KAPU 2

Mukanda Mosi ya Mekatuka na Nzambi Mosi ya Zola

SONGA munu, inki mukanda nge kezolaka mingi?— Bana mingi keponaka mikanda yina ketubilaka bambisi. Bankaka keponaka yina ke ti bifwanisu mingi na kati. Yo le vanda kitoko na kutanga mikanda ya mutindu yina.

Kansi mikanda ya mbote ya meluta mikanda yonso ke yina ya ketubilaka beto kyeleka ya metala Nzambi. Na kati ya mikanda yonso ya ketubilaka mambu ya Nzambi, mosi ke mfunu mingi kuluta yina yankaka. Inki mukanda yango yina?— Biblia.

Sambu na nki Biblia ke mfunu mingi?— Sambu yo mekatukaka na Nzambi. Yo ketubilaka beto mambu na yandi ti mambu ya mbote yina yandi tasadila beto na bilumbu kekwisa. Yo kesongaka beto mpi mambu yina beto fwe sala sambu na kupesa yandi kyese. Yo ke bonso mukanda mosi ya mekatuka na Nzambi.

Nzambi lendaka kusonika Biblia ya mvimba na zulu, na nima yandi pesa yo na bantu. Kansi yandi salaka ve mutindu yina. Ata bangindu kukatukaka na Nzambi, yandi sadilaka bansadi na yandi na ntoto sambu na kusonika kitini ya kuluta nene ya Biblia.

Inki mutindu Nzambi kusalaka yo?— Sambu na kubakisa yo, baka mbandu yai: Ntangu beto kewaka ndinga ya muntu na radio, ndinga yango le vanda ya muntu mosi yina ke ntama mpenza. Ntangu beto ketalaka televizio, beto le mona nkutu bantu yina ke na bansi yankaka, mpi beto le wa mambu ya bo ketuba.

Bantu le kota na bafize sambu na kukwenda ntama kibeni tii na ngonda, mpi kana bo mekuna kuna, bo le tindila bantu yina ke na ntoto bansangu. Keti nge mezaba mambu yai?— Kana bantu kekuka kusala mpidina, keti Nzambi le tinda ve bansangu katuka kuna na zulu?— Yandi  le sala yo mpenza! Mpi yandi salaka yo tuka ntama kibeni na ntwala nde bantu kusala radio to televizio.

Moize kuvandaka mpenza muntu yina kuwaka Nzambi ketuba. Moize lendaka ve kumona Nzambi, kansi yandi waka ndinga na Yandi. Bantu mingi kibeni kuvandaka pana ntangu dyambu yango kusalamaka. Nkutu, kilumbu yango, Nzambi kunikisaka ngumba yonso, mpi banzasi kubwaka. Bantu kuzabaka nde Nzambi kutubaka, kansi bo vandaka na boma mpenza. Yo yina bo tubilaka Moize nde: “Kana Mfumu Nzambi kutubila beto, beto ta fwa.” Na nima, Moize kusonikaka mambu yina Nzambi kutubaka. Mambu ya Moize kusonikaka ke na Biblia.—Kubasika 20:18-21.

Moize kusonikaka mikanda tanu ya ntete ya Biblia. Kansi yandi mosi mpamba ve muntu kusonikaka Biblia. Nzambi kusadilaka bantu kiteso ya  40 sambu na kusonika Biblia. Bantu yango kuzingaka tuka ntama, ntama kibeni, mpi bo salaka bamvula mingi sambu na kumanisa kusonika Biblia. Bo sonikaka yo na nsungi mosi ya kiteso ya bamvula 1600! Dyambu ya kuyituka kele nde ata bantu mingi na kati ya bayina kusonikaka Biblia kukutanaka ve ata fyoti, mambu yonso ya bo sonikaka kewakanaka mpenza.

Bantu mingi yina Nzambi kusadilaka sambu na kusonika Biblia kuvandaka bantu ya lukumu. Ata Moize kuvandaka ngungudi, yandi kumaka ntwadisi ya dikanda ya Izraele. Salomo kuvandaka ntotila ya kuluta mayele mpi mvwama ya kuluta nene na inza ya mvimba. Kansi, bansoniki yina yankaka kuvandaka ve na lukumu mingi. Amosi vandaka kusala kisalu ya kubongisa banti ya bafige.

Katula bayina beto metanga, nsoniki mosi ya Biblia kuvandaka munganga. Zina na yandi nani?— Zina na yandi Luka. Nsoniki yankaka vandaka kufutisa bantu mpaku. Zina na yandi Matayo. Yankaka dyaka kuvandaka avoka, muntu ya nene na nsiku ya dibundu ya Bayuda. Yandi sonikaka mikanda ya Biblia mingi kuluta bantu yankaka. Zina na yandi nani?— Zina na yandi Polo. Ebuna balongoki ya Yezu, Piere ti Yoane, yina kusonikaka mpi Biblia vandaka kuloba bambisi.

Mingi na kati ya bansoniki yai ya Biblia kusonikaka mambu yina Nzambi tasala na bilumbu kekwisa. Inki mutindu bo zabaka mambu yina na ntwala nkutu yo salama?— Nzambi muntu kupesaka bantu yango bansangu yina. Yandi tubilaka bo mambu yina tasalama.

Na ntangu Yezu, Longi ya Nene, kuvandaka na ntoto, mikanda mingi ya Biblia kuvandaka dezia ya kusonika. Ntangu yai, kuvila ve nde Longi ya Nene kuvandaka na zulu. Yandi zabaka mambu yina Nzambi kusalaka. Keti yandi kwikilaka nde Biblia kukatukaka na Nzambi?— Ee.

Ntangu Yezu vandaka kutubila bantu mambu ya metala bisalu ya Nzambi, yandi vandaka kutanga yo na Biblia. Bantangu yankaka, yandi vandaka kutubila bo na ntu mambu yina Biblia ketuba. Yezu kunatilaka beto mpi bansangu mingi ya metala Nzambi. Yezu kutubaka nde: “Mono ke tuba na bantu yonso kaka mambu yina ya mono longukaka na yandi.” (Yoane 8:26) Yezu kuwaka mambu mingi na Nzambi sambu yandi zingaka  ti Nzambi. Ebuna na nki mukanda beto le tanga mambu yina Yezu kutubaka?— Na Biblia. Bo sonikaka mambu yango yonso sambu beto kutanga yo.

Ya kyeleka, ntangu Nzambi kusadilaka bantu sambu na kusonika Biblia, bo sonikaka yo na ndinga yina bantu yonso vandaka kubakisa. Yo yina, bo sonikaka mikanda mingi ya Biblia na Kiebreo, ndambu na Kiarameye, mpi mingi dyaka na Kigreki. Sambu bantu mingi bubu yai mezaba ve kutanga bandinga yina, bo mebalulaka Biblia na bandinga yankaka. Bubu yai, bantu le tanga bitini ya Biblia na bandinga kiteso ya 2260. Na bandinga mingi kibeni! Biblia ke mukanda ya Nzambi metindilaka bantu na bisika yonso. Kansi, ata bo mebalulaka yo na bandinga mingi, nsangu na yo ke kaka nsangu mosi ya mekatukaka na Nzambi.

Mambu ya Biblia ketuba ke mfunu sambu na beto. Bamvula meluta mingi banda bo sonikaka yo. Kansi yo ketubila mambu yina ke na kusalama bubu yai. Mpi yo ketubila beto mambu yina Nzambi tasala ntama mingi ve na  bilumbu kekwisa. Mambu yina yo ketuba ke ya kyese mpenza! Yo kepesa beto kivuvu mosi ya kitoko.

Biblia ketubila beto dyaka mutindu Nzambi kezola nde beto zinga. Yo ketubila beto mambu yina ke ya mbote mpi yina ke ya mbi. Nge fwe zaba mambu yango, munu mpi mu fwe zaba yo. Yo ketubila beto mambu ya metala bantu yina kusalaka mambi mpi bampasi yina kubwilaka bo, sambu beto kuditanina na bampasi yina bo monaka. Yo ketubila beto dyaka mambu ya metala bantu yina kusalaka mambu ya mbote mpi balusakumunu ya mbote yina bo bakaka. Mambu yina yonso bo sonikaka yo sambu na mambote na beto.

Kansi, sambu na kubaka mambote mingi yina kekatukaka na Biblia, beto fwe baka mvutu na ngyufula mosi. Ngyufula yango yo yai: Nani kupesaka beto Biblia? Inki mvutu nge tapesa?— Ya kyeleka, Biblia ya mvimba mekatukaka na Nzambi. Ebuna, inki mutindu beto le monisa nde beto kele mpenza mayele?— Beto tasonga yo kana beto kewila Nzambi mpi kesala mambu yina ya yandi ketuba.

Yo yina, beto fwe bakaka ntangu ya kutanga Biblia kumosi. Ntangu beto kezwaka mukanda ya mekatuka na muntu mosi ya beto kezolaka mingi, beto ketangaka yo mbala na mbala. Beto kemonaka yo mfunu mingi. Beto fwe monaka Biblia mfunu mutindu yina sambu yo ke mukanda mosi ya mekatuka na Muntu ya kezolaka beto mingi kuluta. Yo ke mukanda mosi ya mekatukaka na Nzambi mosi ya zola.

Ntangu yai, baka mwa minuta sambu na kutanga baverse yai ya kesonga nde Biblia ke mpenza Ndinga ya Nzambi, yina bo mesonikaka sambu na mambote na beto: Roma 15:4; 2 Timoteo 3:16, 17; mpi 2 Piere 1:20, 21.

[Bifwanisu ya kele na lutiti 17]

Inki mutindu beto kezaba nde Nzambi le tubila beto ata yandi ke ntama mpenza?

[Bifwanisu ya kele na lutiti 19]

Keti nge le pesa bazina ya bantu yai ya kusonikaka Biblia?

[Kifwanisu ya kele na lutiti 20]

Inki mambu nge le longuka ntangu nge ketanga Biblia?