Mekene 1

Pine Nemene Matre Iesu Hi La Atre hamë Ini Ka Sisitria

KOLA troa tru thauzane lao macatre enehila thupene lo kola hnahone ekö la ketre nekönatre ka ketre pengöne kö. Nge tro la nekönatre cili a tru trotro uti hë la troa ketre atr ka tru ne la fene hnengödrai asë. Pëkö avio me loto ngöne la ijine cili. Ketre tune la televizio me ordinatör me Ëternet.

Iesu la ëjene la nekönatr. Pëkö ka inamacane ka tui nyidrë. Nge ketre pëkö ka hamë ini tui nyidrë. Atreine catre Iesu troa qeje pengöne la itre mekun ka jol, matre canga trotrohnine hi hnene la itre atr ka dreng.

E öhne hë Iesu la atr, nyidrëti a hamë ini ju kow. Hnei nyidrëti hna kuca tun e ezine hnagejë, maine hune he, maine ngöne itre hnalapa, maine ngöne itre gojenyi pena. Pine laka pëkö loto me tërë, haawe, nyidrëti a trongë ihnadro matre troa inine la itre atr ngöne la itre götrane hnei angatre hna mele ngön.

Maine nyipici laka nyimutre la itre ewekë hne së hna atre qaathei itre xan, ngo Iesu hmekuje hi lo Atre Hamë Ini Ka Sisitria, atre ini së la itre ewekë ka tru thatraqane la mele së. Ame asë hi la itre hnei Iesu hna qaja, tre, itre eje asë e hnine la Tusi Hmitrötr. Celë hi matre, ame la easa e mekötine la itre trenge ewekë i nyidrë e hnine la Tusi Hmitrötr, tre, kösë nyidrëti hi lai a ithanata koi së.

Pine nemene matre hë Iesu jë ka hape, Atre Hamë Ini Ka Sisitria? Ame la kepin, tre, hetre ka hamë ini fe koi nyidrë, nge atre hi nyidrëti la enyipiewekëne la troa drenge hnyawa. Atre fe hi eö ka hape, Iesu a drei drei? Drei la ka hamë ini koi nyidrë?— Kolo hi lo Tretretro i nyidrë. Akötresie la Tretretro i nyidrë.

Qëmekene tro Iesu a uti kowe la fen, ce nyidrëti ekö me Akötresie e koho hnengödrai. Qa ngöne lai tha ceitui nyidrëti kö memine la itre xa atr, ke,  pine pe hi hnaho nyidrëti e celë fen, ngo hnei nyidrëti hë hna pane mele e koho hnengödrai. Ame ngöne lo nyidrëti ekö e koho hnengödrai, tre, ketre Neköne ka lolo thiina nyidrë, nge ka drengethenge hnyawa la Tretretro i nyidrë. Haawe, tha jole kö koi Iesu troa inine la itre xa atr la nöjei ewekë hnei Akötresieti hna qaja koi nyidrë. Ijije fe hi tro eö a hane tui Iesu, e hnei eö hna drengethenge hnyawa la keme me thine i eö.

Ame mina fe la kola hë Iesu ka hape, Atre Hamë Ini Ka Sisitria, tre, hnene la aqane hnime nyidrëti la itre atr. Aja i nyidrëti tro angatr a hane atre Akötresie. Maine nyipici laka ka hnime Iesu la itre ka tru, ngo nyidrëti mina fe a hnime la itre nekönatr. Nge pi tro catre la itre nekönatr a ce me Iesu, pine laka, nyidrëti a thele troa porotrike me nyudren me hane drei nyudren.

Ame ngöne la ketre ijin, hnene la itre keme me thin hna tro fë la itre nekö i angatre ka co koi Iesu. Ngo hna sewe nyudreni me upi nyudren hnene la itre sinee i Iesu, ke, angatre a mekune ka hape, tru catre hnei jole i nyidrë nge pëkö ijine i nyidrëti troa drenge la itre nekönatr. Ngo nemene la hnei Iesu hna qaja?— Öni nyidrëti koi angatr, ka hape: “Nuepi la ite nekönat’ e troa tro koi ni, nge the shewe nyudeni kö.” Kola mama hnyawa laka,  aja i Iesu troa tro koi nyidrëti hnene la itre nekönatr. Ngacama ketre atr ka tru nyidrë nge ka inamacan, ngo ame pe, hnei nyidrëti hna thele ijine troa hane inine la itre nekönatre ka co.—Mareko 10:13, 14.

Atre fe hi eö la kepine matre Iesu a inine la itre nekönatre me hane drei nyudren? Ame la ewekë hnapan, tre, aja i nyidrë tro nyudreni a madrine qa ngöne la hna qaja koi nyudreni la pengö i Akötresie Tretretro i nyidrë. Atre fe hi eö la aqane tro eö a hane amadrinëne la itre xa atr?— Ene la troa hane qaja fe koi angatre la itre hnei eö hna atre göi Akötresie.

Ame ngöne la ketre ijin, jëne la nekönatr, hnei Iesu hna pane hamëne la ketre ini ka tru kowe la itre sinee i nyidrë. Hnei nyidrëti hna acil e nyipi angatre la nekönatr me qaja koi angatre la enyipiewekëne la tro angatr a ujë ceitu memine la nekönatre cili.

Pine nemene matre qaja jë Iesu la mekune cili? Nemene la hnei eö hna hane mekun, ijije kö tro la ketre atr ka tru maine ketre nekönatre ka nango tru hui eö, a tune hmaca la ketre nekönatre ka co?— Pine laka tha ceitune kö la hnei nyëne hna atre memine la itre ka tru, ngo nyëne pe a thele troa kepe ini qaathei angatr. Ngo ame la aliene la hnei Iesu hna qaja, tre, ene laka tro la itretre drenge a thele troa hetrenyi la hni ne ipië tune la itre nekönatre ka co. Nyine tro fe hi lai a amamane ka hape, hetre hne së fe hna troa hane atre me kapa qaathene la itre xan. Ketre, easa atrehmekune hnyawa laka, ka nyipi ewekë catre kö la itre ini hnei Iesu hna hamëne hune la itre sipu mekuna së.—Mataio 18:1-5.

Kolo mina fe a mama laka Iesu la Atre Hamë Ini Ka Sisitria, hnene la aqane ithanatane nyidrëti la itre ewekë matre troa pi drei nyidrë hnene la itre atr. Hmaloi nge nualai la aqane qeje pengöne nyidrëti la itre ewekë cili. Ame ngöne la nyidrëti a thele troa qaja la pengö i  Akötresie, hnei nyidrëti hna qaja la itre waco me itre engen, me itre ewekë hna majemine kuca ngöne la nöjei drai.

Ame ngöne la ketre ijin, ngöne lo Iesu e hune la ketre wetr, nyimutre la itre atr ka traqa koi nyidrë. Tune la hna amamane ngöne cahu iatr, nyidrëti a lapa me cainöj kowe la itre atr. Kola hëne la cainöje cili ka hape, Cainöje Hune La Wetr. Öni nyidrëti ka hape: ‘Goeëne jë caha itre waco. Tha hane fe kö itre eje eënyi me menu me nyi fie; ngo hna ithuane itre eje hnei Tretretro e koho hnengödrai. Hapeu, tha sisitria kö nyipunie hune itre ej?’

Hnei Iesu fe hna qaja ka hape: ‘Mekuneju la aqane cia ne la itre peledrë; tha hane kö huliwa, me cai mano; ngo ame Solomona ngöne la nöjei lolo i nyidrë, tre, tha hna hetre kö tune lai. Nge maine Akötresieti a xetrëne la hnitre tune lai, hapeu, tha nyipi koi anganyidrëti troa xetrë nyipunie?’—Mataio 6:25-33.

Trotrohnine hi eö lai ini hnei Iesu hna hamën?— Tha nyidrëti kö a ajane tro sa kukehnine menun, e traqa ju së pë nyine xen maine nyine hetrëne  pena. Atre hnyawa hi Akötresieti laka itre ewekë lai ka sisitria catre kowe la mele së. Tha Iesu kö a qaja ka hape, tha nyipi ewekë kö tro sa huliwa matre troa kapa la itre ewekë cili. Nyidrëti pe a ithuecatre koi së troa amë panë Akötresie ngöne la mele së, nge pine pë hë la itre ewekë cili. Maine tro sa ujë tune lai, haawe, tro hë Akötresieti a hamëne koi së la nyine xeni me nyine hetrën. Hapeu, mejiune kö eö kowe la ewekë cili?—

Nemene la pengöne la itre atr thupene lo hnei Iesu hna cainöje koi angatr?— Kola qaja hnei Tusi Hmitrötre ka hape, angatre a haine atraqatre la aqane hamë ini i nyidrë. Madrine catre la itre atr la itre ini hnei nyidrëti  hna hamën. Itre ini ka xatua angatre troa kuca la itre ewekë ka loi.—Mataio 7:28.

Haawe, nyipi ewekë catre tro sa drei Iesu. Ngo troa drei nyidrëti tune kaa?— Hna cinyihane la itre trengewekë i Iesu hnine la ketre itus. Nemene la itusi cili?— Kola qaja la Tusi Hmitrötr. Kolo lai a hape, tro sa drei Iesu hnene la hna wangatrune hnyawa la itre ewekë hne së hna e e hnine la Tusi Hmitrötr. Kola hamëne hnene la Wesi Ula i Akötresie la ketre edromë ka amamane la aqane upi së hnei Akötresie troa drei Iesu. Tro sa pane ce ithanatane la edromë cili.

Ame ngöne la ketre drai, hnei Iesu hna ce tro memine la itre sinee i nyidrë kowe la ketre wetr; ala köni angatr, Iakobo me Ioane me Peteru. Tro pë hë sa ce ithanatane e thupene la pengö i angatr, pine laka itre sipu enehmu i Iesu asë hi angatr. Ngo hna pane traqa la ewekë ka ketre pengöne hune la wetr, hudrume jë hi la iqëmeke i Iesu. Tune la hna amamane hnene la iatr, kola melemele la itre ixetre i nyidrë tune la lai.

Thupene lai kola drenge hnei Iesu memine la itre ehnemu i nyidrë la kola ewekë qa hnengödrai ka hape: “Dei la Nekönge hniminang, ini a madi nyidë ; dei nyidëti ju nyipunie.” (Mataio 17:1-5) Drei la ka ithanata?— Akötresie. Eje hi, Akötresieti a upi Iakobo me Ioane me Peteru, troa drenge la Hupuna i Nyidrë.

Nge tune kaa fe së enehila? Easë fe kö a hane thele troa drengethenge Akötresie memine la Hupuna i Nyidrë, lo Atre Hamë Ini Ka Sisitria?— Celë hi la nyine troa kuca hnene la nöjei atr asë. Mekune hi eö lo nyine tro sa kuca matre troa drenge la Hupuna i Akötresie?—

Ame ngöne la easa e la aqane trongene la mele i Iesu e hnine la Tusi Hmitrötr, kösë easë hi lai a drei nyidrëti e ithanata. Tru catre la itre ewekë ka lolo hnei nyidrëti hna troa qaja koi së. Maine tro eö a inine la itre ewekë cili qa hnine la Tusi Hmitrötr, me hane ce thawa memine la itre sinee i eö, eje hi lai laka, tro ha atraqatre la madrine i eö.

Maine easa ajane troa atre hnyawa la itre manathithi ka lolo qa ngöne la hna drei Iesu, haawe, e jë la Ioane 3:16; 8:28-30; me Itre Huliwa 4:12.

[Iatr ne la götran 11]

Pine nemene matre ajane catre la itre nekönatre troa tro koi Iesu?

[Iatr ne la götran 12]

Nemene la ini hna troa hamëne hnene la nekönatre ka co kowe la itre ka nango tru me itre ka tru?

[Iatr ne la götran 13]

Nemene la ini hnei Iesu hna hamën, ngöne lo nyidrëti a qaja la itre waco me itre engen?

[Iatr ne la götran 14]

“Dei la Neköng . . .

Dei nyidëti ju nyipunie”