KI LIV ki ou pli kontan?— I annan manrmay ki kontan liv zannimo. Lezot i kontan bann liv ki annan en ta portre ladan. Vre, i gou lir sa bann liv.

Me pli bon liv ki annan dan lemonn i bann liv ki dir nou laverite lo Bondye. Enn sa bann liv i pli enportan ki tou lezot. Ou konnen lekel sa liv?— Labib.

Akoz Labib i sitan enportan?— Akoz i sorti kot Bondye. Labib i koz lo Bondye e lo bann bon keksoz ki i pou fer pour nou. I dir nou ki nou devret fer pour fer Bondye kontan. Labib i parey en let ki sorti kot Bondye.

Bondye ti’n kapab ekrir Labib antye dan lesyel e apre donn bann imen. Me i pa ti fer sa. I ti fer bann zonm lo later ekrir Labib. Me i ti fer zot ekrir son lide.

Be ki mannyer Bondye ti fer sa?— Pour konpran ki mannyer i ti fer sa, annou vwar en legzanp. Kan nou tann lavwa en dimoun lo radyo, sa dimoun ki pe koze i lwen avek nou. Kan nou get televizyon, nou kapab vwar portre bann dimoun dan lezot pei, e nou kapab tande ki zot pe dir.

Mazin osi bann dimoun ki al lo lalin. Ler zot laba lo lalin zot kapab anvoy mesaz isi lo later. Ou ti konn sa ou?— Be si dimoun i kapab fer sa, eski Bondye i kapab anvoy mesaz isi sorti dan lesyel?— Be wi! I ti fer sa depi byen lontan, avan radyo ek televizyon ti ganny envante.

 En zonm ki ti apel Moiz, ti tann Bondye koze. Moiz pa ti kapab vwar Bondye, me i ti tann son lavwa. Ti annan bokou dimoun ki ti la ler sa ti arive. Sa zour Bondye ti fer en montanny sekwe. Ti annan loraz ek zekler. Bann dimoun ti konnen ki Bondye ti’n koze, me zot ti per. Alor zot ti dir Moiz: “Pa fer Bondye koz avek nou akoz nou per pangar nou a mor.” Plitar, Moiz ti ekrir sa bann keksoz ki Bondye ti’n dir li. Sa ki Moiz ti ekrir i dan Labib.—Egzod 20:18-21.

Moiz ti ekrir sa senk premye liv dan Labib. Me pa zis li ki ti ekrir Labib. Bondye ti fer apepre 40 zonm ekrir lezot liv dan  Labib. Sa ti lontan menm e i ti pran bokou letan pour Labib fini ekrir. An tou, ti pran apepre 1,600 zan! Kantmenm serten sa bann zonm pa ti konn kanmarad, tou sa ki zot in ekrir dan Labib i tonm dakor avek kanmarad. Sa i en keksoz ki sirprann nou.

Serten zonm ki Bondye ti fer ekrir Labib ti popiler. Par egzanp, Moiz ki avan sa ti sonny mouton, ti vin sef nasyon Izrael. Salomon ti en lerwa pli entelizan e pli ris dan lemonn. Me ti annan lezot ekriven ki dimoun pa ti tro konn zot. Par egzanp Amos, ki ti okip bann pye fig.

En lot zonm ki ti ekrir Labib ti en dokter. Ou konnen ki mannyer i apele?— Lik. En lot ekriven Labib ti anmas larzan taks. I ti apel Matye. Ti osi annan enn ki ti en avoka, i ti konn byen lalwa larelizyon Zwif. Li ki’n ekrir plis liv dan Labib. Ou konnen ki mannyer i apele?— Pol. Ti osi annan de disip Zezi ki ti ekrir Labib. Sa i Pyer ek Zan. Zot zot ti de peser.

Bokou ekriven Labib ti koz lo bann keksoz ki Bondye ti pou fer plitar. Ki mannyer zot ti konnen sa bann keksoz pou arive?— Bondye ki ti dir zot.

Ler Zezi, sa gran Ansennyan, ti lo later, en gran bout Labib ti’n fini ganny ekrir. Pa bliye sa Gran Ansennyan ti sorti dan lesyel. I ti konnen ki Bondye ti’n fer. Eski i ti krwar Labib i sorti kot Bondye?— Be wi.

Kan Zezi ti koz avek dimoun lo bann keksoz ki Bondye in fer, i ti lir dan Labib. Annandeler i ti rapel sa ki Labib i dir e dir zot san bezwen lir. Zezi ti osi fer nou konn plis keksoz lo Bondye. I ti dir: “Mon anons lemonn zis sa ki i’n dir mwan.” (Zan 8:26) Zezi ti’n aprann bokou keksoz avek Bondye akoz i ti reste avek  Bondye. Kote nou kapab lir sa bann keksoz ki Zezi ti dir?— Dan Labib. Tousala in ganny ekrir pour nou lir.

Sa bann zonm ki Bondye ti fer ekrir Labib, ti ekrir li dan zot langaz. Alors, laplipar Labib in ganny ekrir an Ebre ek Grek, e en pti morso an Arameen. Me bokou dimoun ozordi pa konn lir sa bann langaz. Alor Labib in ganny mete dan lezot langaz. Ozordi dimoun i kapab lir Labib oubyen en bout Labib dan 2,260 langaz. Zis mazin sa! Pa Labib i vreman en let ki Bondye in anvoy pour dimoun partou lo later! Me kantmenm Labib in ganny kopye e rekopye plizyer fwa, son mesaz i reste mesaz Bondye.

Sa ki Labib i dir i enportan  pour nou. Labib ti ganny ekrir lontan menm. Me i koz lo bann keksoz ki pe arive konmela. I dir nou ki Bondye pou fer byento. I enteresan sa ki i dir! I donn nou en zoli lespwar.

Labib i osi dir nou ki mannyer Bondye i oule nou viv. I dir nou sa ki byen ek sa ki mal. Ou bezwen konn tousala, mwan osi tou. I koz lo bann dimoun ki ti fer bann keksoz mal e ki ti arive avek zot, pour nou pa fer parey. I osi koz lo bann dimoun ki ti fer sa ki byen e rekonpans ki zot ti gannyen. Tousala in ganny ekrir pour nou prop byen.

Me pour Labib vreman ed nou, nou bezwen kapab reponn en kestyon. Sa kestyon i: Lekel ki’n donn nou Labib? Ki ou pou reponn?— Wi, Labib antye i sorti kot Bondye. Be ki mannyer nou kapab montre ki nou en bon zanfan?— Ler nou ekout Bondye e fer sa ki i dir nou fer.

Alor nou bezwen pran letan pour lir Labib ansanm. Ler nou ganny en let sorti kot en dimoun ki nou kontan en kantite, nou lir li e lir li ankor. Nou kontan sa let. Be nou devret kontan Labib parey. Akoz i en let sorti kot sa Enn ki pli kontan nou. I en let sorti kot Bondye ki kontan nou.