1 تاراۋ
يسا ۇلى ۇستاز بولعان
ەكى مىڭنان استام جىل بۇرىن ٴبىر ەرەكشە بالا تۋىلعان ەدى. كەيىن ول دۇنيەدەگى ەڭ ۇلى ادام بولدى. سول زاماندا ەشكىمنىڭ ۇشاعى، ماشيناسى بولماعان، ادامدار ٴتىپتى تەلەديدار، كومپيۋتەر جانە ينتەرنەت دەگەندى بىلمەگەن.
اتا-اناسى بالاعا يسا دەپ ات قويدى. وسە كەلە ونىڭ دانالىعى كەز كەلگەن ادامنىڭ دانالىعىنان اسىپ ٴتۇستى. سونىمەن قاتار ول ەڭ جاقسى ۇستاز بولدى، ٵرى ادامدارعا قيىن نارسەلەردى وڭاي ەتىپ تۇسىندىرە الدى.
يسا ادامدارعا ٵرتۇرلى جەردە — تەڭىزدىڭ جاعاسىندا، قايىقتا، ۇيدە جانە جول-جونەكەي — ٴتالىم بەردى. ول ەل ارالاپ ٴجۇرىپ تە ٴتالىم بەردى. ماشينا، اۆتوبۋس، پويىز بولماعاندىقتان، يسا جاياۋ جۇرەتىن.
ٴبىز ادامداردان كوپ نارسەنى ٴبىلىپ جاتامىز. ٴبىراق ەڭ ماڭىزدى شىندىقتاردى ەڭ ۇلى ۇستازىمىز يسادان عانا بىلە الامىز. ال ونىڭ ايتقان سوزدەرى كيەلى كىتاپتا جازىلعان. سول سوزدەردى وقىعان كەزدە، بىزگە يسانىڭ ٶزى سويلەپ تۇرعانداي بولادى.
ال ەندى يسانىڭ نەگە ۇلى ۇستاز بولعانىن ٴتۇسىندىرىپ بەرەيىن. يسا دا كەزىندە بىرەۋدەن ٴتالىم العان. سوندىقتان ول بىرەۋ ۇيرەتىپ جاتقاندا، مۇقيات تىڭداۋ كەرەك ەكەنىن جاقسى بىلگەن. سوندا وعان كىم ٴتالىم بەرگەن؟ ول كىمدى تىڭداعان؟ ~ اكەسىن تىڭداعان. ال يسانىڭ اكەسى — قۇداي.
يسا جەرگە كەلمەس بۇرىن، اسپاندا قۇدايدىڭ قاسىندا ٶمىر سۇرگەن. باسقا ەشبىر ادام كوكتە ٶمىر سۇرمەگەن، سوندىقتان يسا ەرەكشە ادام بولعان. ول كوكتە اكەسىنىڭ ايتقانىن تىڭداپ، جاقسى ۇل بولا بىلگەن. جەرگە كەلگەندە، اكەسىنەن ەستىگەن-بىلگەندەرىن ادامدارعا ايتقان. سەن دە اكەڭ مەن اناڭدى تىڭداساڭ، يساعا ەلىكتەيسىڭ.
يسانىڭ ۇلى ۇستاز بولۋىنىڭ تاعى ٴبىر سەبەبى — ول ادامداردى جاقسى كورگەن. ولارعا قۇدايدى تانىپ-بىلۋگە كومەكتەسكەن. يسا بالالاردى دا جاقسى كورىپ، ولارمەن سويلەسەتىن جانە ولاردى مۇقيات تىڭدايتىن. بالالارعا دا يسانىڭ قاسىندا بولۋ ۇنايتىن.
نەگە بالالار يسانىڭ قاسىندا بولۋدى ۇناتاتىن؟
بىردە اتا-انالار بالالارىن يساعا الىپ كەلەدى. ٴبىراق ۇلى ۇستازدىڭ بالالارمەن سويلەسۋگە ۋاقىتى جوق دەپ ويلاپ، دوستارى بالالاردى ۇيلەرىنە قايتارعىسى كەلەدى. سوندا يسا ولارعا نە دەگەنىن بىلەسىڭ بە؟ ~ ول بىلاي دەدى: «بالالاردىڭ ماعان كەلۋىنە جول بەرىڭدەر، ولارعا كەدەرگى جاساماڭدار». كوردىڭ بە، يسا بالالاردىڭ وزىنە كەلگەنىن قالاعان ەكەن. ول بارىنەن دانا بولسا دا، ماڭىزدى ىستەرمەن اينالىسىپ جۇرسە دە، كىشكەنتايلارعا ٴتالىم بەرۋ ٷشىن ۋاقىت بولگەن (مارقا 10:13، 14).
يسا نەگە بالالارعا ٴتالىم بەرىپ، ولاردى مۇقيات تىڭدادى؟ سەبەبى ول بالالاردىڭ قۇداي تۋرالى بىلگەنىن ٵرى باقىتتى بولعانىن قالادى. ادامداردى باقىتتى ەتۋ ٷشىن سەن نە ىستەي الاسىڭ؟ ~ ولارعا قۇداي تۋرالى بىلگەندەرىڭدى ايتساڭ بولادى.
بىردە يسا دوستارىنا ماڭىزدى ساباق بەرگىسى كەلىپ، قاستارىنا كىشكەنتاي بالانى شاقىردى. ونى شاكىرتتەرىنىڭ ورتاسىنا تۇرعىزدى. سوسىن، يسا وسى ۇلكەن كىسىلەرگە وي قالىپتارىن وزگەرتىپ، كىشكەنتاي بالا سياقتى بولۋ كەرەكتىگىن ايتتى.
ۇلكەن كىسىلەر مەن جاسوسپىرىمدەر كىشكەنتايلاردان نە نارسەگە ۇيرەنە الادى؟
يسا نەگە بۇلاي دەدى ەكەن؟ ۇلكەن كىسىلەر مەن جاسوسپىرىمدەر قالايشا كىشكەنتاي بالا سياقتى بولا الادى؟ ~ كىشكەنتايلار ۇلكەندەرگە قاراعاندا كوپ بىلمەيدى، سوندىقتان ولار ۇيرەنۋگە دايىن. دەمەك، يسا شاكىرتتەرىنە كىشكەنتايلار سياقتى كىشىپەيىل بولۋ قاجەت ەكەنىن تۇسىندىرگىسى كەلدى. شىنىندا دا، باسقالاردان ۇيرەنەتىن نارسە كوپ. ولاي بولسا، ٶزىم بىلەمىن دەمەي، يساعا قۇلاق اسۋىمىز كەرەك. ويتكەنى ول وتە ماڭىزدى نارسەلەردى ايتقان (ماتاي 18:1—5).
يسانىڭ ۇلى ۇستاز بولۋىنىڭ كەلەسى ٴبىر سەبەبى — ادامدار قىزىعىپ تىڭداۋ ٷشىن قالاي ٴتۇسىندىرۋ كەرەك ەكەنىن بىلگەن. مىسالى، يسا قيىن ويلاردى قاراپايىم ٵرى وڭاي جولمەن تۇسىندىرگەن. قۇستار مەن گۇلدەر سياقتى كۇندە كورىپ جۇرگەن نارسەلەردى قولدانىپ، ادامدارعا قۇدايدى جاقسىراق تانۋعا كومەكتەسكەن.
ٴبىر كۇنى يسا تاۋدىڭ بوكتەرىندە وتىرعاندا، قاسىنا كوپ ادام جينالادى. سوندا يسا ولارعا ۋاعىز ايتادى. كيەلى كىتاپتا ول تاۋداعى ۋاعىز دەپ اتالادى. مۇنى سەن سۋرەتتەن كورىپ تۇرسىڭ. يسا جينالعاندارعا بىلاي دەدى: «اسپانداعى قۇستارعا قاراڭدارشى. ولار ەگىن ەكپەيدى. قامباعا ٴدان جينامايدى. ايتسە دە كوكتەگى قۇداي ولاردى اسىرايدى. ال سەندەر ولاردان الدەقايدا ارتىق ەمەسسىڭدەر مە؟»
يسا قۇستار مەن گۇلدەر جايلى ايتقاندا، ادامدارعا نە ۇيرەتكىسى كەلدى؟
يسا ولارعا تاعى بىلاي دەدى: «دالادا وسەتىن گۇلدەن ساباق الىڭدار. ولار ەڭبەك ەتپەيدى. سوندا دا ولار قانداي ادەمى، قاراڭدارشى! ٴتىپتى سۇلەيمەن پاتشانىڭ ٶزى دە سولار سياقتى ادەمى كيىنبەگەن. ەگەر قۇداي گۇلدەردى وسىلاي كيىندىرسە، سەندەردى دە كيىندىرمەي مە؟» (ماتاي 6:25—33).
يسا وسىنداي مىسالدارمەن قانداي ساباق بەرگىسى كەلگەنىن ٴتۇسىندىڭ بە؟ ~ ول ٴبىزدىڭ نە جەيمىز، نە كيەمىز دەپ ۋايىمداعانىمىزدى قالامايدى. ويتكەنى قۇداي بىزگە نە قاجەت ەكەنىن جاقسى بىلەدى. الايدا يسا ەڭبەك ەتپەۋ كەرەك دەگەن جوق. ونىڭ ايتقىسى كەلگەنى — ەڭبەك ەتە ٴجۇرىپ، ومىرىمىزدە قۇدايدى باستى ورىنعا قويۋىمىز كەرەك. سوندا قۇداي بىزگە ىشەتىن اس تا، كيەتىن كيىم دە بەرەدى. سەن وسىعان سەنەسىڭ بە؟ ~
يسانىڭ سوزدەرى تىڭداۋشىلارىنا قالاي اسەر ەتتى؟ ~ كيەلى كىتاپتا: «جۇرت ونىڭ تالىمىنە قايران قالدى»،— دەلىنگەن. دەمەك، ادامدار يسانى قىزىعىپ تىڭداعان، ٵرى ونىڭ ايتقاندارى دۇرىس نارسە ىستەۋگە كومەكتەسكەن (ماتاي 7:28).
ولاي بولسا، يسانى تىڭداۋ وتە ماڭىزدى ەكەن. بۇگىندە يسانى قالاي تىڭداۋعا بولاتىنىن سەن بىلەسىڭ بە؟ ~ بىزدە يسانىڭ سوزدەرى جازىلعان كىتاپ بار. بۇل قانداي كىتاپ دەپ ويلايسىڭ؟ ~ ٴيا، ول — كيەلى كىتاپ. ونى دەن قويىپ وقىساق، يسانىڭ بىزگە ايتقان سوزدەرىن تىڭدايمىز. بىلەسىڭ بە، قۇدايدىڭ ٶزى بىزگە يسانى تىڭداڭدار دەگەن. كيەلى كىتاپتا وسى جايلى ٴبىر وقيعا جازىلعان. كەل، سونى قاراستىرايىق.
ٴبىر كۇنى يسا ٷش دوسىن ەرتىپ، بيىك تاۋعا كوتەرىلەدى. ولاردىڭ ەسىمدەرى — جاقىپ، جوحان جانە پەتىر. كەيىنىرەك وسى ادامدار تۋرالى كوبىرەك بىلەسىڭ، ويتكەنى ولار يسانىڭ جاقىن دوستارى. ال بۇل جولى ولار ٴبىر عاجايىپ جايتتىڭ كۋاسى بولدى. ولاردىڭ كوز الدىندا يسانىڭ بەت-الپەتى كۇن سياقتى ساۋلە شاشىپ، كيىمى دە جارقىراپ كەتتى. مۇنى سۋرەتتەن كورىپ تۇرعان شىعارسىڭ.
«بۇل — مەنىڭ سۇيىكتى ۇلىم... ونى تىڭداڭدار!»
كەنەت، يسا مەن ونىڭ دوستارى كوكتەن: «بۇل — مەنىڭ سۇيىكتى ۇلىم. مەن وعان ريزامىن! ونى تىڭداڭدار!»— دەگەن داۋىستى ەستيدى (ماتاي 17:1—5). سەنىڭشە، بۇل كىمنىڭ داۋسى؟ ~ ٴيا، بۇل — قۇدايدىڭ داۋسى! شاكىرتتەر قۇداي ۇلىن تىڭداۋ كەرەك ەدى.
ال ٴبىز شە؟ قۇدايدىڭ جانە ونىڭ ۇلىنىڭ ٴسوزىن تىڭداۋىمىز كەرەك پە؟ ~ ارينە، تىڭداۋىمىز كەرەك. ال مۇنى قالاي ىستەۋگە بولاتىنى ەسىڭدە مە؟ ~
دۇرىس، قۇدايدىڭ ۇلىن تىڭداۋ ٷشىن، كيەلى كىتاپتا جازىلعان ونىڭ ٶمىرى جايلى وقۋ كەرەك. ۇلى ۇستازىمىز كوپتەگەن كەرەمەت نارسەلەردى ايتىپ كەتكەن. سولاردى وقىپ ٴبىلۋ ساعان قىزىقتى بولادى. ال ٴبىلىپ العان سوڭ، ونى دوستارىڭا ايتىپ بەرسەڭ، زور قۋانىشقا كەنەلەسىڭ.
يسانى تىڭداۋدىڭ تاعى قانداي پايداسى بارىن ٴبىلۋ ٷشىن، كيەلى كىتابىڭدى اشىپ، جوحان 3:16؛ 8:28—30 جانە ەلشىلەردىڭ ىستەرى 4:12 وقى.
