Ibuot 2

Leta Otode Abasi Ima

TỊN̄ nọ mi, ewe n̄wed ke afo ama akan?—Ndusụk nditọwọn̄ ẹkpemek n̄wed oro etịn̄de n̄kpọ aban̄a mme unam. Mbon eken ẹkpemek n̄wed oro ọyọhọde ye ndise. Ekeme ndidi n̄kpọ inemesịt ndikot mme n̄wed oro.

Edi mme mfọnn̄kan n̄wed ke ofụri ererimbot ẹdi mbon oro ẹtịn̄de akpanikọ aban̄ade Abasi ẹnọ nnyịn. Kiet ke otu n̄wed oro enen̄ede enyene ufọn akan kpukpru mmọ eken. Nte afo ọmọfiọk m̀mê ewe n̄wed edi oro?— Edi Bible.

Ntak emi Bible enen̄erede edi akpan n̄wed ntre?— Koro enye okoto Abasi. Enye asian nnyịn aban̄a Abasi ye nti n̄kpọ oro enye edinamde ọnọ nnyịn. Ndien enye owụt nnyịn se nnyịn ikpanamde man inem Abasi esịt. Enye etie nte leta otode Abasi.

Nte ededi, Abasi ekpekekeme ndiwet ofụri Bible ke heaven ndien ekem ayak enye ọnọ owo. Edi enye ikanamke ntre. Okposụkedi mme ekikere oro ẹketode Abasi, enye akada mme asan̄autom esie ke isọn̄ ndiwet ediwak n̄kpọ oro ẹdude ke Bible.

Didie ke Abasi akanam oro?— Man ifiọk nte enye akanamde, kere ban̄a emi. Ke ini nnyịn ikopde uyo owo ke ekebe ukopikọ, uyo oro ekeme ndito owo emi odude ke anyan ebiet. Ke ini nnyịn isede ekebe ndise, nnyịn imekeme ndikụt mme ndise owo ke mme idụt eken ke ererimbot, ndien nnyịn imekeme ndikop se mmọ ẹtịn̄de.

Mme owo ẹkam ẹkeme ndida mme ubomofụm mmọ n̄ka ọfiọn̄, mmọ ẹnyụn̄ ẹkeme nditie do nnọ mme etop ẹdi isọn̄. Nte afo ama ọfiọk oro?— Edieke mme owo ẹkemede ndinam oro, nte Abasi ikemeke ndinọ mme etop ẹto heaven ẹdi?— Ke akpanikọ enye ekeme!  Ndien enye ama anam emi anyan ini mbemiso mme owo ẹkenyenede ekebe ukopikọ m̀mê ekebe ndise.

Moses ekedi owo oro ekenen̄erede okop nte Abasi etịn̄de ikọ. Moses ikekemeke ndikụt Abasi, edi enye ama ekeme ndikop uyo Abasi. Ediwak miliọn owo ẹma ẹdu do ke ini emi eketịbede. Ke akpanikọ, ke usen oro Abasi ama anam ofụri obot enyek, ndien obuma ye emịnen̄mịnen̄ ẹma ẹsiaha. Mme owo ẹma ẹfiọk ẹte ke Abasi eketịn̄ ikọ, edi mmọ ẹma ẹnen̄ede ẹkop ndịk. Ntre mmọ ẹma ẹdọhọ Moses ẹte: “Yak Abasi okûdọhọ ye nnyịn, mbak nnyịn idikpan̄a.” Ke ukperedem, Moses ama ewet mme n̄kpọ oro Abasi eketịn̄de enịm. Ndien se Moses ekewetde odu ke Bible.—Exodus 20:18-21.

 Moses ekewet akpa n̄wed ition eke Bible. Edi idịghe enye ikpọn̄ ekewet Bible. Abasi ama ada n̄kpọ nte irenowo 40 ndiwet Bible. Irenowo emi ẹkedu uwem ata anyan ini ko ke edem, ndien ama ada ediwak isua ndiwet Bible n̄kụre. Ih, akada n̄kpọ nte isua 1,600! Se ikpade owo idem edi nte ke okposụkedi ndusụk ke otu irenowo emi akananam mîsoboke ye kiet eken, kpukpru se mmọ ẹkewetde ẹdu ke ata n̄kemuyo.

Ndusụk irenowo oro Abasi akadade ndiwet Bible ẹkedi mme ọwọrọetop owo. Okposụkedi Moses ekedide ekpemerọn̄, enye ama akabade edi andida idụt Israel usụn̄. Solomon ekedi edidem oro ekenyenede ọniọn̄ ye inyene akan ke ererimbot. Edi mme andiwet eken ikọwọrọke etop ntre. Amos ekedi ekpeme-in̄wan̄ fig.

Ke adianade do, andiwet Bible kiet ekedi abiausọbọ. Nte afo ọmọfiọk enyịn̄ esie?— Enye ekekere Luke. Andiwet efen ekedi ọbọ a-tax. Enye ekekere Matthew. En̄wen ekedi ekpeibet, ataifiọk ke ibet ido ukpono mme Jew. Enye ama ewet n̄wed Bible awak akan owo efen ekededi. Nte afo ọmọfiọk enyịn̄ esie?— Enye ekekere Paul. Ndien mme mbet Jesus oro Peter ye John, emi n̄ko ẹkedide mme andiwet Bible, ẹkedi mme ọkọiyak.

Ediwak ke otu mme andiwet Bible emi ẹkewet ẹban̄a mme n̄kpọ oro Abasi okoyomde ndinam ke ini iso. Mmọ ẹkesan̄a didie ẹfiọk mme n̄kpọ oro mbemiso mmọ ẹkekam ẹtịbede?— Abasi ọkọnọ irenowo oro ntọt. Enye ama etịn̄ ọnọ mmọ aban̄a se iditịbede.

Ke ini oro Jesus, kpa Akwa Andikpep, okodude ke isọn̄, ẹma ẹwewet akamba ubak Bible. Idahaemi, ti ete ke Akwa Andikpep ama ododu ke heaven. Enye ama ọfiọk se Abasi akanamde. Nte enye ama enịm ke akpanikọ ete ke Bible okoto Abasi?— Ih, ama enịm.

Ke ini Jesus eketịn̄de ọnọ mme owo aban̄a mme utom Abasi, enye ama esikot oto Bible. Ndusụk ini enye ama esitịn̄ ke ibuot ọnọ mmọ se Bible ọdọhọde. Jesus n̄ko ama ada ntọt efen efen otode Abasi ọsọk  nnyịn. Jesus ọkọdọhọ ete: “Se Ami n̄kokopde Enye ke inua, n̄kpọ oro ke ntetịn̄ nnọ ererimbot.” (John 8:26) Jesus ama okop ediwak n̄kpọ oto Abasi sia enye okodụn̄de ye Abasi. Ndien m̀mọ̀n̄ ke nnyịn ikeme ndikot mme n̄kpọ oro Jesus eketịn̄de?— Ke Bible. Ẹma ẹwet kpukpru mmọ ẹnịm ẹnọ nnyịn ndikot.

Nte ededi, ke ini Abasi akadade mme owo ndiwet, mmọ ẹkewet ke usem oro mmọ ẹkesemde kpukpru usen. Ntre ẹkewet n̄wakn̄kan ubak Bible ke usem Hebrew, ndusụk ke usem Aramaic, ye ediwak ke usem Greek. Sia ata ediwak owo mfịn mîfiọkke nte ẹkotde mme usem oro, ẹma ẹkabade Bible ẹsịn ke mme usem efen. Mfịn mme ubak Bible ẹdu ke se iwakde ibe usem 2,260. Kam kere ban̄a oro! Bible edi leta oro Abasi ọnọde mme owo ke kpukpru ebiet. Edi inamke n̄kpọ m̀mê ẹkabade enye ẹsịn ke usem ifan̄, etop emi oto Abasi.

 Se Bible etịn̄de edi akpan n̄kpọ ọnọ nnyịn. Ẹkewet enye ke anyan ini oro ekebede. Edi enye etịn̄ aban̄a mme n̄kpọ oro ẹtịbede mfịn. Ndien enye asian nnyịn se Abasi edinamde ke ini iso. Se enye etịn̄de akama nduaidem! Enye ọnọ nnyịn utịbe utịbe idotenyịn.

Bible n̄ko asian nnyịn nte Abasi oyomde nnyịn idu uwem. Enye asian nnyịn se inende ye se ikwan̄ade. Oyom afo ọfiọk emi, ndien ntre n̄ko ke oyom ami mfiọk. Enye asian nnyịn aban̄a mme owo oro ẹkenamde ndiọi n̄kpọ ye se iketịbede inọ mmọ, man nnyịn ikeme ndifep mfịna oro mmọ ẹkenyenede. Enye n̄ko asian nnyịn aban̄a mme owo oro ẹkenamde se inende ye nti utịp oro mmọ ẹkebọde. Ẹkewet kpukpru mmọ ẹnịm ke ufọn nnyịn.

Edi man ibọ n̄kponn̄kan ufọn ito Bible, oyom nnyịn ifiọk ibọrọ mbụme kiet. Mbụme oro edi emi: Anie ọkọnọ nnyịn Bible? Nso ke afo ọkpọbọrọ?— Ke akpanikọ, ofụri Bible oto Abasi. Didie, ndien, ke nnyịn ikeme ndiwụt nte ke nnyịn imenen̄ede inyene ibuot?— Ebe ke ndikpan̄ utọn̄ nnọ Abasi nnyụn̄ nnam se enye ọdọhọde.

Ntre oyom nnyịn ida ini ikot Bible ọtọkiet. Ke ini nnyịn ibọde leta ito owo oro nnyịn inen̄erede ima, nnyịn imesikot enye ediwak ini. Enye edi ọsọn̄urua n̄kpọ ọnọ nnyịn. Nte nnyịn ikpadade Bible edi oro, koro enye edi leta otode Enye emi amade nnyịn akan. Enye edi leta otode Abasi ima.

Da minit ifan̄ idahaemi kot mme itie N̄wed Abasi emi ẹwụtde nte ke Bible enen̄ede edi Ikọ Abasi, ke ẹkenyụn̄ ẹwet ke ufọn nnyịn: Rome 15:4; 2 Timothy 3:16, 17; ye 2 Peter 1:20, 21.

[Mme ndise ke page 17]

Nnyịn isan̄a didie ifiọk ke Abasi ekeme ndida ke anyan ebiet ntịn̄ ikọ nnọ nnyịn?

[Mme ndise ke page 19]

Nso idi enyịn̄ mme andiwet Bible emi?

[Ndise ke page 20]

Mme n̄kpọ ewe ke afo ekeme ndikpep nto edikot Bible?