LAKA hake ‘i he ta‘u ‘e ua afe kuo maliu atú, na‘e fā‘ele‘i ai ha ki‘i tama makehe ‘aupito ‘a ia na‘e tupu hake ‘o hoko ko e mo‘unga‘i tangata lahi taha kuo mo‘ui maí. Na‘e ‘ikai ha taha ‘e mo‘ui ‘i he taimi fuoloa ko iá na‘e ‘i ai ha‘ane vakapuna pe me‘alele. Na‘e ‘ikai ke ‘i ai ha ngaahi me‘a ‘o hangē ko e televīsoné, komipiutá pea mo e ‘Initanetí.

Ko e ki‘i tamá na‘e ‘oange kiate ia ‘a e hingoa ko e Sīsū. Na‘á ne hoko ko e tangata poto taha kuo faifai pea ‘a‘eva ‘i he māmaní. Na‘e toe hoko foki ‘a Sīsū ko e faiako lelei tahá. Na‘á ne fakamatala‘i ‘a e ngaahi me‘a na‘e faingata‘á ‘i he ngaahi founga na‘e ‘ai ai ‘a e me‘a ko iá ke faingofua ‘a hono mahino‘í.

Na‘e ako‘i ‘e Sīsū ‘a e kakaí ‘i he feitu‘u kotoa pē na‘á ne fetaulaki ai mo kinautolú. Na‘á ne ako‘i kinautolu ‘i he matātahí pea ‘i he ngaahi vaká. Na‘á ne ako‘i kinautolu ‘i honau ngaahi ‘apí pea ‘i he fefononga‘akí. Na‘e ‘ikai ke ‘i ai ha kā ‘a Sīsū, pea na‘e ‘ikai te ne fononga ‘i ha pasi pe lēlue. Na‘e lue ‘a Sīsū mei he feitu‘u ki he feitu‘u ‘o ako‘i ai ‘a e kakaí.

‘Okú ta ako ‘a e ngaahi me‘a lahi mei he kakai kehé. Ka ‘e lava ke ta ako ‘a e ngaahi me‘a mātu‘aki mahu‘inga tahá mei he Faiako Lahi ko Sīsuú. ‘Oku ma‘u ‘a e ngaahi lea ‘a Sīsuú ‘i he Tohitapú. ‘I he‘eta fanongo ki he ngaahi lea ko iá mei he Tohitapú, ‘oku hangē ia ne lea mai ‘a Sīsū kia kitauá.

Ko e hā na‘e hoko ai ‘a Sīsū ko ha Faiako Lahí? Ko e ‘uhinga ‘e taha, he ko Sīsuú tonu na‘e ako‘i. Pea na‘á ne ‘ilo‘i ‘a e mātu‘aki mahu‘inga ko ia ke fanongó. Ka ko hai na‘e fanongo ki ai ‘a Sīsuú? Ko hai na‘á ne ako‘i iá?— Ko ‘ene Tamaí. Pea ko e Tamai ‘a Sīsuú ko e ‘Otuá.

Ki mu‘a ke hoko mai ki he māmaní ko ha tangatá, na‘e nofo ‘a Sīsū ‘i hēvani mo e ‘Otuá. Ko ia, na‘e kehe ‘a Sīsū mei he kau tangata kehé koe‘uhi  na‘e ‘ikai toe ‘i ai ha tangata kehe na‘e nofo ‘i hēvani ki mu‘a ke fā‘ele‘i mai ki he māmaní. ‘I hēvani, na‘e hoko ai ‘a Sīsū ko ha ‘Alo lelei, ko ha tokotaha na‘e fakaongo ki he‘ene Tamaí. Ko ia na‘e malava ai ‘e Sīsū ke ako‘i ki he kakaí ‘a e me‘a na‘á ne ako mei he ‘Otuá. ‘I ho‘o fanongo ki ho‘o tamaí mo ho‘o fa‘eé, ‘e malava ai ke ke fa‘ifa‘itaki kia Sīsū.

Ko e toe ‘uhinga ‘e taha na‘e hoko ai ‘a Sīsū ko ha Faiako Lahí he na‘á ne ‘ofa ‘i he kakaí. Na‘á ne loto ke tokoni‘i ‘a e kakaí ke nau ako ‘o fekau‘aki mo e ‘Otuá. Na‘e ‘ofa ‘a Sīsū ‘i he kakai lalahí, ka na‘á ne toe ‘ofa foki ‘i he fānaú. Pea na‘e sai‘ia ‘a e fānaú ke ‘ia Sīsū koe‘uhí he na‘á ne talanoa kia kinautolu mo fanongo kia kinautolu.

‘I he ‘aho ‘e taha, na‘e ‘omai ai ‘e he ngaahi mātu‘a ‘e ni‘ihi ‘enau fānau īkí kia Sīsū. Ka na‘e fakakaukau ‘a hono ngaahi kaume‘á ‘ona ia ‘oku fu‘u femo‘uekina ‘a e Faiako Lahí ke talanoa mo e fānau īkí. Ko ia, na‘a nau fekau‘i kinautolu ke nau ō. Ka ko e hā na‘e lea‘aki ‘e Sīsuú?— Na‘e pehē ‘e Sīsū: ‘Tuku pē ‘a e tamaikí ke nau ha‘u kiate au; ‘oua ‘e ta‘ofi kinautolu.’ ‘Io, na‘e fiema‘u ‘e Sīsū ‘a e fānau īkí ke nau ‘alu ange kiate ia. Ko ia, neongo ko ha tangata poto lahi mo mātu‘aki mahu‘inga ia, na‘e vahe‘i ‘e Sīsū ha taimi ke ako‘i ai ‘a e fānau īkí.—Maake 10:13, 14.

 ‘Okú ke ‘ilo ‘a e ‘uhinga na‘e ako‘i ai ‘e Sīsū ‘a e fānaú mo fanongo kia kinautolú? Ko e ‘uhinga ‘e tahá, he na‘á ne loto ke ‘ai kinautolu ke nau fiefia ‘aki hono fakahā kia kinautolu ‘a e ngaahi me‘a fekau‘aki mo e ‘Otuá, ‘a ‘ene Tamai fakahēvaní. ‘E lava fēfē ke ke ‘ai ke fiefia ‘a e kakaí?— ‘Aki hono fakahā kia kinautolu ‘a e ngaahi me‘a kuó ke ako ‘o fekau‘aki mo e ‘Otuá.

‘I he taimi ‘e taha, na‘e ngāue‘aki ai ‘e Sīsū ha ki‘i tama ke ako‘i ki Hono ngaahi kaume‘á ha lēsoni mahu‘inga. Na‘á ne ‘omi ‘a e ki‘i tamá ‘o fokotu‘u ia ‘i he lotolotonga ‘o ‘Ene kau ākongá, ‘a ia ko Hono kau muimuí. Pea na‘e pehē ai ‘e Sīsū kuo pau ke liliu ‘e he kau tangata lalahi ko ení ‘a ‘enau ngaahi foungá pea hoko ‘o hangē ko e ki‘i tama ko ení.

Ko e hā na‘e ‘uhinga ki ai ‘a Sīsū ‘i he‘ene lea‘aki iá? ‘Okú ke ‘ilo ‘a e founga ‘oku totonu ke hoko ai ha tangata lahi, pe na‘a mo ha ki‘i tama lahilahi hake, ko ha ki‘i tama kei si‘í?— Sai, ko ha ki‘i tama kei si‘i ‘oku ‘ikai tatau ‘ene ‘iló ‘a‘ana ia mo ha tokotaha lahi pea ‘oku loto-lelei ia ke ako. Ko ia, na‘e pehē ‘e Sīsuú ko ‘ene kau ākongá na‘e fiema‘u ke nau anga-fakatōkilalo, ‘o hangē ko e fānau īkí. ‘Io, ‘e malava ke tau ako kotoa ‘a e ngaahi me‘a lahi mei he kakai kehé. Pea ‘oku totonu ke tau ‘ilo‘i kotoa ko e ngaahi akonaki ‘a Sīsuú ‘oku mahu‘inga ange ia ‘i he‘etau ngaahi fakakaukau ‘atautolú.—Mātiu 18:1-5.

Ko e toe ‘uhinga ‘e taha na‘e hoko ai ‘a Sīsū ko ha Faiako Lahí he na‘á ne ‘ilo ‘a e founga ke ‘ai ai ‘a e ngaahi me‘á ke fakamānako ki he kakaí. Na‘á ne fakamatala‘i ‘a e ngaahi me‘á ‘i ha founga faingofua mo mahino. Na‘á ne lea ‘o fekau‘aki mo e fanga manupuná mo e matala‘i‘akaú pea mo e ngaahi me‘a anga-maheni kehé ke tokoni‘i ‘aki ‘a e kakaí ke nau ma‘u ‘a e mahino ‘o fekau‘aki mo e ‘Otuá.

 ‘I ha ‘aho ‘e taha ‘a ia na‘e ‘i he tafa‘aki mo‘ungá ai ‘a Sīsū, na‘e ha‘u kiate ia ha fu‘u kakai tokolahi. Na‘e tangutu hifo ‘a Sīsū ‘o ne fai ha lea, pe malanga kia kinautolu, ‘o hangē ko ia ‘oku lava ke ke sio ki ai ‘i hení. Ko e lea ko ení ‘oku ui ia ko e Malanga he Mo‘ungá. Na‘á ne pehē: ‘Vakai ki he fanga manupuna ‘i he ‘ataá. ‘Oku ‘ikai te nau tō ha tenga. ‘Oku ‘ikai te nau fa‘oaki me‘akai ‘i ha ngaahi fale. Ka ko e ‘Otua ‘i he langí ‘okú ne fafanga kinautolu. ‘Ikai ‘oku mou mahu‘inga ange ‘ia kinautolu?’

Na‘e toe pehē foki ‘e Sīsū: ‘Mou ako mei he ngaahi lile ‘o e ngoué. ‘Oku nau tupu ‘o ‘ikai ha ngāue. Pea vakai atu ki honau faka‘ofo‘ofá! Na‘a mo Tu‘i Solomone koloa‘ia na‘e ‘ikai faka‘ofo‘ofa ange hono teungá ‘i he ngaahi lile ‘o e ngoué. Ko ia, kapau ‘oku tokanga‘i ‘e he ‘Otuá ‘a e ngaahi matala‘i‘akau ‘oku tupú, ‘ikai te ne tokanga‘i foki mo kimoutolu?’—Mātiu 6:25-33.

‘Okú ke mahino‘i ‘a e lēsoni na‘e ako‘i ‘e Sīsuú?— Na‘e ‘ikai te ne fiema‘u ke ta hoha‘a pe te ta ma‘u mei fē ha me‘akai ke kai pe ko ha vala ke  tui. ‘Oku ‘afio‘i ‘e he ‘Otuá ‘okú ta fiema‘u ‘a e ngaahi me‘a kotoa ko iá. Na‘e ‘ikai ke pehē ‘e Sīsū ia ke ‘oua te ta ngāue ke ma‘u ha me‘akai mo ha vala. Ka na‘á ne pehē ‘oku totonu ke ta fakamu‘omu‘a ‘a e ‘Otuá. Kapau te ta fai ia, ‘e fakapapau‘i ‘e he ‘Otuá ‘okú ta ma‘u ‘a e me‘akai ke kai mo e vala ke tui. ‘Okú ke tui ki he me‘a ko iá?—

‘I he ‘osi ‘a e lea ‘a Sīsuú, na‘e fēfē ‘a e fakakaukau ‘a e kakaí?— ‘Oku pehē ‘e he Tohitapú na‘a nau ofo ‘i he‘ene founga faiakó. Na‘e fakamānako ‘aupito ke fanongo kiate ia. Ko e me‘a na‘á ne lea‘akí na‘e tokoni‘i ai ‘a e kakaí ke nau fai ‘a e me‘a ‘oku totonú.—Mātiu 7:28.

 Ko ia, ‘oku mātu‘aki mahu‘inga ke ta ako meia Sīsū. ‘Okú ke ‘ilo pe ‘e lava fēfē ke ta fai ia?— Sai, ‘okú ta ma‘u ‘a ‘ene ngaahi leá kuo hiki ia ‘i ha tohi. ‘Okú ke ‘ilo pe ko e hā ‘a e tohi ko iá?— Ko e Tohitapu Mā‘oni‘oní. ‘Oku ‘uhinga ení, ‘e lava ke ta fanongo kia Sīsū ‘aki ‘a e tokanga ki he ngaahi me‘a ‘okú ta lau ‘i he Tohitapú. Ko hono mo‘oní, ‘oku ‘i he Tohitapú ha talanoa fakafiefia ‘o fekau‘aki mo e founga na‘e fakahā tonu mai ai ‘e he ‘Otuá kia kitaua ke ta fakaongo kia Sīsuú. Ta sio angé ki he me‘a na‘e hokó.

‘I he ‘aho ‘e taha, na‘e ‘ave ai ‘e Sīsū ha toko tolu ‘o hono ngaahi kaume‘á ki ‘olunga ki ha mo‘unga. Ko honau hingoá ko Sēmisi, Sione mo Pita. Te ta ako lahi ange ki he kau tangatá ni ‘amui ange, he ko e toko tolú ni kotoa ko e ngaahi kaume‘a ofi ‘o Sīsū. Ka ‘i he fo‘i taimi makehe ko ení, na‘e kamata ke ulo ngingila ai ‘a e fofonga ‘o Sīsuú. Pea ko hono teungá na‘e hoko ia ‘o ngingila hangē ko e māmá, ‘o hangē ko ia ‘okú ke sio ki ai ‘i hení.

Hili iá, na‘e fanongo ‘a Sīsū mo hono ngaahi kaume‘á ki ha le‘o mei hēvani. Na‘e pehē mai: ‘Ko hoku ‘Alo ‘ofa‘angá eni ‘a ia ‘oku ou fiemālie lahi aí; mou fakaongo kiate ia.’ (Mātiu 17:1-5, PM) ‘Okú ke ‘ilo pe ko e le‘o nai ia ‘o hai?— Ko e le‘o ia ‘o e ‘Otuá! ‘Io, ko e ‘Otuá ia na‘e lea hifo ke nau fanongo ki hono ‘Aló.

Fēfē kitaua he ‘aho ní? Te ta talangofua ki he ‘Otuá ‘o fakaongo ki hono ‘Aló, ko e Faiako Lahí?— Ko e me‘a ia ‘oku fiema‘u kitautolu kotoa ke tau faí. ‘Okú ke manatu‘i ‘a e founga ‘e lava ke ta fai ai iá?—

‘Io, ‘e lava ke ta fanongo ki he ‘Alo ‘o e ‘Otuá ‘aki hono lau ‘a e ngaahi fakamatala faka-Tohitapu ki he‘ene mo‘uí. ‘Oku lahi ‘aupito ‘a e ngaahi me‘a lelei ‘a e Faiako Lahí ke fakahā mai kia kitaua. Te ke fiefia ‘i hono ako ‘a e ngaahi me‘a ko eni ‘oku hiki ‘i he Tohitapú. Pea ‘e ‘omai foki ‘a e fiefia kiate koe kapau te ke tala ki ho ngaahi kaume‘á ‘a e ngaahi me‘a lelei ‘okú ke akó.