1-3. (a) Ekwatathano ndyoka hali kala pokati komuvali nokahanona ke otali tu longo shike kombinga yuunshitwe womuntu? (b) Oshike hashi ningwa po paunshitwe uuna gumwe te tu ulukile ohole, nepulo lini lya simanenena tatu vulu okwiipula?

AAVALI ohaya kala ya nyanyukwa okumona okahanona kawo taki imemeha. Omuvali oha hedhitha oshipala she pwaashoka shokanona ke ngele te ka dhanitha e ta popi ti imemeha. Oha kala a halelela okumona taki imemeha. Konima yokathimbo uupanda wokanona ohawu tameke tawu ningi uudhigilila sho taki imemeha naasho uulungu tawu inyenge. Aanona ohayi imemeha momukalo tagu ulike kutya oye hole aavali yawo, nohayi imemeha molwaashoka aavali yawo nayo oye ya hole.

² Okwiimemeha kokanona ohaku tu dhimbulukitha oshinima sha simana kombinga yuunshitwe waantu. Oshi li paunshitwe natse tu ulike ohole uuna twe yi ulukilwa. (Episalomi 22:9) Sho tatu koko, okuulukila kwetu yalwe ohole ohaku hwepopala. Otashi vulika to dhimbulukwa nkene aavali yoye, aakwanezimo nookuume koye ya li haye ku ulukile ohole sho wa li okanona. Eiyuvo lyokukala wu ya hole ohali ende tali koko momutima gwoye noho kala wu ya hole. Mbela osho ho kala wu uvitile ngawo ekwatathano lyoye naJehova Kalunga?

³ Ombiimbeli otayi ti: “Otse otu hole, oshoka Kalunga okwa kala e tu hole tango.” (1 Johannes 4:19) Oshitopolwa shotango sigo oshititatu shembo ndika otwa dhimbulukithwa kutya Jehova ohu ulike oonkondo dhe, uuyuuki we nuunongo we pahole omolwuuwanawa wetu. Otwi ilonga wo mOshitopolwa oshitine nkene Jehova hu ulukile aantu ohole pauhandimwe momikalo omindhindhilikwedhi. Ihe opu na epulo lya simanenena ndyoka tu na okwiipula tse yene: ‘Otandi ki inyenga ngiini kohole ndjoka Jehova u ulukila ndje?’

4. Omomukalo guni aantu oyendji kaaye shi kutya okukala wu hole Kalunga otashi ti shike?

⁴ Jehova, Omutoti gwohole, oku shi nawa kutya ohole oyi na oonkondo oonenenene ndhoka tadhi vulu okuningitha yalwe ya holole omaukwatya gawo omawanawa. Nonando aantu kaaye shi aadhiginini otaya tsikile nuunashipotha, Jehova oku shi kutya yamwe otaya ka kala ye mu hole. Aantu omamiliyona oye mu hole. Shinikitha oluhodhi, omalongelokalunga muuyuni mbuka wa yonana ihaga yelithile aantu kutya ohole ye oshike. Oyendji ohaya ti kutya oye hole Kalunga, ihe ohaya dhiladhila kutya ohole ndjoka oye na owala oku yi ulika mokupopya. Ohole yetu yoku mu hola ohayi endele ko, ngaashi owala ohole yokahanona yokuhola yina hayi koko. Ihe kaakuluntu ohole oya kwatela mo oshindji.

5. Ombiimbeli otayi yelitha ngiini ohole yokuhola Kalunga, nomolwashike eyelitho ndyoka lihokitha kutse?

⁵ Jehova okwa yelitha kutya okukala tu mu hole otashi ti shike. Oohapu dhe otadhi ti: “Oshoka ohole yokuhola Kalunga oyo okuvulika kiipango ye.” Ohole yoku mu hola oyi na okuulikwa miilonga. Odhoshili kutya aantu oyendji kaye hole okuvulika. Ihe ovelise oyo tuu ndjoka oya gwedha ko tayi ti: “Iipango [yaKalunga] kayi shi iidhigu kutse.” (1 Johannes 5:3) Oompango dhe nomakotampango ge okwe ga tula po omolwuuwanawa wetu, ihe haku tu thiminika. (Jesaja 48:17, 18) Oohapu dhaKalunga odhu udha omakotampango ngoka taga vulu oku tu kwathela tu hedhe popepi naye. Ngiini mbela? Natu konakoneni iinima itatu kombinga yekwatathano lyetu naye. Shika osha kwatela mo okupopya naye, oku mu longela noku mu holela.

6-8. (a) Omomikalo dhini tatu vulu okupulakena kuJehova? (b) Ongiini okulesha kwetu Omanyolo taku vulu okukala kwa mwenyopala?

⁶ Ontopolwa yotango oya tameke netumbulo tali ti: “Natu tye ando oto popi naKalunga.” Oshinima shoka kashi shi owala okufafaeka, molwaashoka Moses okwa li a popi naye shili.  Ongiini kutse? Jehova iha tumu we aayengeli ye ya popye naantu kunena. Ihe oku na omukalo gwa dhenga mbanda gwokupopya natse. Ongiini tatu vulu okupulakena kuye?

⁷ Molwaashoka “Enyolo kehe olya nyolithwa kOmbepo yaKalunga,” ohatu pulakene kuJehova mokulesha Oohapu dhe, Ombiimbeli. (2 Timoteus 3:16) Omupisalomi ota ladhipike aapiya yaJehova ya kale haye dhi lesha “omutenya nuusiku.” (Episalomi 1:1, 2) Oku shi ninga otashi tu pula oonkambadhala dha mana mo. Ihe oonkambadhala adhihe ndhoka odha simanenena. Ngaashi twe shi mona mOntopolwa 18, Ombiimbeli oya fa ontumwafo ya za kuTate yetu gwomegulu. Onkee ano, oku yi lesha kaku na okukala owala omukalondjigilile, ihe oku na okukala kwa mwenyopala. Ongiini tatu vulu oku shi ninga?

⁸ Sho to lesha omahokololo gOmbiimbeli, kala wa fa wu wete iinima mbyoka tayi ningwa. Kala wo wa fa wu wete aantu mboka ya popiwa mo. Kambadhala okuuva ko onakuziwa yawo, oonkalo dhawo naashoka sha li she yi iyengitha ya ninge iinima mbyoka. Opo nduno dhiladhila muule kwaashoka to lesha, nokwiipula kutya ‘ehokololo ndika otali longo ndje shike kombinga yaJehova? Omaukwatya ge geni ge li mo? Omithikampango dhini a hala ndi ilonge, nongiini ndi na oku dhi tula miilonga monkalamwenyo yandje?’ Ngele oho lesha nokutedhatedha Oohapu dhaKalunga nokutula miilonga shoka to lesha, otadhi ka kala dhi na omwenyo kungoye.—Episalomi 77:12; Jakob 1:23-25.

9. Olye “omupiya omudhiginini nomunandunge,” nomolwashike sha simana tu pulakene neitulomo ‘komupiya’ ngoka?

⁹ Jehova oha popi wo natse okupitila ‘momupiya omudhiginini nomunandunge.’ Ngaashi Jesus a hunganeka, opu na ongundu yAakriste aagwayekwa ndjoka ya langekwa po yi tu pe “iikulya pethimbo lyayo” momasiku ngaka omadhigu gahugunina. (Mateus 24:45-47, KB) Ohatu paluthwa pambepo kongundu yomupiya ngoka ngele tatu lesha iileshomwa mbyoka ya longekidhwa yi tu kwathele tu mone ontseyo yashili yOmbiimbeli, ngele tu li pokugongala nopiigongi. Molwaashoka omupiya ngoka ogwaKristus, oshi li pandunge tu tule miilonga oohapu  dhaJesus ndhoka tadhi ti: ‘Kotokeni, mu tale, nkene hamu pulakene.’ (Lukas 8:18) Ohatu pulakene neitulomo molwaashoka otu shi kutya Jehova ota longitha ongundu yomupiya ndjoka okupopya natse.

10-12. (a) Omolwashike egalikano li li omagano omakumithi ga za kuKalunga? (b) Ongiini tatu vulu okugalikana momukalo ngoka Jehova ta hokwa, nomolwashike tu na einekelo kutya okwa lenga omagalikano getu?

¹⁰ Mbela ongiini kombinga yokupopya naKalunga? Mbela otatu vulu okupopya naye? Oshinima shoka oshikumithi. Mbela ngele owa hala wu popye nomuleli gwoshilongo sheni wu mu lombwele omaupyakadhi goye gopaumwene oto ka mona ngaa ompito nuupu? Ohashi vulika nokuli wu ki iyadhe muudhigu wu vule oonkondo dhoye ngele owa pula wu popye naye. Pethimbo lyaEster naMordekai omuntu ota vulu okudhipagwa ngele okwa yi a ka popye nomukwaniilwa gwaPersia ini ithanwa ko. (Ester 4:10, 11) Natu tye ando owu li koshipala shOmuwa Omunamapangeloagehe, ngoka nokuli aantu aanankondoelela ye li ngaashi “uudhidhi” moku ya yelekanitha naye. (Jesaja 40:22) Mbela otu na okukala twa tila okuhedha kuye megalikano? Hasho nando.

¹¹ Egalikano oli li omukalo omupu ngoka Jehova a longekidha opo tu popye naye. Okanona okashona nako otaka vulu okugalikana kuJehova meitaalo, okupitila medhila lyaJesus. (Johannes 14:6; Aahebeli 11:6) Egalikano otali tu pe wo ompito tu mu lombwele omadhiladhilo getu nosho wo omaiyuvo getu, noku mu lombwela iinima mbyoka tayi tu ehameke. (Aaroma 8:26) Jehova iha fuuka komagalikano ngoka taga popiwa niitya ya hogololekeka, iidhigu okuuvi wa ko nosho wo ngoka omaleeleka. (Mateus 6:7, 8) Kakele kaashono, ina ngambeka ethimbo niikando mbyoka tu na oku mu galikana. Oohapu dhe otadhi tu ladhipike tu ‘galikane aluhe.’—1 Aatessalonika 5:17.

¹² Dhimbulukwa kutya Jehova oye awike ti ithanwa ‘Omuuvi gwomagalikano,’ noha pulakene shili nolukeno. (Episalomi 65:2) Mbela oha pulakene owala kee na ohokwe omagalikano gaapiya ye aadhiginini? Aawe, oha kala e ga hokwa. Oohapu  dhe otadhi yelekanitha omagalikano ngoka nomatsinino ngoka ezimba lyago ewanawa tali tsinagana sho taga fikwa. (Episalomi 141:2; Ehololo 5:8; 8:4) Mbela itashi hekeleke okutseya kutya omagalikano getu taga zi komutima nago ohaga yi kOmuwa Omunamapangeloagehe nokwe ga hokwa? Onkee ano, ngele owa hala okuhedha popepi naye kala ho galikana kuye neifupipiko esiku kehe. Mu mbumbulila ashihe shoka shi li momutima gwoye. (Episalomi 62:8) Lombwela Ho yomegulu iinima mbyoka to ipula nayo, mbyoka wa nyanyukilwa, mu pandula noku mu tanga. Ngele to shi ningi, ekwatathano lyoye naye otali ka kala lya kola.

13, 14. Okulongela Jehova osha hala okutya ngiini, nomolwashike she eleka tu shi ninge?

¹³ Ngele tatu popi naJehova Kalunga, ihatu kala tatu pulakene owala nokupopya ngaashi hatu popi nakuume ketu nenge nomupambele. Paulelalela, egalikano oli li oshitopolwa shelongelokalunga, nongele tatu shi ningi otu na okuulika etilosimaneko ndyoka e na okupewa. Onkalamwenyo yetu ayihe oyi na okukala natango metsokumwe nelongelokalunga lyashili. Sho tatu longele Jehova otatu ulike kutya otu mu hole nomutima aguhe notwe mu igandjela thiluthilu notashi hanganitha iishitwa ye yomegulu naambyoka yokombanda yevi. Memoniko, omuyapostoli Johannes oku uvu omuyengeli ta popi oshipango shika ta ti: “Galikaneni Kalunga, ngoka a shiti egulu, evi, efuta noothithiya dhomeya!”—Ehololo 14:7.

¹⁴ Omolwashike tu na okulongela Jehova? Dhiladhila komaukwatya ge ngoka twi ilonga membo ndika ngaashi, uuyapuki, oonkondo, eipangelo, uuyuuki, uulaadhi, ohenda, uunongo, eifupipiko, ohole, olukeno, uudhiginini nosho wo uuwanawa. Otwe shi mona kutya omaukwatya ge ngoka ohe ga ulike momukalo gwa dhenga mbanda. Ngele tatu dhiladhila komaukwatya ge otatu ka mona kutya ita vulu nando okuyelekanithwa nomuntu kehe ngoka a simanekwa noonkondo. Jehova okwa tumbala kaaku na we noku tu vule kokulekule. (Jesaja 55:9) Kapu  na omalimbililo kutya oku na uuthemba wokupangela nokwa gwana okulongelwa kutse. Otu na oku mu longela ngiini?

15. Ongiini tatu vulu okugalikana Jehova “mOmbepo nomoshili,” nokugongala kwopaKriste ohaku tu pe ompito yini?

¹⁵ Jesus okwa ti: “Kalunga oye Ombepo, onkee naamboka taye mu galikana, oye na okugalikana mOmbepo nomoshili.” (Johannes 4:24) Shoka otashi ti kutya otu na okulongela Jehova nomitima tadhi hunga eitaalo nohole notatu wilikwa kombepo ye. Otashi ti wo kutya otu na oku mu longela metsokumwe nontseyo yashili ndjoka tayi adhika mOohapu dhe. Otu na ompito yi ikalekelwa yoku mu longela “mOmbepo nomoshili” uuna twa gongala pamwe nAakriste ooyakwetu. (Aahebeli 10:24, 25) Ngele tatu imbile Jehova omaimbilohambelelo, tatu galikana kuye tu li egongalo, tatu pulakene nokukutha ombinga moonkundathana dhi na ko nasha nOohapu dhe, kungeyi otatu ulike okupitila melongelokalunga lya yogoka kutya otu mu hole.

16. Oshipango oshinenenene shoka sha pewa Aakriste yashili oshini, nomolwashike twa halelela okuvulika kusho?

 ¹⁶ Ohatu longele wo Jehova ngele tatu popi nayalwe kombinga ye noku mu tanga montaneho. (Aahebeli 13:15) Okuuvitha onkundana ombwanawa yUukwaniilwa osho shimwe shomiipango ye iinenenene mbyoka ya pewa Aakriste yashili. (Mateus 24:14) Ohatu vulika nehalo ewanawa koshipango shoka molwaashoka otu hole Jehova. Ngele tatu dhiladhila omukalo moka “kalunga komuuyuni mbuka,” Satana Ondiaboli, a pukitha ‘omadhiladhilo gaamboka inaa itaala’ nokwa humitha komeho iifundja iinyanyalithi kombinga yaJehova, mbela ihatu kala twa halelela okulongela Kalunga tu li Oonzapo dhe opo tu aneke pomutenya omalundilo gaSatana ngoka? (2 Aakorinto 4:4; Jesaja 43:10-12) Sho tatu tedhatedha omaukwatya omakumithi ge, mbela ihashi tu inyengitha tu kale twa halelela okulombwela yalwe kombinga ye? Odhoshili kutya kapu na uuthembahenda wulwe wu vule mboka wokukwathela aantu ya tseye noya kale ye hole Tate yetu gwomegulu ngaashi tse.

17. Okulongela kwetu Jehova okwa kwatela mo shike, nomolwashike tu na oku shi ninga nuudhiginini?

¹⁷ Okulongela Jehova kwetu okwa kwatela mo oshindji. Okwa guma okanima kehe monkalamwenyo yetu. (Aakolossa 3:23) Ngele otwa zimina shili kutya oye Omuwa Omunamapangeloagehe otatu ka kala twa hala okulonga ehalo lye mukehe shimwe ngaashi, muukwanegumbo wetu, kiilonga, mokuungaunga kwetu nayalwe nuuna tatu thuwa po. Otwa hala oku mu longela “nomutima aguhe” nosho wo nuudhiginini. (1 Ondjalulo 28:9) Okulongela Jehova momukalo gwa tya ngaaka otashi ke tu kwathela twaaha kale aanamitima mbali nenge tu na onkalamwenyo yopaali, sha hala kutya, okukala hatu iningitha twa fa hatu mu longele omanga hatu longo meholamo omayono ga kwata miiti. Uudhiginini otawu ke tu kwathela twaaha kale nuufudhime nohole otayi ke tu kwathela tu wu henuke. Etilokalunga ohali tu kwathele wo. Ombiimbeli oyu ulika kutya pokati ketilokalunga nuukuume wetu wopothingo naJehova opu na ekwatathano.—Episalomi 25:14.

18, 19. Omolwashike tatu vulu okutya aantu inaaya gwanenena otaya vulu okuholela Jehova Kalunga?

¹⁸ Oshitopolwa kehe membo ndika osha kwatela mo ontopolwa ndjoka tayi tu kwathele ‘tu holele Kalunga, tu li oyana aaholike.’ (Aaefeso 5:1) Osha simanenena tu dhimbulukwe kutya nonando inatu gwanenena otatu vulu okuholela lela omukalo gwe gwa gwanenena gwokulongitha oonkondo dhe, uuyuuki, uunongo nokuulika ohole. Otu shi shi ngiini kutya otashi wapa shili okuholela Omunakondoadhihe? Dhimbulukwa kutya eityo lyedhina lye otali tu longo kutya ota ka kala kehe shoka a hala okukala opo a gwanithe po omalalakano ge. Oshu uka okukala twa kuminwa okuvula kwe, ihe mbela otatu vulu ngaa oku mu holela? Eeno.

¹⁹ Otwa shitwa oshifetha shaKalunga. (Genesis 1:26) Onkee ano, otwa yooloka ko kiishitwa yilwe yokombanda yevi. Mepingathano niishitwa yilwe, ihatu wilikwa owala koonkondo dhopaunshitwe, komauthigululwakwatya nenge koonkalo dhomomudhingoloko gwetu. Jehova okwe tu pa emanguluko lyokuninga omatokolo. Nonando otu na omangambeko noinatu gwanenena, otu na emanguluko lyokuhogolola shoka twa hala tu ka kale. Mbela owa hala wu kale omunahole, omunandunge nomuyuuki noho longitha oonkondo dhoye momukalo gu uka? Ombepo yaJehova otayi ke ku kwathela wu kale ngaaka. Dhiladhila wo komauwanawa ngoka to ka mona ngele to shi ningi.

20. Uuwanawa wuni tatu ka mona ngele tatu holele Jehova?

²⁰ Ngele owu na omaukwatya omawanawa oto ka nyanyudha Tate yetu gwomegulu. (Omayeletumbulo 27:11) Oto ka vula nokuli okulonga shoka ‘she mu opalela’ molwaashoka okwa tseya omangambeko goye. (Aakolossa 1:9, 10) Sho to tsikile okukokeka omaukwatya omawanawa moku mu holela, oto ka kala wu na uuthembahenda wi ikalekelwa. Uuyelele woye otawu ka minikila momilema dhuuyuni mbuka wa topoka ko kuKalunga. (Mateus 5:1, 2, 14) Oto ka tseyitha wo omaukwatya ge ga tongomana kombanda yevi alihe. Mboka kawu shi tuu uuthembahenda uunene!

21, 22. Aantu mboka ye hole Jehova oye li molweendo lwaahe na ehulilo lini?

²¹ Eladhipiko li li paunathangwa ndyoka tali adhika muJakob 4:8 kali shi owala elalakano ndyoka tu na okulalakanena. Otali vulu okuyelekanithwa nolweendo. Ngele otwa kala aadhiginini, olweendo ndoka italu ka hula nando. Itatu ke etha nando okuhedha popepi lela naJehova. Kakele kaashono, otapu ka kala aluhe oshindji okwiilonga kombinga ye. Katu na okudhiladhila kutya embo ndika otali tu longo ashihe shoka tu na okutseya kombinga ye. Ihe shika oshi li owala etameko lyokukundathana ashihe shoka Ombiimbeli tayi popi kombinga ye. Ombiimbeli nayo itayi tu lombwele ashihe shoka tu na okutseya kombinga ye. Omuyapostoli Johannes okwa ti kutya andola iinima ayihe mbyoka Jesus a ninga muukalele we kombanda yevi oya nyolelwe, “ando omambo ngoka itaga gwana mo muuyuni.” (Johannes 21:25) Ngele otaku vulu okutiwa ngaaka shi na ko nasha nOmwana, ongiini mbela kombinga yaHe?

 ²² Nokuli nando otu ka kale nomwenyo gwaaluhe itatu ka mana okwiilonga kombinga yaJehova. (Omuuvithi 3:11) Dhiladhila ketegameno ndyoka tu na. Konima sho tatu ka kala nomimvo omathele, omayuvi, omamiliyona nosho wo omabiliyona, otatu ka tseya oshindji shi na ko nasha naJehova Kalunga shi vulithe ngashingeyi. Otatu ka kala wo tu uvite kutya opu na iinima oyindji iikumithi mbyoka twa pumbwa okwiilonga. Otatu ka kala nehalo lyokwiilonga oshindji ngaashi owala omupisalomi a li e uvite, ngoka i imbi a ti: “Osho opalela ndje okukala popepi naKalunga.” (Episalomi 73:28) Otashi ka kala shituntula noonkondo okukala nomwenyo sigo aluhe nokunyanyukilwa iinima yi ili noyi ili notatu ka kala tu na ompito yokuhedha aluhe popepipepi naJehova.

23. Otatu ladhipikwa tu ninge shike?

²³ Molwaashoka Jehova oku ku hole, kala wu mu hole nomutima gwoye aguhe, nomwenyo gwoye aguhe nomadhiladhilo goye agehe nonoonkondo dhoye adhihe. (Markus 12:29, 30) Ohole yoye nayi kale yi na uudhiginini noihayi tengauka. Omatokolo ngoka ho ningi esiku kehe, kutya nduno omanene nenge omashona, naga kale taga wilikwa kekotampango kutya oto ka hogolola aluhe ondjila ndjoka tayi ku kwathele wu kale nekwatathano lya kola naTate yetu gwomegulu. Komeho gayihe, hedha popepielela naye nota ka hedha wo popepielela nangoye sigo aluhe.