31-تاراۋ
«قۇدايعا جاقىنداڭدار، سوندا ول دا سەندەرگە جاقىندايدى»
1—3. ا) اتا-انا مەن نارەستەنىڭ قارىم-قاتىناسىنان ادامنىڭ بولمىسى تۋرالى نە بىلۋگە بولادى؟ ٵ) بىرەۋ بىزگە سۇيىسپەنشىلىگىن كورسەتكەندە ادەتتە نە بولادى جانە ٴبىز وزىمىزگە قانداي ماڭىزدى سۇراق قويۋىمىز كەرەك؟
اتا-انالار جاڭا تۋىلعان نارەستەلەرىنىڭ كۇلكىسىن تاماشالاۋدى وتە جاقسى كورەدى. ولار ٴجيى بالاعا ەڭكەيىپ، ەزۋلەرى جيىلماعان كۇيى ەلجىرەي سويلەپ، جاۋاپ كۇتەدى. بوبەك كوپ كۇتتىرمەيدى: جۇزىنە كۇلكى ٷيىرىلىپ، بەتتەرىندە شۇقىر پايدا بولادى دا، ەزۋ تارتىپ، ٴجۇزى جايناپ سالا بەرەدى. كىشكەنە بوبەك اتا-اناسىنا باۋىر باسقانىن وسىلاي عانا كورسەتەدى، بۇل — ونىڭ اتا-اناسىنىڭ ماحابباتىنا جاۋاپ رەتىندە سۇيىسپەنشىلىك كورسەتۋىنىڭ باستاماسى.
2 بالا كۇلكىسى ادامنىڭ بولمىسى جايلى ٴبىر جايتتى ەسىمىزگە سالادى: ادام سۇيىسپەنشىلىككە سۇيىسپەنشىلىكپەن جاۋاپ بەرەدى. ٴبىز سولاي جاراتىلعانبىز (ٴزابۋر 22:9 [21:10]). وسە كەلە، سۇيىسپەنشىلىككە جاۋاپ بەرۋ قابىلەتىمىز جەتىلە تۇسەدى. بالا كۇنىڭدە اتا-اناڭ مەن تۋىستارىڭنىڭ نەمەسە دوستارىڭنىڭ وزىڭە دەگەن سۇيىسپەنشىلىكتەرىن قالاي كورسەتكەنى، ٴسىرا، ەسىڭدە بولار. سەنىڭ جۇرەگىڭدە جىلى سەزىم ۇيالاپ، وسە ٴتۇسىپ، اقىرىندا ارەكەتكە ۇلاستى. سۇيىسپەنشىلىككە سەن دە سۇيىسپەنشىلىكپەن جاۋاپ بەرەتىن بولدىڭ. ەحوبا قۇدايمەن دە قارىم-قاتىناسىڭ وسىلاي دامىدى ما؟
3 كيەلى كىتاپتا: «ٴبىز سۇيەمىز، سەبەبى ول ٴبىزدى الدىمەن ٴسۇيدى»،— دەلىنگەن (جوحاننىڭ 1-حاتى 4:19). وسى كىتاپتىڭ العاشقى ٷش بولىمىندە ەحوبا قۇداي ٶزىنىڭ كۇشىن، ادىلدىگى مەن دانالىعىن سەنىڭ يگىلىگىڭ ٷشىن سۇيىسپەنشىلىكپەن تانىتاتىنى ەسىڭە سالىندى. ال 4-بولىمنەن ونىڭ ٶز سۇيىسپەنشىلىگىن بۇكىل ادامزاتقا جانە جەكە ساعان قانداي كەرەمەت تۇردە تانىتاتىنىن كوردىڭ. ەندى وسى جەردە وتە ماڭىزدى سۇراق تۋادى: «ەحوبانىڭ سۇيىسپەنشىلىگىنە مەن قالاي جاۋاپ بەرەمىن؟»
قۇدايدى ٴسۇيۋ دەگەن نەنى بىلدىرەدى؟
4. قۇدايدى سۇيۋگە قاتىستى ادامداردىڭ تۇسىنىگى قالاي بۇرمالانعان؟
4 سۇيىسپەنشىلىكتىڭ قاينار كوزى ەحوبا سۇيىسپەنشىلىك وزگەلەردىڭ بويىنداعى جاقسى قاسيەتتەردىڭ دامي تۇسۋىنە ىقپال ەتەتىن زور كۇشكە يە ەكەنىن بىلەدى. وپاسىز ادامزاتتىڭ قايتپاي بۇلىكشىل رۋح تانىتاتىنىنا قاراماستان، ول ٶزىنىڭ سۇيىسپەنشىلىگىنە كەيبىر ادامداردىڭ جاۋاپ قايىراتىنىنا سەنەدى. ميلليونداعان ادام سولاي ەتىپ تە جاتىر. الايدا، ٴبىر وكىنىشتىسى، قازىرگى زۇلىم دۇنيەدەگى دىندەر قۇدايدى ٴسۇيۋ دەگەن تۇسىنىكتى بۇرمالاپ جىبەرگەن. كوپ ادام قۇدايدى سۇيەمىز دەيدى، ٴبىراق ولار مۇنى كوركەم سوزبەن جەتكىزۋگە بولاتىن جاي عانا سەزىم دەپ قاراستىراتىنعا ۇقسايدى. قۇدايدى ٴسۇيۋ كىشكەنە بوبەكتىڭ اتا-اناسىنا كۇلۋ ارقىلى كورسەتكەن سۇيىسپەنشىلىگى سياقتى باستالۋى مۇمكىن. ٴبىراق ەرەسەك ادامنىڭ سۇيىسپەنشىلىگى مۇنىمەن عانا شەكتەلمەيدى.
5. قۇدايدى ٴسۇيۋ دەگەن نەنى بىلدىرەتىنى كيەلى كىتاپتا قالاي تۇسىندىرىلەدى جانە نەگە بۇل ٴبىز ٷشىن جاعىمدى نارسە بولۋ كەرەك؟
5 ٶزىن ٴسۇيۋدىڭ نەنى بىلدىرەتىنىن ەحوبانىڭ ٶزى تۇسىندىرەدى. ونىڭ سوزىندە: «وسيەتتەرىن ورىنداعانىمىز — قۇدايدى سۇيگەنىمىز»،— دەلىنگەن. ولاي بولسا، قۇدايعا دەگەن سۇيىسپەنشىلىك ارەكەتتەن كورىنۋى كەرەك. راس، كوپ ادامعا بىرەۋگە مويىنسۇنۋ كەرەك دەگەن وي تارتىمدى بولىپ كورىنبەيدى. ٴبىراق جوعارىدا كەلتىرىلگەن تارماقتا ٵرى قاراي: «ولاردى [قۇدايدىڭ وسيەتتەرىن] ورىنداۋ قيىن ەمەس»،— دەگەن جىلى سوزدەر ايتىلعان (جوحاننىڭ 1-حاتى 5:3). ەحوبانىڭ زاڭدارى مەن پرينسيپتەرى اۋىرتپالىق بولۋ ٷشىن ەمەس، قايتا، ٴبىزدىڭ پايدامىز ٷشىن بەرىلگەن (يشايا 48:17، 18). قۇداي ٴسوزى ەحوباعا جاقىنداۋىمىزعا كومەكتەسەتىن پرينسيپتەرگە تولى. قالايشا؟ قۇدايمەن قارىم-قاتىناستا بولۋدىڭ ٷش جولىن قاراستىرايىق: بايلانىستا بولۋ، عيبادات ەتۋ جانە وعان ەلىكتەۋ.
ەحوبامەن بايلانىستا بولۋ
6—8. ا) ەحوبانى قالاي ەستي الامىز؟ ٵ) وقىعاندا جازبالارعا قالاي جان بىتىرۋگە بولادى؟
6 وسى كىتاپتىڭ ٴبىرىنشى تاراۋى «كوز الدىڭا قۇدايمەن سويلەسىپ جاتقانىڭدى ەلەستەتە الاسىڭ با؟» دەگەن سۇراقتان باستالعان ەدى. ٴبىز مۇنىڭ تەك قيال ەمەس ەكەنىن كوردىك. مىسالى، مۇسا قۇدايمەن سويلەسكەن. ال ٴبىز جايلى نە دەۋگە بولادى؟ قازىر ادامدارمەن سويلەسۋ ٷشىن ەحوبا پەرىشتەلەرىن جىبەرمەيدى. ٴبىراق بۇگىندە بىزبەن بايلانىستا بولۋ ٷشىن ەحوبا كەرەمەت ٵدىستى قولدانادى. سونىمەن، ونىڭ ايتقاندارىن ٴبىز قالاي ەستي الامىز؟
7 ‹كيەلى جازبالاردىڭ ٴبارى قۇداي رۋحىنىڭ جەتەلەۋىمەن جازىلعاندىقتان›، ٴبىز ەحوبانى ونىڭ ٴسوزى كيەلى كىتاپتى وقۋ ارقىلى ەستيمىز (تىموتەگە 2-حات 3:16). سوندىقتان ٴزابۋر جىرشىسى ەحوبانىڭ قىزمەتشىلەرىن ونى «كۇنى-ٴتۇنى» وقۋعا شاقىرادى (ٴزابۋر 1:1، 2). بۇلاي ەتۋ كوپ كۇش سالۋدى تالاپ ەتەدى. ٴبىراق ەڭبەگىمىزدىڭ زايا كەتپەسى انىق. 18-تاراۋدان كورگەنىمىزدەي، كيەلى كىتاپتى كوكتەگى اكەمىزدەن كەلگەن قۇندى حاتقا تەڭەۋگە بولادى. سوندىقتان ونى وقۋ ٴبىز ٷشىن قاجىتاتىن ٸس بولماۋ كەرەك. جازبالارعا جان بىتىرە وقىعان دۇرىس. مۇنى قالاي ىستەۋگە بولادى؟
8 وقىعان نارسەڭدى كوز الدىڭا ەلەستەت. كيەلى كىتاپ كەيىپكەرلەرىن كورىپ تۇرعانداي قابىلداۋعا تىرىس. ولاردىڭ شىققان ورتاسىن، جاعدايىن، نيەتتەرىن تۇسىنۋگە تالپىن. سوسىن، وزىڭە: «وسى ۇزىندىدەن ەحوبا تۋرالى نە ٴبىلدىم؟ ونىڭ قانداي قاسيەتىن كوردىم؟ ەحوبا مەنىڭ قانداي ٴپرينسيپتى بىلگەنىمدى قالايدى جانە ونى ومىردە قالاي قولدانۋىما بولادى؟»— دەگەن سۇراقتار قويىپ، تەرەڭ وي جۇگىرت. وقى، وي جۇگىرت جانە ومىردە قولدان، وسىلاي ەتەر بولساڭ، قۇداي ٴسوزى سەن ٷشىن ٴتىرى بولادى (ٴزابۋر 77:12 [76:13]؛ جاقىپ 1:23—25).
9. «ادال دا اقىلدى قۇل» دەگەن كىم جانە نەگە سول «قۇلدى» مۇقيات تىڭداعانىمىز ماڭىزدى؟
9 سونىمەن قاتار ەحوبا بىزگە «ادال دا اقىلدى قۇل» ارقىلى سويلەيدى. يسا الدىن الا ايتقانداي، قازىرگى قيىنشىلىققا تولى سوڭعى كۇندەرى ‹اس-سۋدى ۋاقتىلى بەرۋ› ٷشىن مايلانعان ماسىحشىلەر تابى تاعايىندالعان (ماتاي 24:45—47، جد). كيەلى كىتاپتاعى تۋرا بىلىمگە يە بولۋىمىزعا كومەكتەسۋگە ارنالعان ادەبيەتتەردى وقىعاندا، ماسىحشىلەردىڭ كەزدەسۋلەرى مەن كونگرەستەرىنە بارعاندا، قۇل تابى دايارلاعان رۋحاني اس-سۋدى قابىلدايمىز. ول ٴماسىحتىڭ قۇلى بولعاندىقتان، يسانىڭ: «قالاي تىڭدايتىندارىڭا نازار اۋدارىڭدار!»— دەگەن سوزدەرىنە قۇلاق اسقانىمىز ابزال (لۇقا 8:18). ەحوبانىڭ بىزبەن قۇل تابى ارقىلى بايلانىساتىنىن بىلەمىز، سوندىقتان ونى مۇقيات تىڭدايمىز.
10—12. ا) نەگە دۇعا ەحوبانىڭ كەرەمەت سيى؟ ٵ) قانداي دۇعالار ەحوباعا ۇنامدى بولادى جانە ونىڭ دۇعالارىمىزدى باعالايتىنىنا نەگە سەنىمدى بولا الامىز؟
10 سويتسە دە قۇدايمەن بايلانىسۋ جونىندە نە دەۋگە بولادى؟ ٴبىز قۇدايعا بىردەڭە ايتا الامىز با؟ بۇل — كوڭىل تولقىتاتىن وي. ەگەر ەلىڭدەگى ەڭ جوعارى لاۋازىمدى ادامعا بارىپ، ٶزىڭدى تولعاندىرىپ جۇرگەن جايتتاردى ايتقىڭ كەلسە، ونىڭ الدىنا كىرە الامىن دەپ قانشالىقتى ۇمىتتەنۋىڭە بولار ەدى؟ كەيدە ٴتىپتى مۇنداي ارەكەت جاساپ كورۋدىڭ ٶزى قاۋىپتى! ەستەر مەن ماردوحايدىڭ زامانىندا ەگەر ادام شاقىرۋسىز پارسى مونارحىنىڭ الدىنا كەلسە، ومىرىنەن ايىرىلۋى مۇمكىن ەدى (ەستەر 4:10، 11). ال ەندى ونىمەن سالىستىرعاندا ەڭ قۇدىرەتتى ادامي بيلەۋشىلەردىڭ ٶزى «شەگىرتكەلەردەي» بولاتىن بۇكىل عالامدى جاراتقان الەمنىڭ ٵمىرشىسىنىڭ الدىنا بارۋ تۋرالى ويلاپ كورشى (يشايا 40:22). ٴبىز بۇدان جان ۇشىرا قورقۋىمىز كەرەك پە؟ ارينە، جوق!
11 ەحوباعا كەز كەلگەن ادام جاقىنداي الادى: ول بىزگە دۇعا ەتۋ مۇمكىندىگىن بەرگەن. ٴتىپتى جاس بالا دا يسانىڭ اتىنان سەنىممەن ەحوباعا دۇعا ەتە الادى (جوحان 14:6؛ ەۆرەيلەرگە 11:6). دۇعا جان دۇنيەمىزدەگى قۇپيا وي-نيەتىمىزدى دە، ٴتىپتى ەڭسەمىزدى باسقان، ايتۋعا ٴسوز تاپپايتىن سەزىمدەرىمىزدى دە جەتكىزۋگە مۇمكىندىك بەرەدى (ريمدىكتەرگە 8:26). ەحوبانى شەشەندىگىمىزبەن دە، تىلمارلىعىمىزبەن دە، ۇزاق، ۇزىن سونار دۇعالارىمىزبەن دە تاڭعالدىرا المايمىز (ماتاي 6:7، 8). سويتسە دە ەحوبا دۇعالارىمىزدىڭ ۇزاقتىعى مەن جيىلىگىنە شەكتەۋ قويمايدى. ونىڭ ٴسوزى ٴتىپتى ‹ۇزدىكسىز سيىنۋعا› شاقىرادى (سالونيقالىقتارعا 1-حات 5:17).
12 تەك ەحوبانىڭ عانا «دۇعانى تىڭداۋشى» دەپ اتالاتىنىن ەسىڭە الشى، سونداي-اق ول ٴبىزدى شىنايى جاناشىرلىقپەن تىڭدايدى (ٴزابۋر 65:2، جد؛ [64:3]). ٴبىراق ول ادال قىزمەتشىلەرىنىڭ دۇعالارىن امالسىزدان تىڭداي ما؟ جوق، شىندىعىنا كەلگەندە، دۇعالارىمىز وعان وتە ۇنايدى. ەحوبانىڭ سوزىندە مۇنداي دۇعالار تۇتەتكەندە اڭقىعان ٴيىسى جاندى جادىراتاتىن حوش ٴيىستى زاتتارعا تەڭەلەدى (ٴزابۋر 140:2؛ ايان 5:8؛ 8:4). شىن جۇرەكتەن ايتقان دۇعالارىمىزدىڭ حوش ٴيىستى زات ىسپەتتى ٵرى الەمنىڭ امىرشىسىنە ۇنامدى ەكەنى جۇبانىش بەرەدى ەمەس پە؟ سوندىقتان ەگەر ەحوباعا جاقىنداعىڭ كەلسە، ٴجيى — كۇندەلىكتى — كىشىپەيىلدىلىكپەن دۇعا ەت. كوڭىلىڭدەگىنىڭ تۇگىن قالدىرماي ايت (ٴزابۋر 62:8 [61:9]). دۇعاڭدا كوكتەگى اكەڭە ۋايىمىڭدى، قۋانىشىڭدى، ريزاشىلىعىڭدى ايت، ونى ماداقتا. ناتيجەسىندە، قارىم-قاتىناستارىڭ ودان سايىن نىعايا بەرەتىن بولادى.
ەحوباعا عيبادات ەتۋ
13، 14. ەحوباعا عيبادات ەتۋ دەگەن نەنى بىلدىرەدى جانە نەگە ول بۇعان لايىق؟
13 ەحوبا قۇدايمەن بايلانىسقاندا، دوسىمىز نە تۋىسىمىزبەن اڭگىمەلەسىپ جاتقانداي، جاي تىڭداپ نەمەسە سويلەسىپ قانا قويمايمىز. ٴبىز وعان عيبادات ەتەمىز، ياعني قۇرمەتتەپ، وعان تيەسىلى ماداق ايتامىز. ٴبىزدىڭ بۇكىل ٶمىرىمىز شىنايى عيباداتپەن بايلانىستى. عيباداتىمىز ارقىلى وعان دەگەن شىن جۇرەكتەن شىققان سۇيىسپەنشىلىگىمىز بەن بەرىلگەندىگىمىزدى كورسەتەمىز، ٵرى عيباداتىمىز جەر مەن كوكتەگى ەحوبانىڭ بۇكىل ادال جاراتىلىستارىن بىرىكتىرەدى. ەلشى جوحان العان ايانىندا كەلەسى بۇيرىقتى جاريالاپ بارا جاتقان پەرىشتەنىڭ داۋسىن ەستىگەن: «كوك پەن جەردى، تەڭىز بەن سۋ كوزدەرىن جاراتقان قۇدايعا باس ۇرىپ تاعزىم ەتىڭدەر!» (ايان 14:7)
14 نەگە ەحوباعا عيبادات ەتۋىمىز كەرەك؟ وسى كىتاپتا تالقىلانعان كيەلىلىك، كۇش، ۇستامدىلىق، ادىلدىك، باتىلدىق، مەيىرىمدىلىك، دانالىق، كىشىپەيىلدىلىك، سۇيىسپەنشىلىك، مەيىرىمدى راقىم، شەكسىز بەرىلگەندىك جانە ىزگىلىك سياقتى قاسيەتتەر جايىندا ويلانىپ كورشى. ٴبىز ەحوبانىڭ وسى قۇندى قاسيەتتەردىڭ ەڭ جوعارعى، كەمەلدى بەينەسى ەكەنىن كوردىك. وسى قاسيەتتەردى جان-جاقتى تۇسىنۋگە تىرىسقاندا، ونىڭ سونشاما كەرەمەت ٵرى ۇلى تۇلعا عانا ەمەس ەكەندىگىن ۇعىنامىز. ونىڭ سالتاناتتىلىعىن سوزبەن ايتىپ جەتكىزۋ مۇمكىن ەمەس، ال بىزدەن قانشالىقتى جوعارى ەكەندىگىنە ٴتىپتى ادام اقىلى جەتپەيدى (يشايا 55:9). ەحوبانىڭ الەمنىڭ قۇقىلى بيلەۋشىسى جانە ٴبىزدىڭ عيبادات ەتۋىمىزگە لايىق ەكەندىگىندە ەش كۇمان جوق. ولاي بولسا، وعان قالاي عيبادات ەتۋىمىز كەرەك؟
15. قالاي ٴبىز ەحوباعا «ونىڭ رۋحىنا كەنەلىپ، شىندىقپەن» عيبادات ەتە الامىز جانە ماسىحشىلەردىڭ كەزدەسۋلەرىندە بىزگە قانداي مۇمكىندىك بەرىلەدى؟
15 يسا: «قۇدايدىڭ ٶزى — رۋح. سوندىقتان وعان سيىناتىندار ونىڭ رۋحىنا كەنەلىپ، شىندىقپەن سيىنۋعا ٴتيىس»،— دەگەن (جوحان 4:24). بۇل ەحوبانىڭ كيەلى رۋحىنا مويىنسۇنىپ، سەنىم مەن سۇيىسپەنشىلىك تانىتا وتىرىپ، شىن جۇرەكتەن عيبادات ەتۋدى بىلدىرەدى. سونداي-اق بۇل شىندىقپەن — قۇداي سوزىندەگى تۋرا بىلىمگە ساي — عيبادات ەتۋدى دە بىلدىرەدى. باۋىرلاستارمەن باس قوسقاندا، ەحوباعا «ونىڭ رۋحىنا كەنەلىپ، شىندىقپەن» عيبادات ەتۋدىڭ كەرەمەت مۇمكىندىگى تۋادى (ەۆرەيلەرگە 10:24، 25). ال شىنايى عيبادات ەتكەندە — ەحوبانى ماداقتاپ ٵن ايتقاندا، بىرىگىپ دۇعا ەتكەندە جانە ونىڭ ٴسوزى تالقىلانعاندا مۇقيات تىڭداپ ٵرى اتسالىسقاندا — وعان دەگەن سۇيىسپەنشىلىگىمىزدى كورسەتەمىز.
16. شىنايى ماسىحشىلەرگە بەرىلگەن ەڭ ۇلى وسيەتتەردىڭ ٴبىرى قانداي جانە نەگە ٴبىز وعان مويىنسۇنۋدى قالايمىز؟
16 ەل الدىندا ەحوبانى ماداقتاپ، ول تۋرالى وزگەلەرگە ايتقانىمىز دا عيبادات ەتۋگە جاتادى (ەۆرەيلەرگە 13:15). ٴيا، ەحوبانىڭ پاتشالىعى تۋرالى ىزگى حاباردى ۋاعىزداۋ — شىنايى ماسىحشىلەرگە بەرىلگەن ەڭ ۇلى وسيەتتەردىڭ ٴبىرى (ماتاي 24:14). ٴبىز وعان بار ىقىلاسىمىزبەن مويىنسۇنامىز، ويتكەنى ەحوبانى سۇيەمىز. «وسى كۇناكار دۇنيەنىڭ «ٴتاڭىرى» شايتان ٸبىلىس ەحوبا تۋرالى زالىمدىقپەن لاقاپ تاراتىپ، سەنبەيتىندەردىڭ ‹سانالارىن سوقىر قىلىپ› جاتقانى تۋراسىندا ويلانعاندا، وسىنداي جالعان سوزدەردى اشكەرەلەپ، قۇدايدىڭ كۋاگەرى رەتىندە قىزمەت ەتۋگە دەگەن زور ىقىلاس پايدا بولادى ەمەس پە؟ (قورىنتتىقتارعا 2-حات 4:4؛ يشايا 43:10—12) ال ەحوبانىڭ عاجاپ قاسيەتتەرى تۋرالى وي جۇگىرتكەندە، بويىمىزدا ول تۋرالى وزگەلەرگە ايتۋعا دەگەن تالپىنىس ويانادى ەمەس پە؟ راسىندا دا، ٴبىز ٷشىن وزگەلەردىڭ كوكتەگى اكەمىز تۋرالى بىلۋىنە جانە سۇيىسپەنشىلىك دامىتۋىنا كومەكتەسۋدەن ارتىق مارتەبە جوق.
17. ەحوباعا دەگەن عيباداتىمىزعا تاعى نە كىرەدى جانە نەگە ٴبىز مىنسىزدىكپەن عيبادات ەتۋگە ٴتيىسپىز؟
17 ەحوباعا عيبادات ەتۋ مۇنىمەن عانا شەكتەلمەيدى. ول ٶمىرىمىزدىڭ ٵربىر سالاسىن قامتيدى (قولوستىقتارعا 3:23). ەگەر ەحوبانى شىنىمەن بيلەۋشىمىز دەپ قابىلدايتىن بولساق، بارلىق جاعدايدا — وتباسىندا، جۇمىستا، وزگەلەرمەن قارىم-قاتىناسىمىزدا، دەمالعاندا — ونىڭ ەركىن ورىنداۋعا تىرىسامىز. ٴبىز وعان ‹شىن جۇرەكتەن›، ٴمىنسىز قىزمەت ەتۋدى قالايمىز (شەجىرەلەر 1-جازبا 28:9). مۇنداي عيبادات ەحوباعا قىزمەت ەتىپ جۇرگەنسىپ، ٴبىراق ەكىجۇزدىلىكپەن اۋىر كۇنا جاساي بەرىپ، ەكى ويلى بولۋعا نەمەسە ەكى جاقتى ٶمىر كەشۋگە جول بەرمەيدى. مىنسىزدىك بار جەردە ەكىجۇزدىلىككە ورىن جوق، ال سۇيىسپەنشىلىك بار جەردە ەكىجۇزدىلىك جەركەنىشتى كورىنەدى. قۇداي الدىنداعى قورقىنىشتىڭ دا پايداسى زور. كيەلى كىتاپتا ەحوبانى وسىلايشا ايرىقشا قۇرمەتتەۋ ونىمەن ۇنەمى ‹تىعىز قارىم-قاتىناستا› بولۋمەن بايلانىستىرىلادى (ٴزابۋر 25:14، جد؛ [24:14]).
ەحوباعا ەلىكتەۋ
18، 19. كەمەلسىز ادام دا ەحوبا قۇدايعا ەلىكتەي الادى دەپ ويلاۋ نەگە اقىلعا قونىمدى نارسە؟
18 وسى كىتاپتىڭ ٵر ٴبولىمى ‹سۇيىكتى رۋحاني بالاسى رەتىندە قۇدايدان ۇلگى الۋىمىزعا› كومەكتەسەتىن تاراۋمەن اياقتالادى (ەفەستىكتەرگە 5:1). كەمەلسىز ەكەندىگىمىزگە قاراماستان، ەحوبانىڭ كۇشىن، ادىلدىگىن، دانالىعىن جانە سۇيىسپەنشىلىگىن قالاي قولداناتىنىنا شىنىمەن ەلىكتەي الاتىنىمىزدى ەستە ۇستاعانىمىزدىڭ ماڭىزى زور. قۇدىرەتى شەكسىز قۇدايعا شىنىمەن ەلىكتەۋگە بولاتىنىن قايدان بىلەمىز؟ ەحوبانىڭ ەسىمى ٶز ەركىن جۇزەگە اسىرۋ ٷشىن، ول كىم بولۋدى قالاسا، سول بولا الاتىنىن بىلدىرەتىنىن ەسىڭە الشى. ٴبىز ونىڭ وسىنداي قابىلەتىنە قايران قالامىز، بۇلاي ەتۋ دۇرىس تا، ٴبىراق بۇل وعان ەلىكتەۋ مۇمكىن ەمەس دەگەندى بىلدىرە مە؟ جوق.
19 ٴبىز قۇدايعا ۇقساس ەتىپ جاراتىلعانبىز (جاراتىلىس 1:26). سوندىقتان جەر بەتىندەگى ەشقانداي جاراتىلىس اداممەن تەڭەستىرۋگە كەلمەيدى. ادام بالاسى تەك تۇيسىك سەزىمىنە نەمەسە گەنەتيكالىق ەرەكشەلىكتەرگە نە سىرتقى جايتتارعا عانا تاۋەلدى ەمەس. ەحوبا بىزگە قۇندى سي بەرگەن، بۇل — ەرىك بوستاندىعى. مۇمكىندىكتەرىمىزدىڭ شەكتەۋلى ٵرى كەمەلسىز ەكەندىگىمىزگە قاراماستان، قانداي بولۋدى قالايتىنىمىزدى ٶز ەركىمىزبەن شەشەمىز. ونىڭ ۇستىنە، ەسىڭدە بولسا، قۇدايدىڭ ەسىمىنىڭ ماعىناسىنا ساي، ول ٶزىنىڭ قىزمەتشىلەرىنىڭ دە قانداي بولعانىن قالاسا، سونداي بولعىزا الادى. كۇشىن دۇرىس قولداناتىن، سۇيىسپەنشىلىككە تولى، دانا دا ٵدىل ادام بولعىڭ كەلەر مە ەدى؟ ەحوبانىڭ كيەلى رۋحىنىڭ ارقاسىندا سەن تاپ سونداي بولا الاسىڭ! سوندا قانشاما جاقسىلىق ىستەي الاتىنىڭدى ويلاپ كورشى!
20. ەحوباعا ەلىكتەر بولساق، قانداي جاقسى ٸس اتقارامىز؟
20 سەن كوكتەگى اكەمىزدىڭ جۇرەگىن قۋانىشقا بولەيسىڭ (ناقىل سوزدەر 27:11). ٴتىپتى ەحوبانى بارىنشا ‹ريزا قىلاسىڭ›، ويتكەنى ول مۇمكىندىكتەرىڭنىڭ شەكتەۋلى ەكەنىن بىلەدى (قولوستىقتارعا 1:9، 10). سۇيىكتى اكەمىزگە ەلىكتەپ، جاقسى قاسيەتتەردى دامىتا بەرسەڭ، كەرەمەت ارتىقشىلىقتارعا يە بولاسىڭ. قۇدايدان بەزگەن قارا تۇنەكتەگى دۇنيەدە سەن ساۋلە شاشقان نۇر ىسپەتتى بولاسىڭ (ماتاي 5:1، 2، 14). دۇنيە جۇزىندەگى ادامدارعا ەحوبانىڭ سالتاناتتى ۇلىلىققا تولى بولمىسىنىڭ كەيبىر قىرلارىنىڭ نۇرىن كورە الۋعا كومەكتەسەسىڭ. نەتكەن مارتەبە!
«قۇدايعا جاقىنداڭدار، سوندا ول دا سەندەرگە جاقىندايدى»
ەحوباعا ارقاشان جاقىنداي بەر
21، 22. ەحوبانى سۇيەتىندەردىڭ ٴبارىنىڭ الدىندا قانداي بىتپەيتىن ساپار جاتىر؟
21 جاقىپ 4:8 دە جازىلعان وسى قاراپايىم شاقىرۋ — الدىمىزعا قويۋىمىز كەرەك ماقسات قانا ەمەس. بۇل — ساپار. ادالدىعىمىزدى ساقتاي بەرەر بولساق، بۇل ساپار ەشقاشان اياقتالمايدى. ٴبىز ەحوباعا جاقىنداعان ۇستىنە جاقىنداي تۇسەمىز. نەگىزىندە، ٴبىز ۇنەمى ول تۋرالى كوبىرەك بىلە بەرەمىز. ارينە، بۇل كىتاپتا ەحوبانىڭ بولمىسىنىڭ قىر-سىرىن تولىق قامتۋ مۇمكىن ەمەس. ٴبىز كيەلى كىتاپتا قۇداي تۋرالى ايتىلعان نارسەلەردىڭ جالت ەتكەن ۇشقىنىن عانا قاراستىردىق! ٴتىپتى كيەلى كىتاپتىڭ وزىندە دە ەحوبا جايلى بارلىق نارسە ايتىلماعان. ەلشى جوحاننىڭ ويىنشا، يسانىڭ جەردەگى قىزمەتىنىڭ كەزىندە نە ىستەگەنىن قاعاز بەتىنە تۇسىرەر بولسا، ‹جازىلۋعا ٴتيىستى كىتاپتار بۇل دۇنيەگە سيماس ەدى› (جوحان 21:25). ەگەر ۇلى جايلى وسىلاي دەر بولساق، اكەسى تۋرالى نە دەۋگە بولادى!؟
22 ەحوبانى تولىق تانىپ بىلۋىمىزگە ٴتىپتى ماڭگىلىك ٶمىردىڭ ٶزى جەتكىلىكسىز (ەككلەسياست 3:11). ولاي بولسا، ٴبىزدى الدا نە كۇتىپ تۇرعانىن ويلاشى. جۇزدەگەن، مىڭداعان، ميلليونداعان، ٴتىپتى ميللياردتاعان جىل ٶمىر سۇرگەننەن كەيىن، ٴبىزدىڭ ەحوبا قۇداي تۋرالى ٴبىلىمىمىزدى قازىرگىمەن سالىستىرۋعا دا كەلمەيتىن بولادى. سوعان قاراماستان ٵلى دە ٴبىلۋىمىز كەرەك نارسەنىڭ سانسىز كوپ ەكەنىن ۇعىناتىن بولامىز. ەحوبانى جاقسىراق تاني تۇسۋگە دەگەن ىقىلاسىمىز زور بولادى، ويتكەنى ٴبىز دە: «قۇدايعا جاقىن بولعانىم قانداي يگى!»— دەگەن ٴزابۋر جىرشىسى سياقتى سەزىمدە بولامىز (ٴزابۋر 73:28 [72:28]). ماڭگىلىك ٶمىر سونداي ماعىنالى ٵرى تانىپ بىلەتىن نارسەلەر سونشا كوپ بولادى، ال ەحوباعا جاقىنداۋ ماڭگىلىك بويى ەرەكشە باقىت پەن قاناعات سەزىمىنە بولەي بەرەدى.
23. سەن نە ىستەۋگە شاقىرىلاسىڭ؟
23 ەحوبانى شىن جۇرەكتەن، بۇكىل جان دۇنيەڭمەن، بارلىق اقىل-ويىڭمەن، بار كۇش-قۋاتىڭمەن ٴسۇيىپ، ونىڭ سۇيىسپەنشىلىگىنە ٶز لەبىزىڭدى قازىر بىلدىرە بەر (مارقا 12:29، 30). سەنىڭ سۇيىسپەنشىلىگىڭ ادال ٵرى باياندى بولسىن. كۇندەلىكتى قابىلدايتىن شەشىمدەرىڭنەن، مەيلى ول قانداي بولماسىن، ارقاشان كوكتەگى اكەڭمەن قارىم-قاتىناسىڭدى بۇرىنعىدان دا نىعايتا تۇسكىڭ كەلەتىنى كورىنىپ تۇرسىن. ال ەڭ باستىسى، ەحوباعا جاقىنداي بەرگەيسىڭ، سوندا ول دا ماڭگىلىك بويى ساعان جاقىنداعان ۇستىنە جاقىنداي بەرەدى!
