ISKAY waranqa wata ñaupaqta jinan juj importante wawa naceran. Chay wawan wiñaspa llapa runakunamanta aswan allin karan. Chay tiempopiqa manan karanchu avionpas, carropas, computadorapas, televisionpas, internetpas.

Chay wawaq sutinmi karan Jesús. Payqa llapa runakunamanta aswan yachayniyoqmi karan. Jinaspapas allin yachachiqmi karan. Payqa sasa yachachikuykunatan facil-llata yachachiran, chaymi payta niqku: “Allin yachachiq”, nispa.

Jesusqa may tarikusqanpin runakunata yachachiq. Yachachiqmi lamar-qochaq qayllanpi, botepi, wasikunapi, ñanpi kashaspa ima. Chay tiempopiqa manan karanchu trenpas, carropas, avionpas. Chaymi Jesusqa chakillapi juj llaqtakunata viajaq runakunata yachachinanpaq.

Yaqapaschá kunankama tukuy yachasqaykita juj runakunamanta yacharanki. Jesusmi ichaqa aswan importante yachachikuykunata yachachiran. Yachachisqanqa Bibliapin kashan. Bibliata leesun chayqa paytapas uyarishasunman jinan kanqa.

¿Imaraykun Jesús allin yachachiq karan? Paytapas jujmi yachachiran. ¿Pin yachachiran?... Papanmi. Jesuspa papanqa Diosmi. Jesusqa papanpa yachachisqantan allinta uyarikuran.

Jesusqa papanwanmi janaq pachapi tiyaran. Chay qhepamanñan kay allpaman jamuran. Chaymi payqa mana noqanchis jina común runachu karan. Janaq pachapi kashaspaqa papanpa  tukuy yachachisqantan uyarikuran. Chay uyarisqantan kay allpaman jamuspa runakunaman yachachiran. Sichus qanpas tayta-mamaykita uyarinki chayqa Jesús jinan kanki.

Jinaspapas Jesusqa munakuranmi kuraq runakunata wawakunatapas, chaymi munaran Diosmanta yachanankuta. Payqa llapa wawakunawanmi parlariq, makillan uyariq rimasqankutapas. Chaymi wawakunaqa paypa ladonpi kusisqa kaqku.

Juj kutinmi wakin tayta-mamakuna wawankuta Jesusman aparanku. Ichaqa Jesuspa qatikuqninkunan mana munarankuchu Jesusman achhuykunankuta. ¿Imatan Jesús ruwaran chayta rikuspa?... Qatikuqninkunatan niran: “Jinalla wawakunaqa noqaman jamuchunku, ama jark’aychischu”, nispa. Jesusqa munaranmi wawakuna payman achhuykunankuta. Ancha yachayniyoqña ancha importante runaña karan chaypas, Jesusqa tiempotan t’aqaran wawakunawan kananpaq (Marcos 10:13, 14).

 ¿Imaraykun Jesús wawakunaman yachachiq? ¿Imaraykun wawakunaq nisqantapas makilla uyariran? Payqa kusisqa kanankutan munaran, chaymi Diosmanta paykunaman yachachiran. ¿Imatan qanpas ruwanayki juj runakuna kusisqa kanankupaq?... Diosmanta yachasqaykitan paykunaman willanayki.

Juj kutinmi Jesús juj importante yachachikuyta amigonkunaman yachachiran. Chaypaqmi juj erqechata ladonkupi sayaykachiran. Qatikuqninkunaqa llapankupas kuraq runakunañan karanku. Ichaqa Jesusmi paykunata niran: ‘Kay erqecha jinan kanaykichis’, nispa.

¿Imatan Jesús chaywan nisharan? ¿Imaynapin kuraqkunapas wayna-sipaskunapas juj wawa jina kankuman?... Humilde kaspan, chaytan Jesusqa qatikuqninkunaman nisharan. Wawakunaqa pisillatan imatapas yachanku, chaymi astawan yachayta munaspa imaymanata tapukunku. Llapanchismi necesitanchis jujkunaq yachachiwananchista. Ichaqa Jesuspa yachachisqantan astawanqa necesitanchis (Mateo 18:1-5).

Chaymantapas, ¿imaraykun Jesús allin yachachiq karan? Payqa sonqonkuman chayaqtan yachachiran, sasa yachaykunatan entiendenapaq jina facil-llata yachachiq. Diosmanta astawan yachanankupaqmi willaq urpikunamanta, t’ikakunamanta, jujkunamantawan.

 Juj kutinmi Jesús campopi yachachisharan. Chaymi askha runakuna payman juñukuranku. Chaypin Jesusqa kaypi rikusqayki jina, runakunaman imaymanata yachachiran. Chaytan ninku: ‘Orqo patapi yachachisqan’, nispa. Chaypi yachachishaspan niran: ‘Allinta qhawariychis altonta phawaq animalkunata, chay animalkunaqa manan tarpunkuchu, manan cosechankuchu, manan mijuyta juñunkuchu. Janaq pacha Yayaykichismi chay animalkunataqa mijuchin. ¿Manachu qankunaqa chaykunamanta astawanraq valenkichis?’, nispa.

Jesusmi nillarantaq: ‘Qhawariychis campopi t’ikakuna ancha munay wiñasqanta. Salomonpas ancha qhapaqña kashaspapas manan jujnin t’ika jinallapas p’achakuranchu. Chhaynatan Diosqa campopi plantakunata cuidan, ¿chaychu qankunata mana cuidasunkichisman?’, nispa (Mateo 6:25-33).

 ¿Imatan Jesús chaywan nisharan?... Payqa manan munaranchu mijunamanta p’achamantapas nishuta llakikunanchista. Ichaqa manan nisharanchu: “Amaña llank’aychischu”, nispaqa. Jesusqa munaranmi Diostaraq ñaupaqta servinanchista. Chayta ruwasun chayqa Diosmi tukuy necesitasqanchista qowasun. ¿Cheqaqtachu Dios yanapawasun?...

¿Ima nirankun runakuna Jesuspa tukuy yachachisqanta uyarispa?... Anchatapunin admirakuranku. Yachachisqanmi sonqonkuman  chayaran, yanaparantaqmi sumaqta kausanankupaq (Mateo 7:28).

Chaymi noqanchisqa Jesusmanta astawan yachananchis. ¿Imaynatan yachasunman?... Paypa yachachisqanqa juj libropin kashan. ¿Ima libropi?... Arí, Bibliapin. Jesusta uyarinapaqqa tukuy yuyaywanmi Bibliata leenanchis. Kikin Diosmi Jesuspa amigonkunata niran uyarinankupaq. Chaymanta kunan yachasun.

Juj kutinmi Jesusqa Pedrowan, Santiagowan, Juanwan ima orqota wicharan. Paykunaqa Jesuspa munakusqan amigonkunan karan, ichaqa qhepamanñan paykunamanta astawan yachasun. Chay orqopi kashaqtinkun qonqaylla Jesuspa uyan inti jinaraq k’anchariran, p’achantaq sinchi yuraqman tukuran, kay dibujopi rikusqayki jina.

Chayllamanmi Jesuspa amigonkuna janaq pachamanta juj kunkata uyariranku: “Kaymi munakusqay Churiyqa, payqa sonqoypaq jinan, payta uyariychis”, nispa nimuqta (Mateo 17:1-5). ¿Pin chayta nimuran?... Arí, Diosmi rimamusharan. Diosmi paykunata kamachisharan wawanta uyarinankupaq.

Noqanchisri, ¿kasukusunchu Diosta? ¿Uyarisunchu wawanpa yachachisqanta?... Chaytan llapanchispas ruwananchis. ¿Imaynatan Jesusta uyarisunman? ¿Yuyashankichu?...

Arí, Jesusta uyarinapaqqa Bibliatan leenanchis. Biblian paymanta astawan willawasun. Chaypin kashan Jesuspa sumaq yachachikuyninkuna. Anchatapunin kusikunki paymanta yachaspa. Chaykunamanta amigoykikunaman willanki chayqa, astawanmi kusikunki.