KUKADI kupite bidimu binunu bibidi ne bia pa mutu, muana mukuabu wa wende mushindu wakaledibua, kukolaye ne pashishe kuluaye muntu mutambe bunene wa katshia ne katshia. Kakuvua muntu nansha umue tshikondo atshi uvua ne ndeke nansha mashinyi a kuendela to. Kakuvua bintu bu mudi televizion anyi tshiamu tshia ordinatere ne kakuvua Internet to.

Bakinyika muana au dîna ne: Yezu. Wakalua muntu wa meji a dikema kupita bantu bonso badi pa buloba. Yezu wakalua kabidi mulongeshi muimpe mutambe. Uvua mua kumvuija malu etu a makole aa mu mushindu uvua bantu mua kuumvua kakuyi lutatu.

Yezu uvua ulongesha bantu muaba wonso uvuaye ubasangana. Wakabalongeshila ku muelelu kua mâyi ne mu mâtu a balobi. Wakabalongeshila ku nzubu yabu ne pavuaye mu luendu. Yezu kavua ne mashinyi to, kavua nansha wendela mu bise anyi mu kawulu to. Yezu uvua wenda ku makasa umbuka eku uya kuaka, wenda ulongesha bantu.

Tutu tulongela malu a bungi kudi bantu bakuabu. Kadi malu a mushinga mukole tudi mua kualongela kudi Yezu, Mulongeshi Munene. Mêyi a Yezu adi mu Bible. Patudi tubala mêyi au mu Bible, bidi bienza anu bu se: Yezu uvua utuambilawu tuetu.

Bua tshinyi Yezu uvua Mulongeshi Munene nanku? Bualu yeye pende bavua bamulongeshe. Uvua mumanye kabidi ne: kuteleja kudi ne mushinga wa bungi. Kadi Yezu wakateleja nganyi? Uvua mumulongeshe nnganyi?​— Tatuende ke uvua mumulongeshe. Nzambi ke Tatuende wa Yezu.

Bangabanga ne kuluaye panu pa buloba bu muntu, Yezu uvua musombele mu diulu pamue ne Nzambi. Nunku Yezu uvua mushilangane bikole ne bantu bakuabu bualu kakuena muntu mukuabu nansha umue  uvua musombele mu diulu bangabanga ne kuledibuaye pa buloba apa to. Mu diulu Yezu uvua Muana wa butumike, muana uvua uteleja Tatuende. Nunku Yezu uvua mumanye mua kulongesha bantu malu avua Nzambi mumulongeshe. Wewe muikale uteleja tatuebe ne mamuebe, bushuwa newidikije Yezu.

Yezu uvua kabidi Mulongeshi Munene bualu uvua munange bantu. Uvua musue kuambuluisha bantu bua bamanye Nzambi. Yezu uvua munange bantu bakulumpe, kadi uvua munange kabidi bana batekete. Bana bavua basue kuikala muaba uvua Yezu bualu uvua mua kubayikidila tu-malu ne kubateleja.

Dimue dituku baledi bakalua ne bana babu kudi Yezu. Kadi balunda ba Yezu bavua bela meji ne: Mulongeshi Munene eu kavua ne dîba dia kuyikila ne bana batekete to. Nunku bakambila baledi ba bana ne bana babu bine bua bumuke muaba au. Kadi Yezu wakamba tshinyi?​— Yezu wakamba ne: “Lekelayi bana batekete balue kundi, kanubakandiki to.” Bushuwa, Yezu uvua musue bua bana batekete balue kudiye. Nunku nansha muvuaye muntu munene wa meji a bungi, Yezu wakakeba dîba dia kulongesha bana batekete.​—Mâko 10:13, 14, Mukanda wa Mvidi Mukulu [Katolike, MMM].

 Udi mumanye bua tshinyi Yezu uvua ulongesha bana ne ubateleja anyi? Bualu uvua musue kubasankisha pa kubalondela malu adi atangila Tatuende wa mu diulu Nzambi. Kadi mmunyi muudi wewe pebe mua kusankisha bantu?​— Mpa kubalondela malu a Nzambi audi mulonge.

Musangu mukuabu, Yezu wakangata muana mutekete bua kulongesha balunda Bende bualu bukuabu bua mushinga. Wakangata muana, kumuimanyikaye munkatshi mua bayidi Bende. Pashishe Yezu wakamba ne: bantu bakulumpe aba bavua ne bua kushintulula ngikadilu yabu ne kulua bu muana mutekete uvuaye muimanyike munkatshi muabu au.

Yezu uvua musue kumvuija tshinyi pakambaye bualu abu? Udi mumanye mushindu udi muntu mukulumpe ta muana ukadi mutantamane mua kulua bu muana mutekete anyi?​— Muana mutekete ki mmumanye malu a bungi bu muntu mukulumpe ne kabidi mmusue kulonga. Nanku Yezu uvua uleja ne: bayidi bende badi ne bua kudipuekesha, anu bu mutu bana batekete badipuekesha. Bushuwa, tuetu bonso tudi mua kulongela malu a bungi kudi bantu bakuabu. Kabidi tuetu bonso mbimpe tumanye ne: malu adi Yezu ulongesha adi ne mushinga wa bungi kupita ngenyi yetu nkayetu.​—Matayo 18:1-5.

Bualu bukuabu buvua buenze ne: Yezu ikale Mulongeshi Munene mbuobu ebu: Yezu uvua mumanye mua kuamba malu avua asankisha bantu. Uvua umvuija malu mu mushindu mupepele, mutokesha bimpe menemene. Wakakula bua nyunyi ne bilongo ne bintu bikuabu bivua bantu bamanye bimpe bua kubambuluisha bua bafike ku diumvua bilenga malu adi atangila Nzambi.

Dimue dituku pavua Yezu ku mukuna kampanda, bantu ba bungi bakalua kudiye. Yezu wakasomba panshi e kuelaye muyuki  anu muudi ubimona mu tshimfuanyi etshi. Muyuki wakenzaye eu badi baubikila ne: Muyuki wa pa Mukuna. Yezu wakamba ne: ‘Tangilayi nyunyi idi ibuka mulu. Kayitu ikuna bintu. Kayitu ilama biakudia mu nzubu. Kadi Nzambi udi mu diulu utu uyidisha. Nuenu kanuena bayipite anyi?’

Yezu wakamba kabidi ne: ‘Monayi bilongo bia mu mpata. Bidi bikola kabiyi bienza mudimu to. Kadi monayi mudibi bilengele! Nansha Mukalenge Solomo muntu wa bubanji kakavuala bilamba bilengele bu mudi bilongo bia mu mpata to. Nunku bikala Nzambi uvuadika bilongo bidi bikola, kêna mua kunuvuadikaku penu anyi?’​—Matayo 6:25-33.

Udi mumvue tshidi bualu buvua Yezu ulongesha ebu bumvuija anyi?​— Yezu kavua musue bua tuetu kuikala tuela anu kuela meji bua kutudi mua kupeta biakudia anyi bilamba bia kuvuala to. Nzambi mmumanye ne: tudi dijinga ne bintu bionso abi. Yezu kavua muambe ne: katuena ne bua kuenza mudimu bua kupeta biakudia ne bilamba bia kuvuala to. Kadi wakamba ne: Nzambi ke utudi ne bua kuteka kumpala kua bionso. Tuetu  bateke Nzambi kumpala, bushuwa neenze bua ne: dîba dionso tuikale anu ne biakudia, kabidi ne bilamba bia kuvuala. Udi witaba bualu ebu anyi?​—

Pakajikija Yezu kuakula, ntshinyi tshiakenza bantu?​— Bible udi wamba ne: bantu bakakema bikole bua mushindu uvuaye ulongesha. Bivua bienza disanka dia bungi bua kumuteleja. Malu akambaye akambuluisha bantu bua kuenza malu mimpe.​—Matayo 7:28.

Nunku bidi ne mushinga wa bungi bua tuetu kulongela malu kudi Yezu. Udi mumanye tshidi tshikengela kuenza bua kulongela malu kudi  Yezu anyi?​— Malu ende mmafunda mu mukanda mukuabu nunku. Udi mumanye mukanda au anyi?​— Mukanda au m’Bible mukanda Munsantu. Mbuena kuamba ne: bua kuteleja bidi Yezu ulongesha tudi ne bua kuteya ntema ku malu atudi tubala mu Bible. Bushuwa, mu Bible mudi bualu bukuabu budi bukemesha budi buleja mushindu udi Nzambi nkayende utuambila bua ne: bidi bikengela kuteleja Yezu. Tuanji kumonayi tshiakenzeka.

Dituku dikuabu Yezu wakaya ne balunda bende basatu kuulu kua munga mukuna. Mêna a balunda bende basatu abu nguowu aa: Yakobo, Yone ne Petelo. Netumanye pashishe malu makuabu a bungi adi atangila bantu aba, bualu bonso basatu bavua balunda ba Yezu ba menemene. Kadi dituku dine adi mpala wa Yezu wakatuadija kuengelela ubalakana bikole. Bilamba biende biakatoka too kutuadija kukenka anu bu muinda, anu muudi umona mu tshimfuanyi etshi.

Pashishe, Yezu ne balunda bende aba bakumvua dîyi difumina mu diulu. Dîyi adi diakamba ne: “Ewu ke Muananyi musuibue undi mupite kunanga, numuteleje.” (Matayo 17:1-5, MMM) Dîyi adi divua dia nganyi?​— Divua dîyi dia Nzambi! Bulelela, Nzambi ke wakabambila ne: bavua ne bua kuteleja Muanende Yezu.

Tudi mua kuamba tshinyi buetu tuetu lelu? Netutumikile Nzambi ne kabidi netuteleje Muanende udi Mulongeshi Munene eu anyi?​— Ke bualu butudi bonso ne bua kuenza. Udi muvuluke mutudi mua kuenza bualu ebu anyi?​—

Eyowa, tudi mua kuteleja Yezu Muana wa Nzambi pa kubala malu adibu bafunde mu Bible adi atangila nsombelu wende. Kadi ki nkujike to, kutshidi malu makuabu mimpe a dikema adi Mulongeshi Munene eu mua kutulongesha. Nebikuenze disanka bua kulonga malu aa adibu bafunde mu Bible. Nunku nebikusankishe kabidi bikole wewe muikale pebe ulondela balunda bebe malu malenga audi ulonga.