1-3. (a) Kiko nos por siña tokante naturalesa humano dor di opservá e relashon entre un beibi i su mayornan? (b) Kiko ta desaroyá outomátikamente ora un hende mustra amor na nos, i ki pregunta importante nos por hasi nos mes?

MAYORNAN gusta mira nan yu resien nasí smail. Hopi bes nan ta pega nan kara kontra kara di e beibi, saka zonidu suave i smail tiernamente kuné. Nan ta loko pa mir’é reakshoná. I e no ta tarda pa hasié tampoko: e beibi ta haña ‘kuiltje,’ e lepnan ta kuminsá trèk, i un dushi smail ta aparesé riba su kara. E smail ei ta manera e promé señal di kariño di parti di e beibi, ekspresá na su mes manera, respondiendo na e amor ku su mayornan ta mustr’é.

² E smail di e beibi ei ta pone nos kòrda un punto importante tokante naturalesa humano. Nos reakshon natural ta pa stima ora nos ser stimá. Ta asina nos ta trahá. (Salmo 22:9) Segun ku nos ta krese, nos kapasidat di mustra amor bèk tambe ta krese. Kisas bo por kòrda kon den bo infansia bo mayornan i otro famianan òf amigunan a mustra amor na bo. Den bo kurason un kariño a kria rais, i ku tempu el a krese i a kuminsá duna fruta den forma di akshon. Bo a reakshoná na nan amor dor di mustra amor bèk. Bo ta mira un desaroyo similar den bo relashon ku Yehova Dios?

³ Beibel ta bisa: “Nos ta stima, pasobra el a stima nos promé.” (1 Juan 4:19) Sekshon 1 te ku 3 di e buki aki a mustra bo ku Yehova Dios ta ehersé su poder, hustisia i sabiduria na maneranan amoroso pa bo benefisio. I den Sekshon 4 bo a mira ku el a demostrá su amor direktamente pa humanidat, i pa abo personalmente, na maneranan  impreshonante. Awor, un pregunta ta lanta; kisas e pregunta mas importante ku bo por hasi bo mes: ‘Kon ami ta bai reakshoná na Yehova su amor?’

4. Dikon nos por bisa ku hende ta konfundí tokante loke kier men stima Dios?

⁴ Yehova, Esun ku a originá amor, sa perfektamente ku amor tin un poder masha grandi pa laga hende saka nan mihó kualidatnan na kla. P’esei, apesar di e rebeldia konstante di humanidat infiel, Dios a keda konfia ku algun hende lo reakshoná na su amor. I en bèrdat, miónes di hende a reakshoná. Pero lamentablemente e religionnan di e mundu korupto aki a laga hende tur konfundí tokante kiko kier men stima Dios. Masha hopi hende mes ta bisa ku nan ta stima Dios, pero aparentemente nan ta kere ku palabra so ta basta pa ekspresá e sintimentu ei. Amor pa Dios por kuminsá asina, meskos ku e amor di un beibi pa su mayornan por kuminsá ku un smail. Pero ora ta trata di hende grandi, amor mester enserá mas.

5. Kon Beibel ta definí amor pa Dios, i dikon e definishon ei mester zona bon den nos orea?

⁵ Ta Yehova ta definí kiko kier men stim’é. Su Palabra ta bisa: “Esaki ta e amor di Dios, ku nos ta warda su mandamentunan.” Pues, nos mester mustra ku nos ta stima Dios pa medio di akshon. Ta bèrdat ku hopi hende no gusta e idea di obedesé un otro. Pero bondadosamente e mesun versíkulo ta bisa aserka: “I [Dios] su mandamentunan no ta pisá.” (1 Juan 5:3) Yehova su leinan i prinsipionan ta diseñá pa benefisiá nos, no pa oprimí nos. (Isaias 48:17, 18) E Palabra di Dios ta yen di prinsipio ku ta yuda nos hala mas serka dje. Kon asina? Laga nos repasá tres aspekto di nos relashon ku Dios: komunikashon, adorashon i imitashon.

6-8. (a) Via ki medio nos por skucha Yehova? (b) Kon nos por laga e Skritura haña bida ora nos ta les’é?

⁶ Kapítulo 1 a habri ku e pregunta: “Bo por imaginá bo ta kòmbersá ku Dios?” Manera nos a mira, e idea ei no ta djis un fantasia. De echo, Moisés a yega di tin un kòmbersashon asina. Kiko di nos? Den nos tempu Yehova no ta manda su angelnan pa kòmbersá ku hende. Pero Yehova tin medionan ekselente pa komuniká ku nos awe sí. Kon nos por skucha Yehova?

⁷ Ya ku “tur Skritura ta inspirá pa Dios,” nos por skucha Yehova dor di lesa su Palabra, Beibel. (2 Timoteo 3:16) P’esei un skirbidó di salmo a urgi sirbidónan di Yehova pa nan hasi esei “di dia i anochi.” (Salmo 1:1, 2) Esei ta eksigí hopi esfuerso di nos parti. Pero tur esfuerso ku nos hasi ta bale la pena. Manera nos a mira den Kapítulo 18, Beibel ta manera un karta presioso ku nos Tata selestial a manda pa nos. Pues, lo no mester ta un karga pa les’é. Ora nos lesa e Skritura, nos mester hinka bida den e informashon. Kon nos por hasi esei?

⁸ Segun ku bo ta lesa, visualisá e relatonan bíbliko. Purba mira e personahenan bíbliko komo personanan real. Purba komprondé nan ‘background,’ nan sirkunstansianan i loke a motivá nan. Anto pensa profundamente tokante loke bo ta lesa, i hasi bo mes preguntanan manera: ‘Kiko e relato aki ta siña mi tokante Yehova? Kua di su kualidatnan ta bini dilanti? Ki prinsipio Yehova kier pa mi siña, i kon mi por aplik’é den mi bida?’ Lesa, meditá i apliká. Segun ku bo hasi asina, e Palabra di Dios lo haña bida pa bo.—Salmo 77:12; Santiago 1:23-25.

9. Ken ta “e esklabo fiel i prudente,” i dikon ta importante pa nos paga bon tinu na loke e “esklabo” ei ta bisa?

⁹ Ademas Yehova ta papia ku nos pa medio di “e esklabo fiel i prudente.” Manera Hesus a profetisá, un grupo chikitu  di ruman hòmber ungí a ser nombrá pa perkurá “kuminda [spiritual] na su debido tempu” den e último dianan difikultoso aki. (Mateo 24:45-47) Ora nos lesa literatura prepará pa yuda nos gana konosementu eksakto di Beibel, i asistí na reunionnan i kongresonan kristian, nos ta risibí alimento spiritual for di e esklabo ei. E esklabo ta di Kristu. Pues, ta importante pa nos hasi manera Hesus a bisa: “Pone bon atenshon kon boso ta skucha.” (Lukas 8:18) Nos ta skucha ku atenshon dor ku nos ta rekonosé ku e esklabo fiel ei ta un di Yehova su medionan pa komuniká ku nos.

10-12. (a) Pakiko orashon ta un don maravioso di Yehova? (b) Kon nos por resa na un manera ku ta agradá Yehova, i pakiko nos por konfia ku e ta apresiá nos orashonnan?

¹⁰ Pero kiko di komuniká bèk ku Dios? Nos por papia ku Yehova? E idea so kaba ta impreshoná bo profundamente. Si bo purba aserká e gobernante di mas poderoso den bo pais pa papia kuné tokante un ke otro preokupashon, kuantu chèns lo bo tin di logra yega serka dje? Den algun kaso por ta asta peligroso pa purba! Den tempu di Ester ku Mardokeo, bo por a muri si bo aserká e monarka di Pèrsia sin ku e invitá bo. (Ester 4:10, 11) Awor, imaginá bo pará dilanti e Señor Soberano di universo. Asta e ser humanonan di mas poderoso ta keda parse ‘dalakochi’ su dilanti. (Isaias 40:22) Nos mester tin miedu di aserk’é? Di ningun manera!

¹¹ Yehova a duna nos un manera simpel pa nos tur aserk’é—orashon. Asta mucha hopi chikitu por resa na Yehova ku fe, den nòmber di Hesus. (Juan 14:6; Hebreonan 11:6) Pero orashon ta permití nos komuniká nos pensamentunan i sintimentunan mas íntimo tambe—asta esnan doloroso ku nos tin problema pa ekspresá ku palabra. (Romanonan 8:26) No ta bale la pena purba impreshoná Yehova ku abla elokuente i poétiko, ni ku orashon largu sin fin. (Mateo 6:7, 8) Sin embargo, Yehova no a pone un límite na e largura ni e frekuensia di nos orashonnan. Su Palabra ta asta invitá nos pa “resa sin stòp.”—1 Tesalonisensenan 5:17.

 ¹² Kòrda ku ta Yehova so yama ‘Esun ku ta skucha orashon,’ i e ta skucha nos ku berdadero empatia. (Salmo 65:2) Ora e ta skucha orashon di su sirbidónan fiel, e ta hasié djis pa skucha numa? Nò, e ta skucha nan ku plaser. Den su Palabra, orashonnan asina ta ser kompará ku sensia ku ta kima i laga un holó dushi subi bai laira. (Salmo 141:2; Revelashon 5:8; 8:4) No ta un konsuelo pa sa ku nos orashonnan sinsero ta subi meskos ku sensia, i ku nan ta agradá e Señor Soberano? Pues, si bo kier hala serka Yehova, humildemente hasi orashon regular na dje, tur dia. Deshogá bo na dje sin tene nada atras. (Salmo 62:8) Kompartí bo preokupashon, alegria, gratitut i alabansa ku bo Tata den shelu. Komo resultado, e laso entre abo kuné lo bira kada bes mas fuerte.

13, 14. Kiko adorá Yehova ta enserá, i pakiko ta apropiá pa nos ador’é?

¹³ Ora nos ta komuniká ku Yehova Dios, nos no ta djis papia i skucha manera ora nos ta kòmbersá ku un famia òf amigu. Loke nos ta hasi ta un akto di adorashon na Yehova. Orashon ta un manera di duna Dios e onor ku asina tantu e meresé. Henter nos bida ta drei rònt di adorashon berdadero. Dor di ador’é nos ta mustra Yehova e amor i deboshon ku nos ta sinti p’e di henter kurason. Tur Yehova su kriaturanan fiel, tantu den shelu komo riba tera, ta uní den e adorashon aki. Den un vishon apòstel Juan a tende un angel proklamá e siguiente òrdu: “Adorá esun ku a traha shelu i tera i laman i fuentenan di awa.”—Revelashon 14:7.

¹⁴ Pakiko nos mester adorá Yehova? Pensa un ratu riba su kualidatnan ku nos a trata den e buki aki, manera santidat, poder, dominio propio, hustisia, kurashi, miserikòrdia, sabiduria, humildat, amor, kompashon, lealtat i bondat. Manera nos a mira, Yehova ta e representashon supremo, e norma mas elevá posibel, di tur karakterístika deseabel. Ora nos purba komprondé tur su kualidatnan kompletamente,  nos ta bin realisá ku e ta muchu mas ku un Personahe grandi i atmirabel. E ta inmensamente glorioso, i superior na nos na un grado ku palabra no por ekspresá. (Isaias 55:9) No tin duda ku Yehova ta nos Soberano legítimo. Definitivamente e meresé nos adorashon. Pero, kon nos mester adorá Yehova?

15. Kon nos por adorá Yehova “den spiritu i bèrdat,” i ki oportunidat reunionnan kristian ta brinda nos?

¹⁵ Hesus a bisa: “Dios ta Spiritu, i esnan ku ta ador’é mester adorá den spiritu i bèrdat.” (Juan 4:24) Esei ta nifiká ku nos mester adorá Yehova ku un kurason yen di fe i amor, guiá dor di su spiritu. Tambe e ta nifiká ku nos mester ador’é di akuerdo ku e bèrdat, e konosementu eksakto ku nos ta haña den e Palabra di Dios. Ki ora ku nos reuní ku otro adoradónan, nos tin un oportunidat presioso pa adorá Yehova  “den spiritu i bèrdat.” (Hebreonan 10:24, 25) Ora nos kanta alabansa na Yehova, uni den orashon na dje, i skucha i partisipá den studio di su Palabra, nos ta ekspresando amor p’e pa medio di adorashon puru.

16. Kua ta un di e mandamentunan di mas grandi ku kristiannan berdadero a risibí, i kiko ta motivá nos pa kumpli kuné?

¹⁶ Ademas nos ta adorá Yehova ora nos papia ku otro hende tokante dje, alabando e públikamente. (Hebreonan 13:15) Sí, un di e mandamentunan di mas grandi ku kristiannan berdadero a risibí ta di prediká e bon nobo di Yehova su Reino. (Mateo 24:14) Nos ta obedesé e mandamentu aki di buena gana, pasobra nos ta stima Yehova. Ora nos pensa kon “e dios di e mundu aki,” Satanas e Diabel, “a siega mente di esnan ku no ta kere” dor di plama mentiranan flagrante kontra Yehova, akaso nos no ta sinti un anhelo di sirbi komo Testigunan na fabor di nos Dios, i kombatí e kalumnianan ei? (2 Korintionan 4:4; Isaias 43:10-12) I ora nos pensa riba Yehova su kualidatnan maravioso, nos no ta sinti un deseo lanta den nos pa konta otro hende tokante dje? Di bèrdat no ta eksistí privilegio mas grandi ku yuda hende siña konosé e amor di nos Tata selestial meskos ku nos.

17. Kiko adorashon di Yehova ta enserá, i dikon nos tin ku ador’é ku integridat?

¹⁷ Adorá Yehova ta enserá asta mas. E ta toka delaster un aspekto di nos bida. (Kolosensenan 3:23) Si di bèrdat nos ta aseptá Yehova komo nos Señor Soberano, anto nos lo purba kumpli ku su boluntat den tur kos: den nos bida di famia, na trabou, den nos trato ku otro hende i durante nos oranan di relahamentu. Nos lo purba sirbi Yehova ‘ku henter nos kurason,’ ku integridat. (1 Krónikanan 28:9) Si nos ta adorá Yehova asina, esei lo no laga lugá pa nos sirbié ku kurason dividí òf hiba un bida dòbel, esta, pretendé di sirbi Yehova, i na mes momentu, hipókritamente, praktiká piká serio den sekreto. Integridat no ta laga lugá pa hipokresia; amor ta pone nos sinti asko di dje. Temor di Dios tambe ta  yuda. Beibel ta mustra ku e temor ei ta hopi importante pa nos por keda den un relashon íntimo ku Yehova.—Salmo 25:14.

18, 19. Dikon ta realístiko pa pensa ku nos komo simpel hende imperfekto por imitá Yehova Dios?

¹⁸ Kada un di e sekshonnan di e buki aki a terminá ku un kapítulo tokante kon pa ta “imitadónan di Dios, manera yunan stimá.” (Efesionan 5:1) Ta esensial pa nos keda kòrda ku maske nos ta imperfekto, nos por imitá e manera perfekto ku Yehova ta usa su poder, ehersé hustisia, aktua ku sabiduria i mustra amor. Kon nos por sa ku ta posibel bèrdat pa nos imitá e Todopoderoso? Kòrda loke e nòmber di Dios ta nifiká. Su nòmber ta siña nos ku e ta hasi su mes bira loke sea ku e kier, pa e kumpli ku su propósito. E abilidat aki ku e tin ta impreshoná nos profundamente. Pero, ta kompletamente imposibel pa nos imit’é den esaki? Nò.

¹⁹ Nos ta trahá na Dios su imágen. (Génesis 1:26) Pues hende ta diferente ku tur otro kriatura riba tera. Loke ta motivá nos no ta simplemente instinto, komposishon genétiko i faktornan den nos medio ambiente. Yehova a duna nos un don presioso—boluntat liber. Apesar di nos limitashonnan i imperfekshonnan, nos tin e libertat di skohe kiko nos ta bira. Bo kier ta un persona amoroso, sabí, hustu, ku ta hasi bon uso di su poder? Danki na e yudansa di Yehova su spiritu, esei ta presis loke bo por bira tambe! Pensa kuantu kos bon lo bo por logra.

20. Kiko nos por logra hasi dor di imitá Yehova?

²⁰ Lo bo agradá bo Tata selestial i hasi su kurason kontentu. (Proverbionan 27:11) Bo por asta “agrad’é den tur sentido,” pasobra e ta komprondé bo limitashonnan. (Kolosensenan 1:9, 10) I segun ku bo ta sigui desaroyá bon kualidatnan, imitando bo Tata stimá, lo bo ser bendishoná ku un privilegio masha grandi. Den un mundu skur i alehá for di Dios,  lo bo ta un kargadó di lus. (Mateo 5:1, 2, 14) Lo bo yuda plama algu di e refleho di Yehova su glorioso personalidat rònt mundu. Esta un onor!

21, 22. Ki biahe sin fin tin dilanti di tur hende ku ta stima Yehova?

²¹ E animashon simpel ku ta pará skirbí na Santiago 4:8 ta mas ku un meta: E ta un biahe, un proseso. Tanten ku nos keda fiel, e biahe ei no ta kaba nunka. Nunka nos lo stòp di hala mas i mas serka Yehova. Al fin i al kabo, semper nos lo tin mas kos pa siña tokante dje. Nos no mester pensa ku e buki aki a siña nos tur loke tin di sa tokante Yehova. Nò, esaki ta apénas e komienso di tur loke Beibel ta siña nos tokante nos Dios! Ademas, ni Beibel mes no ta konta nos tur loke tin di siña tokante Yehova. Apòstel Juan a pensa ku si mester a skirbi tur loke Hesus a hasi durante su ministerio riba tera, “ni mundu henter lo no por a kontené e bukinan ku lo a wòrdu skirbí.” (Juan 21:25) Si esei ta sierto tokante e Yu, kuantu mas sierto e ta den kaso di e Tata!

 ²² Ni bida eterno lo no permití nos kaba di siña tur kos di Yehova. (Eklesiastés 3:11) P’esei, pensa riba loke ta spera nos. Despues di a biba shen, mil, un mion, òf asta mil mion aña mas, nos lo sa hopi mas tokante Yehova Dios ku loke nos sa awor. Pero ainda nos lo sinti ku tin un sin fin di kos maravioso ku nos por siña. Nos lo ta ansioso pa siña mas, pasobra semper nos lo tin bon motibu pa sinti meskos ku e salmista ku a kanta: “Hala serka Dios ta bon pa mi.” (Salmo 73:28, NW) Nos no por ni imaginá kon variá i yen di nifikashon bida eterno lo ta. I pa semper, loke lo duna nos mas satisfakshon den bida ta e echo ku nos lo sigui hala serka Yehova.

23. Kiko bo ta ser animá pa hasi?

²³ Reakshoná awor riba Yehova su amor, dor di stim’é ku henter bo kurason, alma, mente i forsa. (Marko 12:29, 30) Hasi bo amor p’e leal i konstante. Tuma tur bo desishonnan di tur dia, for di esun di mas chikitu te esun di mas grandi, guiá dor di e siguiente prinsipio: semper skohe e rumbo ku ta hiba bo na un relashon mas íntimo ku bo Tata selestial. I riba tur kos, semper keda hala mas i mas serka Yehova, i semper e lo keda hala mas i mas serka bo—pa tur eternidat!