ISKAY waranqa watakuna ñawpaqtaraqmi kuyayllapaq wawacha nacerurqa, wiñaruspanñataqmi ancha riqsisqa runa rikurirurqa. Chay tiempopiqa manam kunan tiempopi hinachu avionkunapas, carrokunapas, televisionkunapas nitaq computadorakunapas kaqchu.

Chay wawachapa sutinmi karqa Jesus. Payqa wiñaruspanmi alli-allin yachachiq runa rikurirurqa. Mana sasachakuspallanmi sasa entiendena kaqkunamantapas yachachiq.

Jesusqa lamar quchapa patankunapi, buquekunapa kasqanpi, wasikunapi hinaspa ñankunapim runakunamanqa yachachiq. Ichaqa carrokuna hinaspa trenkuna mana kasqanraykum chakillawan maykunamanpas rispan runakunaman yachachiq.

Alli-allin yachachiq Jesuspa yachachikuyninkunaqa manam runakunapa yachachikuyninkuna hinachu. Chaymi bibliata leeptinchikqa rimapayawachkachwan hina rikchakun.

¿Imanasqataq Jesusqa alli-allin yachachiq karqa? Yachachiqninta allinta uyarisqanraykum, chaynataq yachachiqninpas alli-allin yachachiq kasqanraykum. Ichaqa, ¿pitaq karqa chay yachachiqninqa?... Taytan Diosmi.

Manaraq kay pachaman hamuchkaspanqa taytanwan kuskam Jesusqa hanaq pachapi yacharqa. Chayraykum payqa mana runakuna hinachu karqa. Jesusqa taytanpa yachachisqankunatam allinta uyarirqa. Chaymi kay pachaman hamuspanqa chay yachasqankunamanta  runakunaman yachachirqa. Qampas tayta-mamaykipa yachachisusqaykita uyarispaqa Jesustam qatipakuchkanki.

Jesusqa runakunata kuyasqanrayku hinaspa paykunaman Diosmanta yachachiyta munasqanraykutaqmi alli-allin yachachiq karqa. Payqa hatunmanpas chaynataq taksamanpas kuyasqantam qawachirqa rimasqanwan hinaspa uyarisqanwan. Chaymi warmachakunapas payman asuykuyta munaqku.

Huk kutipim tayta-mamakuna warmachankuta Jesuspa kasqanman pusarurqaku. Hinaptinmi Jesuspa puriqmasinkunaqa Jesus achka ruwayniyuq kasqanta piensaspanku chay warmachakunata kutikunankupaq nirqaku. ¿Imatataq Jesusqa ruwarqa? Nirqam: ‘Ama harkaychikchu wawakuna ñuqaman hamunantaqa’, nispa. Yachaysapa hinaspa riqsisqa runa kaspanpas Jesusqa warmachakunawan kaytam  munarqa, chaymi yachachinanpaqpas tiempochakurqa (Marcos 10:13, 14).

¿Imanasqataq Jesusqa warmachakunaman yachachirqa hinaspa rimasqankutapas uyarirqa? Kusichiyta munasqanraykum, chayraykum hanaq pachapi kaq taytanmanta yachachirqa. Qamqa, ¿imaynatataq hukkunata kusichiwaq? Diosmanta yachasqaykikunata willaspam.

Huk kutipim puriqmasinkunapa chawpinkuman warmachata churaykurqa, hinaspam chay warmachawan tupanachispan yachachirqa chay warmacha hina kanankupaq.

¿Ima ninantaq warmacha hina kayqa? ¿Imaynatataq hatunpas chaynataq taksapas warmacha hina kachwan?... Jesuspa nisqanman hinaqa, mana hatun tukuq kaspam. Warmachakunaqa hatun runakuna hina mana yachasqankuraykum sapa kuti yachachisqa kayta munanku. Runamasinchikmantaqa imakunatapas yachachwanmi manaña Jesuspa yachachikuyninkuna hina kaptinpas (Mateo 18:1-5).

Jesusqa alli-allin yachachiqtaqmi karqa uyarikunapaqta hina yachachisqanrayku. Payqa runakunaman Diosmanta yachachinanpaqmi rimarqa pichinkuchakunamanta, waytakunamanta hinaspa imapas riqsisqa kaqkunamanta.

 Urqupi Jesus kachkaptinmi achkallaña runakuna paypa kasqanman chayarurqaku. Hinaptinmi payqa kay dibujopi qawasqaykiman hina kaynata nispan yachachiyta qallaykurqa: ‘Qawaychik alton pawaqkunata, paykunaqa manam tarpunkuchu nitaq taqimanpas huñunkuchu. Ichaqa hanaq pachapi kaq taytaykichikmi mikuchin. ¿Manachu qamkunaqa paykunamantapas astawan valenkichik?’, nispa. Kayqa ancha riqsisqa yachachikuyninmi.

Hinaspapas nirqam: ‘Yachaychikyá purun waytakunamanta, manam llamkankuchu nitaq puchkankuchu. Ichaqa llumpa-llumpay apu Salomonpas manam waytakuna hinaqa pachakurqachu. Chaynaqa sichum waytakunatapas Dios pachachichkaspanqa, ¿manachum qamkunatapas pachachisunkichik?’, nispa (Mateo 6:25-33).

 ¿Musyachkankichu Jesuspa ima niy munasqanta?... Mikunanchikmanta hinaspa pachanchikmanta mana llumpayta llakikunapaqmi nichkarqa. ¿Imanasqa? Imapas pisipuwasqanchikmanta Dios yachasqanraykum. Ichaqa manam kaywanqa hawkalla tiyakuspa manaña llamkanamantachu rimachkarqa, aswanqa Diosta puntapi churanamantam. Chayta ruwaptillanchikmi Diosqa pisipuwaqninchikta quwasun, ¿iskayrayawaqchu chaymanta?

 Jesus rimayta tukuruptinqa, ¿imaynataq uyariqninkunaqa kachkarqaku?... Bibliapa nisqanman hinaqa yachachikuykuna rimasqanwanmi uyarayarurqakuraq. Paytaqa uyariytamá munaqku allin kaqkunata yachachisqanrayku (Mateo 7:28).

Chaymi Jesusmanta yachayninchikqa ancha allin. ¿Ima qillqapitaq Jesusmanta willakuchkan?... Bibliapim. Jesustaqa uyarichwanmi bibliata leespa hinaspa chaypi yuyaymanaspa. Chaypim willakuchkan kikin Dios churinta uyarinanchikpaq niwasqanchikmanta. Kaynam karqa:

Jesusmi amistadnin Pedrowan, Santiagowan hinaspa Juanwan kuska urquman rirqa. Kay kimsan qatiqninkunamantam astawan yachachkasunchik wakin yachachikuykunapi. Hinaptinmi chaypi kay dibujopi qawasqaykiman hina Jesuspa uyanwan pachanpas inti hinaraq kanchariyta qallaykurqa.

Chaymantañataqmi tawanku uyarirurqaku hanaq pachamanta kayna rimamuqta: “Paymi kuyasqay churiy, paytam kuyani hinaspapas chaskinim, uyariychikyá”, niqta (Mateo 17:1-5). ¿Pipa rimasqantaq karqa?... Arí, kikin Diospam. Paymi nichkarqa churinta uyarinankupaq.

¿Ñuqanchikqa imatam ruwachwan? ¿Diosta kasukuspachu alli-allin yachachiq churinta uyarisun?... Llapallanchikmi uyarinanchik. Ichaqa, ¿imaynata?...

Bibliata leespanchikmi. Chaypim Jesusmantaqa tukuy ima ruwasqankunamanta suma-sumaqllataña willakuchkan. Yachasqaykikunawanqa kusisqam kanki, ichaqa aswan kusisqaraqmi kanki chaykunamanta warmamasikikunaman willakuspaykiqa.