Jehova Ngai, tũtikoragwo tũkĩaranĩria nake ta ũrĩa twaranagĩria na arata aitũ kana andũ a famĩlĩ. Tũkoragwo tũkĩmũthathaiya, tũkĩmũheaga gĩtĩo kĩrĩa kĩmwagĩrĩire. Tũtongoragio nĩ ũthathaiya wa ma ũtũũro-inĩ witũ wothe. Kũgerera ũthathaiya witũ, nĩ tuonanagia wendo witũ wa ngoro yothe na wĩyamũrĩri witũ harĩ Jehova, na tũkagĩa na ũrũmwe na ciũmbe ciothe njĩhokeku cia Jehova iria irĩ igũrũ kana gũkũ thĩ. Kĩoneki-inĩ kĩrĩa mũtũmwo Johana oonirio, aaiguire mũraika akĩanĩrĩra ũũ: “Thathaiyai Ũrĩa wombire igũrũ na thĩ na iria o na matherũkĩro ma maĩ.”—Kũguũrĩrio 14:7.

¹⁴ Twagĩrĩirũo gũthathaiya Jehova nĩkĩ? Ta wĩcirie ũhoro wa ngumo ciake iria twarĩrĩirie ibuku-inĩ rĩrĩ ta ũtheru, hinya, kwĩgirĩrĩria, kĩhooto, ũcamba, tha, ũũgĩ, wĩnyihia, wendo, ũcayanĩri, wĩhokeku, na wega. Nĩ twĩrutĩte atĩ Jehova onanagia o ĩmwe ya ngumo icio na gĩkĩro kĩa igũrũ mũno. Tũngĩgeria gũtaũkĩrũo nĩ ngumo ciake ciothe, no tuone atĩ gũtirĩ ũngĩ ũngĩhota gũtũgucĩrĩria take. Riri wake nĩ wa gĩkĩro kĩa igũrũ mũno na tũtingĩhota kwĩiganania nake. (Isaia 55:9) Hatarĩ nganja, Jehova nĩwe wĩna kĩhooto gĩa gũtwatha, na  nĩ twagĩrĩirũo kũmũthathaiya. No hihi twagĩrĩirũo kũmũthathaiya atĩa?

15. Tũngĩthathaiya Jehova atĩa “na roho na ma,” na mĩcemanio ya Gĩkristiano ĩtũheaga mĩeke ĩrĩkũ ũndũ-inĩ ũcio?

¹⁵ Jesu ooigire ũũ: “Ngai nĩ Roho, na arĩa mamũthathayagia no mũhaka mamũthathayagie na roho na ma.” (Johana 4:24) Nĩguo tũthathaiye Ngai “na roho,” no mũhaka tũkoragwo na roho wake na tũgatongorio nĩguo. Ningĩ ũthathaiya witũ no mũhaka ũkorũo ũringaine na ũhoro wa ma, kana ũmenyo wa ma ũrĩa ũkoragwo Kiugo-inĩ kĩa Ngai. Tũkoragwo na mweke wa mwanya wa gũthathaiya Jehova “na roho na ma,” rĩrĩa rĩothe tũcemanĩtie hamwe na aarĩ na ariũ a Ithe witũ. (Ahibirania 10:24, 25) Rĩrĩa tũrainĩra Jehova hamwe, tũkahoya, na tũgathikĩrĩria Kiugo gĩake na tũgakĩarĩrĩria, tũkoragwo tũkĩonania wendo witũ harĩ we kũgerera ũthathaiya mũtheru.

16. Ũmwe wa mawatho marĩa manene Akristiano a ma maheetwo nĩ ũrĩkũ, na twendaga kũwathĩkĩra nĩkĩ?

 ¹⁶ Ningĩ nĩ tũthathayagia Jehova rĩrĩa tũrahunjĩria andũ arĩa angĩ ũhoro wake, na njĩra ĩyo tũkamũgooca mbere ya andũ. (Ahibirania 13:15) Wĩra wa kũhunjia ũhoro mwega wa Ũthamaki wa Jehova, nĩ ũmwe wa mawatho marĩa manene maheetwo Akristiano a ma. (Mathayo 24:14) Tũwathĩkagĩra twĩyendeire tondũ nĩ twendete Jehova. Rĩrĩa tweciria ũhoro wa ũrĩa Shaitani, “ngai wa mũtabarĩre ũyũ wa maũndũ atumumarĩtie meciria ma arĩa matetĩkĩtie,” na njĩra ya gũtheremia maheeni moru igũrũ rĩgiĩ Jehova-rĩ, na githĩ tũtiguaga tũkĩenda mũno kũruta ũira wĩgiĩ Ngai witũ nĩguo tuonie andũ atĩ Shaitani nĩ mũheenania? (2 Akorintho 4:4; Isaia 43:10-12) Na rĩrĩa twecũrania igũrũ rĩgiĩ ngumo njega cia Jehova, nĩ tũiguaga tũkĩhĩahĩa kũhe andũ arĩa angĩ ũhoro wake. Hatarĩ nganja, gũtirĩ mweke ũngĩ mũnene na wa mwanya ũkĩrĩte wa gũteithĩrĩria andũ mamenye Ithe witũ wa igũrũ na mamwende o ta ũrĩa tũmwendete.

17. Ũthathaiya witũ kwĩ Jehova ũhutĩtie maũndũ marĩkũ, na nĩkĩ no mũhaka tũmũthathaiye twĩ na wĩkindĩru?

¹⁷ Ũthathaiya witũ kwĩ Jehova nĩ ũhutĩtie maũndũ mangĩ maingĩ. Ũhutagia mũtũũrĩre witũ wothe. (Akolosai 3:23) Angĩkorũo nĩ twĩtĩkĩrĩte Jehova akorũo arĩ we Mwathani witũ Mũnene, nĩ tũrĩgeragia o ũrĩa wothe twahota gwĩka wendi wake maũndũ-inĩ mothe, nginya mũtũũrĩre-inĩ witũ wa famĩlĩ, mawĩra-inĩ maitũ, mĩikaranĩrie-inĩ itũ na andũ arĩa angĩ, na rĩrĩa tũrĩ ithuiki. Tũrĩgeragia ũrĩa wothe tũngĩhota gũtungatĩra Jehova “na ngoro yothe” twĩ na wĩkindĩru. (1 Maũndũ ma Matukũ ma Tene 28:9) Ũthathaiya ta ũcio nĩ ũtũgiragĩrĩria kũgĩa na ngoro ngayũkanu kana ũtũũro wa ũhinga, wa gwĩtua nĩ tũratungatĩra Jehova, no hĩndĩ o ĩyo nĩ tũreka mehia hitho-inĩ. Wĩkindĩru ũtũmaga tũkorũo tũtarĩ na ũhinga ta ũcio; wendo naguo ũgatũma tũũmene. Gwĩtigĩra Ngai o na kuo no gũtũteithie. Bibilia yonanagia atĩ andũ arĩa metigĩrĩte Jehova, no o tu mangĩgĩa na ũrata wa hakuhĩ hamwe nake.—Thaburi 25:14.

18, 19. Nĩkĩ no tuuge atĩ andũ matarĩ akinyanĩru no mahote kwĩgerekania na Jehova?

¹⁸ O gĩcigo kĩa ibuku rĩrĩ, kĩrarĩkĩrĩra na gĩcunjĩ kĩronania ũrĩa tũngĩhota ‘kwĩgerekanagia na Ngai tũrĩ ciana ciendetwo.’ (Aefeso 5:1) Nĩ ũndũ wa bata kũririkana atĩ o na angĩkorũo tũtirĩ akinyanĩru, no tũhote kwĩgerekania na Jehova harĩ kũhũthĩra hinya wega, kũrũmĩrĩra kĩhooto, gwĩka maũndũ na ũũgĩ, na kuonania wendo. Tũmenyaga atĩa atĩ no tũhote kwĩgerekania na Mwene-Hinya-Wothe? Ririkana atĩ rĩĩtwa rĩa Jehova riugĩte atĩ no atuĩke kĩrĩa gĩothe angĩenda nĩguo ahingie mĩoroto yake. Nĩ ma nĩ tũgegagio nĩ ũhoti ũcio wake, no hihi ũguo nĩ kuuga atĩ tũtingĩhota kwĩgerekania nake? Aca.

¹⁹ Tũũmbĩtwo na mũhianĩre wa Ngai. (Kĩambĩrĩria 1:26) Nĩ ũndũ ũcio, gũtirĩ ciũmbe ingĩ thĩinĩ wa thĩ ihaanaine na mũndũ. Ngũrani na ciũmbe ingĩ thĩinĩ wa thĩ iria itongoragio nĩ ũũgĩ wa mũũmbĩre, andũ nĩ maheetwo kĩheo kĩa bata mũno kĩa wĩyathi wa gwĩthuurĩra. O na gũtuĩka tũtirĩ akinyanĩru, twĩ na wĩyathi wa gwĩthuurĩra ũrĩa tũkũhũthĩra ũtũũro witũ. Makĩria ma ũguo, ririkana atĩ rĩĩtwa rĩa Ngai ningĩ riugĩte no atũme ndungata ciake ituĩke kĩrĩa gĩothe angĩenda. Kwoguo-rĩ, hihi no wende gũtuĩka mũndũ ũrĩ wendo, ũũgĩ, kĩhooto, na ũrahũthĩra hinya ũrĩa kwagĩrĩire? Kũgerera ũteithio wa roho wa Jehova no ũhote! Wĩcirie ũhoro wa maũndũ mega marĩa ũngĩhota kũhingia ũngĩgĩa na ngumo icio.

20. Tũgunĩkaga atĩa nĩ ũndũ wa kwĩgerekania na Jehova?

²⁰ Nĩ ũrĩkenagia ngoro ya Ithe witũ wa igũrũ. (Thimo 27:11) O na no ũhote ‘kũmũkenagia biũ,’ tondũ nĩ oĩ maũndũ marĩa ũngĩhota gwĩka. (Akolosai 1:9, 10) Ningĩ o ũrĩa ũgũthiĩ na mbere gũkũria ngumo njega na njĩra ya kwĩgerekania na Ithe witũ ũrĩ wendo, noguo ũkũrathimwo na mweke wa mwanya. Ũrĩkoragwo ũrĩ ũtheri thĩinĩ wa thĩ ĩno ĩiyũire nduma na ĩraihĩrĩirie Ngai. (Mathayo 5:1, 2, 14) Nĩ ũrĩonanagia ngumo ta cia Jehova, na kwoguo ũgateithia andũ arĩa angĩ kuona atĩ we nĩ Ngai ũrĩ riri mũingĩ. Hatarĩ nganja kĩu nĩ gĩtĩo kĩnene!

21, 22. Nĩ ũndũ ũrĩkũ andũ arĩa mendete Jehova megũtũũra mekaga?

²¹ Ũhoro ũrĩa wandĩkĩtwo thĩinĩ wa Jakubu 4:8, ti ũndũ wa gwĩkwo riita rĩmwe no nĩ ũndũ wa gũthiĩ na mbere. Tũngĩtũũra tũrĩ ehokeku, gũtirĩ hĩndĩ tũgaatiga gũkuhĩrĩria Jehova. Ũhoro wa ma nĩ atĩ, gũtirĩ hĩndĩ tũkaaga maũndũ maingĩ ma kwĩruta megiĩ Jehova. Ibuku rĩrĩ rĩtinatũruta maũndũ mothe megiĩ Jehova. Gĩkĩ no kĩambĩrĩria tu gĩa kwĩruta maũndũ megiĩ Ngai marĩa maandĩkĩtwo thĩinĩ wa Bibilia! Na o na Bibilia ndĩtwĩraga maũndũ mothe megiĩ Jehova. Mũtũmwo Johana ooigire atĩ maũndũ marĩa Jesu eekire ũtungata-inĩ wake gũkũ thĩ maangĩandĩkirũo mothe, “thĩ ndĩngĩaiganĩrire ikũnjo iria ingĩaandĩkirũo.” (Johana 21:25) Angĩkorũo no kwĩrũo ũndũ ta ũcio igũrũ rĩgiĩ Mũriũ-rĩ, ĩ Ithe nake?

²² Gũtirĩ hĩndĩ tũgaakinya mũthia wa kũmenya Jehova o na twatũũra tene na tene. (Kohelethu 3:11) Ta kĩgerie kũhũũra mbica maũndũ marĩa marĩ mbere itũ. Thutha wa gũtũũra mĩaka magana, makiri, mamilioni, o na mabilioni maingĩ,  tũgaakorũo tũũĩ maũndũ maingĩ megiĩ Jehova Ngai gũkĩra marĩa tũũĩ ũmũthĩ. Ĩndĩ o na hĩndĩ ĩyo no tũkoona atĩ kũrĩ na maũndũ maingĩ ma magegania tũkaabatara kũmenya mamwĩgiĩ. Nĩ tũgaakoragwo na wendi mũnene wa kũmenya makĩria, tondũ hingo ciothe tũkaaiguaga ta mwandĩki wa Thaburi, ũrĩa woigire ũũ: “Gũkuhĩrĩria Ngai nĩkuo kwega na niĩ.” (Thaburi 73:28) Ũtũũro wa tene na tene ũgaakorũo na muoroto na maũndũ maingĩ mega ma gwĩka, na gũkuhĩrĩria Jehova nĩguo ũndũ ũrĩa tũgaakenagĩra makĩria.

23. Ibuku rĩrĩ rĩagwĩkĩra ngoro gwĩka atĩa?

²³ Gũkĩrĩ ũguo-rĩ, onanagia ngatho nĩ ũndũ wa wendo wa Jehova ũmũthĩ, na njĩra ya kũmwenda na ngoro yaku yothe, muoyo waku wothe, meciria maku mothe, na hinya waku wothe. (Mariko 12:29, 30) Reke wendo waku ũkorũo ũrĩ na wĩhokeku na ũrũmĩte wega. Reke matua maku ma o mũthenya marĩ manini kana manene, monanagie atĩ nĩ ũrĩrũmagĩrĩra njĩra ĩrĩa ĩngĩgũtongoria ũkorũo na ũrata wa hakuhĩ makĩria na Ithe witũ wa igũrũ. Makĩria ma ũndũ ũngĩ o wothe, ũrotũũra ũkuhagĩrĩria Jehova makĩria nake agũkuhagĩrĩrie makĩria, nginya tene na tene!