MĨAKA makĩria ma ngiri igĩrĩ mĩhĩtũku, harĩ mwana wa mwanya mũno waciarirũo ũrĩa wacokire gũtuĩka mũndũ ũrĩa wa bata mũno wanatũũra gũkũ thĩ. Hĩndĩ ĩyo andũ matiarĩ na ndege kana ngaari. Gũtiarĩ na indo ta TV, redio, kana thimũ.

Mwana ũcio eetirũo Jesu. Aacokire agĩtuĩka mũndũ ũrĩa mũũgĩ mũno wanakorũo gũkũ thĩ. Ningĩ Jesu nĩ aatuĩkire mũrutani ũrĩa mwega biũ. Nĩ aahotaga gũtaarĩria maũndũ maritũ na njĩra hũthũ.

Jesu aarutaga andũ kũrĩa guothe amakora. Aamarutaga marĩ hakuhĩ na iria na marĩ tũtarũ-inĩ. Nĩ aarutaga andũ marĩ mĩciĩ-inĩ kwao na magĩthiĩ na njĩra. Jesu ndaarĩ na ngaari, na ndaathiaga na mbathi kana mũgithi. Aathiaga magũrũ kuuma itũũra rĩmwe nginya rĩrĩa rĩngĩ akĩrutanaga.

Nĩ twĩrutaga maũndũ maingĩ kuuma kũrĩ andũ arĩa angĩ. No tũngĩĩruta maũndũ marĩa ma bata makĩria kuuma kũrĩ Jesu, Mũrutani Ũrĩa Mũnene. Ciugo ciake ikoragwo ciandĩkĩtwo Bibilia-inĩ. Rĩrĩa twathoma ciugo icio thĩinĩ wa Bibilia, nĩ ta tũkoragwo tũgĩthikĩrĩria Jesu agĩtwarĩria.

Nĩ kĩĩ gĩatũmire Jesu akorũo arĩ Mũrutani Mũnene ũguo? Ũndũ ũmwe nĩ atĩ Jesu we mwene nĩ aarutĩtwo. Na nĩ oĩ atĩ gũthikĩrĩria nĩ ũndũ wa bata. No hihi Jesu aathikagĩrĩria ũ? Nũũ wamũrutĩte?— Aarutĩtwo nĩ Ithe. Na Ngai nĩwe Ithe.

Mbere ya Jesu gũũka gũkũ thĩ,  aatũũraga igũrũ marĩ na Ngai. Kwoguo-rĩ, Jesu aarĩ ngũrani na andũ arĩa angĩ tondũ gũtirĩ mũndũ ũngĩ ũrĩ watũũra igũrũ mbere ya gũciarũo gũkũ thĩ. Rĩrĩa Jesu aarĩ igũrũ, aarĩ Mwana mwathĩki, wathikagĩrĩria Ithe. Nĩkĩo Jesu aahotire kũruta andũ maũndũ marĩa eerutĩte kuuma kũrĩ Ngai. Ũngĩthikĩrĩria mami wanyu na baba wanyu no ũtuĩke ta Jesu.

Ũndũ ũngĩ watũmire Jesu akorũo arĩ Mũrutani Mũnene nĩ atĩ nĩ eendete andũ. Nĩ eendaga mũno gũteithia andũ merute ũhoro wa Ngai. Jesu eendete andũ agima o hamwe na ciana. Nacio ciana nĩ ciendete gũkorũo harĩ Jesu tondũ nĩ aaragia nacio na agacithikĩrĩria.

Harĩ mũthenya aciari amwe maatwarire twana twao kũrĩ Jesu. No arata ake meeciragia atĩ Mũrutani Ũrĩa Mũnene ndangĩona mahinda ma kwaria na twana. Kwoguo makĩmaingata. No Jesu oigire atĩa?— Oigire ũũ: “Rekei twana tũũke harĩ niĩ; mũtigatũgirie.” Ta rora, Jesu nĩ eendaga twana tũthiĩ harĩ we. Kwoguo o na gũtuĩka Jesu aarĩ mũndũ mũũgĩ mũno na wa bata, nĩ eethaga mahinda ma kũruta twana.—Mariko 10:13, 14.

 Wee nĩ ũĩ kĩrĩa gĩatũmaga Jesu arute ciana na acithikĩrĩrie? Ũndũ ũmwe nĩ atĩ nĩ eendaga gũcikenia na njĩra ya gũciĩra maũndũ megiĩ Ngai, Ithe ũrĩa ũrĩ igũrũ. Wee ũngĩka atĩa nĩguo andũ makene?— Ũndũ ũmwe ũngĩka nĩ kũmeera maũndũ marĩa wĩrutĩte megiĩ Ngai.

Hĩndĩ ĩmwe Jesu nĩ aahũthĩrire kaana kũruta arata Ake kaũndũ ka bata mũno. Oire kaana, agĩkarũgamia gatagatĩ-inĩ ka arutwo Ake. Agĩcoka akiuga atĩ andũ acio agima maagĩrĩirũo gũcenjia mwonere wao wa maũndũ ũhaane ta wa kaana kau.

Hihi Jesu eendaga kuonania atĩa rĩrĩa oigire ũguo? Wee nĩ ũĩ ũrĩa mũndũ mũgima kana mwana mũnene angĩhaana ta kaana kanini?— Kaana kanini gatikoragwo koĩ maũndũ maingĩ ta mũndũ mũgima na nĩ kendaga kwĩruta. Nĩ ũndũ ũcio, Jesu eendaga kuonania atĩ arutwo ake nĩ maabataraga kwĩnyihia o ta twana tũnini. Nĩ ma, ithuothe no twĩrute maũndũ maingĩ kuuma kũrĩ andũ arĩa angĩ. No nĩ twagĩrĩirũo kũmenya atĩ morutani ma Jesu nĩ ma bata gũkĩra maũndũ marĩa twĩciragia.—Mathayo 18:1-5.

Ũndũ ũngĩ watũmaga Jesu akorũo arĩ Mũrutani Mũnene nĩ atĩ aarutanaga na njĩra yagucagĩrĩria andũ. Aataaragĩria maũndũ na njĩra hũthũ. Nĩ aaragia ũhoro wa nyoni, mahũa, na indo ingĩ nĩguo ateithie andũ mahote kũnyita ũhoro wa Ngai.

 Mũthenya ũmwe rĩrĩa Jesu aarĩ kũndũ kĩrĩma-inĩ, andũ aingĩ nĩ maathire kũrĩ we. Nake Jesu agĩikara thĩ na akĩambĩrĩria kũmahe mĩario kana ũhoro, o ta ũrĩa ũrona haha mbica-inĩ. Mĩario ĩyo ĩtagwo Mahunjio ma Kĩrĩma-inĩ. Oigire ũũ: ‘Rorai nyoni cia rĩera-inĩ. Itihandaga mbegũ. Na itiigaga irio makũmbĩ. No Ngai wa igũrũ nĩ aciheaga gĩa kũrĩa. Githĩ inyuĩ mũtirĩ a bata gũcikĩra?’

Ningĩ Jesu nĩ oigire ũũ: ‘Mwĩrutei na mahũa ma gĩthaka. Makũraga matekwĩnogia. Na makoragwo marĩ mathaka mũno! O na Mũthamaki Suleimani ũrĩa warĩ mũtongu ndeehumbaga nguo thaka ta mahũa macio. Kwoguo angĩkorũo Ngai nĩ amenyagĩrĩra mahũa ma gĩthaka-rĩ, githĩ ndarĩmũmenyagĩrĩra o na inyuĩ?’—Mathayo 6:25-33.

Hihi nĩ wamenya kaũndũ karĩa Jesu eendaga kũrutana?— Ndeendaga twĩthĩnie mũno tũkĩyũria kũrĩa tũkũruta irio cia kũrĩa kana nguo cia kwĩhumba. Ngai nĩ oĩ atĩ nĩ tũbataraga indo icio ciothe.  Jesu ndoigire atĩ tũtiagĩrĩirũo kũruta wĩra tũgĩcaria irio na nguo. No oigire atĩ twagĩrĩirũo kũiga Ngai mbere. Tũngĩka ũguo-rĩ, Ngai nĩ arĩtũmaga tuone irio cia kũrĩa na nguo cia kwĩhumba. Wee nĩ wĩtĩkĩtie ũguo?—

Rĩrĩa Jesu aarĩkirie kwaria-rĩ, andũ meekire atĩa?—Bibilia yugaga atĩ nĩ maamakire mũno nĩ ũrĩa aarutanaga. Nĩ maakeneire mũno kũmũthikĩrĩria. Maũndũ marĩa oigire nĩ maateithirie andũ gwĩka ũrĩa kwagĩrĩire.—Mathayo 7:28.

 Kwoguo nĩ ũndũ wa bata mũno kwĩruta kuuma kũrĩ Jesu. Hihi nĩ ũĩ ũrĩa tũngĩka ũguo?— Nĩ harĩ ibuku rĩkoragwo na ciugo ciake. Nĩ ũĩ ibuku rĩu nĩ rĩrĩkũ?— Ibuku rĩu nĩ Bibilia. Ũguo nĩ kuuga atĩ no tũthikĩrĩrie Jesu tũngĩrũmĩrĩra maũndũ marĩa tũthomaga thĩinĩ wa Bibilia. Bibilia nĩ ĩkoragwo na rũgano rũmwe ruonanagia atĩ Ngai we mwene nĩ oigire tũthikagĩrĩrie Jesu. Reke tuone ũrĩa gwathiire.

Mũthenya ũmwe Jesu nĩ aathiire hamwe na arata ake atatũ handũ kĩrĩma igũrũ. Meetagwo Jakubu, Johana na Petero. Tondũ othe maarĩ arata a Jesu, nĩ tũrĩthoma ũhoro wao thutha-inĩ. Hĩndĩ ĩyo maarĩ kĩrĩma-inĩ, ũthiũ wa Jesu nĩ waambĩrĩirie kũruta ũtheri mũingĩ. Nacio nguo ciake ikĩhaana ũtheri ta ũrĩa ũrona haha mbica-inĩ.

Thutha ũcio Jesu na arata ake makĩigua mũgambo ũkiuma igũrũ. Woigire atĩrĩ: ‘Ũyũ nĩ Mũrũ wakwa, ũrĩa nyendete, na nĩ ndĩmwĩtĩkĩrĩte. Mũthikagĩrĩriei.’ (Mathayo 17:1-5) Nĩ ũĩ mũgambo ũcio warĩ wao?— Warĩ wa Ngai! Nĩ Ngai woigire atĩ nĩ maagĩrĩirũo gũthikĩrĩria Mũrũwe.

Ĩ ithuĩ ũmũthĩ? Hihi nĩ tũrĩathĩkagĩra Ngai na tũgathikĩrĩria Mũrũwe, Mũrutani Ũrĩa Mũnene?— Ũguo nĩguo ithuothe twagĩrĩirũo nĩ gwĩka. Hihi nĩ ũraririkana ũrĩa tũngĩka ũguo?—

No tũthikĩrĩrie Mũrũ wa Ngai na njĩra ya gũthoma ũhoro ũrĩa ũrĩ Bibilia-inĩ wĩgiĩ ũtũũro wake. Mũrutani Ũrĩa Mũnene akoragwo na maũndũ maingĩ mega mũno ma gũtwĩra. Nĩ ũgũkenera kwĩruta maũndũ macio marĩa marĩ thĩinĩ wa Bibilia. Ningĩ nĩ ũkũgĩa na gĩkeno makĩria ũngĩra arata aku maũndũ mega marĩa ũreruta.