OKWIHA obu omwana ow’omutaano yaazaarwa, akakura kandi akaba omwegyesa mukuru okukira abandi boona abaraabaireho, hahingwireho emyaka erikurenga enkumu ibiri. Omu bwire bwa ira, abantu bakaba bataine nyonyi nari emotoka. Hakaba hatariho zaatiivi, kompyuta nari zaaradiyo.

Omwana ogwo akeetwa eiziina Yesu. Akaba omushaija omunyabwengye okukira abantu abandi boona abaraabaireho omu nsi. Kandi Yesu akaba omwegyesa murungi munonga. Akaba ashoboorora ebintu bigumire omu muringo gworobi kugira ngu abantu babyetegyereze.

Yesu akaba ayegyesa abantu omu myanya yoona ei yaabaire abashangamu. Akaba abeegyeseza aha nkungu z’enyanja n’omu maato. Akaba abeegyeseza omu maka gaabo kandi ari n’aha rugyendo. Yesu akaba ataine motoka kandi akaba atagyendera mu baasi nari egaari y’omwika. Akaba agyenda omu myanya mingi, arikwegyesa abantu.

Nitwega ebintu bingi kuruga aha bantu abandi. Kwonka nitubaasa kwegyera ahari Yesu Omwegyesa Mukuru ebintu ebirikukirayo obukuru. Omuri Baibuli nimwo turikushanga ebigambo bya Yesu. Twashoma ebigambo ebyo kuruga omu Baibuli, Yesu naaba ari nk’orikugamba naitwe.

Ahabw’enki Yesu yaabaire ari Omwegyesa Mukuru? Enshonga y’okubanza n’ahabw’okugira ngu nawe akeegyesibwa. Kandi akaba naamanya obukuru bw’okuhurikiza gye. Kwonka shi Yesu akaba ahurikiza oha? N’oha owaamwegyeise?— Ishe niwe yaamwegyeise. Kandi Ishe Yesu ni Ruhanga.

Atakaizire omu nsi nk’omuntu, Yesu akaba naatuura omu iguru na  Ruhanga. N’ahabw’ekyo Yesu akaba ari ow’omutaano aha bantu abandi ahabw’okuba tihariho muntu ondiijo owaabandize kutuura omu iguru reero akaija akazaarwa omu nsi. Omu iguru Yesu akaba ari Omwana murungi arikuhurira Ishe. N’ahabw’ekyo Yesu nikyo yaabaasiize kwegyesa abantu ebi yaabaire ayegire ahari Ruhanga. Waaba noyorobera sho na nyoko nooba nootooreza Yesu.

Enshonga endiijo ahabw’enki Yesu yaabaire ari Omwegyesa Mukuru n’ahabw’okugira ngu akaba naakunda abantu. Akaba naayenda kuhwera abantu kwega ebirikukwata ahari Ruhanga. Yesu akaba atarikukunda bantu bakuru bonka beitu akaba naakunda n’abato. Kandi abaana bakaba nibakunda kuba na Yesu ahabw’okuba akaba agamba nabo kandi abahurikiza.

Eizooba rimwe abazaire bamwe bakareetera Yesu abaana baabo abato. Kwonka banywani be bakateekateeka ngu Omwegyesa Mukuru akaba ataine bwire bw’okugaaniira n’abaana. N’ahabw’ekyo banywani ba Yesu bakabinga abazaire n’abaana baabo. Kwonka niki eki Yesu yaabagambiire?— Akagira ati: “Murekye abaana bato baije ahariinye, mutabazibira.” Buzima Yesu akaba naayenda ngu  abaana bato bamwijeho. Yesu n’obu araabe yaabaire ari omushaija w’obwengye bwingi kandi w’ekitiinisa, akatwara obwire kwegyesa abaana bato.​—Mako 10:13, 14.

Noomanya ahabw’enki Yesu yaayegyeise abaana kandi akabahurikiza? Enshonga y’okubanza n’ahabw’okugira ngu akaba naayenda ngu bashemererwe ahabw’okubagambira ebirikukwata ahari Ruhanga, Ishe ow’omu iguru. Noobaasa kureetera ota abantu kushemererwa?— Orikubagambira ebi oyegire ebirikukwata ahari Ruhanga.

Eizooba rimwe, Yesu akakoresa omwana muto kwegyesa banywani Be ekintu kikuru. Akatwara omwana yaamwemereza ahagati y’abeegi Be. Yesu akagira ngu abashaija bakuru abo bakaba baine kuhindura aha mitwarize yaabo bakaba nk’omwana ogwo omuto.

Yesu akaba naamanyisa ki obu yaagamba ekyo? Mbwenu noomanya oku omuntu mukuru nari omwana okuzire ashemereire kuba nk’omwana muto?— Omwana muto naaba atarikumanya bingi nk’ebi omuntu mukuru arikuba naamanya kandi naaba naayenda kwega. N’ahabw’ekyo Yesu akaba naamanyisa ngu abeegi be baine kuba abacureezi nk’abaana bato. Buzima, twena nitubaasa kwega ebintu bingi kuruga aha bantu abandi. Twena tushemereire kumanya ngu ebi Yesu yaayegyeise nibikira ebiteekateeko byaitu.—Matayo 18:1-5.

Enshonga endiijo ahabw’enki Yesu yaabaire ari Omwegyesa Mukuru, n’ahabw’okugira ngu akaba naamanya kureetera abantu kukunda ebi yaabaire naabeegyesa. Akaba naashoboorora ebintu omu muringo gworobi. Akagamba aha binyonyi, ebirabyo n’ebintu  ebindi ebya butoosha kuhwera abantu kwetegyereza ebirikukwata ahari Ruhanga.

Eizooba rimwe obu Yesu yaabaire ari aha kibungo, abantu baingi bakaija ahu yaabaire ari. Yesu akashutama ahansi yaabaha orubazo, nk’oku orikureeba aha omu kishushani. Orubazo oru nirwetwa Okubuurira kw’aha Rushozi. Akagira ati: ‘Mwetegyereze enyonyi z’omu mwanya; tizibiba, tizigyesha, n’obu kwakuba okuhunika omu bitara; kwonka Shoimwe ow’omu iguru aziriisa. Mbwenu imwe timurikuzikira?’

Kandi Yesu akagira ati: ‘Mwetegyereze ebirabyo by’omu ishwa oku bimera; tibigira murimo, tibiruka myenda; nangwa n’Omugabe omugaiga Sulemaani omu kitiinisa kye kyona tarabikirize kujwara gye. Mbwenu Ruhanga ku araabe ajweka ebirabyo by’omu kishaka, tarikizaho kubajweka?’​—Matayo 6:25-33.

Mbwenu waayetegyereza eki Yesu yaabaire naayegyesa?— Akaba atarikwenda ngu twerarikirire aha bikwatiraine n’okutunga eby’okurya nari  eby’okujwara. Ruhanga naamanya ngu ebyo byona nitubyetenga. Yesu taragizire ngu titushemereire kukora kutunga eby’okurya n’eby’okujwara. Kwonka akagira ngu tushemereire kwebembeza ebirikukwata ahari Ruhanga. Twakora ekyo, Ruhanga naija kuhamya ngu twatunga eby’okurya n’ebijwaro. Ekyo nokiikiriza?—

Abantu bakagamba ki, Yesu ku yaaherize kubeegyesa?— Baibuli neegira ngu bakatangaarira omuringo ogu yaayegyeisemu. Kikaba nikishemeza  okumuhurikiza. Ebi yaagambire bikahwera abantu kukora ebihikire.​—Matayo 7:28.

N’ahabw’ekyo ni kikuru ngu twegyere ahari Yesu. Noomanya oku ekyo turikubaasa kukikora?— Ebi yaayegyeise bihandiikire omu kitabo. Ekitabo ekyo nookimanya?— Ni Baibuli Erikwera. Eki nikimanyisa ngu nitubaasa kuhurikiza Yesu turikuta omutima aha bi turikushoma omu Baibuli. Baibuli erimu ekitebyo ekirikushemeza ekirikukwata aha ku Ruhanga we wenka yaatugambiire kuhurira Yesu. Ka tureebe ekyabaireho.

Eizooba rimwe Yesu akatwara bashatu ahari banywani be aha rushozi. Amaziina gaabo ni Yakobo, Yohaana na Petero. Nitwija kwega bingi ebirikukwata aha bashaija abo bwanyima, ahakuba boona bashatu bakaba bari banywani ba Yesu ab’aha mara. Ku baabaire bari omu mwanya ogwo, aha maisho ga Yesu hakatandika kumurinkana n’ebijwaro bye byayera nk’oku orikureeba omu kishushani.

Bwanyima, Yesu na banywani be bakahurira eiraka kuruga omu iguru. Rikaba nirigira riti: “Ogu n’omwana wangye ou nkunda, ou nyesiimira munonga; mumuhurire.” (Matayo 17:1-5) Eiraka eryo rikaba riri ery’oha?— Rikaba riri erya Ruhanga. Ruhanga niwe yaagizire ngu bashemereire kuhurikiza Omwana we.

Kandi shi itwe omu bunaku obu? Nitwija kworobera Ruhanga kandi tuhurikize Omwana we, Omwegyesa Mukuru?— Ekyo nikyo twena twine kukora. Noijuka oku ekyo turikubaasa kukikora?—

Nitubaasa kworobera Omwana wa Ruhanga turikushoma ebihandiikirwe omu Baibuli ebirikukwata aha Mwana ogwo. Hariho ebintu bingi birungi ebi Omwegyesa Mukuru arikutugambira. Noija kushemererwa kwega ebintu ebyo ebihandiikirwe omu Baibuli. Kandi nikiija kukureetera kushemererwa ku oraagambire banywani baawe ebintu birungi ebi orikwega.