EMYAKA eyilhabire omwa nkumi ibiri eyihwere, omwana w’embaghane mwabuthwa oyuwakulha eribya omundu mukulhu oyuwabirithabyaho. Omwa buthuku obo, abandu sibabya bawithe esyondenge kutse esyomatoka. Sihabya ebindu ng’esyotivi, esyoradio n’esyosimu.

Omwana mwahulhwa mwa Yesu. Mwabya mundu w’amenge manene oyuwabirithabyaho okwa kihugho. Kandi Yesu mwabya mukangirirya mubuya. Iniakasoborera emyatsi eyikalha-kalire omwa mibere eyangaleka ikyalhoba eriyitheghereryayo.

Yesu mwakangirirya abandu ahosi-hosi ah’ababana. Mwabakangirirya ibane okwa musike w’engetse kandi ibane omw’obwathu. Mwabakangirirya omwa miyi yabu n’omwa nzira akaghenda. Yesu syabya withe ematoka, kandi mwathakolesya ebbasi kutse egali y’omuki. Yesu iniakalyatha erilhua omwa kitsweka kighuma erighenda omwa kindi, akakangirirya abandu.

Ebindu binene thukabighira okw’abandi bandu. Aliriryo thwangan’ighira okwa Mukangirirya Mukulhu, Yesu, kw’ebindu eby’omughaso munene. Ebinywe bya Yesu thukabibana omwa Biblia. Thukabya thukahulikirira ebinywe ebyo erilhua omwa Biblia, Yesu akabya ng’akakanaya nethu.

Ekyaleka Yesu iniabya Mukangirirya Mukulhu athya niki? Enzumwa y’erimbere yiri yithi Yesu iyuwene-wene asangawa iniabirikangiriribwa. Kandi abya inianasi omughaso w’erihulikirira. Aliriryo Yesu mwahulikirira ndi? Oyuwamukangiriraya nindi?— Thatha wiwe yuwamukangiriraya. Thatha wa Yesu ni Nyamuhanga.

 Abere athe abuthwa okwa kihugho ng’omundu, Yesu abya ikere elhubulha na Nyamuhanga. Busana n’ekyo abya wambaghane okw’abandi bandu kusangwa sihali owundi omundu oyuwabya ikere elhubulha athe abuthwa okwa kihugho. Iniane elhubulha, Yesu abya Mwana mubuya, oyuwabya akahulikirira Thatha wiwe. Busana n’ekyo, Yesu mwathoka erikangirirya abandu ebya ighira oku Nyamuhanga. Wangana gherererya Yesu wamahulikirira thatha wawu na mama wawu.

Eyindi nzumwa eyaleka Yesu iniabya Mukangirirya Mukulhu yiri yithi abya anzire abandu. Abya anzire eriwathikya abandu eriminya Nyamuhanga. Abya anzire abakulhu n’abalere. N’abaana babya banzire eribya na Yesu kundi abya akakania nabu n’eribahulikirira.

Kiro kighuma ababuthi balebe mubalethera Yesu y’abaana babu. Aliriryo, banywani biwe mubalengekania bathi Omukangirirya Mukulhu syawithe obuthuku obw’erikania n’abaana balere. Busana n’ekyo, mubabakakirya. Aliriryo Yesu mwabugha athiki?— Yesu mwabugha athi: ‘Muleke abaana balere base okw’ingye, simukakirayebo.’ Yesu mwanza abaana balere base eyali. Nomwakine indi  abya mundu w’amenge manene kandi iniawithe ekitsumbi, mwaghunza obuthuku iniane mukangirirya abaana balere.—Mariko 10:13, 14.

Wunasi ekyaleka Yesu iniakangirirya abaana n’eribahulikirira? Enzumwa yiri yithi mwanza batseme omw’ibabwira emyatsi eyihambire oku Nyamuhanga, Thatha wiwe ow’elhubulha. Wanga tsemesya wuthi abandu?— Omw’ibabwira emyatsi eya wabirigha oku Nyamuhanga.

Kiro kighuma, Yesu mwakolesya omwana mulere akakangirirya banywani Biwe b’erisomo ly’omughaso. Mwimya omwana neryo amamwimania omwakathi-kathi k’abigha Biwe. Neryo Yesu mwabugha athi abalhume abakulire aba batholere ibabindulha emibere yabu n’eribya ng’omwana mulere oyu.

Yesu amanyisaya ki akabugha ekyo? Wunasi ngoku omundu oyukulire, kutse omwana oyuwamabiri kulha, ngoku angabya ng’omwana mulere?— Omwana mulere syasi ebingene n’ebyo omundu mukulhu asi kandi akabya iniananzire erigha. Kwesi Yesu amanyisaya athi abigha biwe batholere ibayikehya ng’abaana balere. Kwenene, thwangan’ighira okw’abandi bandu kw’emyatsi mingyi. Kandi ithwe abosi thutholere ithwaminya ngoku ebya Yesu akangiriraya ni by’omughaso munene kwilhaba amalengekania wethu.—Matayo 18:1-5.

Eyindi nzumwa eyaleka Yesu iniabya Mukangirirya Mukulhu athya yiri yithi abya akakangirirya abandu omwa nzira eyikaleka ibanza ebya bak’igha. Iniakasoborera ebindu omwa nzira eyolhobire, n’eyilhangirikire. Mwakania okwa binyonyi, ebimole n’ebindu ebya buli kiro eriwathikya abandu baminye Nyamuhanga.

 Kiro kighuma, Yesu abere ane okwa kithwe, abandu bangyi mubasa eyali. Yesu mw’ikalha n’eritsuka erikaniryabo, ngoku wamalhangira omwa kisasani eki. Omukania ono akahulhawa mw’Omukania w’Okwa Kithwe. Mwabugha athi: ‘Musamalire esyonyonyi sy’omwakyanya. Sisyebiba. Sisyebika ebyalya by’omwa bighona. Nikwa Nyamuhanga oyuli elhubulha akalisayasyo. Nenyu simuli b’obughuli bunene kwilhabasyo kwehi?’

Kandi Yesu mwabugha athi: ‘Mulebaye ebiranga-ranga by’omoli ngoku bikalhasa. Bikakulha ahathe erikolha. Kandi mulebaye ngoku byuwenenga! Nibya n’Omwami Solomono omughuda mwathambalha ndeke ng’ebiranga-ranga eby’omoli ebi. Neryo Nyamuhanga amabya iniakatsomana ebimole ebikakulha, mbwino nenyu syendi batsomana?’—Matayo 6:25-33.

N’isomo lyahi erya Yesu akangiriraya?— Syabya anzire thukayilhalikirira ngoku thwangabana eby’erirya kutse eby’eryambalha. Nyamuhanga  anasi ngoku thukayithagha ebyosi ebi. Yesu mwatha bugha athi thuleke erikolha busana n’erisondya ebyalya n’esyongyimba. Aliriryo mwabugha athi thuhire Nyamuhanga y’embere. Thwamakolha ekyo, Nyamuhanga iniakendi lhangira athi thukabana eby’erirya n’eby’eryambalha. Wun’ikirirya ekyo?—

Yesu abere akaghunza erikania, abandu mubalengekania bathiki?— E Biblia yikabugha yithi endeko muyasweka busana n’erikangirirya liwe. Kyabya kikatsemesya erimuhulikirira. Ebya akanaya mubya wathikya abandu erikolha ekitholere.—Matayo 7:28.

 Busana n’ekyo, ni kikulhu kutsibu erighira oku Yesu. Thwanga kolha ekyo kya thuthi?— Erithoka erikolha ekyo, thuwithe ekitabu ekihandikire mw’ebya abugha. Ekitabu ekyo ni kyahi?— Ye Biblia Eyibuyirire. Eki kikamanyisaya kithi thwangana hulikirira Yesu omw’isoma emyatsi eyiri omwa Biblia. Erithwalira haghuma, omwa Biblia muli omwatsi owakatsemesaya owakakanganaya ngoku Nyamuhanga iyuwene-wene akathubwira athi thuhulikirire Yesu. Thulebaye ekyabya.

Kiro kighuma, Yesu mwathwalha abasathu b’okw’abanywani biwe okwa kithwe kiri-kiri. Babya, Yakobo, Yoane, na Petero. Thukendi sy’igha bingyi ebihambire okw’abalhume aba embere, kundi abosi basathu babya banywani ba Yesu ab’okwa ndungu. Aliriryo okwa kiro ky’embaghane eki, obusu bwa Yesu mubwatsuka erikangabasania. N’esyongyimba siwe musyabya nyeru-nyeru ng’ekyakakalha, ngoku wamalhangira hano.

Enyuma waho, Yesu n’abanywani biwe mubowa omulenge akalhua elhubulha. Athi: ‘Oyu ni Mughalha waghe mwanze, namamutsemera ndeke; mumwowe.’ (Matayo 17:1-5) Omulenge oyu abya wandi?— Abya mulenge wa Nyamuhanga! Ee, Nyamuhanga yuwabugha athi bahulikirire omulenge wa Mughalha wiwe.

Kandi ibbwa ithwe munabwire? Thune mwendi owa Nyamuhanga n’erihulikirira Mughalha wiwe, Omukangirirya Mukulhu?— Ithwe abosi ekyo kya thutholere ithwakolha. Wukinibukire ngoku thwanga kolha eki?—

Ee, thwangana hulikirira Mughalha wa Nyamuhanga omw’isoma emyatsi eyiri omwa Biblia eyihambire okwa ngebe yiwe. Hali ebindu bingyi ebikatsemesaya ebyo Omukangirirya Mukulhu anzire erithubwira. Wukendi tsema wukigha emyatsi eyiri omwa Biblia eyi. Kandi kikendi kutsemesya wamabwira banywani bawu ebindu bibuya ebya wuk’igha.