A SUCU ena ruanaudolu vakacaca na yabaki sa oti e dua na gone e qai yaco me tamata rogo duadua. Ena gauna oya e se sega kina na waqavuka se lori. E se sega kina na retioyaloyalo, kompiuta, kei na Internet.

E yaca ni gone oqo o Jisu. E qai yaco me tamata vuku duadua e vuravura. E qai qasenivuli vinaka duadua tale ga. E dau matata vinaka na nona vakamacalataka na veika e dredre na kena kilai.

O Jisu e vakavulici ira na tamata ena veivanua kece ga. E veivakavulici e baravi vaka kina mai na waqa. E veivakavulici e vale kei na gauna e veilakoyaki voli kina. E sega ni vakamotoka o Jisu, e sega tale ga ni vodo basi se sitimanivanua. E taubale voli ga o Jisu ena nona veivakavulici.

Dau levu na ka eda vulica vei ira tale e so. Ia eda na vulica ga na veika e bibi vua na Qasenivuli Levu, o Jisu. E kunei ga ena iVolatabu na vosa i Jisu. Nida wilika na vosa oya ena iVolatabu, e vaka sara ga ni vosa tiko vei keda o Jisu.

E rawa vakacava me Qasenivuli Levu o Jisu? E vakavulici tale ga o Jisu. E kila vinaka na bibi ni vakarorogo. Ia e vakarorogo vei cei o Jisu? O cei e vakavulici koya?— O Tamana. E tama i Jisu na Kalou.

Ni bera ni qai mai tamata e vuravura o Jisu, a bula voli mai lomalagi kei na Kalou. E duatani gona o Jisu mai vei ira na vo ni tamata baleta ni sega ni dua tale na tamata me bula voli mai lomalagi ni bera ni mai sucu e vuravura. E ivakaraitaki vinaka sara o Jisu mai lomalagi  baleta ni dau vakarorogo vei Tamana. Oya na vuna e vakavuvulitaka rawa kina o Jisu na veika e vulica vua na Kalou. E rawa mo vakataki Jisu ke o vakarorogo vei tamamu kei tinamu.

E Qasenivuli Levu tale ga o Jisu baleta ni dau lomani ira na tamata. A vinakata mera vulica na tamata na veika e baleta na Kalou. O Jisu e lomani ira na uabula, ia e lomani ira tale ga na gone. Era dau taleitaki Jisu na gone baleta ni dau vosa vei ira qai rogoci ira tale ga.

Dua na siga era kauti luvedra lalai mai na itubutubu vei Jisu. Ia era qai nanuma na nona itokani de rui osooso vakalevu na Qasenivuli Levu me vosa vei ira na gonelalai. Ra mani vakatalai ira. Ia na cava e kaya o Jisu?— E kaya: “Dou laivi ira na gone lalai me ra lako mai vei au, ka mo dou kakua ni tarovi ira.” Io, e vinakata o Jisu mera lako mai vua na gone. Dina ga ni tamata vuku qai rogo o Jisu, ia e dau solia nona gauna me vakavulici ira na gonelalai.​—Marika 10:13, 14.

O kila na vuna e dau vakavulici ira kina na gone qai dau  vakarogoci ira o Jisu? Baleta ni vinakata me vakamarautaki ira ena nona tukuna vei ira na veika me baleta na Kalou, na Tamana vakalomalagi. O rawa ni vakamarautaki ira vakacava na tamata?— Ni o tukuna vei ira na veika o sa vulica me baleta na Kalou.

Dua na gauna e vakayagataka o Jisu e dua na gonelailai me vakavulici ira kina na nona itokani ena dua na ivakavuvuli bibi. E kauta mai e dua na gone e matadratou na nona tisaipeli. Qai tukuna vei ira na uabula oya ni dodonu mera veisautaka na nodra ivalavala me vaka na gone lailai.

Na cava e vakaibalebaletaka o Jisu? O kila se rawa vakacava vua e uabula, se dua e qase cake me vaka na gonelailai?— E sega ni vakataki koya e uabula na gone, ni lailai na ka e kila qai taleitaka me vulica na ka. E vakaraitaka gona o Jisu ni dodonu mera yalomalumalumu na nona tisaipeli, me vakataki ira na gonelalai. Io, e levu sara na ka eda vulica vei ira tale e so. Meda kila tale ga ni ivakavuvuli i Jisu e uasivi cake mai na ka eda nanuma.​—Maciu 18:1-5.

E dua tale na vuna e Qasenivuli Levu kina o Jisu oya ni matai vinaka ni bulia na nona vosa me taleitaki. E rawarawa qai matata na ka e vakamacalataka. E vakayagataka na manumanu vuka, senikau, kei na veika e kilai levu ni vukei ira na tamata mera kila na Kalou.

Era lako mai vei Jisu e levu na tamata ni dabe toka ena yasa ni dua na ulunivanua. E qai vosa se vunau vei ira o Jisu,  me vaka o raica e ke. Nona vosa oya e vakatokai me nona Vunau ena Ulunivanua. A kaya: ‘Raici ira mada na manumanu vuka. Era sega ni teitei. Era sega ni kumuna na kedra kakana. Ia e vakani ira na Kalou ni lomalagi. Dou sega beka ni yaga cake vakalevu vei ira?’

E kaya tale ga o Jisu: ‘Dou vuli vei ira na viavia ni veikau. Era sega ni cakacakataka na nodra tubu. Ia raica mada na kedra totoka! Na isulusulu mada ga nei Tui vutuniyau o Solomoni e sega ni bau yacova na totoka ni kedra irairai na viavia ni veikau. Ke kauaitaka na Kalou na nodra bula na senikau, ena sega beka ni kauaitaki kemuni vakalevu cake?’​—Maciu 6:25-33.

O kila beka na ka e vakavuvulitaka tiko o Jisu?— E sega ni vinakata meda lomaleqataka na vanua eda na kauta mai kina na keda kakana se na noda isulu. E kila na Kalou nida gadreva na veika oya. E sega ni kaya o Jisu meda kua ni cakacakataka na keda kakana  se noda isulu. Ia e tukuna ga meda vakaliuca na Kalou. Ke da cakava oqori, ena raica na Kalou me tiko na keda kakana kei na isulu eda dara. O vakabauta na vosa oya?—

Na cava era kaya na tamata ni sa vosa oti o Jisu?— E kaya na iVolatabu nira kurabuitaka na nona veivakavulici. Era taleitaka na nodra rogoci koya. Na veika e kaya e vukei ira mera cakava na veika e dodonu.​—Maciu 7:28.

 E dodonu sara ga meda vuli vei Jisu. O kila se eda na vuli vakacava vua?— E volai tu ena dua na ivola na veika e vakavuvulitaka. O kila se ivola cava oya?— Na iVolatabu. E kena ibalebale oqo ni rawa meda vuli vei Jisu nida kauai ina veika eda wilika ena iVolatabu. E tiko ena iVolatabu e dua na italanoa totoka me baleta nona tukuna vei keda na Kalou meda vakarorogo vei Jisu. Meda raica mada se cava a yaco.

Dua na siga e kauti iratou e tolu na nona itokani ina dua na ulunivanua. Na yacadratou o Jemesa, Joni, kei Pita. Ena levu tale na ka eda vulica me baleti iratou, ni ratou itokani voleka i Jisu. Ia ena gauna mada ga oya e serau kina na mata i Jisu. Me vaka o raica e ke, e serau na nona isulu me vaka na rarama.

Oti oya, eratou qai rogoca e dua na vosa mai lomalagi o Jisu kei na nona itokani. E kaya: “Oqo na Luvequ daulomani, au sa dau vinakati koya vakalevu; dou vakarogoci koya.” (Maciu 17:1-5, VV) O kila se o cei e vosa mai oya?— Na Kalou! Io, e tukuna na Kalou me ratou vakarorogo vei Luvena.

Vakacava o keda nikua? Eda na talairawarawa beka vua na Kalou meda rogoci Luvena, na Qasenivuli Levu?— E dodonu meda rogoci koya kece. O se nanuma tiko se eda na rogoci koya vakacava?—

Io, e rawa meda rogoci koya na Luve ni Kalou nida wilika ena iVolatabu na itukutuku ni nona bula. E levu sara na veika totoka e tukuna vei keda na Qasenivuli Levu oqo. O na marau ni o vulica na veika oya ena iVolatabu. O na marau tale ga kevaka o tukuna vei ira na nomu itokani na veika vinaka o vulica.