EKA malembe lama tlulaka magidi mambirhi lama hundzeke, ku velekiwe n’wana wo hlawuleka swinene, loyi a kuleke kutani a va nghwazi leyi tlulaka hinkwato leti tshameke ti va kona. Enkarhini wolowo, a a nga ri kona munhu loyi a nga ni xihaha-mpfhuka kumbe movha. A ku ri hava swilo swo fana ni tithelevhixini, tikhompyuta ni Internet.

N’wana loyi u thyiwe vito ra Yesu. A a tlharihile swinene ku tlula vanhu hinkwavo lava tshameke va hanya emisaveni. Yesu u tlhele a va mudyondzisi lonkulu. A a hlamusela swilo swo tika hi ndlela leyi twisisekaka swinene.

Hinkwako laha Yesu a a hlangana kona ni vanhu, a a va dyondzisa. A a va dyondzisa etimbuweni ta lwandle ni le mabyatsweni. A a va dyondzisa emakaya niloko a ri endleleni. Yesu a a nga ri na movha naswona a a nga khandziyi bazi kumbe xitimela. Yesu a a famba hi milenge loko a ri karhi a dyondzisa vanhu.

Hi dyondza swilo swo tala eka vanhu van’wana. Kambe hi nga dyondza swilo swa nkoka swinene eka Yesu, Mudyondzisi Lonkulu. Marito ya Yesu ma kumeka eBibeleni. Loko hi hlaya marito wolawo eBibeleni, swi fana niloko Yesu a vulavula na hina.

Ha yini Yesu a a ri Mudyondzisi Lonkulu swonghasi? Xivangelo xin’wana hileswaku Yesu hi byakwe u dyondzisiwile. Naswona a a swi tiva leswaku ku yingisa i nchumu wa nkoka. Kambe Yesu a a yingisa mani? I mani la n’wi dyondziseke?— A a dyondzisiwa hi Tata wa yena. Tata wa Yesu i Xikwembu.

Loko Yesu a nga si ta laha misaveni a ta va munhu wa nyama, a a  hanya etilweni ni Xikwembu. Kutani Yesu a a hambanile ni vanhu van’wana hikuva ku hava munhu un’wana loyi a rhangeke a hanya etilweni a nga si velekiwa laha emisaveni. Loko a ri etilweni Yesu a a ri N’wana lonene, loyi a yingisaka Tata wa yena. Hikwalaho Yesu u swi kotile ku dyondzisa vanhu leswi a swi dyondzeke eka Xikwembu. Na wena u nga tekelela Yesu hi ku yingisa tata wa wena ni mana wa wena.

Xivangelo xin’wana lexi endleke Yesu a va Mudyondzisi Lonkulu hileswi a a rhandza vanhu. A a lava ku pfuna vanhu leswaku va tiva Xikwembu. Yesu a a nga rhandzi vanhu lavakulu ntsena, kambe a a rhandza ni vana. Naswona vana a va tsakela ku tshama na Yesu hikuva a a vulavula na vona a tlhela a va yingisela.

Siku rin’wana vatswari van’wana va tise vana va vona lavatsongo eka Yesu. Kambe vanghana va yena a va anakanya leswaku Mudyondzisi Lonkulu u khomeke ngopfu hi ntirho lerova a a nga ta swi kota ku vulavula ni vana lavatsongo. Hiloko va va tlherisa. Kambe Yesu u te yini?— Yesu u te: “Tshikani vana lavatsongo va ta eka mina; mi nga ringeti ku va sivela.” Ina, Yesu a a lava leswaku vana lavatsongo va ta eka yena.  Hambileswi a a tlharihile swinene naswona a a ri munhu wo hlawuleka, Yesu u tinyike nkarhi wo dyondzisa vana lavatsongo.—Marka 10:13, 14.

Xana wa swi tiva leswaku hikwalaho ka yini Yesu a dyondzise vana a tlhela a va yingisela? Xivangelo xin’wana hileswaku a a lava ku va tsakisa hi ku va dyondzisa hi ta Tata wa yena wa le tilweni, ku nga Xikwembu. Xana u nga va tsakisa njhani vanhu?— U nga va tsakisa hi ku va byela swilo leswi u swi dyondzeke malunghana ni Xikwembu.

Siku rin’wana, Yesu u tirhise n’wana lontsongo ku dyondzisa vanghana va Yena dyondzo ya nkoka. U teke n’wana a n’wi yimisa exikarhi ka vadyondzisiwa va Yena, lava a va ri valandzeri va Yena. Kutani Yesu a vula leswaku vanhu lava lavakulu va fanele va cinca tindlela ta vona, va fana ni n’wana loyi.

Xana Yesu a a vula yini? Xana wa swi tiva leswaku munhu lonkulu kumbe n’wana lonkulunyana, a nga fana ni n’wana lontsongo hi ndlela yihi?— Phela, n’wana lontsongo a nga na vutivi ku fana ni munhu lonkulu naswona wa swi navela ku dyondza. Yesu a a vula leswaku vadyondzisiwa va yena va fanele va titsongahata ku fana ni n’wana lontsongo. Ina, hinkwerhu hi nga dyondza swilo swo tala eka vanhu van’wana. Naswona hinkwerhu hi fanele hi swi xiya leswaku tidyondzo ta Yesu i ta nkoka swinene ku tlula leswi hina hi swi anakanyaka.—Matewu 18:1-5.

Xivangelo xin’wana lexi endleke leswaku Yesu a va Mudyondzisi Lonkulu hileswi a a swi kota ku endla leswaku swilo swi tsakisa vanhu. A a hlamusela swilo hi ndlela leyi olovaka ni leyi kongomeke. A a vulavula  hi tinyenyana ni swiluva ni swilo swin’wana leswi tolovelekeke leswaku a endla vanhu va twisisa rungula ra Xikwembu.

Siku rin’wana loko Yesu a ri entshaveni, vanhu vo tala va te eka yena. Yesu u tshame ehansi a nyikela nkulumo, a vulavula na vona hilaha swi kombisiweke hakona laha. Nkulumo leyi yi vitaniwa Dyondzo ya le Ntshaveni. U vulavule na vona a ku: ‘Langutani tinyenyana ta tilo. A ti byali mbewu. A ti hlengeleti swakudya eswitlatini. Kambe Xikwembu xa le tilweni xa ti wundla. Xana a mi va nkoka ku ti tlula?’

Yesu u tlhele a ku: ‘Dyondzani eka makhon’wa ya nhova. Ma kula hambileswi ma nga tirhiki. Vonani ndlela leyi ma sasekeke ha yona! Hambi ku ri Hosi Solomoni la fuweke, a nga ambalanga a saseka ku tlula makhon’wa ya nhova. Kutani, loko Xikwembu xi swi khathalela swiluva leswi milaka, xana a xi nge mi khathaleli na n’wina?’—Matewu 6:25-33.

Xana wa yi twisisa dyondzo leyi Yesu a a yi dyondzisa?— A a nga lavi leswaku hi vilela hi leswaku hi ta swi kuma kwihi swakudya kumbe  swiambalo. Xikwembu xa swi tiva leswaku swilo leswi hinkwaswo ha swi lava. Yesu a a nga vuli swona leswaku hi nga tirhi leswaku hi ta xava swakudya ni swiambalo. Kambe a a vula leswaku hi fanele hi rhangisa Xikwembu. Loko hi endla sweswo, Xikwembu xi ta hi pfuna leswaku hi kuma swakudya ni swiambalo. Xana wa swi tshemba sweswo?—

Loko Yesu a heta ku vulavula, xana vanhu va angule njhani?— Bibele yi vula leswaku va hlamarisiwe hi ndlela leyi a dyondziseke ha yona. A swi tsakisa swinene ku n’wi yingisela. Leswi a swi vuleke swi pfune vanhu leswaku va endla leswi lulameke.—Matewu 7:28.

 Kutani ke, i swa nkoka leswaku hi dyondza eka Yesu. Xana wa swi tiva leswaku hi nga swi endlisa ku yini sweswo?— Lexi tsakisaka, marito yakwe ma tsariwile ebukwini. Xana wa yi tiva buku ya kona?— I Bibele yo Kwetsima. Leswi swi vula leswaku hi nga yingisa Yesu hi ku tirhisa swilo leswi hi swi hlayaka eBibeleni. Kahle-kahle, Bibele yi ni rungula leri tsakisaka leri ha rona Xikwembu hi xoxe xi hi byelaka leswaku hi yingisa Yesu. A hi kambisiseni xiendlakalo xa kona.

Siku rin’wana Yesu u teke vanghana va yena vanharhu a ya na vona ehenhla ka ntshava. Mavito ya vona i Yakobo, Yohane na Petro. Hi ku famba ka nkarhi hi ta dyondza swo tala malunghana ni vavanuna lava, tanihi leswi havanharhu ka vona a va ri vanghana va Yesu lavakulu. Kambe eka xiendlakalo lexi xo hlawuleka, xikandza xa Yesu xi sungule ku vangama swinene. Naswona swiambalo swa yena swi sungule ku vangama ku kota dyambu, hilaha u swi vonaka hakona laha.

Endzhaku ka sweswo, Yesu ni vanghana va yena va twe rito leri humaka etilweni. Ri te: “Loyi i N’wananga, la rhandzekaka, loyi ndzi n’wi amukeleke; n’wi yingiseni.” (Matewu 17:1-5) Xana wa swi tiva leswaku a ku ri rito ra mani leri?— A ku ri rito ra Xikwembu! Ina, a ku ri Xikwembu lexi vuleke leswaku va fanele va yingisa N’wana wa xona.

Ku vuriwa yini hi hina namuntlha? Xana hi ta swi endla leswi Xikwembu xi hi byelaka swona, hi yingisa N’wana wa xona, loyi a nga Mudyondzisi Lonkulu?— Leswi hi swona swi languteriweke eka hina hinkwerhu. Xana wa ha swi tsundzuka leswaku leswi hi nga swi endlisa ku yini?—

Ina, hi nga yingisa N’wana wa Xikwembu hi ku hlaya rungula ra le Bibeleni, leri vulavulaka hi vutomi byakwe. Swi tele swilo leswi Mudyondzisi Lonkulu a nga hi byelaka swona. U ta swi tsakela ku dyondza swilo leswi, leswi tsariweke eBibeleni. Naswona u ta kuma ntsako loko wo byela vanghana va wena hi swilo leswinene leswi u swi dyondzaka.