RACA jma de chupa mil iza, gule ti baʼduhuiiniʼ gadxepeʼ de xcaadxi baʼduhuiiniʼ, ne ora biniisibe gúcabe ti hombre ni jma risaca ni guyuu dxiqué ne de yanna. Ca dxi que gastiʼ avión nin carru, ne laaca qué ñuu diʼ computadora, tele nin Internet.

Baʼduhuiiniʼ que gulee lácabe laabe Jesús, ne laabe beeda gácabe ti hombre ni jma nuu xpiaaniʼ ni bibani lu Guidxilayú riʼ. Ne laaca gúcabe ti maestru ni jma galán bisiidiʼ, purtiʼ bisiénebe cani nagana ca modo ganda guiene binni.

Jesús bisiidibe binni ratiica guyuube: guriá nisadóʼ, ndaaniʼ canuá, ralidxi binni ne lu neza. Cumu dxiqué gastiʼ carru nin tren la? a pie maʼ zebe sti guidxi para gusiidibe binni.

Zanda guizíʼdinu stale cosa de xtuudxi binni, peru cani jma risaca ca rizíʼdinu cani de Jesús, ti Maestru Ni Jma Nanna Gusiidiʼ. Ora rúʼndanu ndaaniʼ Biblia cani guniʼbe la? zeeda gácani casi ora laapebe niníʼnebe laanu.

Xiñee guca Jesús ti maestru ni jma galán bisiidiʼ yaʼ. Tobi de ca razón ca nga purtiʼ laabe laaca guyuu tu bisiidiʼ laabe. Ne Jesús gunna pabiáʼ nga naquiiñeʼ gucaadiaga. Peru tu bicaadiágabe ne tu bisiidiʼ laabe yaʼ.... Bixhózebe, ne Bixhózebe nga Dios.

Ante gueeda Jesús lu Guidxilayú riʼ, maca bibaninebe Dios guibáʼ. Ngue runi gadxepeʼ laabe de ca hombre que, purtiʼ laasibe nga bibánibe guibáʼ ante gálebe lu Guidxilayú riʼ. Dxi biuube  guibáʼ, nabé bicaadiágabe Bixhózebe. Ngue runi gunda bisiidibe binni ni biziidibe de Dios. Pa lii gucaadiágaluʼ jñaaluʼ ne bixhózeluʼ la? zúniluʼ casi biʼniʼ Jesús.

Jesús gúcabe ti maestru ni jma galán bisiidiʼ pur sti razón: gunnaxhiibe binni ne guyuuláʼdxibe gacanebe laacaʼ guiziidicaʼ de Dios. Jesús gunnaxhiibe binni huaniisi ne laaca gunnaxhiibe cani nahuiiniʼ. Laacaʼ nabé guyuuláʼdxicaʼ chúʼnecaʼ laabe purtiʼ riníʼnebe laacaʼ ne rucaadiágabe laacaʼ.

Ti dxi, caadxi binni yenecaʼ xiiñicaʼ ra nuu Jesús. Peru ca xhamigu Maestru Ni Jma Nanna Gusiidiʼ que guníʼ íquecaʼ nabé nuu xhiiñabe para guiníʼnebe ca baʼduʼ que, ne gúdxicaʼ laacabe guireecabe. Xi biʼniʼ Jesús yaʼ.... Gúdxibe ca xhamígube sicaríʼ: «Cadi ucueeza tu ca baʼdu[huiiniʼ] ca. Zaa gueeda cabe ra nuaaʼ». Ya, Jesús guyuulaʼdxiʼ guidxiña ca baʼduhuiiniʼ que ra nuu. Neca nácabe ti hombre ni guizáʼ nuu xpiaaniʼ ne risaca, guleebe tiempu para gusiidibe laacaʼ (Marcos 10:13, 14).

 Nannuʼ xiñee bisiidiʼ ne bicaadiaga Jesús ca baʼduʼ que la? Tobi de ca razón ca nga purtiʼ guyuuláʼdxibe gusiéchebe laacaʼ, ne pur nga guníʼnebe laacaʼ de Dios, Bixhózebe ni nuu guibáʼ. Yanna lii, ximodo zanda gusiécheluʼ sti binni yaʼ.... Zusiécheluʼ laacabe ora guiníʼneluʼ laacabe ni caziidiluʼ de Dios.

Ti biaje, Jesús biquiiñebe ti baʼduʼ para gusiidibe ca xhamígube xiixa ni nabé risaca. Guluube baʼduʼ que galaa de ca discípulo stibe, o cani zinanda laabe, ne gúdxibe laacaʼ naquiiñeʼ guchaacaʼ modo laacaʼ neca maʼ huaniisicaʼ ne gácacaʼ casi baʼduʼ que.

Xi gucalaʼdxiʼ Jesús niníʼ ne ni biʼniʼ riʼ yaʼ. Ñee nannuʼ ximodo zanda gaca ti binni huaniisi, o ti hombrehuiiniʼ casi ti baʼduʼ la?... Biaa, ti baʼduʼ qué gánnapeʼ stale casi ti binni huaniisi ne riulaʼdxiʼ guiziidiʼ jma. Ya, ni guyuu Jesús ñabi laacabe nga naquiiñeʼ chuláʼdxicabe guiziidicabe jma cásica ti baʼduʼ. Dxandíʼ nga guiranu zanda guizíʼdinu stale de xcaadxi binni. Laaca naquiiñeʼ guiénenu pabiáʼ nga risaca cani bisiidiʼ Jesús que ni riníʼ íquenu (Mateo 18:1-5).

Sti razón ni nuu para guca Jesús ti maestru ni jma galán bisiidiʼ nga purtiʼ biyúbibe modo chulaʼdxiʼ binni cani bisiidibe, ne bisiene chaahuibe cani guniʼbe. Bizeetebe de ca manihuiiniʼ  ripapa ca, ca guieʼ ca ne de stuudxi cosa ni runibiáʼ binni ti gacanebe laacaʼ gánnacaʼ jma de Dios.

Ti dxi, laga nuu Jesús ñee ti dani la? stale binni yeguuya laabe raqué. Casi modo ruuyuʼ lu dibuju riʼ, Jesús guribe ne bidiibe ti libana. Libana que runibiáʼcabe ni casi Libana de lu Dani. Laabe guniʼbe: Laguuyaʼ ca manihuiiniʼ ni ripapa ni nuu guibáʼ ca. Qué riguucaʼ biní ne qué ruchacaʼ troja, peru Dios ni nuu guibáʼ rudii ni gocaʼ. Ñee cadi jma risácatu que laacame la?

Ne laaca guniʼbe: Laguuyaʼ modo rigaa ca liriu ni nuu ndaaniʼ guiʼxhiʼ, qué rúnidicaʼ dxiiñaʼ para iniisicaʼ, ne laguuyadxí pabiáʼ nga sicarú cani. Nin rey Salomón qué ñapa lari guizáʼ sicarú casi laacani. Yanna, pa Dios rapa ca guieʼ guiʼxhiʼ ca, ñee qué zápabe laatu la? (Mateo 6:25-33.)

 Ñee rieʼnuʼ xii nga cusiidiʼ Jesús raríʼ la?... Jesús cadi nuudibe chuʼnu xizaa pur ni guidoʼno o pur ni cuáquinu. Dios nanna caquiiñenu cani. Jesús qué niníʼ diʼ cadi gúninu dxiiñaʼ para guyúbinu ni guidoʼno o ni cuáquinu, sínuque naquiiñeʼ gúninu ni na Dios primeru. Pa gúninu ni la? Dios zudii laanu ni caquiiñenu. Ñee raʼbuʼ zácani zacá la?...

Ora biluxe Jesús libana stiʼ, xi guníʼ ique cani zuba raqué yaʼ.... Biblia na guizáʼ bidxagayaacabe pur modo rusiidibe. Nabé guyuu láʼdxicabe gucaadiágacabe laabe, ne ca conseju que gucané cani binni gúnicaʼ ni jneza (Mateo 7:28).

Nga runi, naquiiñepeʼ guizíʼdinu de Jesús. Nannuʼ ximodo la?... Biaa, ca diidxaʼ ni guniʼbe ca zeeda cani ndaaniʼ ti libru. Xi libru ca yaʼ.... Nga nga Biblia. Zanda gucaadiáganu Jesús pa guiníʼ ique chaahuinu ni rúʼndanu ndaaniʼ Biblia. Ne nuupeʼ ti historia nabé sicarú ni cusiene ximodo gunabaʼ Dios gucaadiáganu Jesús. Sicaríʼ gúcani.

Ti dxi, gudxiʼbaʼ Jesús lu ti dani ne chonna de ca xhamigu: Pedru, Jacobo (Santiagu) ne Juan. Lu stuudxi capítulo ni chigúʼndanu ca zazíʼdinu jma de ca hombre riʼ, purtiʼ laacabe nga cani nabé guca xhamigu Jesús. Peru, casi ruuyuʼ lu dibuju riʼ, dxi que nabé bisaca ni purtiʼ lú Jesús bizaaniʼ ni stálepeʼ, ne xhábabe laaca bizaaniʼ ni stale casi biaaniʼ.

Óraque Jesús ne ca xhamigu binadiágacaʼ ti ridxi de guibáʼ na: «Ndi nga Xiiñe ni nadxiee ne ni rusieche naa. Laucaa diaga laabe» (Mateo 17:1-5). Ñee nannuʼ tu stiʼ ridxi que la?... Ridxi stiʼ Dios ngue. Ya, Dios ngue na gucaadiáganu Xiiñiʼ.

Xi naquiiñeʼ gúninu yaʼ. Ñee zuzúʼbanu stiidxaʼ Dios ne zucaadiáganu Xiiñibe, Maestru Ni Jma Nanna Gusiidiʼ ca la?... Nga nga ni naquiiñeʼ gúninu guiranu. Rietenalaʼdxuʼ ximodo gúninu ni la?...

Biaa, ti modo gucaadiáganu Xiiñiʼ Dios nga gúʼndanu ca historia ni zeeda lu Biblia ra caníʼ de modo bibánibe. Maestru Ni Jma Nanna Gusiidiʼ ca napa stale cosa guizáʼ galán ni gabi laanu, ne zeeda cani ndaaniʼ Biblia. Ziulaʼdxuʼ guiziiduʼ cani, ne laaca ziuuluʼ nayecheʼ pa gábiluʼ ni ca xhamíguluʼ.