MAS ku dos mil aña pasá, un yu mashá spesial a nase. El a krese bira e hòmber mas importante ku a yega di biba. E tempu ei, niun hende no tabatin avion ni outo. No tabatin televishon, ni kòmpiuter ni Internet tampoko.

Nan a yama e yu Hesus. El a bira e hòmber mas sabí ku a yega di biba na mundu. Hesus a bira e mihó maestro tambe. E tabata splika kos difísil na un manera fásil pa hende komprondé.

Hesus tabata siña hende unda ku el a topa nan. E tabata siña nan kantu di laman i den boto. E tabata siña nan na kas i kanando di un lugá pa otro. Hesus no tabatin outo, ni e no a biaha den bùs ni den trein. Hesus tabata kana na pia bai di un lugá pa otro pa siña hende.

Hende por siña nos hopi kos. Pero e Gran Maestro, Hesus, por siña nos e kosnan di mas importante. Den Beibel ta kaminda nos por lesa e kosnan ku Hesus a bisa. Ora nos tende su palabranan for di Beibel, ta meskos ku ta ku nos Hesus ta papia.

Dikon Hesus tabata asina un Gran Maestro? Un motibu ta ku Hesus mes tabatin un maestro ku a siñ’é. I Hesus tabata sa ku ta mashá importante pa skucha. Pero, di ken Hesus a skucha? Ken a siñ’é?— Su Tata. I Tata di Hesus ta Dios.

Promé ku Hesus a bini na tera komo hende, e tabata biba den shelu serka Dios. Esei kier men ku Hesus no tabata manera otro hende, pasobra niun otro hende no a yega di biba den shelu promé  ku nan a nase na tera. Hesus tabata un bon Yu den shelu. E tabata skucha di su Tata. P’esei Hesus por a siña hende e kosnan ku el a siña for di Dios. Abo por hasi meskos ku Hesus dor di skucha di bo tata i bo mama.

Ademas Hesus tabata un Gran Maestro pasobra el a stima hende. E kier a yuda hende siña tokante Dios. Hesus a stima hende grandi, pero el a stima mucha tambe. Anto mucha tabata gusta bai serka Hesus pasobra e tabata papia ku nan i skucha nan.

Un dia, un par di mayor a trese nan yunan chikitu serka Hesus. Pero Hesus su amigunan a kere ku e tabata muchu drùk pa papia ku mucha chikitu. P’esei nan a bisa e mayornan i e muchanan pa nan bai. Pero kiko Hesus a bisa?— Hesus a bisa: “Laga e muchanan bin serka mi; no stroba nan.” Sí, Hesus tabata ke pa e muchanan bini serka dje. Maske e tabata un hòmber hopi sabí i hopi importante, Hesus a tuma tempu pa siña mucha chikitu.—Marko 10:13, 14.

 Bo sa dikon Hesus a siña mucha i a skucha nan? Un motibu ta ku e tabata ke hasi nan felis dor di konta nan di Dios, su Tata den shelu. Kon abo por hasi hende felis?— Dor di konta nan e kosnan ku abo a siña tokante Dios.

Un biaha Hesus a usa un mucha chikitu pa siña su amigunan un lès importante. El a pone e mucha para meimei di Su disipelnan, esta, su siguidónan. E ora ei Hesus a bisa ku e hòmber grandinan ei mester a kambia nan manera, i bira manera e mucha.

Kiko Hesus tabata kier men? Bo sa kon hende grandi òf asta mucha grandi mester bira manera un mucha chikitu?— Wèl, un mucha chikitu no sa mes hopi ku un hende grandi, i e ta kla pa siña. P’esei, loke Hesus tabata kier men ta ku su disipelnan mester ta humilde, manera mucha chikitu. Sí, nos tur por siña hopi kos for di otro. I nos tin ku komprondé ku e kosnan ku Hesus ta siña nos ta mas importante ku loke nos mes ta pensa.—Mateo 18:1-5.

Tambe Hesus tabata asina un Gran Maestro pasobra e tabata sa kon pa splika hende kos na un manera interesante. E tabata splika hende kos na un manera fásil i kla. E tabata papia tokante para, flor i otro kos ku hende sa di dje, pa yuda nan komprondé kosnan di Dios.

Un dia Hesus tabata riba un seru, i hopi hende a bini serka dje. Hesus a  kai sinta i a duna nan un diskurso, esta, un sermon, manera bo ta mira aki. E diskurso aki yama e Sermon Riba Seru. Hesus a bisa: ‘Mira e paranan di shelu. Nan no ta sembra. Nan no ta warda kuminda den mangasina. Pero Dios den shelu ta duna nan kuminda. Boso no bal muchu mas ku nan?’

Tambe Hesus a bisa: ‘Mira e lelinan di sabana. Nan ta krese sin traha mata kurpa. Anto mira kon bunita nan ta! Ni Rei Salomon, ku tur su rikesa, no tabata bisti mas bunita ku leli di sabana. P’esei, si Dios ta kuida flor ku ta krese, lo e no kuida boso tambe?’—Mateo 6:25-33.

Bo a komprondé kiko Hesus a siña nos aki?— E no tabata ke pa nos preokupá tokante unda nos ta bai haña kuminda pa kome ni paña pa bisti. Dios sa ku nos tin mester di tur e kosnan ei. Hesus no tabata kier men ku nos no mester traha pa nos tin  kuminda ku paña. Loke el a bisa ta ku nos mester pone Dios na promé lugá. Si nos hasi asina, Dios mes lo pèrkurá pa nos tin kuminda pa kome i paña pa bisti. Abo ta kere loke el a bisa?—

Kiko e hendenan a pensa ora Hesus a kaba di papia?— Beibel ta bisa ku nan a keda asombrá ku su manera di siña. Nan tabata gusta skuch’é. E kosnan ku el a bisa a yuda hende hasi bon.—Mateo 7:28.

 Sí, ta hopi importante pa nos siña for di Hesus. Bo sa kon nos por siña di dje?— Wèl, nos tin un buki, i e kosnan ku Hesus a bisa ta skirbí den dje. Bo sa kon yama e buki ei?— Beibel Santu. Esei kier men ku nos por skucha Hesus si nos paga tinu na e kosnan ku nos ta lesa den Beibel. Anto den Beibel tin un historia hopi emoshonante tokante kon Dios mes a bisa nos pa skucha Hesus. Laga nos wak kiko a pasa.

Un dia Hesus a bai ku tres di su amigunan te na haltu riba un seru. Nan tabata yama Santiago, Juan ku Pedro. Despues nos ta bai siña hopi mas di nan, pasobra nan tur tres tabata hopi bon amigu di Hesus. Awor, na e okashon spesial aki, Hesus su kara a kuminsá bria masha hopi. Anto su paña a kuminsá bria meskos ku lus, manera bo ta mira riba e plachi.

Despues, Hesus ku su amigunan a tende un stèm for di shelu. E stèm a bisa: ‘Esaki ta mi Yu stimá, esun ku mi ta kontentu kuné. Tende di dje.’ (Mateo 17:1-5) Bo sa ta ken su stèm esei tabata?— Di Dios! Sí, ta Dios mes a bisa ku nan mester a tende di su Yu.

Kiko di nos ku ta biba awe? Nos lo hasi loke Dios a bisa, esta, tende di su Yu e Gran Maestro?— Esei ta loke nos tur mester hasi. Bo ta kòrda kon nos por skucha Hesus?—

Sí, nos por skucha e Yu di Dios dor di lesa e historianan di su bida den Beibel. Tin hopi kos masha bunita ku e Gran Maestro tin pa konta nos. Bo ta bai gusta siña tokante nan den Beibel. Anto si bo konta bo amigunan e kosnan bon ku bo ta siña, esei lo hasi bo felis tambe.