EMINYAKENI lengetulu kwa-2 000 leyendlulile, kwatalwa umntfwana lokhetseke kakhulu futsi wakhula waba ngumuntfu lomkhulu kunabo bonkhe labake baphila. Ngaleso sikhatsi, bekusete tindiza nobe timoto, futsi bekusete ema-TV, ema-computer kanye ne-Internet.

Lomntfwana wetsiwa libito kwatsiwa nguJesu. Waba ngumuntfu lomkhulu kunabo bonkhe labake baphila emhlabeni. Jesu waphindze waba ngumfundzisi lobendlula bonkhe. Bekakhona kuchaza tintfo letilukhuni ngendlela lecondzakala melula.

Jesu bekafundzisa bantfu nome ngukuphi lapho bekabatfola khona. Bekabafundzisa eceleni kwelwandle nasetikebheni. Bekabafundzisa emakhaya abo ngisho nalapho asendleleni. Jesu bekete imoto futsi bekangahambi ngebhasi nobe sitimela. Bekahamba ngetinyawo etindzaweni letehlukahlukene afundzisa bantfu.

Sifundza tintfo letinyenti kulabanye bantfu. Kodvwa singafundza ngetintfo letibaluleke kakhulu kuMfundzisi Lomuhle Kakhulu longuJesu. Emavi aJesu atfolakala eBhayibhelini. Nasiva lawo mavi eBhayibhelini, kuba shengatsi Jesu ukhuluma natsi.

Kungani Jesu bekanguMfundzisi Lomuhle Kakhulu? Lesinye sizatfu kutsi Jesu naye wafundziswa. Bekati kutsi kubaluleke kangakanani kulalela. Kodvwa Jesu bekalalela bani? Ngubani lobekafundzise Jesu?— BekunguBabe wakhe. Babe waJesu nguNkulunkulu.

 Ngesikhatsi Jesu asengaketi emhlabeni, bekaphila naNkulunkulu ezulwini. Ngaleso sizatfu, Jesu bekehlukile kunobe ngabe ngumuphi umuntfu ngobe waphila ezulwini asengaketi emhlabeni. Nakasasezulwini, Jesu bekayiNdvodzana lelalelako, alelela Babe wakhe. Ngako Jesu wakhona kufundzisa bantfu loko lebekakufundze kuNkulunkulu. Nawe ungalingisa Jesu ngekutsi ulalele make wakho nababe wakho.

Lesinye sizatfu lesenta Jesu waba nguMfundzisi Lomuhle Kakhulu kutsi bekabatsandza bantfu. Bekafisa kusita bantfu bafundze ngaNkulunkulu. Jesu bekabatsandza bantfu labadzala, nebantfwana. Bantfwana nabo bebatsandza kuba naJesu ngobe bekakhuluma nabo aphindze abalalele.

Ngalelinye lilanga, labanye batali baletsa bantfwana babo labancane kuJesu. Kodvwa bangani baJesu bebacabanga kutsi uMfundzisi Lomuhle Kakhulu bekete sikhatsi sekukhuluma nebantfwana labancane. Ngako bacela labatali nalabantfwana kutsi bahambe. Kodvwa-ke, yini Jesu layisho?— Jesu watsi: “Bayekeleni bantfwana bete kimi; ningabavimbi.” Kuyacaca kutsi Jesu  bekafuna labantfwana labancane bete kuye. Ngisho nobe bekahlaniphe kakhulu futsi angumuntfu lobalulekile, Jesu watinika sikhatsi sekufundzisa bantfwana labancane.​—Makho 10:13, 14.

Uyati kutsi kungani Jesu afundzisa bantfwana waphindze wabalalela? Lesinye sizatfu kutsi bekafuna kubajabulisa ngekubatjela tintfo letimayelana naNkulunkulu, Babe wakhe wasezulwini. Wena ungabajabulisa njani labanye bantfu?— Ngekubatjela tintfo lotifundzile ngaNkulunkulu.

Ngalesinye sikhatsi, Jesu wasebentisa umntfwana lomncane kuze afundzise bangani baKhe sifundvo lesibalulekile. Watsatsa umntfwana wammisa emkhatsini webafundzi baKhe lebekubalandzeli baKhe. Ngemuva kwaloko, Jesu watsi lamadvodza lamadzala kufanele ashintje indlela lacabanga ngayo futsi afanane nalomntfwana lomncane.

Bekasho kutsini Jesu ngalamavi? Indvodza lendzala nome umntfwana losakhula khulile angafanana njani nemntfwana lomncane?— Umntfwana lomncane akatati tintfo letinyenti njengemuntfu lomdzala, futsi uhlale anesifiso sekufundza. Ngaleyondlela, Jesu bekatsi bafundzi bakhe bekufanele batfobeke njengebantfwana labancane. Kuliciniso kutsi sonkhe singafundza tintfo letinyenti kulabanye bantfu. Kufanele sati nekutsi timfundziso taJesu tibaluleke kakhulu kwendlula imibono yetfu.​—Matewu 18:1-5.

Lesinye sizatfu lesenta Jesu waba nguMfundzisi Lomuhle Kakhulu kutsi bekakwati kubeka tintfo ngendlela letawujabulisa  bantfu. Wachaza tintfo ngendlela lemelula nalecacile. Wakhuluma ngetinyoni, ngetimbali nangalokunye lokuvamile kuze asite bantfu bacondze tintfo letimayelana naNkulunkulu.

Ngalelinye lilanga ngesikhatsi Jesu asentsabeni, bantfu labanyenti beta kuye. Jesu wahlala phansi, wase ubeka inkhulumo nome inshumayelo, njengobe ubona kulesitfombe. Lenkhulumo yatiwa ngekutsi yiNshumayelo yaseNtsabeni. Jesu watsi: ‘Nakisisani tinyoni; atilimi, ativuni futsi tite tindzawo tekubeka kudla. Kodvwa njengobe Nkulunkulu asezulwini uyatondla. Nine anikabaluleki yini kwendlula tona?’

Jesu waphindze watsi: ‘Fundzani endleleni timbali tesiganga letikhula ngayo; atikhandleki. Kodvwa bukani kutsi tinhle kangakanani! Ngisho neNkhosi Solomoni lebeyinjingile ayizange yembatse kahle kwengca letimbali. Ngako nangabe Nkulunkulu atinakekela letimbali tesiganga, ngeke yini aninakekele nani?’​—Matewu 6:25-33.

 Ngusiphi sifundvo Jesu lebekasifundzisa?— Bekangafuni kutsi sikhatsateke ngekutsi sitakutfolaphi kudla nobe tintfo tekwembatsa. Nkulunkulu uyati kutsi siyatidzinga tonkhe letintfo. Jesu akazange atsi kufanele singasebenti kuze sitfole kudla nekwekwembatsa. Kunaloko, watsi kufanele sente kukhonta Nkulunkulu kute kucala ekuphileni kwetfu. Nasenta loko, Nkulunkulu utasinakekela ngekudla kanye nangetintfo tekugcoka. Uyakukholelwa yini loko?—

Yini bantfu labayicabanga ngemuva kwekutsi Jesu sekayicedzile inkhulumo yakhe?— LiBhayibheli litsi bamangaliswa yindlela yakhe  yekufundzisa. Bekujabulisa kakhulu kumlalela. Loko lakusho kwasita bantfu kutsi bente lokuhle.​—Matewu 7:28.

Kubaluleke kakhulu kutsi sifundze kuJesu. Singafundza njani kuye?— Ecinisweni, sinemavi lashiwo nguye labhalwe encwadzini. Nguyiphi lencwadzi?— Yincwadzi Lengcwele liBhayibheli. Loko kusho kutsi singamlalela Jesu ngekunaka tintfo lesitifundza eBhayibhelini. LiBhayibheli linetindzaba letijabulisako letimayelana nendlela Nkulunkulu lasitjela ngayo kutsi singamlalela njani Jesu. Asesibone kutsi wakwenta njani loko.

Ngalelinye lilanga, Jesu watsatsa bangani bakhe labatsatfu wenyukela nabo etulu entsabeni. Emabito abo bekuboJakobe, Johane naPhetro. Sitawufundza kabanti ngalamadvodza kulencwadzi, njengobe omatsatfu abebangani baJesu labakhulu. Kodvwa ngalesikhatsi sebasetulu entsabeni, buso bakhe bacala kukhatimula. Timphahla takhe nato takhanya kakhulu njengobe ubona kulesitfombe.

Ngemuva kwaloko, Jesu nebangani bakhe beva livi lelivela ezulwini. Lelivi belitsi: “Lena yiNdvodzana yami letsandzekako nalengiyemukele; yilaleleni.” (Matewu 17:1-5) Belilabani lelivi?— Bekulivi laNkulunkulu. NguNkulunkulu lowatsi kufanele balalele iNdvodzana yakhe.

Kutsiwani ngatsi lamuhla? Sitamlalela yini Nkulunkulu kanye neNdvodzana yakhe, lenguMfundzisi Lomuhle Kakhulu?— Nguloko sonkhe lokudzingeka sikwente. Singakwenta njani loko?—

Kuliciniso, singayilalela iNdvodzana yaNkulunkulu ngekufundza tindzaba letiseBhayibhelini letikhuluma ngekuphila kwayo. Tinyenti tintfo letijabulisako uMfundzisi Lomuhle Kakhulu lafisa kusitjela tona. Utakujabulela kufundza leto tintfo letibhalwe eBhayibhelini. Kutakujabulisa nekutitjela bangani bakho letintfo letinhle lotifundzako.