1-3. (a) Ko e heigoa ka ako e tautolu hagaao ke he foliga he tagata he kitekite atu ke he fakafetuiaga he vahaloto he tau matua mo e tama mukemuke ha laua? (e) Ko e heigoa e fakaholoaga ne kitia pauaki ka fakakite he taha tagata e fakaalofa ki a tautolu, mo e heigoa e huhu aoga lahi kua lata ia tautolu ke huhu ki a tautolu ni?

KUA olioli e tau matua ke kitia e tama mukemuke fanau fou ha laua ka mamali. Kua mahani a laua ke fakapiki atu e tau fofoga ha laua ke he mata he tama, he fanafana mo e mamali fakalahi ki a ia. Kua amanaki lahi a laua ke kitia e aga he tama. Mo e nakai leva, ti kitia ai​—e poko he tau kauvehe he tama, he matala e tau laugutu, mo e kitia ai e mamali. Ke he puhala pauaki ni hana, kua tuga fakakite he mamali ia e fakaalofa hofihofi, ko e maataata he fakaalofa he tama he tali atu ke he fakaalofa he tau matua.

² Kua fakamanatu he mamali he tama mukemuke ki a tautolu taha mena aoga lahi hagaao ke he foliga he tagata. Ko e tali pauaki ha tautolu ke he fakaalofa ko e fakaalofa. Ko e puhala ni a ia ne talaga ai a tautolu. (Salamo 22:9) He tutupu hake a tautolu, kua motua a tautolu ke he lotomatala ke tali atu ke he fakaalofa. Liga manatu e koe mai he vaha tama hau e puhala ne fakakite he tau matua, tau magafaoa, po ke tau kapitiga hau e fakaalofa ki a koe. He loto hau ne vaka, tupu, ti matala ai e tau logonaaga mafanatia ke gahuahua. Ne liu fakakite age e koe e fakaalofa hau. Ti kua kitia nakai e fakaholoaga pihia he fakafetuiaga hau mo Iehova ko e Atua?

³ Ne talahau he Tohi Tapu: “Kua fakaalofa a tautolu, ha ko e mena ne fakamua mai hana fakaalofa kia tautolu.” (1 Ioane 4:19) He Vala 1 ke he 3 he tohi nei, kua fakamanatu ki a koe nukua fakagahuahua e Iehova ko e Atua hana malolo, hana fakafili tonu, mo e hana pulotu ke he tau puhala fakaalofa ma e aoga ni hau. Mo e he Vala 4, ne mailoga e koe nukua fakakite fakamahino e ia e fakaalofa hana ma e tagata​—mo e  ki a koe fakatagata​—ke he tau puhala mitaki lahi. Ati mafuta mai ai e huhu. Ke he taha manatu, ko e huhu ne mua atu e aoga ka huhu e koe ki a koe ni: ‘To tali fefe au ke he fakaalofa ha Iehova?’

4. Ko e puhala fe ne fakaniniko ai e tau tagata hagaao ke he kakano ke fakaalofa ke he Atua?

⁴ Ko Iehova, ko e Kamataaga he fakaalofa, kua iloa moli na ha ha he fakaalofa e malolo lahi ue atu ke fakakite e mitaki he falu. Ti pete ni ko e tau fakafualoto tumau he tau tagata nakai tua fakamoli, nukua mauokafua a ia to fai tagata ka tali ke he fakaalofa hana. Mo e, moli, kua totou miliona ne tali. Ka e momoko ni, ha kua fakaniniko he tau lotu he lalolagi kolokolovao nei e tau tagata hagaao ke he kakano ke fakaalofa ke he Atua. Kua tokologa e tau tagata ne talahau na fakaalofa a lautolu ke he Atua, ka e tuga manatu a lautolu ko e fakaalofa pihia ko e taha logonaaga noa ke fakakite ni ke he tau kupu. Liga kamata e fakaalofa ke he Atua ke he puhala ia, ke tuga e fakaalofa he tama mukemuke ke he tau matua hana ne kua liga fakakite fakamua ai ke he mamali. Ka ke he tau tagata motua, kua mua atu e fakaalofa ke he mena ia.

5. Fakamahino fefe he Tohi Tapu e fakaalofa ke he Atua, mo e ko e ha kua futia a tautolu ke he fakamahinoaga ia?

⁵ Kua fakamahino e Iehova e kakano ke fakaalofa ki a ia. Ne talahau he Kupu hana: “Ko e fakaalofa ke he Atua hanai, kia omaoma a tautolu ke he tau poaki hana.” Ko e fakaalofa, mogoia, ke he Atua kua lata ke fakakite ke he tau gahua. Moli, ke he tokologa kua nakai mitaki e manatu ke omaoma. Ka e lafi fakatotonu mai he kupu ia ni: ‘Ka kua nakai mamafa foki e tau poaki he Atua.’ (1 Ioane 5:3) Ko e tau fakatufono mo e tau matapatu fakaakoaga ha Iehova kua talaga ke aoga ai a tautolu, nakai ke fakakavega aki a tautolu. (Isaia 48:​17, 18) Kua puke e Kupu he Atua ke he tau matapatu fakaakoaga ka lagomatai a tautolu ke fakatata lahi atu ki a ia. Puhala fe? Kia liu fakamanatu e tautolu tolu e fahi he fakafetuiaga ha tautolu mo e Atua. Putoia ai e matutakiaga, tapuakiaga, mo e fifitakiaga.

6-8. (a) Ko e puhala fe kua lata ia tautolu ke fanogonogo ki a Iehova? (e) Maeke fefe ia tautolu ke fakamoui e tau Tohiaga Tapu ka totou ai e tautolu?

⁶ Ne hafagi e Veveheaga 1 mo e huhu, “Manamanatu la kua tutala a koe mo e Atua?” Kitia ai e tautolu nakai ko e manatu noa anei. Ha kua tuga matutaki pihia a Mose. Ka e kua a tautolu? Nakai ko e magaaho ha Iehova anei ke fakafano mai e tau agelu hana ke matutaki mo e tau tagata. Ka ko Iehova kua mua atu e mitaki he puhala fakamatutakiaga mo tautolu he vaha nei. Fanogonogo fefe a tautolu ki a Iehova?

⁷ Ha ‘ko e tau Tohi Tapu oti kana mai he agaga he Atua,’ kua fanogonogo a tautolu ki a Iehova he totou e Kupu hana, ko e Tohi Tapu. (2 Timoteo 3:16) Ati fakamafana he salamo e tau fekafekau ha Iehova ke totou pihia “ke he aho katoa mo e po.” (Salamo 1:​1, 2) Ke taute pihia kua lata mo e laliaga lahi he vala ha tautolu. Ka ko e tau laliaga oti pihia kua aoga lahi. Tuga ne kitia e tautolu he Veveheaga 18, kua tuga e tohi uho e Tohi Tapu ki a tautolu mai he Matua ha tautolu he lagi. Ti he totou e Tohi Tapu kua nakai lata ke eke mo matagahua lahi. Kua lata ia tautolu ke fakamoui e tau Tohiaga Tapu he magaaho ka totou ai e tautolu. Maeke fefe ia tautolu ke taute pihia?

⁸ Kia manamanatu ke he tau fakamauaga he Tohi Tapu ka totou ai e koe. Kia lali ke kitia e tau tagata faka-Tohi Tapu ko e tau tagata moli. Kumi ke he tau feakiaga, tau tuaga, mo e tau omoomoiaga ha lautolu. Ti, manamanatu fakahokulo hagaao ke he mena ne totou e koe, he huhu ki a koe ni e tau huhu tuga anei: ‘Ko e heigoa ne fakaako mai he fakamauaga nei ki a au hagaao ki a Iehova? Ko e fua fe hana ne kitia e au? Ko e heigoa e matapatu fakaakoaga ne manako a Iehova ke iloa e au, mo e maeke fefe ia au ke fakagahua ai he moui haku?’ Totou, manamanatu fakahokulo, mo e fakagahuahua ai​—he taute pihia e koe, to moui e Kupu he Atua ki a koe.​—Salamo 77:12; Iakopo 1:23-25.

9. Ko hai e “fekafekau fakamoli mo e loto matala,” mo e ko e ha ne aoga ai ke fanogonogo fakamitaki a tautolu ke he “fekafekau” ia?

⁹ Kua vagahau foki a Iehova ki a tautolu he puhala he “fekafekau fakamoli mo e loto matala.” Tuga ne talahau tuai e Iesu,  nukua kotofa e matakau tote he tau Kerisiano fakauku ke foaki “kia lautolu e tau mena kai ke he tau magaaho” he magahala he tau aho fakahiku kelea nei. (Mataio 24:45-47) He magaaho ka totou e tautolu e tau tohi ne talaga ke lagomatai a tautolu ke moua e iloilo tonuhia ke he Tohi Tapu mo e ka o atu a tautolu ke he tau feleveiaaga mo e tau fono Kerisiano, kua fagai fakaagaga ai he fekafekau ia a tautolu. Ha ko e tau fekafekau he Keriso a ia, kua fakagahuahua fakapulotu e tautolu e tau kupu ha Iesu: “Hanai, a mutolu, po ke fefe ha mutolu a fanogonogo.” (Luka 8:18) Kua fanogonogo fakamitaki a tautolu ha kua iloa e tautolu ko e fekafekau ko e taha he tau puhala he matutakiaga ha Iehova mo tautolu.

10-12. (a) Ko e ha ko e mena fakaalofa homo ue atu e liogi ne mai e Iehova? (e) Maeke fefe a tautolu ke liogi ke he puhala ne fakafiafia ki a Iehova, mo e ko e ha kua liga mauokafua a tautolu na tokiofa e ia e tau liogi ha tautolu?

¹⁰ Ka e kua e matutakiaga mo e Atua? Maeke nakai ia tautolu ke vagahau ki a Iehova? Ko e manatu ofoofogia lahi a ia. Kaeke lali a koe ke finatu ke he pule malolo lahi he motu hau ke tutala hagaao ke he ha tupetupe fakatagata hau, to kautu fefe la a koe? Ke he falu mena, ko e lali fakamakamaka pihia ka liga eke ke fakahagahaga kelea! He vaha ha Eseta mo Moretikai, kua tamate e tagata he finatu ke he patuiki Peresia ka e nakai uiina atu he patuiki. (Eseta 4:10, 11) Kia manamanatu he mogonei kua finatu ki mua he Iki Pule Katoatoa he lalolagi mo e lagi katoa, ka fakatai atu ke he tau tagata pule malolo lahi ke “tuga ne tau hē a lautolu.” (Isaia 40:22) Kua lata kia a tautolu ke fakauaua ke o atu ki a ia? Kia nakai pihia!

¹¹ Kua hafagi mai e Iehova e tau puhala mukamuka ke o atu ki a ia​—he liogi. Kua maeke foki he tama tote lahi ke liogi ki a Iehova he tua, he liogi ke he higoa a Iesu. (Ioane 14:6; Heperu 11:6) Pete ia, kua fakamaeke he liogi a tautolu ke talahau e tau manatu vihu mo e tau logonaaga fakatagata ha tautolu​—pihia foki mo e tau manatu mamahi lahi ne uka ia tautolu ke talahau. (Roma 8:26) Kua nakai fai aoga ke lali ke nava a Iehova ke he tau kupu mahifi mo e fakafulufuluola, po ke tau liogi loloa mo e loga e tau kupu. (Mataio 6:7, 8) Ke he taha fahi, kua nakai fakakaupa e Iehova e  loa ka vagahau ai a tautolu ki a ia po ke lagafiha. Kua uiina he Kupu hana a tautolu ke “liogi nakai noa.”​—1 Tesalonia 5:17

¹² Manatu ko Iehova tokotaha ne ui ‘ko e Fanogonogo liogi,’ mo e fanogonogo a ia mo e fakaalofa moli. (Salamo 65:2) Kua fakauka ni kia a ia ke he tau liogi he tau fekafekau fakamoli hana? Nakai, kua fiafia moli a ia ke he tau liogi ha lautolu. Kua fakatatai he Kupu hana e tau liogi pihia ke he mena manogi, ne maafu hake e ahua he tau manogi-mahofi ke he lagi. (Salamo 141:2; Fakakiteaga 5:8; 8:4) Kua nakai kia mafanatia ke manatu ko e tau liogi moli ha tautolu kua o hake pihia mo e fakafiafia e Iki Pule Katoatoa? Ti kaeke manako a koe ke fakatata atu ki a Iehova, kia liogi fakatokolalo tumau ki a ia, he tau aho oti. Ki a liligi e loto hau ki a ia; kia nakai taofi ha mena. (Salamo 62:8) Talahau e tau kapaletu, tau fiafia, tau fakaaue, mo e tau fakaheke hau ke he Matua hau he lagi. Ko e fua, to tupu malolo e pipiaga he vahaloto hau mo ia.

13, 14. Ko e heigoa e kakano ke tapuaki ki a Iehova, mo e ko e ha ne latatonu ai ke taute pihia e tautolu?

¹³ Ka matutaki a tautolu ki a Iehova ko e Atua, ne nakai fanogonogo mo e vagahau a tautolu ke tuga kua vagahau a tautolu ke he kapitiga po ke magafaoa. Ka kua tapuaki a tautolu ki a Iehova, he foaki ki a ia e lilifu mua ue atu ne kua lata lahi ki a ia. Ko e tapuaki moli ko e moui katoatoa ha tautolu. Ko e puhala ne fakakite e tautolu ki a Iehova e solu-katoa mo e fakamoli ha tautolu, ti kua fakalataha e tau mena momoui oti ne tua fakamoli ha Iehova, he lagi po ke he lalolagi. He fakakiteaga, ne logona he aposetolo ko Ioane e agelu ne fakapuloa e poakiaga nei: “Kia [“tapuaki,” NW] foki a mutolu kia ia ne eke e lagi, mo e lalolagi, mo e tahi, mo e tau vai puna.”​—Fakakiteaga 14:7.

¹⁴ Kua lata he ha a tautolu ke tapuaki ki a Iehova? Manamanatu ke he tau fua ne kua fakatutala a tautolu ki ai, tuga e tapuina, malolo, mahani fakalatalata, fakafili tonu, lototoa, fakaalofa noa, pulotu, fakatokolalo, fakaalofa, fakaalofa hofihofi noa, mahani fakamoli, mo e mitaki. Kitia ai e tautolu kua fakatino e Iehova e tapunu lahi, ko e tuaga tokoluganea, he tau mahani uho oti. He  magaaho ka lali a tautolu ke maama e katoatoaaga he tau fua hana, kua kitia ai e tautolu kua mua atu a ai he eke mo Peresona fulufuluola mo e mua ue atu. Ko ia kua ofoofogia e lilifu, kua nakai fakatatai e tokoluga ki a tautolu. (Isaia 55:9) Nakai fakauaua, ko Iehova ko e Pule Katoatoa tonuhia ha tautolu, mo e latatonu moli a ia ke tapuaki e tautolu. Ka kua lata a tautolu ke tapuaki fefe a Iehova?

15. Liga tapuaki fefe e tautolu a Iehova “mo e agaga mo e kupu moli,” mo e heigoa e magaaho ne foaki mai he tau feleveiaaga Kerisiano ki a tautolu?

¹⁵ Ne talahau e Iesu: “Ko e Atua ko e agaga ni a ia; ko lautolu foki ne tapuaki kia ia, kua lata ke tapuaki atu ki ai mo e agaga mo e [“kupu moli,”NW].” (Ioane 4:24) Ke tapuaki ke he Atua “mo e agaga,” kua lata ia tautolu ke moua e agaga haana mo e takitakiaga ia. Lata foki e tapuakiaga ha tautolu ke fakalautatai atu ke he kupu moli, ko e iloilo tonuhia ne moua he Kupu he Atua. Kua ha ha ia tautolu e magaaho uho ke tapuaki ki a Iehova “mo e  agaga mo e kupu moli” ke he ha magaaho ka fakapotopoto a tautolu mo e tau katofia tapuaki. (Heperu 10:24, 25) Ka uhu e tautolu e tau lologo fakaheke ki a Iehova, kaufakalataha he liogi ki a ia, mo e fanogonogo mo e fai vala ke he fakatutalaaga he Kupu hana, kua fakakite e tautolu e fakaalofa ki a ia he tapuaki mea.

16. Ko e heigoa taha he tau poakiaga mua ue atu ne tuku ke he tau Kerisiano moli, mo e ko e ha kua logona e tautolu e omoiaga ke omaoma ki ai?

¹⁶ Kua tapuaki foki e tautolu a Iehova ka vagahau a tautolu hagaao ki a ia ke he falu, he fakaheke a ia ke he toloaga tagata. (Heperu 13:15) Haia, ke fakamatala e tala mitaki he Kautu ha Iehova ko e taha he tau poakiaga mua ue atu ne tuku ke he tau Kerisiano moli. (Mataio 24:14) Kua omaoma fakamakai a tautolu ha kua fakaalofa a tautolu ki a Iehova. Ka manatu a tautolu ke he puhala “kua fakapouli he atua he lalolagi nai,” ko Satani ko e Tiapolo, “e tau manatu ha lautolu kua nakai tua,” he fakaohooho e tau pikopiko kelea hagaao ki a Iehova, kua nakai kia manako lahi a tautolu ke fekafekau ko e Tau Fakamoli ma e Atua ha tautolu, ke fakahako e tau fatipiko pihia? (2 Korinito 4:4; Isaia 43:10-12) Mo e ka manamanatu a tautolu ke he tau fua homo ue atu ha Iehova, kua nakai kia logona e tautolu e manako ne fufula hake ia tautolu ke talatala atu ke he falu hagaao ki a ia? Moli, kua nakai fai kotofaaga ne mua ue atu ke lagomatai falu ke o mai ke iloa mo e fakaalofa ke he Matua ha tautolu he lagi tuga ne taute e tautolu.

17. Ko e heigoa ne putoia ke he tapuakiaga ha tautolu ki a Iehova, mo e ko e ha kua lata ia tautolu ke tapuaki mo e loto fakamoli?

¹⁷ Kua mua atu foki e tau mena ne putoia ke he tapuakiaga ha tautolu ki a Iehova. Kua lauia e tau fahi oti he tau momoui ha tautolu. (Kolose 3:23) Kaeke talia moli e tautolu a Iehova ko e Iki Pule Katoatoa ha tautolu, to lali a tautolu ke taute e finagalo hana ke he tau mena oti​—ke he ha tautolu a magafaoa, tau gahuaaga, tau fehagaiaga ha tautolu mo e falu, mo e ha tautolu ni a magaaho fakatagata. To lali a tautolu ke fekafekau ki a Iehova ‘mo e loto katoa,’ mo e loto fakamoli. (1 Nofoaga he Tau Patuiki 28:9) Ko e tapuakiaga ia kua nakai fakaata ma e loto vevehe po ke moui fahiua​—ko e puhala fakatupua ke tuga kua fekafekau ki a Iehova ka e taute fakagalogalo e tau hala kelea muitui. Kua nakai fakaata he  loto fakamoli e fakatupua pihia; kua taute he fakaalofa e fakatupua mo mena fakalialia. Ko e matakutaku mahani Atua ka lagomatai foki. Kua matutaki he Tohi Tapu e fakalilifu pihia mo e fakafetuiaga tumau ha tautolu mo Iehova.​—Salamo 25:14.

18, 19. Ko e ha kua lata ke manatu na kua maeke he tau tagata noa nakai mitaki katoatoa ke fifitaki a Iehova ko e Atua?

¹⁸ Kua igatia e vala he tohi nei ke fakahiku aki e veveheaga ke he puhala ke ‘fifitaki ke he Atua tuga e tau fanau fakahelehele.’ (Efeso 5:1) Kua aoga lahi ke manatu ko e pete ni he nakai mitaki katoatoa a tautolu, kua maeke moli ia tautolu ke fifitaki e puhala mitaki katoatoa ha Iehova he fakaaoga e malolo, he fakagahuahua e fakafili tonu, mo e gahua he pulotu, mo e he fakakite e fakaalofa. Iloa fefe e tautolu kua maeke moli ke fifitaki e Mua ue Atu? Kia manatu, na fakaako he kakano he higoa ha Iehova a tautolu kua taute e ia a ia ke eke mo ha mena ne fifili e ia ke fakamoli aki e tau finagalo hana. Kua ofo tonuhia a tautolu ke he lotomatala ia, ka kua nakai kia maeke ia tautolu ke fifitaki a Iehova? Nakai pihia.

¹⁹ Kua taute a tautolu he fakatai he Atua. (Kenese 1:26) Ko e mena ia, kua nakai tatai e tau tagata ke he falu mena momoui he lalolagi. Kua nakai omoi a tautolu he logonaaga pauaki, tau talagaaga, po ke tau mena tutupu he takatakaiaga ha tautolu. Kua mai e Iehova ki a tautolu e mena fakaalofa uho​—ko e ataina ke fifili. Pete ko e tau kuku mo e tau nakai mitaki katoatoa ha tautolu, kua ataina a tautolu ke fifili ma tautolu ni. Kua manako nakai a koe ke mahani fakaalofa, pulotu, tagata tututonu ne fakaaoga fakamitaki e malolo? Fakaaue ke he lagomatai he agaga ha Iehova, kua maeke ia koe ke pihia moli! Manatu ke he mitaki ka taute ai e koe.

20. Ko e heigoa e mitaki ka moua e tautolu he magaaho ka fifitaki e tautolu a Iehova?

²⁰ To fakafiafia e koe e Matua hau he lagi, he fakafiafia e loto hana. (Tau Fakatai 27:11) Kua maeke ia koe ke “fiafia” ki a Iehova, ha kua maama e ia e tau kuku hau. (Kolose 1:9, 10) Mo e he fakatumau a koe ke feaki e tau fua mitaki he fifitaki atu ke he Matua fakahele hau, to fakamonuina a koe aki e tau kotofaaga lalahi. He lalolagi pouligia ne fakamamao mai he Atua, to eke a koe mo uta he maama. (Mataio 5:​1, 2, 14) To lagomatai ai a koe ke folafola  ke he lalolagi e falu fakatataaga he fakaperesona lilifu ha Iehova. Ko e fakalilifu ha a ia!

21, 22. Ko e heigoa e fenoga nakai fakaoti ne ha ha i mua he tau tagata oti ne fakaalofa ki a Iehova?

²¹ Ko e tomatomaaga fakalapalapa ne fakamau ia Iakopo 4:8 kua mua atu mai he foliaga. Ko e fenoga. He fakatumau a tautolu ke tua fakamoli, ko e fenoga ia to nakai fakaoti. To nakai oti e fakatata mo e fakatata lahi atu ha tautolu ki a Iehova. Ha ko e mena, to ha ha ai tumau e loga he tau mena ke ako hagaao ki a ia. Kua nakai lata ia tautolu ke manatu kua fakaako mai he tohi nei e tau mena oti ke iloa hagaao ki a Iehova. Ha kua kamata laia a tautolu ke fakatutala ke he tau mena oti ne talahau he Tohi Tapu hagaao ke he Atua ha tautolu! Mo e nakai talahau foki he Tohi Tapu e tau mena oti kana ke iloa hagaao ki a Iehova. Ne manamanatu e aposetolo ko Ioane kaeke fakamau hifo e tau mena oti ne taute e Iesu he magahala he fekafekau hana he lalolagi, to “nakai maeke he toka ai ke he lalolagi e tau tohi ia ka tohi.” (Ioane 21:25) Kaeke kua talahau taha mena pihia hagaao ke he Tama, kua mua atu foki e moli ke he Matua!

 ²² To nakai fakaoti foki he moui tukulagi e fakaako ha tautolu hagaao ki a Iehova. (Fakamatalaaga 3:11) Manamanatu, mogoia, ke he amaamanakiaga i mua ia tautolu. He mole e momoui ke he totou teau, afe, miliona, mo e piliona foki he tau tau, to mua atu e mena ka iloa e tautolu hagaao ki a Iehova ko e Atua ke he mena ne iloa e tautolu he mogonei. Ka e to logona hifo e tautolu kua ha ha agaia e tau mena homo ue atu ke iloa. To manako lahi a tautolu ke iloa atu foki, ha kua ha ha mau ia tautolu e kakano ke manatu tuga e salamo, ne lologo: “Ko e mitaki kia au ke fakatata ke he Atua.” (Salamo 73:28) Ko e moui tukulagi to kakano lahi mo e kehekehe​—ti ke fakatata lahi atu ki a Iehova to eke tumau mo palepale lahi he moui tukulagi.

23. Ko e heigoa kua fakamalolo ki a koe ke taute?

²³ Kia tali atu a koe ke he fakaalofa ha Iehova he mogonei, he fakaalofa ki a ia mo e hau a loto katoa, solu, manamanatuaga, mo e malolo. (Mareko 12:29, 30) Kia fakamoli mo e tu mauokafua e fakaalofa hau. Kia eke e tau fifiliaga ne taute e koe he tau aho oti, mai he tama mena tote ke he mena lahi, ke fakaata oti e tau matapatu fakaakoaga takitaki taha ia ni​—mo e to fifili tumau e koe e puahala ka takitaki atu a koe ke he fakafetuiaga malolo lahi mo e Matua hau he lagi. Ke he tau mena oti, kia fakatata lahi atu a koe ki a Iehova, mo e kia fakatata lahi mai a ia ki a koe​—ke he tukulagi tukumuitea!