MWAKI makato alip aryo angec, kinywalo latin mo ma dok pat adada ma odongo odoko laco ma ngene loyo. Pe tye ngat mo i kare meno ma onongo tye ki dege nyo mutoka. Jami calo redio ki telebijon onongo bene pud gipe.

Latin meno kicako nyinge ni Yecu. En odoko laco maryek loyo ma okwo i lobo. Yecu bene odoko lapwony maber loyo. En onongo tito jami matego i yo ma niang i komgi doko yot.

Yecu opwonyo dano ka mo keken ma en orwatte kwedgi iye. En opwonyogi i dog nam ki dong i yeya bene. En opwonyo dano i gangigi ki ka tye ka wot ka mo. Yecu onongo pe ki mutoka dok bene pe owoto ki bac nyo gar. Yecu owoto i kabedo mapat pat kun pwonyo dano.

Wapwonyo jami mapol ki bot jo mukene. Ento waromo pwonyo jami ma pigi tego loyo ki bot Yecu, Lapwony Madit. Lok pa Yecu nonge i Baibul. Ka wawinyo lok magi ma tye i Baibul-li, nongo bedo calo Yecu tye ka lok kwedwa.

Pingo Yecu obedo Lapwony Madit kumeno? Tyen lok me acel aye ni Yecu bene kipwonye apwonya. Dok en onongo ngeyo kit ma winyo lok pire tek kwede. Ento Yecu mono owinyo lok pa anga? Anga ma opwonye?— Wonne aye opwonye. Won Yecu aye Lubanga.

Ma peya obino i lobo macalo dano, Yecu okwo i polo kacel ki Lubanga. Pi meno, Yecu onongo dok pat ki dano mukene-ni, pien  pe tye dano mo keken ma kinywale i lobo ma okwo i polo. Ki i polo, Yecu obedo Latin maber ma owinyo lok pa Wonne. Pi meno, Yecu obedo ki kero me pwonyo dano ki jami ma en opwonyogi ki bot Lubanga. Itwero lubu lanen pa Yecu ka iwinyo lok pa babani ki mamani.

Tyen lok mukene mumiyo Yecu obedo Lapwony Madit aye ni en omaro dano. En onongo mito konyo dano wek gupwony lok i kom Lubanga. Yecu omaro jo madito ento en onongo maro lutino bene. Dok lutino onongo gimaro bedo bot Yecu pien ni en onongo loko kwedgi dok winyo lokgi.

I nino mo acel, lunyodo mogo gukelo lutinogi bot Yecu. Ento lureme gutamo ni Lapwony Madit-ti pe ki cawa me lok ki lutino matino. Pi meno, guwaco botgi ni gua woko. Ento ngo ma Yecu owaccigi?— Yecu owacci: “Wuwek litino gubin bota; pe wugenggi.” Ada, Yecu onongo mito ni lutino matino gubin bote. Dong, kadi bed ni en obedo  laco mo maryek dok ma pire tek, Yecu okwanyo kare me pwonyo lutino matino.—Marako 10:13, 14.

In ingeyo pingo Yecu opwonyo lutino matino dok owinyo lokgi? Tyen lok acel aye ni en onongo mito ni gubed ki yomcwiny ki tito botgi lok i kom Lubanga, Wonne me polo. In itwero yomo cwiny dano nining?— Itwero yomo cwinygi ki tito botgi jami ma ipwonyo i kom Lubanga.

I nino mo acel, Yecu opwonyo Lureme ki lok mo ma pire tek adada kun tiyo ki latin matidi. En okwanyo latin meno ci omiyo ocung i nyim Lupwonnyene. I ngeye, Yecu owaco bot jo magi ni myero gulok kitgi wek gubed calo latin man matidi-ni.

Ngo mono ma Yecu onongo tye ka wacone? Tika ingeyo kit ma laco muteggi, nyo latin madong dit dit, omyero odok kwede calo latin matidi?— Latin matidi pe ngeyo jami mapol calo dano muteggi, man miyo en bedo ki miti me nongo pwony. Pi meno, Yecu onongo tye ka wacci lupwonnyene myero gubed mwol calo lutino matino. Ada, wan ducu watwero pwonyo jami mapol ki bot jo mukene. Dok wan ducu omyero wange ni pwony pa Yecu pigi tego loyo tamwa kekenwa.—Matayo 18:1-5.

Tyen lok mukene mumiyo Yecu obedo Lapwony Madit aye ni en onongo ngeyo kit me weko winyo lok doko mit bot dano. En onongo tito jami i yo ma niang i komgi doko yot. En oloko i  kom winyi, ature ki jami mogo me nino ducu me konyo dano wek guniang lok i kom Lubanga.

I nino mo acel ma Yecu tye i te got, dano mapol gubino bote. Yecu obedo piny ci opwonyogi kit ma i neno kwede i cal kany. Pwony man kilwongo ni Pwony me Wi Got. En owaco ni: ‘Kong wunen winyi me polo. Pe gicoyo kodi. Pe gigwoko cam i dero. Ento Lubanga ma tye i polo pud pitogi. Wun pe piwu tek kato pigi woko?’

Yecu bene owaco ni: ‘Tam kong i kom ature me tim. Gidongo labongo tiyo tic mo. Ento nen kong kit ma gileng kwede! Kadi wa Kabaka Solomon ma olony tutwal-li pe kirukke maleng loyo ature me tim. Ka Lubanga gwoko ature ma dongo i tim, en pe bigwokowu bene?’—Matayo 6:25-33.

 Tika iniang ngo ma Yecu onongo tye ka pwonyone?— En onongo pe mito ni wabed ka paro pi ngo ma wabicamo nyo wabiruko. Lubanga ngeyo ni wamito jami magi ducu. Yecu pe owaco ni omyero pe wati tic me nongo cam ki bongi. Ento en owaco ni omyero waket Lubanga obed mukwongo. Ka watimo meno, Lubanga bineno ni wanongo cam ki bongi me aruka. Tika iye lok meno?—

I kare ma Yecu otyeko lokke, tam ango ma dano gubedo kwede?— Baibul waco ni gubedo ki ur i kom kit ma en pwonyo  kwede. Winyo lok pa Yecu onongo mit mada. Gin ma en opwonyo okonyo dano me timo gin matir.—Matayo 7:28.

Pi meno, pire tek ni omyero wanong pwony ki bot Yecu. Mono ingeyo kit ma watwero timo kwede meno?— Watye ki lokke ma kicoyo i buk mo acel. Iromo wacca nying buk meno?— Buk meno aye Baibul Maleng. Man te lokke ni watwero winyo Yecu ka waketo cwinywa i jami ma wakwanogi ki i Baibul. Ki lok ada, Baibul tye ki lok mamit i kom kit ma Lubanga kikome owacciwa ni omyero wawiny Yecu. Kong wanenu ngo mutimme.

I nino mo acel Yecu otero lureme mogo adek malo i wi got. Lureme magi nyinggi Yakobo, Jon ki Petero. Wabipwonyo jami mapol i kom jo magi lacen, kit ma gin adek ducu gubedo lurem Yecu macok tutwal-li. Ento i nino meno, wang Yecu ocako ryeny calo ceng. Bongone olokke matar kit ma nen kwede i cal-li.

Lacen, Yecu ki lureme guwinyo dwan mua ki i polo. Dwan meno owaco ni: “Man aye Woda ma amaro; wuwinye.” (Mat 17:1-5) Tika ingeyo dwan ngat meno?— Meno obedo dwan Lubanga! Ada, Lubanga aye owaco ni myero guwiny Wode.

Wan i kare-ni kono? Tika wabibedo ki winy bot Lubanga gin ki Wode ma en aye Lapwony Madit?— Meno aye gin ma myero wan ducu watim. Wi tika po kit ma watwero timo kwede meno?—

Tye ni, watwero winyo Wod pa Lubanga ka wakwano kit me kwone ki i Baibul. Tye jami mabeco mapol ma Lapwony Madit-ti pud mito wacone botwa. Ibinongo mit pa pwonyo jami magi ma kicoyogi i Baibul-li. Dok bene bikelli yomcwiny ka itito ki luremi jami mabeco ma itye ka pwonyogi.