MORO leki tu dusun yari pasa, wan tumusi aparti pikin ben gebore. A pikin dati gro kon tron a moro prenspari man di oiti libi. Na a ten dati, sma no ben abi opolani noso oto ete. Sani soleki radio nanga telefisi no ben de.

A pikin ben kisi a nen Yesus. A ben tron a moro koni sma di oiti ben de na grontapu. Yesus ben tron a moro koni leriman sosrefi. A ben gwenti fu tyari muilek tori kon na krin na wan fasi di makriki fu frustan.

Na ala presi pe Yesus ben miti sma, a ben gi den leri. A ben gi den leri na sekanti èn na ini boto. A ben gi den leri na ini den oso fu den èn te a ben de na pasi. Yesus no ben abi wan oto, èn a no ben e teki bus noso loko. Yesus ben e waka nanga futu fu a wan presi go na a trawan, èn a ben e gi sma leri na den presi dati.

Wi e leri furu sani fu tra sma. Ma wi kan leri den moro prenspari sani fu a Bigi Leriman, Yesus. Wi kan feni den leri fu Yesus na ini Bijbel. Te wi e leisi noso e arki den wortu dati di skrifi na ini Bijbel, dan a de neleki Yesus e taki nanga wi.

Fu san ede Yesus ben de so wan Bigi Leriman? Wán reide, na taki Yesus srefi ben kisi leri. Èn a ben sabi o prenspari a de fu arki. Ma suma Yesus ben arki? Suma ben gi en leri?— En Tata ben gi en leri. Èn a Tata fu Yesus na Gado.

Bifo Yesus ben kon na grontapu leki wan libisma, a ben libi na ini hemel makandra nanga Gado. Fu dati ede Yesus ben difrenti fu tra mansma, fu di nowan enkri tra sma ben libi na ini hemel bifo a  gebore na grontapu. Yesus ben de wan bun Manpikin di a ben de na ini hemel, èn a ben e gi yesi na en Tata. Fu dati ede a ben man leri sma den sani di Gado ben leri en. Te yu e gi yesi na yu papa nanga mama, dan na so fasi yu e teki na eksempre fu Yesus.

Wan tra reide fu san ede Yesus ben de wan Bigi Leriman, na taki a ben lobi sma. A ben wani yepi sma fu kon sabi Gado. Yesus ben lobi bigisma, ma a ben lobi pikin-nengre tu. Èn pikin-nengre ben lobi fu de nanga Yesus, fu di a ben e taki nanga den èn a ben e arki den.

Wan dei, wan tu papa nanga mama tyari den yongu pikin fu den go na Yesus. Ma den mati fu Yesus ben feni taki a Bigi Leriman no ben abi ten fu taki nanga yongu pikin. Sobun, den taigi den papa nanga den mama fu gowe nanga den pikin fu den. Ma san Yesus taki?— Yesus taki: „Meki den yongu pikin kon na mi; no pruberi fu tapu den fu kon na mi.” Iya, Yesus ben wani taki den yongu pikin ben musu kon na en. Aladi Yesus ben de wan tumusi koni man èn sosrefi wan tumusi  prenspari man, toku a ben teki ten fu leri yongu pikin.​—Markus 10:13, 14.

Yu sabi fu san ede Yesus ben e leri pikin-nengre èn fu san ede a ben e arki den? Wan reide, na taki a ben wani meki den firi koloku, èn fu dati ede a ben e fruteri den sani fu Gado, en hemel Tata. Fa yu kan meki sma firi koloku?— Yu musu fruteri den san yu kon sabi fu Gado.

Wan leisi, Yesus teki wan yongu pikin leki eksempre fu leri den mati fu en wan prenspari sani. A teki a pikin èn a meki a tanapu na mindri den disipel fu En di ben de bakaman fu En. Baka dati, Yesus taki dati den bigiman disi ben musu kenki den fasi fu den, èn den ben musu kon de leki a pikin disi.

San Yesus ben wani taki nanga den wortu dati? Yu sabi fa wan bigiman, noso wan moro bigi pikin srefi musu kon de leki wan yongu pikin?— We, wan yongu pikin no sabi so furu leki wan bigisma, èn a e angri fu leri sani. Sobun, Yesus ben wani taki dati den disipel fu en ben musu angri fu leri sani, neleki fa a de nanga yongu pikin. Iya, wi alamala kan leri furu sani fu tra sma. Èn wi alamala musu sabi taki den leri fu Yesus prenspari moro leki wi eigi prakseri.​—Mateyus 18:1-5.

Wan tra reide fu san ede Yesus ben de so wan Bigi Leriman, na taki a ben sabi fa fu hari a prakseri fu sma. A ben e taki sani krin èn na wan fasi di ben de makriki fu frustan. A ben e taki fu pikin fowru nanga bromki èn fu tra sani di sma ben  gwenti, so taki den ben kan frustan spesrutu tori di abi fu du nanga Gado.

Wan dei di Yesus ben de na tapu wan bergi, dan wan heri ipi sma kon na en. Yesus saka sidon èn a hori wan taki gi den, soleki fa yu kan si dyaso na tapu a prenki. A taki disi nen a Bergitaki. Yesus ben taki: ’Luku den pikin fowru di e frei na loktu. Den no e prani siri. Den no e kibri nyanyan na ini maksin. Ma Gado na ini hemel e gi den nyanyan. Unu no warti moro den?’

Yesus ben taki sosrefi: ’Leri wan sani fu den bromki na ini a sabana. Den e gro sondro taki den e wroko. Èn luku fa den moi! Srefi den krosi di a gudu Kownu Salomo ben weri no ben moi moro den bromki fu a sabana. Sobun, efu Gado e sorgu gi den bromki di e gro, dan a no sa sorgu gi unu sosrefi?’​— Mateyus 6:25-33.

Yu e frustan san Yesus ben e leri wi?— A no ben wani wi fu broko wi ede pe wi ben o feni nyanyan, noso pe wi ben o feni krosi fu  weri. Gado sabi taki wi abi ala den sani dati fanowdu. Yesus no ben taki dati wi no musu wroko fu abi nyanyan nanga krosi. Ma a ben taki dati wi musu poti Gado na a fosi presi na ini wi libi. Te wi e du dati, dan Gado sa sorgu taki wi abi nyanyan èn taki wi abi krosi fu weri. Yu e bribi dati?—

San a pipel ben prakseri di Yesus ben kaba taki?— Bijbel e taki dati den ben fruwondru fu a fasi fa a ben e gi leri. A ben moi srefisrefi fu arki en. Den sani di a ben taki ben yepi sma fu du san bun.​—Mateyus 7:28.

 Fu dati ede a prenspari srefisrefi taki wi e teki leri fu Yesus. Yu sabi fa wi kan du dati?— We, den wortu fu en skrifi na ini wan buku. Yu sabi sortu buku na dati?— A buku dati na a Santa Bijbel. Disi wani taki dati wi kan arki Yesus te wi e poti prakseri na den sani di wi e leisi na ini Bijbel. Fu taki en leti, Bijbel abi wan tumusi moi tori di e fruteri fa Gado srefi taigi wi fu arki Yesus. Meki wi luku san ben pasa.

Wan dei, Yesus tyari dri mati fu en go te na tapusei fu wan bergi. Den mati dati ben nen Yakobus, Yohanes, nanga Petrus. Bakaten wi sa leri furu sani ete fu den man disi, fu di den ala dri ben de bun mati fu Yesus. Ma na a spesrutu okasi disi, Yesus en fesi bigin brenki srefisrefi. Boiti dati, den krosi fu en ben brenki neleki leti, soleki fa yu kan si dyaso na tapu a prenki.

Bakaten, Yesus nanga den mati fu en yere wan sten di ben komoto fu hemel. A sten ben taki: „Disi na mi Manpikin, a lobiwan di mi feni bun; arki en” (Mateyus 17:1-5). Yu sabi fu suma a sten dati ben de?— A ben de a sten fu Gado! Iya, na Gado ben taigi den fu arki en Manpikin.

Fa a de nanga wi na ini a ten disi? Wi sa gi yesi na Gado? Wi sa arki en Manpikin, a Bigi Leriman?— Disi na wan sani di wi alamala musu du. Yu sabi ete fa wi kan du dati?—

Iya, wi kan arki a Manpikin fu Gado te wi e leisi den Bijbel tori di e taki fu a libi fu Yesus. A Bigi Leriman wani fruteri wi furu tumusi moi sani. Yu sa prisiri fu kon sabi den sani disi di skrifi na ini Bijbel. Èn yu sa kon de koloku tu te yu e fruteri den mati fu yu den bun sani di yu e leri.