NJEBAKO, libuuku nshi watemwisha?— Abana bamo kuti basala ililanda pa finama. Bambi kuti basala ilyakwata sana ifikope. Cilomfwika bwino ukubelenga amabuuku ya musango yo.

Lelo amabuuku yawamisha mu calo conse ni yalya ayatweba icine pali Lesa. Ibuuku limo pali ayo lyalicindama sana ukucila yambi. Bushe libuuku nshi ilyo?— Ni Baibolo.

Mulandu nshi Baibolo yacindamine fi?— Pantu yafumine kuli Lesa. Itweba pa lwa wene na pa fintu ifisuma ifyo akatucitila. Kabili itulanga ifyo tufwile ukucita pa kumusekesha. Yaba kwati ni kalata wafuma kuli Lesa.

Nomba Lesa nga alilembele Baibolo yonse ku muulu e lyo apeela abantu. Lelo tacitile fyo. Nangu ca kuti ifyebo fyafumine kuli Lesa, abomfeshe ababomfi bakwe aba pe sonde ukulemba Baibolo.

Bushe Lesa acitile shani ico?— Pa kumfwikisha ifyo acitile co, tontonkanya pali ci. Lintu twaumfwa ishiwi lya muntu pa redio, ishiwi kuti lyaba lya muntu uuli ukutali. Lintu tuletamba TV, tulamona ifikope fya bantu mu fyalo fimbi, kabili tulomfwa ne fyo balelanda.

Abantu kuti baya na ku mweshi mu ndeke shaibela, kabili kuti batuma ne fyebo pe sonde ukufuma kulya. Bushe walishibe co?— Nga ca kuti abantu kuti bacite co, bushe Lesa kuti atuma ifyebo  ukufuma ku muulu?— Ee! Kabili alicitile co kale sana lintu abantu tabalakwata na redio nelyo TV.

Mose ali muntu uwaumfwile Lesa alanda. Mose tamwene Lesa, lelo aleumfwa ishiwi lya kwa Lesa. Abantu abengi eko bali lintu ici cacitike. Na kuba, pali bulya bushiku Lesa alengele ulupili lonse ukutenta, kabili kwali ukubulukuta ne nkuba. Abantu balishibe ukuti Lesa alelanda, lelo balitiinine sana. E co baebele Mose ati: “Elasosa na ifwe Lesa, epali twafwa.” Pa numa, Mose alembele ifintu Lesa amwebele. Kabili ifyo Mose alembele fyaba mu Baibolo.—Ukufuma 20:18-21.

Mose alembele amabuuku ya kubalilapo 5 aya mu Baibolo.  Lelo te eka uwalembele amabuuku ya mu Baibolo. Lesa abomfeshe abantu 40 ukulemba amabuuku ya mu Baibolo. Aba bantu baliko kale sana, kabili palipitile imyaka iingi pa kuti Baibolo ipwe ukulembwa. Papitile imyaka nalimo 1,600! Ica kupapusha ca kuti nangu aba bantu bamo tabaishibene, fyonse ifyo balembele filomfwana.

Abantu bamo Lesa abomfeshe ukulemba Baibolo bali abaishibikwa. Nangu ca kuti Mose ali mucemi, aishileba intungulushi ya bena Israele. Solomone ali ni mfumu kabili umuntu wakwatishe amano ne cuma mu calo. Lelo bakalemba bambi tabaishibikwe sana. Amose alesunga ifimuti fya mikunyu.

Na kabili, kalemba wa Baibolo umo ali ni dokota. Bushe walishiba ishina lyakwe?— Ali ni Luka. Kalemba na umbi alesonkesha imisonko. Ishina lyakwe ali ni Mateo. Umbi na o ali ni loya, uwaishibe sana amafunde ya mipepele ya baYuda. Alembele amabuuku ayengi aya mu Baibolo ukucila bonse. Bushe walishibe shina lyakwe?— Ali ni Paulo. Kabili abasambi ba kwa Yesu, Petro na Yohane, abalembeleko na Baibolo, bali balondo be sabi.

Bakalemba ba Baibolo abengi balembele pa fintu ifyo Lesa ali no kucita ku ntanshi. Baishibe shani ifyo fintu ifyali tafilacitika?— Lesa apeele aba bantu ifyebo. Abebele ifyali no kucitika.

Ilyo Yesu, Kasambilisha Mukalamba ali pe sonde, amabuuku ayengi aya mu Baibolo yali nayalembwa. Nomba, ibukisha ukuti Kasambilisha Mukalamba alipo ku muulu. Alishibe ifyo Lesa acitile. Bushe alisumine ukuti Baibolo yafumine kuli Lesa?— Ee.

Lintu Yesu alelanda na bantu pa milimo ya kwa Lesa, alebelenga mu Baibolo. Inshita shimo alebeba ku mutwe ifyo yalanda. Yesu atuletele ifyebo na fimbi ukufuma kuli Lesa. Yesu atile: “Nsosa ku ba pano isonde ifintu ifyo naumfwile kuli  wene.” (Yohane 8:26) Yesu aumfwile ifintu ifingi kuli Lesa pantu aleikala na Lesa. Kabili ni mwi twingabelenga ifyo fintu Yesu alandile?— Ni muli Baibolo. Fyonse fyalilembelwe ukuti tulefibelenga.

Kwena, lintu Lesa abomfeshe abantu ukulemba, balembele mu lulimi balelanda lyonse. E co amabuuku ayengi aya mu Baibolo yalembelwe mu ciHebere, yambi mu ciAramaiki, na yambi ayengi mu ciGriki. Apo abantu abengi lelo tabaishiba ukubelenga isho ndimi, Baibolo yalilembwa mu ndimi shimbi. Lelo amabuuku yamo aya mu Baibolo e ko yaba mu ndimi ukucila pali 2,260. Iyo ni mpendwa ikalamba! Baibolo ni kalata Lesa alembela abantu konse. Lelo te mulandu ne miku yalembwa, ifyebo fyabamo ni filya fine fyafuma kuli Lesa.

 Ifyo Baibolo ilanda fyalicindama kuli ifwe. Yalembelwe kale sana. Lelo ilanda pa filecitika nomba. Kabili itweba ifyo Lesa ali no kucita nomba line. Ifyo ilanda filacincimusha! Fitupeela isubilo ilisuma sana.

Baibolo ilatweba ne fyo Lesa afwaya ifwe ukwikala. Itweba pa cisuma ne cabipa. Ufwile ukwishibe ci, na ine mfwile ukwishiba. Itweba pa bantu abalecita ifyabipa ne fyabacitikile, pa kuti twikakwata amafya bakwete. Itweba na pa bantu abacitile icisuma ne fisuma ifyaishile kuli bene. Fyonse fyalembelwe ukuti tunonkelemo.

Lelo pa kuti tunonkelemo sana mu Baibolo, tufwile ukwishiba icasuko kuli ici cipusho. Icipusho cileti: Nani watupeele Baibolo? Kuti waasuka shani?— Ee, Baibolo yonse yafuma kuli Lesa. Kanshi, kuti twalanga shani ukuti tuli ba mano icine cine?— Ni pa kukutika kuli Lesa no kucita ifyo alanda.

E co tufwile ukukwata inshita ya kubelenga Baibolo pamo. Lintu twapokelela kalata ukufuma ku muntu twatemwa sana, tulaibelenga imiku iingi. Iyo kalata tuimona iyacindama. E fyo na Baibolo ifwile ukuba kuli ifwe pantu ni kalata wafuma ku Watutemwa sana. Ni kalata wafuma kuli Lesa wa kutemwa.