TITA kong, buk mene ma imaro loyo?— Lutino mogo yero buk ma loko i kom lee. Mukene giyero buk ma tye ki cal mapol. Kwano bukke magi twero bedo mit.

Ento bukke mabeco loyo i wi lobo-ni aye bukke ma gititiwa lok ada i kom Lubanga. Buk acel ber loyo ki i kin mukene-ni ducu. Tika ingeyo buk meno?— Buk meno aye Baibul.

Pingo Baibul pire tek adada?— Pien oa ki bot Lubanga. Titiwa lok kome ki jami mabeco ma en bitimo piwa. Dok bene nyutu botwa gin ma myero watim me yomo cwinye. Obedo calo waraga mua ki bot Lubanga.

Lubanga onongo twero coyo Baibul ki i polo ci miyo bot dano. Ento en pe otimo meno. Kadi bed tam ducu ma tye i Baibul oa ki bot Lubanga, ento en otiyo ki luticce ma i lobo me coyone.

Lubanga otimo meno nining?— Me ngeyone, tam kong lok man. Ka wawinyo dwan ngat mo ki i redio; dwan meno mogo nongo tye ka a ki bot ngat ma tye ka mabor. Ka waneno telebijon, waneno cal pa dano ma gitye i lobe mukene dok bene wawinyo gin ma gitye ka wacone.

Dano gitwero tuk cito wa i dwe dok bene gitwero cwalo lok ki kunnu i lobo kany. Tika onongo ingeyo meno?— Ka dano twero timo meno, ci Lubanga kono pe twero cwalo lok ki i polo?— Ngene kene ni twero! Dok en otimo meno wacon ma onongo redio nyo telebijon pud gipe bot dano.

 Moses obedo laco ma owinyo ka Lubanga loko. Moses owinyo dwan Lubanga ento onongo pe twero neno kome. Dano milion mapol onongo gitye kunnu i kare ma gin man timme-ni. I nino meno, Lubanga oweko got oyenge dok bene piny omor kun wil calo lut kot. Dano guniang ni Lubanga oloko ento lworo omakogi matek adada. Ci guwaco bot Moses ni: “Pe iwek Lubanga aye olok kwedwa; miyo wato.” Lacen Moses ocoyo piny lok ma Lubanga owaco. Lok ma Moses ocoyogi-ni tye i Baibul.—Nia 20:18-21.

Moses ocoyo bukke abic mukwongo me Baibul. Ento pe en keken aye ma ocoyo Baibul. Lubanga otiyo ki co ma romo 40 me coyo but Baibul. Co magi gukwo yam con, dok tyeko coyo Baibul  otero mwaki mapol. Coyone otero mwaki ma romo 1,600 kulu! Gin me aura aye ni kadi bed ni jo magi pe gurwatte, jami ducu ma gin gucoyo rwatte nitap.

Jo mogo ma Lubanga otiyo kwedgi me coyo Baibul onongo guywek adada. Kadi bed Moses onongo obedo lakwat, en odoko latel wi jo Icrael. Solomon onongo obedo kabaka maryek dok mulony loyo ki i wi lobo i karegi ca. Ento lucoc mukene-ni onongo pe gingene tutwal. Amoc onongo gwoko yadi ma ginyako nyig olam.

Medo i kom meno, lacoc acel me Baibul obedo dokto. Tika ingeyo nyinge?— Nyinge Luka. Lacoc mukene onongo obedo lajog mucoro. Nyinge Matayo. Acel obedo lapilida ma tye ki ngec matut i kom cik me dini pa Lujudaya. En ocoyo bukke mapol me Baibul ma loyo ngat mo keken. Tika ingeyo nyinge?— Nyinge Paulo. Lupwonnye pa Yecu, Petero gin ki Jon, ma bene gucoyo Baibul-li onongo gubedo lumak rec.

Pol pa lucoc magi me Baibul-li gucoyo lok i kom jami ma Lubanga bitimogi i anyim. Gin gungeyo jami magi ma peya gutimme nining?— Lubanga aye omiyo ngecce botgi. En otito botgi gin ma bitimme.

I kare ma Yecu, Lapwony Madit bino i lobo, onongo pol pa bukke me Baibul dong kityeko coyogi woko. Wi myero opo ni Lapwony Madit-ti okwo i polo. En onongo ngeyo gin ma Lubanga otimo. Tika en oye ni Baibul oa ki bot Lubanga?— En oye do.

I kare ma Yecu obedo ka tito lok i kom tic pa Lubanga bot dano, en okwanogi ki i Baibul. Kare mukene en otito botgi lok ma nongo omako i wiye. Yecu bene okeliwa ngec mapol ki bot Lubanga. Yecu owacci: “Atito ki lobo gin ma dong awinyo ki bote.” (Jon 8:26) Yecu owinyo jami mapol ki bot Lubanga pien en okwo kacel ki Lubanga. Dong kakwene ma watwero kwano iye jami magi ma  Yecu owacogi-ni?— Wakwanogi ki i Baibul. Kicoyogi piny botwa me akwana.

Ngene kene ni, i kare ma Lubanga otiyo ki dano me coyo Baibul, gin gucoyo i leb ma gitiyo kwede jwi. Pi meno, pol pa bukke me Baibul kicoyo i leb Ibru, mukene i leb Aram ki dong pole i leb Grik. Kit ma pol pa dano i kare-ni pe gingeyo kwano leb magi-ni, kigonyo Baibul i leb mukene mapat pat. I kare-ni, kiromo kwano but Baibul keken i leb makato 2,260 kulu. Tam kong i kom lok meno! Baibul obedo waraga pa Lubanga bot dano me kabedo ducu. Kadi bed kigonyo tyen mapol, lokke pud a ki bot Lubanga.

Gin ma Baibul waco pire tek botwa. Kicoyo wa yam con. Ento tito botwa jami ma tye ka timme i kare-ni. Dok titiwa  gin ma Lubanga bitimone cokcok-ki i anyim. Gin ma Baibul waco tye me yomcwiny! Miniwa gen me aura mada.

Baibul bene titiwa kit ma Lubanga mito ni wakwo kwede. Titiwa gin maber ki marac. Mitte ni myero in ki an wange man. Baibul titiwa lok i kom dano ma gutimo jami maraco kacel ki gin mutimme i komgi wek wan pe wapot i pekogi-ni. Tito bene botwa lok i kom jo ma gutimo jami matir ki adwogi maber ma gunongo. Ngec magi ducu kicoyogi me konyowa.

Ento wek wanong adwogi maber ki i Baibul, omyero kong wange lagam me lapeny mo acel. Lapenye en ene: Anga ma ominiwa Baibul? In igamo ningo?— Lagamme tye ni, Baibul oa ki bot Lubanga. Dong wan watwero nyutune nining ni waryek?— Ka wawinyo Lubanga ki dok watimo gin ma en waco.

Dong, mitte ni myero wakwany kare me kwano Baibul kacel. Ka wanongo waraga ki bot ngat mo ma wamaro adada, wabedo ka kwanone teretere. Pire bedo tek botwa. Meno aye kit ma Baibul myero pire obed tek kwede botwa pien obedo waraga mua ki bot Ngat ma marowa pud dong loyo. Obedo waraga mua ki bot Lubanga ma lamar.