1-3. (a) San wi kan leri fu a fasi fa libisma de te wi luku fa papa nanga mama e handri nanga a beibi fu den? (b) San wi e du te trawan e sori lobi gi wi? Sortu prenspari aksi wi kan poti gi wisrefi?

PAPA nanga mama lobi fu si taki a beibi fu den e lafu. Furu tron den e poti den fesi krosibei fu a fesi fu a beibi fu den, dan den e lafu èn den e meki ala sortu sani nanga den fesi fu si san a pikin fu den o du. Fosi yu denki, a fesi fu a beibi e kenki èn dan wan moi switi lafu e kon na en fesi. A lafu dati e sori a lobi di a pikin e firi. Na a fasi disi a beibi e bigin sori taki a lobi en papa nanga mama, fu di den fosi sori lobi gi en.

² A lafu fu a beibi e memre wi na wan prenspari sani di abi fu du nanga a fasi fa libisma de. Te sma e sori taki den lobi wi, dan wi wani sori taki wi lobi den tu. Na so Gado meki wi (Psalm 22:9). O moro wi e gro, o moro wi e leri fa fu sori lobi te trawan e sori lobi gi wi. Kande yu kan memre ete fa sani ben de di yu ben de wan pikin; fa yu papa nanga mama, famiriman, noso mati ben sori lobi gi yu. Yu ben firi a lobi dati na ini yu ati, a firi dati kon moro tranga èn te fu kaba a meki taki yu du wan sani; yusrefi bigin sori lobi tu. Na so a de tu nanga a matifasi fu yu nanga Yehovah Gado?

³ Bijbel e taki: „Ma wi lobi trawan, bika Gado fosi lobi wi” (1 Yohanes 4:19). Pisi 1 te go miti pisi 3 fu a buku disi ben memre yu na a lobi-ati fasi fa Yehovah Gado e gebroiki en makti, en retidu nanga en koni, fu tyari wini gi yu. Na ini pisi 4 yu si den tumusi moi fasi fa Gado sori taki a lobi a libisma famiri, èn taki a lobi yu sosrefi. Ma now wan aksi e opo kon. Te yu luku en bun, dan a de a moro prenspari aksi di yu kan poti gi yusrefi: ’Fa mi o sori taki mi e warderi a lobi fu Yehovah?’

4. Na sortu fasi libisma bruya so taki den no sabi san a wani taki fu lobi Gado?

⁴ Yehovah na a Sma di sori taki a lobi wi fosi. Dati meki a sabi taki lobi kan yepi trawan fu tron moro betre sma. Sobun, aladi a libisma famiri di no de getrow, tan opo densrefi teige Yehovah, toku a tan abi a frutrow taki son sma ben o sori lobi gi en, èn milyunmilyun sma du dati tu. Ma a de wan sari sani taki den kerki fu a kruka grontapu disi, bruya sma so te, taki den no sabi soifri san a wani taki fu lobi Gado. Furu sma e taki dati den lobi Gado, ma leki fa a sori, dan den e prakseri taki lobi na te wan sma e taigi wan trawan nomo taki a lobi en. We, na a bigin a fiti te wan sma taigi Gado taki a lobi En, neleki fa a fosi lafu fu wan beibi e sori taki a lobi en papa nanga mama. Ma sma di kon bigi kaba musu du moro fu sori a lobi fu den.

5. San na a lobi fu Gado, soleki fa Bijbel e sori? Fu san ede a sani dati musu hari wi?

⁵ Yehovah e sori wi san a wani taki fu lobi en. En Wortu e taki: ’Disi na san a lobi fu Gado wani taki, dati wi e hori den komando fu en.’ Te wi lobi Gado, dan dati musu de fu si na ini san wi e du. A tru taki furu sma no lobi fu gi yesi na trawan. Ma a srefi tekst e taki na wan switi fasi: „Ma toku den wet fu [Gado] no de wan hebi” (1 Yohanes 5:3). Yehovah meki den wet nanga den gronprakseri fu en fu tyari wini gi wi, a no meki den fu pina wi (Yesaya 48:17, 18). A Wortu fu Gado lai gronprakseri di e yepi wi fu kon moro krosibei na en. Fa so? Meki wi luku syatu baka fu dri sani di abi fu du nanga a matifasi fu wi nanga Gado. Den sani disi abi fu du nanga a fasi fa wi e taki nanga Gado, a fasi fa wi e anbegi en, èn a fasi fa wi e teki na eksempre fu en.

6-8. (a) Fa wi kan arki Yehovah? (b) Fa wi kan meki Bijbel kon na libi te wi e leisi en?

⁶ Kapitel 1 bigin nanga den wortu: „Kon meki wi taki dati yu abi wan takimakandra nanga Gado.” Wi kon si taki dati a no  wan sani di no kan. Te yu luku en bun, dan Moses ben abi so wan takimakandra nanga Gado. Fa a de nanga wi? Yehovah no e seni engel now fu go taki nanga libisma. Toku a abi tumusi moi fasi fa a e taki nanga wi na ini a ten disi. Fa wi kan arki Yehovah?

⁷ Fu di „Gado srefi ben meki sma skrifi ala den Santa Buku”, meki wi e arki Yehovah fu di wi e leisi en Wortu, Bijbel (2 Timoteyus 3:16). Dati meki a psalm skrifiman gi futuboi fu Yehovah deki-ati fu leisi Bijbel „dei nanga neti” (Psalm 1:1, 2). Wi o abi fu meki muiti trutru efu wi wani du dati. Ma ala den muiti dati warti srefisrefi. Soleki fa wi si na ini kapitel 18, dan Bijbel de leki wan prenspari brifi di wi lobi Tata na hemel seni gi wi. Sobun, wi no musu si en leki wan hebi fu leisi Bijbel. Wi musu meki den Santa Buku kon na libi te wi e leisi den. Fa wi kan du dati?

⁸ Pruberi fu si den sani na yu fesi te yu e leisi Bijbel. Du muiti fu si den sma di Bijbel e taki fu den, leki trutru sma. Suku fu kon frustan fa den libi ben de, na ini sortu situwâsi den ben de, èn fu san ede den du son sani. Baka dati, dan prakseri bun fu san yu leisi, aladi yu e aksi yusrefi: ’San a tori disi e leri mi fu Yehovah? Sortu fasi fu en mi e si na ini a pisi tori disi? Sortu gronprakseri Yehovah wani leri mi, èn fa mi kan gebroiki en na ini mi libi?’ Leisi Gado Wortu, denki dipi fu san yu leisi, èn du san yu leri; dan a Wortu fu Gado sa kon na libi gi yu.​—Psalm 77:12; Yakobus 1:23-25.

9. Suma na „a getrow èn koni srafu”? Fu san ede a de prenspari taki wi e arki a „srafu” disi nanga ala wi prakseri?

⁹ Yehovah e taki nanga wi sosrefi nanga yepi fu „a getrow èn koni srafu”. Soleki fa Yesus ben taki na fesi, dan wan pikin grupu fu salfu Kresten man, poti na wroko na ini a ten disi fu sorgu taki wi e kisi yeye „nyanyan na a reti ten” na ini den ogri lasti dei disi (Mateyus 24:45-47). Te wi e leisi buku di meki fu yepi wi fu kan kisi soifri sabi fu Bijbel èn te wi e go na Kresten konmakandra nanga den kongres, dan wi e kisi yeye nyanyan fu a srafu disi. Fu di den Kresten brada disi de a srafu fu Krestes,  meki a de wan koni sani fu du san Yesus taki: „Poti prakseri na a fasi fa unu e arki” (Lukas 8:18). Wi e arki nanga ala wi prakseri fu di wi e si taki a srafu na wan fu den seti di Yehovah e gebroiki fu taki nanga wi.

10-12. (a) Fu san ede begi na wan tumusi moi presenti fu Yehovah? (b) Fa wi kan begi na wan fasi di Yehovah feni bun? San e gi wi a dyaranti taki a e warderi den begi fu wi?

¹⁰ Ma fa a de te wi wani taki nanga Gado? Wi kan du dati trutru? We, a prakseri dati nomo e furu wi ati nanga bigi lespeki. Yu denki taki yu ben sa abi bun bakapisi efu yu ben sa pruberi fu go taki nanga a moro hei tiriman na ini a kondre fu yu, fu fruteri en san na yu broko-ede? Na son presi yu kan kisi bigi problema srefi efu yu pruberi nomo fu du dati! Na ini den dei fu Ester nanga Mordekai, wan sma ben kan lasi en libi efu a ben sa go na a tiriman fu Persia sondro taki a ben kisi wan kari fu a tiriman disi (Ester 4:10, 11). We, prakseri fa a de fu kon na fesi a Moro Hei Masra fu hemel nanga grontapu; te wi ben sa teki libisma gersi nanga en, dan srefi den moro makti libisma „de leki sprenka” (Yesaya 40:22). Ma a wani taki dati wi musu frede fu taki nanga en? Nôno, kwetikweti!

¹¹ Yehovah seti sani so taki ibriwan sma kan taki nanga en; a gi wi na okasi fu begi. Srefi wan yongu pikin di abi bribi kan begi Yehovah efu a du dati na ini Yesus nen (Yohanes 14:6; Hebrewsma 11:6). Ma begi e yepi wi tu fu fruteri Gado den dipi prakseri fu wi, sani di wi no wani fruteri ala sma. Wi kan fruteri en srefi fu sani di e hati wi so te, taki wi no sabi fa fu taki fu den (Romesma 8:26). Wi no sa kisi wini te wi e pruberi fu korikori Yehovah nanga kefalek wortu, noso langa begi pe wi e taki ala sortu kefalek sani (Mateyus 6:7, 8). Na a tra sei Yehovah no taki o langa wi musu taki nanga en, noso omeni tron wi musu du dati. A Wortu fu En e gi wi deki-ati srefi fu „begi doronomo”.​—1 Tesalonikasma 5:17.

¹² Memre taki Yehovah na a wan-enkri sma di Bijbel e kari a „Yereman fu begi”, èn taki a e arki wi na wan fasi di e sori taki a e frustan trutru fa wi e firi (Psalm 65:2). Ma Yehovah e  arki den begi fu den getrow futuboi, nomo fu di a musu fu du dati? Nôno, na presi fu dati a lobi fu arki den begi fu den trutru. A Wortu fu En e agersi den begi disi nanga te sma e bron switismeri èn te a smoko e opo go na loktu (Psalm 141:2; Openbaring 5:8; 8:4). A de wan bigi trowstu gi wi fu sabi taki a Moro Hei Masra e prisiri nanga den opregti begi fu wi èn taki den e opo go na en leki smoko di e smeri switi. Sobun, efu yu wani kon krosibei na Yehovah, dan yu musu begi nanga sakafasi; begi furu, ibri dei. Taigi en ala san de tapu yu ati, no kibri noti gi en (Psalm 62:8). Fruteri yu hemel Tata san na yu broko-ede, san e meki yu firi prisiri; taki en tangi, prèise en. A bakapisi o de taki a banti fu yu nanga en o kon moro tranga.

13, 14. San a wani taki fu anbegi Yehovah? Fu san ede a fiti taki wi du dati?

¹³ Te wi e taki nanga Yehovah Gado, dan a no de nomo taki wi e arki noso e taki nanga en, soleki fa wi e du dati nanga wan mati noso wan famiriman. Te yu luku en bun dan wi e anbegi Yehovah, èn wi e gi en a grani di a fiti fu kisi. A tru anbegi abi krakti tapu wi heri libi. Nanga na anbegi fu wi, wi e sori Yehovah taki wi lobi en nanga wi heri sili, èn taki wi e dini en wawan. Na anbegi fu wi e meki tu taki wi de wán nanga ala getrow libisani di Yehovah meki, efu den de na hemel noso na grontapu. Na ini wan fisyun na apostel Yohanes yere wan engel e meki a komando disi bekènti, namku: „Anbegi a Sma di meki hemel, grontapu, a se nanga ala den presi pe watra e komopo.”​—Openbaring 14:7.

¹⁴ Fu san ede wi musu anbegi Yehovah? Prakseri den moi fasi fu Gado di wi taki fu den, soleki santafasi, makti, a dwengi di a man dwengi ensrefi, retidu, deki-ati, sari-ati, koni, sakafasi, lobi, firi gi tra sma, loyaalfasi, nanga bunfasi. Wi si kaba taki Yehovah na a moro bigi eksempre di wi abi, na en wi musu luku fu sabi fa fu sori ibriwan fu den tumusi warti fasi disi. Te wi e pruberi fu frustan ala den fasi fu en, dan wi e si taki Yehovah de moro leki wan prenspari Sma nomo di wi e lespeki  trutru. A glori fu en bigi so te, taki wi no man frustan en, èn a hei omeni tron moro wi (Yesaya 55:9). A no de fu taki dati Yehovah abi a reti fu de a Moro Heiwan, èn a fiti srefisrefi taki wi anbegi en. Ma fa wi musu anbegi Yehovah?

15. Fa wi kan anbegi Yehovah „nanga yeye èn nanga waarheid”? Sortu okasi wi e kisi na den Kresten konmakandra?

¹⁵ Yesus ben taki: „Gado na wan Yeye, èn den sma di e anbegi en, musu anbegi en nanga yeye èn nanga waarheid” (Yohanes 4:24). Fu anbegi Gado „nanga yepi fu a santa yeye”, wi musu abi a yeye fu en èn wi musu meki a yeye fu en tiri wi. Disi wani taki dati wi musu anbegi Yehovah soleki fa den tru tori fu Bijbel e taki. Dati na a soifri sabi di wi e feni na ini Gado Wortu. Ibri leisi te wi e kon makandra nanga tra anbegiman fu Yehovah, dan wi abi a tumusi warti grani fu anbegi en „nanga yeye èn nanga waarheid” (Hebrewsma 10:24, 25). Te wi e singi prèisesingi gi Yehovah, te wi e begi makandra, te wi e arki a  Wortu fu en èn e teki prati na takimakandra di abi fu du nanga en Wortu, dan wi e sori nanga a soifri anbegi fu wi, taki wi lobi Yehovah.

16. San na wan fu den moro bigi komando di tru Kresten kisi? Fu san ede wi e si en leki wan plekti fu gi yesi na a komando dati?

¹⁶ Wi e anbegi Yehovah sosrefi te wi e taki fu en nanga tra sma, so taki wi e gi en glori na fesi trawan (Hebrewsma 13:15). Iya, fu preiki a bun nyunsu fu Yehovah Kownukondre na wan fu den moro bigi komando di Gado gi tru Kresten (Mateyus 24:14). Wi de klariklari fu gi yesi na Yehovah fu di wi lobi en. Fa wi e firi te wi e prakseri a fasi fa Satan Didibri, „a gado fu a sistema disi, breni a frustan fu den sma di no e bribi”, noso fu a fasi fa a e fruteri ala sortu lei fu Yehovah? A sani dati no e meki taki wi wani de Kotoigi fu a Gado fu wi, so taki wi kan yepi sma fu si den lei fu Didibri? (2 Korentesma 4:4; Yesaya 43:10-12) Boiti dati, te wi e prakseri den tumusi moi fasi fu Yehovah, dan wi no e kisi a firi fu fruteri tra sma fu en? Fu tru, a moro bigi grani di wi kan kisi na fu yepi trawan fu kon sabi a lobi fu wi hemel Tata, so taki den kan lobi en soleki fa wi lobi en.

17. San a wani taki dati wi e anbegi Yehovah? Fu san ede wi musu sori soifri-retifasi te wi e anbegi en?

¹⁷ Ma moro sani de ete di wi musu du te wi e anbegi Yehovah. Na anbegi fu wi abi fu du nanga a heri libi fu wi (Kolosesma 3:23). Efu wi e si Yehovah trutru leki a Moro Hei Masra fu wi, dan wi sa suku fu du a wani fu en ala ten: na ini wi osofamiri libi, na a wrokope fu wi, na ini a fasi fa wi e handri nanga trawan, noso na ini sani di wi e du ini wi fri ten. Wi sa suku fu dini Yehovah nanga wi „heri ati”, èn wi sa tan hori wi soifri-retifasi (1 Kroniki 28:9). Te wan sma e anbegi Gado na so wan fasi, dan a musu du dati nanga en heri ati, a no kan libi wan dobru libi fu di a e du neleki a e dini Yehovah, aladi a e du seryusu sondu kibrikibri. Te wi e hori wi soifri-retifasi, dan wi no man libi na a fasi dati; lobi sa meki wi tegu gi hoigrifasi. Frede gi Gado sa yepi wi tu. Bijbel e taki dati wi kan kisi so wan lespeki gi Yehovah te wi e du muiti doronomo fu meki a banti di wi abi nanga En, kon moro tranga.​—Psalm 25:14.

18, 19. Fu san ede wi kan bribi trutru taki sondu libisma man fu teki na eksempre fu Yehovah Gado?

¹⁸ Na a kaba fu ibriwan fu den fo pisi fu a buku disi yu ben abi wan kapitel di ben e taki fa wi kan „teki na eksempre fu Gado, leki lobi pikin” (Efeisesma 5:1). A de tumusi prenspari fu hori na prakseri, taki aladi wi na sondu sma, toku wi man teki na eksempre fu Yehovah trutru. Wi kan gebroiki makti leki fa en e du dati, èn wi kan sori retidu, koni, nanga lobi, soleki fa en e du dati. Fa wi sabi taki wi man teki na eksempre fu na Almaktiwan? No frigiti taki a nen fu Yehovah wani taki dati a e meki ensrefi kon tron iniwan sani di a wani fu meki den prakseri fu en kon tru. Nanga reti wi e fruwondru taki Gado man du dati. Ma dati wani taki dati wi libisma no sa man teki na eksempre fu en? Nôno.

¹⁹ Wi meki akruderi a prenki fu Gado (Genesis 1:26). Sobun, libisma de tra fasi leki iniwan tra libisani na grontapu. A no de so taki wi e du sani soso fu di na so Gado meki wi, noso fu di na so wi kweki. Yehovah gi wi wan warti presenti, namku a fri wani fu wi. Aladi wi na sondu libisma, toku wi de fri fu bosroiti san wi wani tron. Yu wani fu de wan sma di e sori lobi, wan sma di e du san reti èn di e gebroiki en makti na wan yoisti fasi? We, nanga yepi fu a yeye fu Yehovah, yu kan tron a sortu sma dati! Prakseri sortu bun yu sa man du efu yu tyari yusrefi na a fasi dati.

20. Sortu bun sani wi e du te wi e teki na eksempre fu Yehovah?

²⁰ Yu sa meki taki yu Tata na hemel breiti, èn yu sa prisiri na ati fu en (Odo 27:11). Fu di Yehovah e frustan san yu man du èn san yu no man du, meki yu man ’plisi en dorodoro’ (Kolosesma 1:9, 10). Te yu tan du muiti fu teki na eksempre fu yu lobi Tata fu di yu e suku fu kon abi den bun fasi di a abi, dan a sa gi yu wan bigi grani. Iya, yu sa de wan sma di e skèin leti na ini wan dungru grontapu pe sma komoto na tapu a pasi fu Gado (Mateyus 5:1, 2, 14). Yu sa yepi sma na ala sei fu grontapu fu kon frustan fa Yehovah de trutru. Dati na wan tumusi bigi grani!

21, 22. Fu san ede wi kan taki dati ala den sma di lobi Yehovah sa musu tan waka a pasi di de na den fesi?

²¹ A moi deki-ati di wi e kisi na ini Yakobus 4:8, a no wan sani nomo di wi musu poti leki marki gi wisrefi. A de leki wi e teki waka go na wan farawe kondre. Solanga wi tan getrow, wi sa musu tan waka a pasi dati. Noti sa tapu wi fu kon krosibei na Yehovah moro nanga moro. Fu tru, ala ten wi sa tan leri fu en. Wi no musu prakseri taki a buku disi leri wi ala san de fu leri fu Yehovah. Fu taki en leti, a buku disi no e fruteri wi afu fu den sani di Bijbel e taigi wi fu wi Gado! Boiti dati, dan Bijbel srefi no e fruteri wi ala san wi kan kon sabi fu Yehovah. Na apostel Yohanes ben taki dati efu sma ben sa skrifi ala san Yesus du di a ben de na grontapu, dan „grontapu srefi no ben o man hori ala den bukulolo pe den sani disi skrifi na ini” (Yohanes 21:25). We, efu Yohanes ben kan taki dati fu a Manpikin, o moro wi kan taki dati fu a Tata!

 ²² Srefi te wi abi têgo libi, dan dati no sa meki wi kon sabi ala sani fu Yehovah (Preikiman 3:11). We, prakseri dan san e wakti wi na ini a ten di e kon. Baka te wi libi wan hondro, wan dusun, wan milyun, noso wan milyard yari, dan wi o sabi moro fu Yehovah Gado leki san wi sabi now. Toku wi no sa frigiti taki bun furu moi sani de ete di wi kan leri fu en. Wi sa wani leri moro, fu di ala ten wi sa si sani di o meki taki wi e firi leki a psalm skrifiman, di ben singi: „A kon di mi e kon krosibei na Gado, bun gi mi” (Psalm 73:28). Têgo libi sa de wan tumusi moi èn warti sani gi wi. A sa de wan ten pe wi o du furu difrenti sani; a moro moi sani fu a libi disi sa de taki wi sa tan kon moro krosibei na Yehovah.

23. Sortu deki-ati yu e kisi?

²³ Meki a de so taki yu e sori warderi gi a lobi fu Yehovah nownow kaba, fu di yu lobi en nanga yu heri ati, sili, frustan, nanga krakti (Markus 12:29, 30). A lobi fu yu musu meki taki yu tan getrow na Gado dorodoro èn lobi musu meki taki yu tanapu kánkan. Meki a de so ala dei taki ibri bosroiti di yu e teki, pikinwan noso bigiwan, e sori taki yu e hori yusrefi na a gronprakseri disi: ala ten yu sa tan suku a fasi fu libi di e meki a banti fu yu nanga yu Tata na hemel kon moro tranga. Boiti dati, meki a de so taki yu tan kon moro krosibei na Yehovah, èn meki ensrefi tan kon moro krosibei na yu, fu têgo!