Uzou Avọ 2

Ileta Nọ I No Obọ Ọghẹnẹ Oyoyou Ze

TA KẸ omẹ, obe vẹ o mae were owhẹ kpobi?— Emaha jọ a rẹ fodẹ obe nọ o ta ẹme kpahe erao. Efa e rẹ fodẹ obe nọ u wo ifoto buobu. Oma o rẹ were ohwo nọ o te bi se ebe itieye na.

Rekọ ebe nọ e mai woma evaọ akpọ na kpobi họ enọ e ta uzẹme kpahe Ọghẹnẹ kẹ omai. Ovo jọ evaọ usu rai o mae ghare vi edekọ kpobi. Kọ whọ riẹ odẹ riẹ?— Ebaibol.

Fikieme Ebaibol na o je wuzou te ere?— Fikinọ u no obọ Ọghẹnẹ ze. O ta kẹ omai kpahe iẹe gbe eware iwoma nọ o bi ti ru kẹ omai. Yọ o dhesẹ oware nọ u fo nnọ ma re ru re ma ru ei eva were kẹ omai. O wọhọ ileta nọ i no obọ Ọghẹnẹ ze.

Whaọ, o hae lọhọ re Ọghẹnẹ o kere Ebaibol na soso evaọ obọ odhiwu re o vi ei se ahwo. Rekọ o ru ere he. Dede nọ Ọghẹnẹ o wo eme na, ọ rehọ idibo riẹ nọ e rrọ otọakpọ ro kere Ebaibol na.

Ẹvẹ Ọghẹnẹ o ro ru oyena?— Re u vẹ kẹ owhẹ, roro kpahe onana. Ma tẹ jọ irediyo yo urru ahwo, o sae jọnọ ohwo nọ who bi yo urru riẹ na o thabọ no oria ra gaga. Ma te bi rri etẹlivisiọno, ma rẹ sae tubẹ ruẹ ahwo nọ a rrọ erẹwho efa evaọ akpọ na, yọ ma sai yo eme nọ a be ta dede.

Ahwo a sae tubẹ ruọ arupre kpohọ obọ ọvẹre, a vẹ jọ obei vi evuẹ ziọ obọ otọakpọ obonẹ. Kọ whọ riẹ ere?— Otẹrọnọ ahwo a sai ru ere, kọ Ọghẹnẹ ọ gbẹ sai vi evuẹ no obọ odhiwu ze?— E!  Yọ o ru ere oke krẹkri no taure ahwo a te ti wo irediyo hayo etẹlivisiọno.

Mosis yọ ohwo nọ o ghine yo nọ Ọghẹnẹ ọ ta ẹme. Mosis ọ ruẹ Ọghẹnẹ hẹ, rekọ ọ sai yo urru Ọghẹnẹ. Ima ahwo buobu a jọ etẹe evaọ okenọ onana o via. Evaọ ẹdẹ ọyena Ọghẹnẹ o ru ugbehru soso nuhu, avọ egbrara gbe elo-egbrara. Ahwo na a riẹ nọ Ọghẹnẹ ọ ta ẹme na, rekọ ozọ u mu rai gaga. A tẹ ta kẹ Mosis nọ: “Whọ jọ Ọghẹnẹ ọvo ọ ta ẹme kẹ omai hi, ogbẹrọ erei hi, ma re ti whu no.” Uwhremu na, Mosis o te kere eme nọ Ọghẹnẹ ọ ta na fi họ otọ. Yọ eme nọ Mosis o kere na e rrọ Ebaibol na.—Ọnyano 20:18-21.

 Mosis o kere ebe isoi ọsosuọ Ebaibol na. Rekọ o rrọ nọ ọye ọvo o kere i rie kpobi hi. Ọghẹnẹ ọ rehọ ezae 40 ro kere abọ sa-sa Ebaibol na. Ezae enana e rria oke krẹkri nọ u kpemu no, yọ o rehọ ikpe buobu re a te ti kere Ebaibol na kpobi re. Ẹhẹ, o rehọ enwenọ ikpe 1,600! Oware nọ u gbunu na họ dede nọ ezae nana jọ a riẹ ohwohwo ho, eware nọ a kere kpobi e rọwo kugbe.

Ezae jọ nọ Ọghẹnẹ o ro kere Ebaibol na a jọ ahwo nọ a riẹ odẹ ziezi. Dede nọ othuru-igodẹ Mosis ọ jọ, o zihe ruọ osu orẹwho Izrẹl. Solomọn ọ jọ ovie, ọ tẹ jẹ jọ ohwo nọ ọ mai wo areghẹ jẹ mai fe evaọ akpọ na. Rekọ a riẹ amọfa jọ nọ i kere Ebaibol na te ere he. Emọs yọ ohwo nọ ọ jẹ rọ ẹro te ire ifigi.

Ofariẹ, ohwo jọ nọ o kere Ebaibol na ọ jọ edọkita. Kọ whọ riẹ odẹ riẹ?— Odẹ riẹ họ Luk. Okere ọfa jọ ọ jọ omiazọhọ. Odẹ riẹ Matiu. Ọfa jọ ọ jọ elọya, ọnọ ọ riẹ kpahe izi egagọ ahwo Ju gaga. Ebe Ebaibol nọ o kere i bu vi erọ ahwo edekọ kpobi. Kọ whọ riẹ odẹ riẹ?— Odẹ riẹ họ Pọl. Yọ Pita avọ Jọn, ilele Jesu, enọ e jọ usu enọ i kere Ebaibol na, a jọ ikuori.

Ahwo nana nọ a kere Ebaibol na ibuobu rai i kere kpahe eware nọ Ọghẹnẹ o ti ru evaọ obaro. Ẹvẹ a sae rọ riẹ eware yena taure e tẹ te via?— Ọghẹnẹ ọ kẹ rai ovuẹ na. Ọ vuẹ rae eware nọ e be te via.

Okenọ Jesu, Owuhrẹ Ologbo na, ọ jọ otọakpọ, yọ a kere abọ ologbo ọrọ Ebaibol na no. Kareghẹhọ nnọ Owuhrẹ Ologbo na ọ jọ obọ odhiwu. Ọ riẹ eware nọ Ọghẹnẹ o ru no. Kọ ọ rọwo nnọ obọ Ọghẹnẹ Ebaibol na i no ze?— E.

Okenọ Jesu ọ jẹ ta ẹme kẹ ahwo kpahe iruo Ọghẹnẹ, o se no Ebaibol na ze dede. Ẹsejọ ọ jẹ tubẹ ta eme Ebaibol na no uzou ze dede. Jesu ọ wha evuẹ buobu no obọ Ọghẹnẹ ze se omai. Jesu  ọ ta nọ: “Eware nọ mẹ jọ obọ riẹ yo, enana mẹ ta kẹ akpọ na.” (Jọn 8:26) Jesu o yo eme buobu mi Ọghẹnẹ keme o je lele Ọghẹnẹ rria. Kọ diẹse ma rẹ jọ se eware nana nọ Jesu ọ ta na?— Evaọ Ebaibol na. A kere i rai kpobi kẹ omai re ma se ai.

Okenọ Ọghẹnẹ ọ rehọ ahwo kere eme riẹ fihọ otọ, a kere i rai evaọ ẹvẹrẹ nọ ahwo oke yena a jẹ ta. Fikiere a kere abọ Ebaibol na buobu evaọ Hibru, ofẹ riẹ jọ evaọ Aramaic, gbe abọ ologbo riẹ jọ evaọ Griki. Nọ ahwo buobu nẹnẹ a rẹ sai se evẹrẹ eyena ha na, a fa Ebaibol na fihọ evẹrẹ efa no. Nẹnẹ na a rẹ sai se abọ sa-sa Ebaibol na evaọ evẹrẹ nọ i bu te 2,260. Roro epanọ oyena u gbunu te! Ebaibol na yọ ileta nọ i no obọ Ọghẹnẹ ze se ahwo evaọ oria kpobi. Rekọ makọ unuẹse nọ a wariẹ e riẹ kere kẹhẹ, obọ Ọghẹnẹ ovuẹ na u no ze.

 Eme nọ Ebaibol na e ta i wuzou kẹ omai. U kri no nọ a kere i rie. Rekọ o ta kpahe eware nọ e be via nẹnẹ. Yọ o ta oware nọ Ọghẹnẹ o bi ti ru evaọ obaro kẹle na kẹ omai. Eme nọ ọ ta i siuru gaga! O kẹ omai ẹruore igbunu.

Ebaibol na e tẹ jẹ ta epanọ Ọghẹnẹ ọ gwọlọ nọ ma rẹ rria uzuazọ kẹ omai. Ọ ta oware nọ u woma gbe onọ u yoma kẹ omai. U fo nọ mai kpobi ma rẹ riẹ onana. O ta kẹ omai kpahe ahwo nọ a ru eware iyoma gbe oware nọ o via kẹ ae, re ma sae whaha uye nọ u te rai. O tẹ jẹ ta kẹ omai kpahe ahwo nọ a ru oware uwoma gbe ewoma nọ o te rai. A kere enana kpobi kẹ erere mai.

Rekọ re ma wo erere ologbo no Ebaibol na ze, u fo re ma riẹ uyo kẹ onọ jọ. Onọ na họ: Ono ọ kẹ omai Ebaibol na? Didi uyo whọ rẹ kẹ?— Ẹhẹ, obọ Ọghẹnẹ oma Ebaibol na soso o no ze. Kọ ẹvẹ ma sai ro dhesẹ nọ ma ghine wo areghẹ?— Ẹkwoma ezọgaviẹ kẹ Ọghẹnẹ gbe eruo oware nọ ọ ta.

Fikiere u fo re ma raha oke se Ebaibol na kugbe. Okenọ ohwo nọ ma you gaga o te vi ileta se omai, ma re dhe i esese. Ma rẹ rehọ iẹe ghaghae. Ere u fo nọ Ebaibol na ọ rẹ jọ kẹ omai re keme onana yọ ileta nọ i no obọ Ohwo nọ ọ mai you omai ze. O rrọ ileta nọ i no obọ Ọghẹnẹ oyoyou na ze.

Rehọ omoke jọ re who se ikereakere enana nọ i dhesẹ nọ Ebaibol na ghinẹ Ẹme Ọghẹnẹ, inọ a kere i rie kẹ erere mai: Ahwo Rom 15:4; 2 Timoti 3:16, 17; gbe 2 Pita 1:20, 21.

[Iwoho nọ e rrọ ẹwẹ-obe avọ 17]

Ẹvẹ ma rọ riẹ inọ Ọghẹnẹ ọ sae ta ẹme kẹ omai no ugbothabọ ze?

[Iwoho nọ e rrọ ẹwẹ-obe avọ 19]

Didi odẹ ahwo nana nọ i kere Ebaibol na?

[Uwoho nọ o rrọ ẹwẹ-obe avọ 20]

Didi eware whọ rẹ sai wuhrẹ no ese Ebaibol na ze?