TUKUNA mada vei au se ivola cava o taleitaka vakalevu duadua?— So na gone era digia na ivola e vakamacalataki kina na manumanu. So era digia na ivola e levu kina na iyaloyalo. E rawa ni taleitaki na wiliki ni ivola vaka oya.

Ia na ivola vinaka duadua e vuravura era ivola e vakaraitaka na veika dina me baleta na Kalou. E dua vei ira na ivola oqori e uasivi duadua. O kila se ivola cava oya?— Na iVolatabu.

Na cava e uasivi kina na iVolatabu?— Baleta e ivola ni Kalou. Na ivola oqo e tukuni koya kei na veika vinaka ena cakava vei keda. E vakaraitaka tale ga na ka e dodonu meda cakava me rawa kina ni marau o koya. E vaka e dua na ivola e vola vei keda na Kalou.

A rawa ni vola ga mai lomalagi na iVolatabu na Kalou qai solia vua na tamata. Ia e sega ni cakava oya. E solia ga vei ira na nona tamata na vakasama, qai vakayagataki ira mera vola na iVolatabu.

E cakava vakacava oya na Kalou?— Me matata vei keda, vakasamataka mada oqo. E rawa ni tu sara mai vakayawa na tamata eda rogoca na domona ena retio. Nida sarava na retioyaloyalo, e rawa nida raici ira na tamata mai na veiyasa i vuravura da qai rogoca tale ga na domodra.

E bau rawa tale ga vei ira na tamata mera vuka ina vula ena nodra waqavuka ra qai vakau itukutuku lesu mai i vuravura. O sa kila tiko oya?— Ke sa cakava rawa oya na tamata, ena rawa beka vua na Kalou me vakau itukutuku mai lomalagi?— Io e sega ni dua na kena dredre!  Sa cakava voli mai oqori ni se bera mada ga ni qai bulia na tamata na retio kei na retioyaloyalo.

O Mosese e rogoca sara ga na domo ni Kalou. E sega ni raica na Kalou o Mosese, ia e rogoci koya ga. Era raica e milioni na tamata na ka e yaco oya. Ena siga oya e yavala kina e dua na ulunivanua taucoko ra qai vakila tale ga na kurukuru kei na livaliva. Era rogoca na tamata ni vosa mai na Kalou, ia sa duatani na nodra rere. Ra mani kaya vei Mosese: “Me kakua ni vosa vei keimami na Kalou, de keimami mate.” E qai vola o Mosese na veika e tukuna na Kalou. E tu ena iVolatabu na veika e vola o Mosese.​—Lako Yani 20:​18-21.

E vola o Mosese na imatai ni lima na ivola ena iVolatabu. Ia e sega  ni volavola duadua o koya. E vakayagataka na Kalou e rauta e 40 na tagane mera vola na iVolatabu. Era bula na tamata oqo ena dua na gauna makawa sara. Ni oti e vica vata na yabaki sa qai volai vakaoti na iVolatabu. Io, e rauta ni 1,600 na yabaki! E veivakurabuitaki ni so vei ira na tamata oqo era sega ni veikilai, ia e duavata na veika era vola.

E so vei ira e vakayagataka na Kalou mera vola na iVolatabu era tamata rogo. E dau vakatawa sipi o Mosese, ia e qai liutaka na matanitu o Isireli. O Solomoni e tui, ia e tamata vuku qai vutuniyau duadua e vuravura. Ia e so vei ira era sega so ni kilai. O Emosi e dausamaki vu ni lolo.

E dua vei ira na vola na iVolatabu e vuniwai. O kila na yacana?— O Luke. E dua vei ira e daukumuni ivakacavacava. E yacana o Maciu. E dua vei ira e loya, e kenadau ena nodra lawa ni lotu na Jiu. E levu duadua na ivola ena iVolatabu e vola o koya. O kila na yacana?— O Paula. Rau vola tale ga na iVolatabu na tisaipeli i Jisu o Pita kei Joni, ia erau gonedau se dauqoli.

E levu vei ira na dauvola iVolatabu era vola na veika ena qai cakava na Kalou ena gauna e se bera mai. Era kila vakacava na veika e se bera ni yaco?— E tukuna vei ira na Kalou. E tukuna vei ira na veika ena qai yaco e muri.

Ni qai yaco mai vuravura na Qasenivuli Levu o Jisu, sa volai oti e dua na iwase levu ni iVolatabu. Nanuma tiko ni a tu mai lomalagi na Qasenivuli Levu. E kila na ka e sa cakava na Kalou. E vakabauta beka o koya ni a vakavuna na Kalou na iVolatabu?— Io, e vakabauta dina.

Ni vakaraitaka o Jisu vei ira na tamata na cakacaka ni Kalou, e wilika sara ga mai na iVolatabu. So na gauna e cavuqaqataka ga na ka e tukuni kina. E vakaraitaka tale ga vei keda o Jisu e levu na ka me baleta na Kalou. A kaya o Jisu: “Ka’u sa tukuna vei ira na kai vuravura na veika ka’u a rogoca mai vei koya.” (Joni 8:26) E levu sara na ka e  rogoca vua na Kalou o Jisu baleta ni rau a bula vata voli. Eda na wilika e vei na ka e tukuna o Jisu?— Ena iVolatabu. A volai meda wilika.

Ni vakayagataki ira na tamata na Kalou mera volavola, era volavola ga ena vosa era vakayagataka e veisiga. Na iwase levu ni iVolatabu e volai ena vosa vakaiperiu, so ena vosa vakaaramea, qai dua na iwase levu tale ga ena vosa vakirisi. Ni levu vei keda e sega ni rawa ni wilika na vosa oya, sa mani vakadewataki kina ina so tale na vosa. Ena gauna oqo sa rawa ni wiliki na iVolatabu ena sivia na 2,260 na vosa. Vakasamataka mada oya! Na iVolatabu e ivola ni Kalou vei keda kece na tamata. E se tu ga kina na itukutuku ni Kalou se mani lavetaki vakavica sara.

E bibi na ka e tukuna vei keda na iVolatabu. A volai ena dua na gauna makawa sara. Ia e  vakamacalataka na veika e yaco tiko nikua. E tukuna tale ga na veika ena qai cakava na Kalou ena gauna mai muri. E totoka vakaoti na veika e tukuna! E vakaraitaka vei keda e dua na inuinui totoka.

E tukuna tale ga na iVolatabu na ivakarau ni bula e vinakata na Kalou. E tukuna vei keda na veika e dodonu kei na veika e cala. E dodonu mo kila oqo, vaka kina o au. E tukuni ira na tamata era cakava na veika ca kei na ka e yacovi ira, me rawa kina meda kua ni cakava na veika era cakava. E tukuni ira tale ga na tamata era caka dodonu kei na veika vinaka e yacovi ira. Era volai na veika oqori me yaga vei keda.

Ia me rawa ni yaga vei keda na iVolatabu, e dodonu meda kila na isaunitaro oqo. O cei e solia vei keda na iVolatabu? O sauma vakacava oya?— Io, e solia mai na iVolatabu na Kalou. Eda vakaraitaka vakacava nida yalomatua?— Kevaka eda vakarorogo vua na Kalou da qai cakava na ka e kaya.

E dodonu gona meda dau wilika vata na iVolatabu. Nida taura na nona ivola e dua eda taleitaka vakalevu, eda na wilika wasoma na ivola oya. Eda taleitaka dina. Me vaka tale ga oqori na iVolatabu baleta e ivola nei Koya e lomani keda vakalevu. E nona ivola na Kalou dauloloma.