UA SILI atu nei i le lua afe tausaga talu ona fanau mai se pepe faapitoa, ma i le taimi na matua ai lenei pepe, na avea o ia ma tagata silisili i tagata uma. I aso na, e leai ni vaalele po o ni taavale. E leai foʻi ni televise, telefoni ma komepiuta.

O le igoa o le pepe lenā, o Iesu. E sili atu lona poto i lo se isi lava tagata ua ola i le lalolagi. Na avea foʻi Iesu ma faiaʻoga sili. Na mafai ona ia faamatala le tele o mea faigatā, i se auala e mafai ona malamalama ai.

Na aʻoaʻo atu Iesu i tagata uma lava na latou feiloaʻi. Na ia aʻoaʻo atu i tagata a o iai i le matafaga ma luga o vaa. Na aʻoaʻo atu foʻi i fale o tagata, ma taimi na malaga ai. E leʻi iai sana taavale, ma e leʻi malaga foʻi Iesu i se pasi po o se nofoaafi. Na savali Iesu i nuu taʻitasi ma aʻoaʻo atu i tagata.

E tele mea e tatou te iloa mai isi tagata. Ae e sili atu le tāua o mea tatou te iloa mai iā Iesu, le Faiaʻoga Sili. O loo maua i le Tusi Paia tala a Iesu. A o tatou faalogo i upu o le Tusi Paia, e pei lava ua fetalai mai Iesu iā i tatou.

Aiseā na avea ai Iesu ma Faiaʻoga Sili? O se tasi o māfuaaga, auā na aʻoaʻoina muamua Iesu e se faiaʻoga. Na iloa foʻi e Iesu le tāua o le faalogo lelei. Ae o ai na faalogo i ai Iesu? O ai la le faiaʻoga o Iesu?— O lona Tamā, ma o le Tamā o Iesu, o le Atua.

A o leʻi afio mai Iesu i le lalolagi, na la nonofo faatasi ma le Atua i lugā i le lagi. E ese la Iesu i tagata, auā e leai ma se tagata na ola  muamua i le lagi a o leʻi fanau mai i le lalolagi. Na avea Iesu ma Atalii usiusitai, ma na faalogo i lona Tamā i le taimi a o iai i le lagi. O le māfuaaga lenā na mafai ai e Iesu ona aʻoaʻo atu i tagata, tala na ia iloa mai le Atua. E mafai ona e faataʻitaʻi iā Iesu, e ala i lou faalogo i lou tamā ma lou tinā.

O le isi māfuaaga ua avea ai Iesu ma Faiaʻoga Sili, auā e alofa tele i tagata. Na finagalo Iesu e fesoasoani atu i tagata, ina ia latou iloa le Atua. Na alofa Iesu i tagata matutua atoa ma tamaiti. Na fiafia tele tamaiti e ō iā Iesu, auā na talanoa ma faalogo atu o ia iā i latou.

I le isi aso, na ō mai ai mātua ma a latou fanau iā Iesu. Ae na manatu uō a Iesu e lē mafai ona talanoa atu le Faiaʻoga Sili i tamaiti, auā na pisi tele. Ona fai atu lea o uō a Iesu iā i latou, e ō loa i o latou fale. Ae o le ā le tala a Iesu?— Na faapea atu Iesu: ʻTuu mai tamaiti e ō mai iā te aʻu, aua le vavao iā te i latou.’ Ioe, na finagalo Iesu e ō atu tamaiti iā te ia. E ui lava o Iesu o se tagata e tāua ma e atamai, ae na faaalu sona taimi e aʻoaʻo ai tamaiti.​—Mareko 10:13, 14.

 Pe e te iloa le māfuaaga na aʻoaʻo ai e Iesu tamaiti ma faalogo iā i latou? O se tasi o māfuaaga, auā na finagalo Iesu e faafiafia i tamaiti, e ala i le taʻu atu iā i latou o tala e uiga i lona Tamā i le lagi. O le ā le auala e te fesoasoani ai i tagata ina ia maua le fiafia?— E ala i le taʻu atu iā i latou, o mea ua e iloa e uiga i le Atua.

I se tasi o mea na tupu, na faaaogā ai e Iesu se tamaitiiti e aʻoaʻo atu ai se lesona tāua i Ana uō. Na avane e Iesu se tamaitiiti ma faatū i luma o Ona soo. Na faapea atu Iesu e tatau ona sui uiga o nei tamāloloa, ma faataʻitaʻi i lenei tamaitiiti.

O le ā le uiga o le tala a Iesu? E te iloa le auala e mafai ai e se tamāloa po o se talavou, ona faataʻitaʻi atu i se tamaitiiti?— E tele atu mea e iloa e le tagata matua i lo le tamaitiiti, ae e fiafia tele le tamaitiiti e aʻoaʻoina ni mea fou. O le uiga la o le tala a Iesu, e tatau i ona soo ona loto maualalo, e pei o tamaiti. Ioe, e tele mea e mafai ona tatou aʻoaʻoina mai isi tagata. E ao ona tatou iloa, e sili atu le tāua o aʻoaʻoga a Iesu na i lo o tatou lava manatu.​—Mataio 18:1-5.

O se isi māfuaaga na avea ai Iesu ma Faiaʻoga Sili, auā na ia aʻoaʻoina tagata i se auala e faaoso ai le naunau o tagata. O le faigofie ia o le auala na faamatala ai tala e Iesu. Sa ia taʻua manufelelei, fugālaau, ma isi foʻi mea, ina ia faigofie ai ona malamalama tagata i le Atua.

 I se tasi aso a o iai Iesu i autafa o se mauga, e toʻatele tagata na ō atu iā te ia. Sa nofo i lalo Iesu ma fai atu loa lana lauga iā i latou, e pei ona e vaaia i le ata. O le lauga lenei ua taʻua o le Lauga i luga o le Mauga. Na faapea atu Iesu: ʻVaavaai i manufelelei i le lagi. Latou te lē lūlū ni fatu. E lē faaputu foʻi ni a latou meaʻai. Ae e fafagaina i latou e le Atua i le lagi. Pe e lē sili ea outou na i lo na manu?’

Na faapea atu foʻi Iesu: ʻIa mafaufau i lautalotalo o le vao. E tupu i latou ae e lē galulue. Ae vaai i lo latou matagofie! E oo iā Solomona ma lona matagofie tele na lē ofu o ia e pei o le tasi o na lautalotalo. Afai e tausia e le Atua fugālaau, e lē sili ea ona ia tausia oe?’​—Mataio 6:25-33.

Po o e malamalama i le lesona na aʻoaʻo atu e Iesu?— E lē manaʻo Iesu tatou te popole i ni a tatou mea e ʻai ma ofu e oofu ai. Ua silafia e le Atua e tatou te moomia uma mea na. E lē o fai mai foʻi  Iesu, e aua neʻi o tatou galulue ina ia maua a tatou meaʻai ma ofu. Ae na fetalai mai, e tatau ona tatou faamuamua le Atua. Afai tatou te faamuamua le Atua, o le a foaʻi mai e le Atua a tatou meaʻai ma o tatou ofu. E te talitonu i lenā mea?—

Ina ua uma le lauga a Iesu, o ā la ni manatu o tagata?— Ua taʻu mai e le Tusi Paia, na ofo tagata i le auala na aʻoaʻo ai Iesu. E ese le manaia o le faalogo atu iā te ia. Sa fesoasoani faamatalaga a Iesu, ina ia mafai ai e tagata ona faia le mea saʻo.​—Mataio 7:28.

 E tāua tele la lo tatou faalogo atu iā Iesu. E te iloa le auala e mafai ona tatou faalogo atu ai iā Iesu?— Ua tusia mea na taʻu mai e Iesu, i se tusi. Pe e mafai ona e taʻu maia le igoa o le tusi lenā?— Ioe, o le Tusi Paia. O lona uiga la, e mafai ona tatou faalogo iā Iesu pe a tatou uaʻi lelei atu i le faitauina o le Tusi Paia. O le manaia ia o le tala a le Tusi Paia i le auala na faatonu ai i tatou e le Atua, e faalogo atu iā Iesu. Seʻi o tatou vaai i le mea na tupu.

I se tasi aso, na ō ai Iesu ma ana uō e toʻatolu i luga o se mauga. O igoa o ana uō o Iakopo, Ioane ma Peteru. E tele mea o le a tatou iloa e uiga i nei tamāloloa e toʻatolu, auā e uō lelei ma Iesu. A o iai i luga o le mauga, na susulu malosi ai foliga o Iesu. Na susulu foʻi ofu o Iesu e pei o se malamalama pupula, e pei ona e vaaia i le ata lenei.

Ina ua uma, na faalogo ai Iesu ma ana uō i se leo mai le lagi. Na faapea mai: “O loʻu Atalii pele lenā, ou te fiafia iā te ia; ia outou faalogo iā te ia.” (Mataio 17:1-5) E te iloa, o le leo o ai lenā?— O le leo o le Atua! Ioe, na fetalai mai le Atua e tatau ona latou faalogo i lona Atalii.

Ae ā i tatou i aso nei? Po o le a tatou usiusitai ea i le Atua ma faalogo atu i lona Alo, le Faiaʻoga Sili?— O i tatou uma lava e tatau ona faalogo iā Iesu. E te manatua foʻi, o le ā le auala tatou te faalogo ai iā Iesu?—

Ioe, e mafai ona tatou faalogo atu i le Alo o le Atua, pe a tatou faitau i tala o le Tusi Paia e uiga i lona olaga. O le tele ia o mea lelei ua finagalo le Faiaʻoga Sili e taʻu mai iā i tatou. O le a e fiafia, pe a e iloa tala o le Tusi Paia o loo taʻua ai nei mea. O le a e fiafia foʻi, pe afai e te talanoa atu i au uō i mea lelei ua e faalogo i ai.