1-3. (a) Wetin wi go lan bɔt mɔtalman we wi wach di we aw mama ɛn papa dɛn kin de wit dɛn yɔŋbebi? (b) Wetin na di nɔmal tin we kin apin we pɔsin sho se i lɛk wi? Us impɔtant kwɛstyɔn wi fɔ aks wisɛf?

MAMA ɛn papa dɛn lɛk fɔ si we dɛn yɔŋbebi de smayl. Bɔku tɛm, dɛn kin put dɛn fes nia di pikin in fes, ɛn dɛn kin tɔk gladi wan ɛn smayl to am. Dɔn dɛn kin wet fɔ si wetin di pikin go du. Ɛn i nɔ kin te, yu go bigin si di pikin in bojɔ, ɛn i kin bigin smayl smɔl smɔl te i tɔn to big smayl. Na di pikin in yon spɛshal we dat we insɛf de bigin sho se i lɛk in mama ɛn papa.

² Di smayl we di yɔŋbebi de smayl de mek wi mɛmba impɔtant tin bɔt di we aw mɔtalman de. I nɔmal fɔ lɛ wi lɛk di wan dɛn we lɛk wi. Na so Gɔd mek wi. (Sam 22:​9) As wi de big, wi de lan difrɛn we dɛn fɔ sho lɔv to pipul dɛn we lɛk wi. Sɔntɛm yu go mɛmba aw yu mama ɛn papa, yu fambul dɛn, ɔ yu padi dɛn bin de sho se dɛn lɛk yu di tɛm we yu bin smɔl. Smɔl smɔl, yusɛf bigin fil di sem lɔv fɔ dɛn insay yu at ɛn yu stat fɔ du tin fɔ sho dɛn se yu lɛk dɛn. Na da sem we de yu lɔv fɔ Jiova Gɔd de gro?

³ Di Baybul se: “Wi de sho lɔv, bikɔs na in fɔs lɛk wi.” (1 Jɔn 4:​19) Insay Sɛkshɔn 1 to 3 na dis buk, yu dɔn lan se Jiova lɛk yu ɛn i want fɔ mek yu bɛnifit frɔm di we aw i de yuz in pawa, in jɔstis, ɛn in sɛns. Ɛn insay Sɛkshɔn 4 yu bin lan se i du wɔndaful tin dɛn fɔ sho se i lɛk yu ɛn yu kɔmpin mɔtalman dɛn. Naw, di kwɛstyɔn we impɔtant pas ɔl we yu fɔ aks yusɛf na: ‘Aw misɛf go sho se a lɛk Jiova?’

4. Wetin sɔm pipul dɛn tink bɔt wetin i min fɔ lɛk Gɔd?

⁴ Na frɔm Jiova lɔv kɔmɔt, so i no se lɔv gɛt pawa fɔ mek pɔsin sho in fayn kwaliti dɛn. So pan ɔl we mɔtalman dɛn we nɔ fetful de kɔntinyu fɔ tɔn dɛn bak pan Gɔd, i stil gɛt kɔnfidɛns se sɔm mɔtalman dɛn go sho se dɛn lɛk am. Ɛn fɔ tru, bɔku bɔku pipul dɛn dɔn du dat. Bɔt i sɔri fɔ no se di rilijɔn dɛn na dis wɔl we kɔrɔpt, dɔn mek pipul dɛn nɔ no di tru bɔt wetin i min fɔ lɛk Gɔd. Bɔku pipul dɛn kin se dɛn lɛk Gɔd, bɔt dɛn tink se fɔ lɛk Gɔd na fɔ jɔs tɔk aw yu de fil. Na so pɔsin kin bigin fɔ lɛk Gɔd, jɔs lɛk aw yɔŋbebi kin bigin smayl fɔ sho se i lɛk in mama ɛn papa. Bɔt fɔ big pɔsin, nɔto dat nɔmɔ de sho se i lɛk ɔda pɔsin.

5. Akɔdin to di Baybul, wetin i min fɔ lɛk Gɔd? Wetin mek da minin de fɔ mek wi gladi?

⁵ Jiova dɔn tɛl wi wetin i min fɔ lɛk am. In Wɔd se: “Fɔ lɛk Gɔd min se wi fɔ obe in lɔ dɛn.” So wi fɔ du sɔntin fɔ sho se wi lɛk Gɔd. Bɔku pipul dɛn nɔ lɛk fɔ obe pɔsin. Bɔt di sem vas ɛnkɔrej wi se: “[Gɔd] in lɔ dɛn nɔto ɛvi lod.” (1 Jɔn 5:​3) Jiova in lɔ ɛn prinsipul dɛn nɔto lod, bɔt na tin dɛn we de bɛnifit wi. (Ayzaya 48:​17, 18) Gɔd in Wɔd gɛt bɔku prinsipul dɛn we de ɛp wi fɔ kam nia am. Aw i de du dat? Lɛ wi tɔk bɔt tri tin dɛn we Gɔd in padi dɛn kin du. Dɛn kin tɔk ɛn lisin to am, wɔship am, ɛn falamakata am.

6-8. (a) Wetin wi go du fɔ mek wi lisin to Jiova? (b) Wetin wi go du fɔ mek i tan lɛk se wi bin de di tɛm we di tin dɛn we dɛn rayt na di Baybul bin de apin?

⁶ Dɛn stat chapta 1 wit di kwɛstyɔn we se: “Yu dɔn ɛva imajin yu ɛn Gɔd de tɔk?” Wi lan se dis nɔto tin we wi jɔs de imajin. Infakt, Mozis bin tɔk wit Jiova. We wi? Jiova nɔ de sɛn in enjɛl dɛn fɔ tɔk wit mɔtalman dɛn igen. Bɔt i gɛt fayn we dɛn fɔ tɔk wit wi tide. Aw wi go lisin to Jiova?

 ⁷ Bikɔs “na Gɔd dayrɛkt di wan dɛn we rayt ɔl di Skripchɔ dɛn,” wi de lisin to Jiova bay we wi de rid in Wɔd di Baybul. (2 Timoti 3:​16) Wan pan di man dɛn we rayt di sam buk bin ɛnkɔrej Jiova in savant dɛn fɔ go de rid In Wɔd “de ɛn nɛt.” (Sam 1:​1, 2) Ɛn wi nid fɔ tray tranga wan fɔ du dat. Bɔt we wi du wi bɛst fɔ du dat, i nɔ go bi fɔ natin. Wi bin dɔn lan na Chapta 18 se di Baybul tan lɛk fayn lɛta frɔm wi Papa we de na ɛvin. So wi nɔ fɔ si am se na wok fɔ rid am. Wi fɔ rid di Baybul lɛk se wi bin de di tɛm we di tin dɛn de apin. Aw wi go du dat?

⁸ Imajin wetin bin apin na di stori dɛn we yu de rid. Tray fɔ si di pipul dɛn na di Baybul as rial pipul dɛn. Tray fɔ ɔndastand usay dɛn mɛn, wetin bin de apin to dɛn, ɛn wetin mek dɛn bin de du sɔm tin dɛn. Dɔn tink gud gud wan bɔt wetin yu de rid ɛn aks yusɛf kwɛstyɔn dɛn lɛk: ‘Wetin dis stori de tich mi bɔt Jiova? Uswan pan in kwaliti dɛn dis stori de ɛp mi fɔ no bɔt? Us prinsipul dɛn we Jiova want mek a lan? Ɛn aw a go du wetin a de lan?’ As yu de rid, tink gud wan, ɛn du wetin yu de lan na Gɔd in Wɔd, i go tan lɛk se yu bin de di tɛm we di tin dɛn we dɛn rayt na di Baybul bin de apin.—Sam 77:​12; Jems 1:​23-25.

9. Udat na “di slev we fetful ɛn gɛt sɛns”? Wetin mek i impɔtant fɔ lɛ wi lisin gud gud wan to da “slev” de?

⁹ Jiova kin yuz di “slev we fetful ɛn gɛt sɛns” fɔ tɔk to wi bak. Jizɔs bin dɔn tɔk se i go pik wan smɔl grup we na anɔyntɛd Kristian man dɛn fɔ gi wi “it di rayt tɛm,” dat na di tin dɛn we go ɛp wi fɔ kam nia Jiova insay dis las dez we tin nɔ izi. (Matyu 24:​45-47) Sɔm we dɛn we dis slev de ɛp wi fɔ kam nia Jiova na we wi de rid buk ɔ magazin we dɛn mek fɔ ɛp wi fɔ no di tru na di Baybul, ɛn we wi de atɛnd mitin ɛn kɔnvɛnshɔn. Bikɔs dɛn na Krays in slev, wi kin du wɛl we wi de fala Jizɔs in advays we se: “Una  lisin gud gud wan.” (Lyuk 8:​18) Wi kin lisin gud gud wan bikɔs wi no se wan pan di we dɛn we Jiova de tɔk to wi na tru di slev we fetful ɛn gɛt sɛns.

10-12. (a) Wetin mek prea na wɔndaful gift frɔm Jiova? (b) Aw wi go pre to Jiova fɔ mek i gladi? Wetin go mek wi gɛt kɔnfidɛns se Jiova valyu wi prea dɛn?

¹⁰ Bɔt aw wi go tɔk to Gɔd? I pɔsibul fɔ lɛ wi tɔk to Jiova? Dis na tin we rili wɔndaful. Imajin se yu de tray fɔ go tɔk to di prɛsidɛnt na yu kɔntri bɔt sɔntin we de apin to yu. Yu tink se yu go ebul? Na sɔm say dɛn, pɔsin we want fɔ du dat go ivin put in layf pan denja. Insay Ɛsta ɛn Mɔdikay dɛn tɛm, dɛn kin kil pɔsin we go to di kiŋ na Pashia, if di kiŋ nɔ kɔl am. (Ɛsta 4:​10, 11) Naw imajin se yu de go to di Masta we De Rul Ɔlman na di wan ol wɔl, ɛn we yu kɔmpia dis Masta to di mɔtalman we gɛt pawa pas ɔl in kɔmpin dɛn, da pɔsin de “tan lɛk grasɔpa.” (Ayzaya 40:​22) Yu tink se yu fɔ fred fɔ go to am? Yu nɔ fɔ ɛva fred!

¹¹ Jiova dɔn mek wan simpul we fɔ tɔk to am ɛnitɛm we wi want fɔ tɔk to am; dat na prea. Ivin smɔl pikin we gɛt fet pan Jiova kin pre to Am insay Jizɔs in nem. (Jɔn 14:​6; Ibruz 11:​6) Prea de ɛp wi bak fɔ tɛl Jiova ɔl wetin wi de tink bɔt ɛn aw wi de fil. Wi kin ivin tɛl am bɔt tin dɛn we de mɔna wi ɛn we nɔ kin izi fɔ lɛ wi tɔk. (Romans 8:​26) Nid nɔ de fɔ lɛ wi tray fɔ mek Jiova gladi fɔ wi prea bay we wi de yuz big big wɔd dɛn ɔ tɔk bɔku tin dɛn, ɛn pre fɔ lɔng tɛm. (Matyu 6:​7, 8) Bɔt Jiova nɔ de tɛl wi ɔmɔs tɛm wi fɔ pre to am ɔ aw lɔng wi prea dɛn fɔ bi. In Wɔd ivin tɛl wi se wi fɔ “go de pre ɔltɛm.”—1 Tɛsalonians 5:​17.

¹² Mɛmba se na Jiova nɔmɔ di Baybul kɔl di Wan “we de ansa wi prea,” ɛn i kin rili sɔri fɔ wi we i de lisin to wi. (Sam 65:​2) Fɔ se i kin jɔs lisin to in fetful savant dɛn prea dɛn fɔ lisin sek? Nɔ, nɔto so i bi. Infakt, i kin lɛk fɔ lisin to dɛn prea dɛn. In Wɔd kɔmpia wi prea dɛn to insɛns,  we kin pul fayn sɛnt we kin go ɔp we dɛn de bɔn am. (Sam 141:​2; Rɛvɛleshɔn 5:​8; 8:​4) We wi mɛmba se na so wi prea dɛn kin go ɔp to di Masta we De Rul Ɔlman ɛn mek I gladi, dat kin rili ɛnkɔrej wi, nɔto so? So if yu want fɔ kam nia Jiova, put yusɛf dɔŋ we yu de pre to am, ɛn du am ɛvride. Tɛl am ɔl wetin de insay yu at, ɛn nɔ ayd natin pan am. (Sam 62:​8) Go de tɛl yu Papa we de na ɛvin tɛnki, prez am, ɛn tɛl am bɔt di tin dɛn we de mek yu wɔri, ɛn di tin dɛn we de mek yu gladi. We yu du ɔl dis, una padi biznɛs go tayt mɔ ɛn mɔ.

13, 14. Wetin i min fɔ wɔship Jiova? Wetin mek wi fɔ wɔship am?

¹³ We wi de tɔk to Jiova Gɔd ɛn lisin to am, wi nɔ jɔs de du am di we aw wi kin du wit wi padi ɔ fambul. Bɔt wi de wɔship Jiova ɛn gi am di ɔnɔ we i fit fɔ gɛt. Di rayt we aw wi de wɔship Jiova gɛt sɔntin fɔ du wit wi wan ol layf. Na da we de wi de sho Jiova se wi lɛk am ɛn wi de wɔship am wit ɔl wi at, ɛn i de mek wi gɛt wanwɔd wit Jiova in fetful savant dɛn, ilɛk dɛn de na ɛvin ɔ na dis wɔl. Insay wan vishɔn we apɔsul Jɔn bin si, i yɛri we wan enjɛl de se: “Una wɔship di Wan we mek di ɛvin, di wɔl, di si, ɛn di spriŋ wata dɛn.”—Rɛvɛleshɔn 14:​7.

¹⁴ Wetin mek wi fɔ wɔship Jiova? Tink bɔt di kwaliti dɛn we wi dɔn tɔk bɔt na dis buk. Wi dɔn lan se Jiova oli, i gɛt pawa, i gɛt jɔstis, i de kɔntrol insɛf, i gɛt maynd, i gɛt sɛns, i ɔmbul, i gɛt lɔv, i gɛt sɔri-at, i nɔ de kɔmɔt biɛn wi, ɛn i gud. Wi dɔn si se Jiova gɛt dɛn kwaliti dɛn ya pas ɛni ɔda pɔsin. We wi tray fɔ no bɔt ɔl in kwaliti dɛn, wi go si se in nɔto pɔsin we wi fɔ jɔs kɔle. Bɔt wi fɔ mɛmba se in glori pas mɔtalman in yon fa fawe. (Ayzaya 55:​9) Wi nɔ gɛt wan dawt fɔ se na Jiova gɛt di rayt fɔ rul wi, ɛn i fit fɔ mek wi wɔship am. Bɔt aw wi fɔ wɔship Jiova?

15. Aw wi go wɔship Jiova “wit spirit ɛn trut”? Wetin wi mitin dɛn kin mek wi gɛt chans fɔ du?

 ¹⁵ Jizɔs bin se: “Gɔd na Spirit, ɛn di wan dɛn we de wɔship am fɔ wɔship am wit spirit ɛn trut.” (Jɔn 4:​24) Fɔ wɔship Gɔd “wit spirit” min se wi fɔ gɛt in spirit ɛn alaw am fɔ gayd wi. Dɔn bak wi wɔship fɔ de in layn wit di tru we de na di Baybul. Wi kin gɛt fayn chans fɔ wɔship Jiova “wit spirit ɛn trut” ɛnitɛm we wi gɛda wit wi kɔmpin Kristian dɛn. (Ibruz 10:​24, 25) We wi ɔl kin siŋ fɔ prez Jiova, pre to am, lisin to tɔk dɛn we kɔmɔt frɔm in Wɔd, ɛn we wisɛf kin tek pat na di mitin, wi de sho se wi lɛk am as wi de wɔship am di rayt we.

16. Wetin na wan pan di lɔ dɛn we pas ɔl we tru Kristian dɛn fɔ fala? Wetin mek wi de si am se dis na lɔ we wi fɔ obe?

¹⁶ Wi de wɔship Jiova bak we wi de tɛl ɔda pipul dɛn bɔt  am, ɛn dat na we wi de prez am na pɔblik. (Ibruz 13:​15) Fɔ tru, wan pan di lɔ dɛn we pas ɔl we tru Kristian dɛn fɔ fala na di wan we se wi fɔ prich di gud nyuz bɔt Jiova in Kiŋdɔm. (Matyu 24:​14) Wi gladi fɔ obe da lɔ de bikɔs wi lɛk Jiova. We wi tink bɔt di we aw Setan we na “di gɔd insay dis tɛm” dɔn “blayn” di wan dɛn we nɔ biliv di Masta dɛn “maynd dɛn,” ɛn aw i de skata lay lay tɔk dɛn bɔt Jiova, wi kin want fɔ bi wi Gɔd in Witnɛs so dat wi go tɔk fɔ am ɛn kɔrɛkt di lay tɔk dɛn we dɛn de tɔk bɔt am. (2 Kɔrintians 4:​4; Ayzaya 43:​10-12) Ɛn we wi de tink bɔt Jiova in wɔndaful kwaliti dɛn, wi kin rili want fɔ tɛl ɔda pipul dɛn bɔt am. Na big big ɔnɔ wi gɛt fɔ ɛp ɔda pipul dɛn fɔ no wi Papa we de na ɛvin ɛn ɛp dɛn fɔ gɛt di sem lɔv we wi gɛt fɔ Am.

17. Us ɔda tin dɛn wi go du we wi de wɔship Jiova? Wetin mek wi fɔ waka tret wit Jiova we wi de wɔship am?

¹⁷ Bɔt nɔto dɛn tin dɛn ya nɔmɔ wi de du fɔ wɔship Jiova. Wi wɔship de afɛkt wi wan ol layf. (Koloshians 3:​23) If wi rili gri se na Jiova na di Masta we De Rul Ɔlman, wi go du wi bɛst fɔ du wetin i want ɔltɛm, lɛk we wi de wit wi famili, we wi de na wokples, we wi de wi wan, ɛn we wi de wit ɔda pipul dɛn. Wi go du wi bɛst fɔ sav Jiova “wit ɔl [wi] at,” ɛn fɔ waka tret wit am. (Fɔs Kronikul 28:​9) We wi de wɔship Jiova dis kayn we, i de mek wi nɔ wɔship ɛni ɔda pɔsin ɔ ɛni ɔda tin, ɛn wi nɔ go liv dɔbul layf, we min se wi de mek lɛk se wi de sav Jiova we i bi se wi de kɔmit siriɔs sin na kɔna. Bikɔs wi de waka tret wit Gɔd, dat go mek wi nɔ mek ipokrit to am. Dɔn bak, di lɔv we wi gɛt fɔ Jiova go mek wi nɔ ɛva tink fɔ mek ipokrit. Di fred we wi de fred Gɔd go ɛp wi bak. Di Baybul se dis kayn fred we wi de fred Jiova gɛt sɔntin fɔ du wit wi tayt padi biznɛs wit am.—Sam 25:​14, NWT.

18, 19. Wetin mek i mek sɛns fɔ tink se pan ɔl we wi nɔ pafɛkt, wi go stil ebul fɔ falamakata Jiova Gɔd?

¹⁸ Di las chapta dɛn insay ɔl di sɛkshɔn dɛn na dis buk tɔk bɔt aw wi go “falamakata Gɔd, lɛk in pikin dɛn we i rili lɛk.” (Ɛfishians 5:​1) I rili impɔtant fɔ lɛ wi mɛmba se pan ɔl we wi nɔ pafɛkt, wi go stil ebul fɔ falamakata di pafɛkt we aw Jiova de yuz in pawa, in sɛns, aw i de sho se i gɛt jɔstis, ɛn aw i de sho in lɔv. Aw wi no se i rili pɔsibul fɔ lɛ wi falamakata di Ɔlmayti Gɔd? Mɛmba se Jiova in nem in minin de tich wi se i ebul fɔ bi ɛnitin we i want fɔ bi so dat i go du wetin i want. Wi kin rili kɔle Jiova we wi tink bɔt dis tin we i ebul fɔ du, bɔt fɔ se dat min se i nɔ go pɔsibul fɔ lɛ wi falamakata am? Nɔ, i nɔ min so.

¹⁹ Gɔd mek wi lɛk aw i tan. (Jɛnɛsis 1:​26) So mɔtalman nɔ tan lɛk animal dɛn. Wi nɔ jɔs de du sɔntin bikɔs na so Jiova mek wi fɔ du am, bikɔs na so wi bɔn, ɔ bikɔs ɔf di tin dɛn we de apin arawnd wi. Jiova dɔn gi wi wan wɔndaful gift, dat na di fridɔm fɔ du wetin wi want fɔ du. Pan ɔl we wi nɔ pafɛkt ɛn wi gɛt tin dɛn we wi nɔ ebul fɔ du, wi stil gɛt di fridɔm fɔ disayd uskayn pɔsin wi go want fɔ bi. Yu want fɔ bi pɔsin we gɛt lɔv, we gɛt sɛns, ɔ we de yuz in pawa fɔ du tin di rayt we? Wɛl, i fayn fɔ no se Jiova in spirit go ɛp yu fɔ bi da kayn pɔsin de. Tink bɔt ɔl di gud tin dɛn we yu go ebul fɔ du.

20. Us gud tin dɛn wi go du we wi falamakata Jiova?

²⁰ Yu go mek yu Papa we de na ɛvin gladi. (Prɔvabs 27:​11) Yu go ivin mek Jiova “rili . . . gladi,” bikɔs i ɔndastand se nɔto ɔltin yu ebul fɔ du. (Koloshians 1:​9, 10) Ɛn as yu de kɔntinyu fɔ falamakata yu Papa we lɛk yu bay we yu de tray fɔ gɛt fayn kwaliti dɛn, i go mek yu gɛt di big big ɔnɔ fɔ du sɔntin. Di pipul dɛn we de na dis wɔl nɔ de du wetin Gɔd want, so i tan lɛk se dɛn de  na daknɛs, bɔt yu go de na layt bikɔs yu de du wetin Gɔd want. (Matyu 5:​1, 2, 14) So yu go gɛt di big big ɔnɔ fɔ ɛp pipul dɛn fɔ no bɔt di wɔndaful kwaliti dɛn we Jiova gɛt.

21, 22. Wetin ɔl di wan dɛn we lɛk Jiova nɔ go ɛva stɔp fɔ du?

²¹ Di simpul advays we de na Jems 4:​8 nɔto sɔntin we wi fɔ jɔs plan fɔ du. I tan lɛk patrol. Wans wi kɔntinyu fɔ sav Jiova fetful wan, da patrol de nɔ go ɛva dɔn. Wi nɔ go ɛva stɔp fɔ kam nia Jiova mɔ ɛn mɔ. Afta ɔl, wi nɔ gɛt fɔ ɛva stɔp fɔ lan bɔt am. Wi nɔ fɔ tink se dis buk dɔn tich wi ɔl wetin wi nid fɔ no bɔt Jiova. Infakt, wi go se wi nɔ ivin stat fɔ tɔk bɔt ɔl wetin di Baybul tɛl wi bɔt wi Gɔd. Ɛn ivin di Baybul sɛf nɔ tɛl wi ɔltin bɔt Jiova. Apɔsul Jɔn bin se if dɛn fɔ bin dɔn rayt ɔl wetin Jizɔs du we i bin de du in prichin wok, i nɔ tink se “di skrol dɛn bin fɔ dɔn du na di wɔl.” (Jɔn 21:​25) If na so dɛn tɔk bɔt di Pikin, wetin wi go se bɔt di Papa?

²² Ivin we wi go gɛt layf sote go, wi nɔ go stɔp fɔ lan bɔt Jiova. (Ɛkliziastis 3:​11, NWT) So tink bɔt aw layf go tan  lɛk da tɛm de. Afta we wi go dɔn liv fɔ wan ɔndrɛd ia, wan tawzin ia, wan milyɔn ia, ɔ ivin wan bilyɔn ia, wi go dɔn no mɔ bɔt Jiova Gɔd pas wetin wi no naw. Bɔt wi go stil fil lɛk se bɔku ɔda fayn fayn tin dɛn de we wi go nid fɔ lan. Wi go gladi fɔ lan mɔ, bikɔs wi go gɛt gud rizin ɔltɛm fɔ tɔk wetin wan pan di man dɛn we rayt di sam buk bin tɔk we i se: “Bɔt fɔ mi yon say, i fayn fɔ de nia PAPA GƆD.” (Sam 73:​28) Wi go gɛt bɔku wɔndaful tin dɛn fɔ ɛnjɔy tumara bambay we wi go dɔn gɛt layf we go de sote go. Ɛn wan pan di bɛst tin dɛn we wi go de du na fɔ kam nia Jiova.

23. Wetin dis paregraf de ɛnkɔrej yu fɔ du?

²³ I go fayn fɔ mek yu sho Jiova se yu lɛk am wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk, jɔs lɛk aw insɛf dɔn sho se i lɛk yu. (Mak 12:​29, 30) Tray fɔ gɛt lɔv we nɔ de chenj ɛn we go mek yu tinap tranga wan. Mek di smɔl ɛn big tin dɛn we yu de disayd fɔ du ɛvride sho se yu de kɔntinyu fɔ du wetin go mek yu kam nia wi Papa we de na ɛvin mɔ ɛn mɔ. Di tin we impɔtant pas ɔl dis na fɔ mek yu du yu bɛst fɔ kam nia Jiova mɔ ɛn mɔ, ɛn mek insɛf kɔntinyu fɔ kam nia yu naw ɛn sote go.