Ibuot 1

Ntak Emi Jesus Ekedide Akwa Andikpep

KE SE iwakde ikan isua tọsịn iba emi ẹkebede, ata a-san̄asan̄a eyen kiet ama amana oro ọkọkọride akabade edi akakan owo oro akanam odude uwem. Idụhe owo ndomokiet emi okodude uwem ini oro, emi ekenyenede ubomofụm m̀mê ubomisọn̄. Mme utọ n̄kpọ nte ekebe ndise, kọmputa, ye Intanet ikodụhe.

Ẹkesio eyen oro enyịn̄ Jesus. Enye ama akabade edi owo oro ọdiọn̄ọde n̄kpọ akan emi akanam odude ke isọn̄. Jesus n̄ko ama akabade edi mfọnn̄kan andikpep. Enye ama esinam n̄kpọsọn̄ n̄kpọ ẹn̄wan̄a ke usụn̄ emi akanamde ẹdi mmemmem ndifiọk mmọ.

Jesus ama ekpep mme owo n̄kpọ ke kpukpru ebiet oro enye okokụtde mmọ. Enye ama ada ke mbeninyan̄ onyụn̄ esịne ke ubom ekpep mmọ n̄kpọ. Enye ama ekpep mmọ n̄kpọ ke ufọk ye ke ini akade isan̄. Jesus ikenyeneke ubomisọn̄, enye ikonyụn̄ idụkke bọs m̀mê tren ika isan̄. Jesus ama esisan̄a ke ebiet ke ebiet, ekpep mme owo n̄kpọ.

Nnyịn imekpep ediwak n̄kpọ ito mbon efen. Edi nnyịn imekeme ndikpep mme n̄kpọ oro ẹdide akpan n̄kpọ ẹkan ito Jesus, kpa Akwa Andikpep. Ẹkụt mme ikọ Jesus ke Bible. Ke ini nnyịn ikopde mme ikọ oro ẹtode Bible, enye etie ukem ukem nte n̄kpọ eke Jesus etịn̄de ikọ ọnọ nnyịn.

Ntak emi Jesus ekedide utọ Akwa Andikpep oro? Ntak kiet edi nte ke ẹkekpekpep Jesus ke idemesie. Ndien enye ama ọfiọk nte ekedide akpan n̄kpọ ndikpan̄ utọn̄. Edi anie ke Jesus akakpan̄ utọn̄ ọnọ? Anie ekekpep enye n̄kpọ?— Ete esie. Ndien Ete Jesus edi Abasi.

Mbemiso ekedide isọn̄ nte owo, Jesus okodụn̄ ke heaven ye Abasi.  Ntre Jesus ama okpụhọde ye mme owo eken koro baba owo kiet efen ikodụn̄ke ke heaven mbemiso amanade ke isọn̄. Ke heaven Jesus ekedi eti Eyen, kiet emi akakpan̄de utọn̄ ọnọ Ete esie. Ke ntre, Jesus ama ekeme ndikpep mme owo se enye ekekpepde oto Abasi. Afo emekeme nditie nte Jesus ebe ke ndikpan̄ utọn̄ nnọ ete ye eka fo.

Ntak efen oro Jesus ekedide Akwa Andikpep edi nte ke enye ama ama mme owo. Enye okoyom ndin̄wam mme owo ẹkpep n̄kpọ ẹban̄a Abasi. Jesus ama ama ikpọ owo, edi enye ama ama nditọwọn̄ n̄ko. Ndien nditọwọn̄ ẹma ẹma ndidu ye Jesus koro enye ama esitịn̄ ikọ ọnọ mmọ onyụn̄ akpan̄ utọn̄ ọnọ mmọ.

Usen kiet ndusụk mme ete ye eka ẹma ẹda n̄kpri nditọ mmọ ẹsọk Jesus. Edi mme ufan esie ẹkekere ke Akwa Andikpep ikenyeneke ini nditịn̄ ikọ ye n̄kpri nditọ. Ntre mmọ ẹma ẹdọhọ mme ete ye eka oro ẹtan̄ nditọ emi ẹnyọn̄ọ. Edi nso ke Jesus ọkọdọhọ?— Jesus ọkọdọhọ ete: “Ẹyak n̄kpri nditọ ẹtiene Mi; ẹkûkpan mmọ.” Ih, Jesus okoyom n̄kpri nditọ ẹtiene imọ. Ntre  okposụkedi enye ekenen̄erede ọdiọn̄ọ n̄kpọ okonyụn̄ edide ata akpan owo, Jesus ama ada ini ekpep n̄kpri nditọ n̄kpọ.—Mark 10:13, 14.

Nte afo ọmọfiọk ntak emi Jesus ekekpepde nditọwọn̄ n̄kpọ onyụn̄ akpan̄de utọn̄ ọnọ mmọ? Ntak kiet edi nte ke enye okoyom ndinam mmọ ẹnem esịt ebe ke ndisian mmọ mme n̄kpọ ẹban̄ade Abasi, kpa Ete esie eke heaven. Didie ke afo ekeme ndinam mme owo ẹnem esịt?— Ebe ke ndisian mmọ mme n̄kpọ oro afo ekpepde aban̄a Abasi.

Ini kiet, Jesus ama ada ekpri eyenọwọn̄ kiet ekpep mme ufan Esie akpan ukpepn̄kpọ. Enye ama emen eyen oro enịm ke ufọt mme mbet Esie, emi ẹkedide mme anditiene Enye. Ndien Jesus ama ọdọhọ ete ke ana ikpọ owo emi ẹkpụhọde mme usụn̄ mmọ ẹnyụn̄ ẹkabade ẹtie nte ekpri eyen emi.

Nso ke ikọ Jesus oro ọkọwọrọ? Nte afo ọmọfiọk nte akwa owo, m̀mê idem akparawa akpakabarede etie nte ekpri eyenọwọn̄?— Nte ededi, ekpri eyenọwọn̄ itịmke ifiọk n̄kpọ nte akwa owo, enye onyụn̄ eben̄e idem ndikpep n̄kpọ. Ntre Jesus ọkọdọhọ ete ke oyom mme mbet imọ ẹsụhọde idem, nte n̄kpri nditọwọn̄. Ke akpanikọ, kpukpru nnyịn imekeme ndikpep ediwak n̄kpọ nto mbon en̄wen. Ndien kpukpru nnyịn ikpenyene ndifiọk nte ke mme ukpepn̄kpọ Jesus ẹnen̄ede ẹdi akpan n̄kpọ ẹkan mme ekikere nnyịn.—Matthew 18:1-5.

Ntak efen emi Jesus ekedide utọ Akwa Andikpep oro edi nte ke enye ama ọfiọk ndinam mme owo ẹnyene udọn̄ ke mme n̄kpọ. Enye ama anam mme n̄kpọ ẹn̄wan̄a ke mmemmem, in̄wan̄-in̄wan̄ usụn̄.  Enye ama etịn̄ aban̄a mme inuen ye mme flawa ye mme n̄kpọ en̄wen oro ẹdiọn̄ọde man an̄wam mme owo ẹnyene ifiọk ẹban̄a Abasi.

Usen kiet ke ini Jesus okodude ekpere akamba obot kiet, ediwak owo ẹma ẹdi ẹbịne enye. Jesus ama osụhọde etetie onyụn̄ etịn̄ ikọ, m̀mê ọkwọrọ ikọ ọnọ mmọ, nte afo ekemede ndikụt mi. Ẹkot utịn̄ikọ emi Ukwọrọikọ Oro ke Obot. Enye ọkọdọhọ ete: ‘Ẹse mme inuen ke enyọn̄. Mmọ itọhọ n̄kpasịp. Mmọ ibonke udia ke ubet. Edi Abasi ke heaven ọbọk mmọ. Nte mbufo ikponke ikan mmọ?’

Jesus ama ọdọhọ n̄ko ete: ‘Ẹkere ekpon̄idịm ke ikọt. Mmọ inamke utom, edi ke ẹkọri. Ndien se nte mmọ ẹyede! Edidem Solomon oro akakam edide imọ owo ikesịneke se iyede ikan mme ekpon̄idịm emi. Ntre edieke Abasi esede aban̄a mme flawa oro ẹkọride, nte enye n̄ko idisehe iban̄a mbufo?’—Matthew 6:25-33.

Nte ukpepn̄kpọ oro Jesus ekekpepde an̄wan̄a fi?— Enye ikoyomke  nnyịn itịmede esịt iban̄a ebiet emi nnyịn idinyenede udia idia m̀mê ọfọn̄ isịne. Abasi ọfiọk ete ke nnyịn imoyom kpukpru n̄kpọ oro. Jesus ikọdọhọke ite ke nnyịn ikpanamke utom man inyene udia ye ọfọn̄. Edi enye ọkọdọhọ ete ke nnyịn ikpenịm Abasi akpa. Edieke nnyịn inamde oro, Abasi oyokụt ete ke nnyịn imenyene udia ndidia ye ọfọn̄ ndisịne. Nte afo emenịm oro ke akpanikọ?—

Ke Jesus ama eketịn̄ ikọ ama, nso ke mme owo ẹkekere?— Bible ọdọhọ ete ke idem ama akpa mmọ aban̄a ukpepn̄kpọ esie. Ama enen̄ede  enem ndikpan̄ utọn̄ nnọ enye. Se enye eketịn̄de ama an̄wam mme owo ndinam se inende.—Matthew 7:28.

Ntre edi ata akpan n̄kpọ nnyịn ndikpep n̄kpọ nto Jesus. Nte afo ọmọfiọk nte nnyịn ikemede ndinam oro?— Ọfọn, nnyịn imenyene mme ikọ esie oro ẹwetde-wet ke n̄wed. Nte afo ọmọfiọk n̄wed oro?— Enye edi Edisana Bible. Emi ọwọrọ ke nnyịn imekeme ndikpan̄ utọn̄ nnọ Jesus ebe ke ndinọ ntịn̄enyịn ke mme n̄kpọ oro nnyịn ikotde ke Bible. Ke akpanikọ, Bible obụk mbụk oro aduaide owo idem aban̄a nte Abasi ke idemesie ọkọdọhọde nnyịn ikpan̄ utọn̄ inọ Jesus. Ẹyak nnyịn ise se iketịbede.

Usen kiet Jesus ama ada mme ufan esie ita ọdọk akamba obot kiet. Mmọ ẹkekere James, John, ye Peter. Nte ini akade nnyịn iyekpep n̄kpọ efen efen iban̄a irenowo emi, sia mmọ mbita ẹkedide n̄kpet n̄kpet ufan Jesus. Edi ke akpan ini emi, iso Jesus ama ọtọn̄ọ ndiyama. Ọfọn̄ esie onyụn̄ akabade afia nte un̄wana, nte afo ekemede ndikụt mi.

Ke oro ebede, Jesus ye mme ufan esie ẹma ẹkop uyo otode heaven nte ọdọhọde ete: ‘Emi edi edima Eyen Mi, emi nnemde esịt ye Enye; ẹkop uyo Esie.’ (Matthew 17:1-5) Nte afo ọmọfiọk m̀mê uyo anie ekedi oro?— Ekedi uyo Abasi! Ke akpanikọ, Abasi ọkọdọhọ ke mmọ ẹkpenyene ndikpan̄ utọn̄ nnọ Eyen imọ.

Nso kaban̄a nnyịn mfịn? Nte nnyịn iyokop uyo Abasi inyụn̄ ikpan̄ utọn̄ inọ Eyen esie, kpa Akwa Andikpep?— Oyom kpukpru nnyịn inam oro. Nte afo emeti nte nnyịn ikemede ndinam oro?—

Ih, nnyịn imekeme ndikpan̄ utọn̄ nnọ Eyen Abasi ebe ke ndikot mme mbụk Bible ẹban̄ade uwem esie. Ediwak utịbe utịbe n̄kpọ ẹdu oro Akwa Andikpep enyenede nditịn̄ nnọ nnyịn. Afo oyokop inem ndikpep mme n̄kpọ emi ke Bible. Ndien afo n̄ko eyenem esịt edieke afo etịn̄de ọnọ mme ufan fo aban̄a nti n̄kpọ oro afo ẹkpepde.

Man enyene ifiọk efen efen aban̄a nti n̄kpọ oro ẹtode edikpan̄ utọn̄ nnọ Jesus, kụbọde Bible fo nyụn̄ kot John 3:16; 8:28-30; ye Utom 4:12.

[Ndise ke page 11]

Ntak emi nditọwọn̄ ẹkemade ndidu ye Jesus?

[Ndise ke page 12]

Nso ukpepn̄kpọ ke n̄kparawa ye ikpọ owo ẹkeme ndikpep nto ekpri eyenọwọn̄?

[Ndise ke page 13]

Nso ke Jesus ekekpep ke ini enye eketịn̄de aban̄a mme inuen ye mme flawa?

[Ndise ke page 14]

‘Emi edi Eyen Mi, ẹkop uyo Esie’