TA NJĨRA atĩrĩ, nĩ ibuku rĩrĩkũ wendete mũno?— Ciana imwe ciendete ibuku rĩraria ũhoro wa nyamũ. Ingĩ nacio ciendete ibuku rĩrĩ na mbica nyingĩ. Ciana nĩ ikenagio nĩ mabuku ta macio.

No mabuku marĩa mega mũno thĩinĩ wa thĩ nĩ marĩa matwĩraga ũhoro wa ma wĩgiĩ Ngai. No nĩ harĩ ibuku rĩmwe rĩa bata gũkĩra macio mangĩ mothe. Wee nĩ ũĩ ibuku rĩu nĩ rĩrĩkũ?— Nĩ Bibilia.

Bibilia nĩ ya bata mũno nĩkĩ?— Nĩ tondũ yoimire kũrĩ Ngai. Ĩtwĩraga ũhoro wake na ũhoro wĩgiĩ maũndũ mega marĩa arĩtwĩkĩra. Na ĩgatuonia ũrĩa twagĩrĩirũo nĩ gwĩka nĩguo tũmũkenie. Bibilia ĩhaana ta marũa kuuma kũrĩ Ngai.

Korũo Ngai nĩ eendaga, nĩ angĩandĩkĩire Bibilia yothe kũũrĩa igũrũ na acoke anengere andũ. No ndekire ũguo. O na gũtuĩka ũhoro woimaga kũrĩ Ngai, aahũthĩrire ndungata ciake cia gũkũ thĩ kwandĩka maũndũ maingĩ marĩa marĩ thĩinĩ wa Bibilia.

Ngai eekire ũguo atĩa?— Nĩguo tũmenye-rĩ, ta wĩcirie ũndũ ũyũ. Hĩndĩ ĩrĩa twaigua mũgambo wa mũndũ redio-inĩ, mũgambo ũcio no ũkorũo ũkiuma kũrĩ mũndũ ũrĩ kũraihu mũno. Rĩrĩa twerorera TV, no tuone mbica cia andũ marĩ bũrũri ũngĩ thĩinĩ wa thĩ, o na no tũigue ũrĩa maroiga.

Andũ no mahote gũthiĩ nginya kwa mweri na magatũma ũhoro gũkũ thĩ marĩ kũu. Hihi nĩ ũroĩ ũguo?— Angĩkorũo andũ no mahote gũtũma ũhoro marĩ kũraihu ũguo-rĩ, nĩ ũkuona ta Ngai angĩhota gũtũma ũhoro kuuma igũrũ?— Ĩĩ no ahote! Na nĩ eekire ũguo tene mũno o na mbere ya andũ kũgĩa na TV kana redio.

 Musa nĩ ũmwe wa arĩa maiguire Ngai akĩaria. Musa ndangĩahotire kuona Ngai, no nĩ aaiguire mũgambo Wake. Haarĩ na andũ milioni nyingĩ rĩrĩa ũndũ ũcio wekĩkire. Mũthenya ũcio-rĩ, Ngai aatũmire kĩrĩma gĩothe kĩinaine, na gũkĩgĩa marurumĩ na heni. Andũ acio nĩ maamenyire atĩ nĩ Ngai waaragia, no magĩĩtigĩra mũno. Nĩ ũndũ ũcio makĩĩra Musa ũũ: ‘Ngai nĩ atige kwaria na ithuĩ tũtigakue.’ Thutha ũcio Musa nĩ aandĩkire maũndũ marĩa Ngai oigĩte. Maũndũ marĩa Musa aandĩkire marĩ thĩinĩ wa Bibilia.—Thama 20:18-21.

Musa nĩwe waandĩkire mabuku matano ma mbere ma Bibilia. No to we wiki wandĩkire Bibilia. Ngai aahũthĩrire athuri ta 40 kwandĩka icunjĩ cia Bibilia. Athuri acio maatũũraga tene mũno, na Bibilia nĩ yaninire mĩaka mĩingĩ mũno ĩgĩkaarĩka kwandĩkwo. Bibilia  yaninire mĩaka ta 1,600. Ũndũ ũrĩa wa kũmakania nĩ atĩ, o na gũtuĩka amwe ao matiacemanirie o na hanini, maũndũ marĩa maandĩkire nĩ matwaranaga wega biũ.

Athuri amwe arĩa maahũthĩrirũo nĩ Ngai kwandĩka Bibilia nĩ moĩkaine mũno. O na gũtuĩka Musa aarĩ mũrĩithi, nĩ aatuĩkire mũtongoria wa rũrĩrĩ rwa Isiraeli. Nake Suleimani aarĩ mũthamaki ũrĩa warĩ mũũgĩ mũno na mũtongu biũ mahinda-inĩ macio. No aandĩki angĩ matioĩkaine mũno. Amosi aarutaga wĩra mũgũnda-inĩ wa mĩkũyũ.

Mwandĩki ũmwe wa Bibilia aarĩ ndagĩtarĩ. Hihi wee nĩ ũĩ ũrĩa eetagwo?— Eetagwo Luka. Nake mwandĩki ũngĩ aarĩ mwĩtia wa mbeca cia igooti. Na eetagwo Mathayo. O na nĩ harĩ ũngĩ warĩ wakiri, wathomeire watho wa ndini ya Ayahudi. Nĩwe waandĩkire mabuku marĩa maingĩ ma Bibilia gũkĩra acio angĩ othe. Hihi nĩ ũĩ ũrĩa eetagwo?— Eetagwo Paulo. Ningĩ Petero na Johana, arĩa maarĩ arutwo a Jesu, o nao nĩ maandĩkire Bibilia na maarĩ ategi a thamaki.

Aandĩki aingĩ a Bibilia maandĩkire ũhoro wa maũndũ marĩa Ngai angĩekire thutha-inĩ. Maamenyaga atĩa maũndũ macio o na mbere ya gwĩkĩka?— Ngai nĩwe wakoragwo amamenyithĩtie maũndũ macio. Nĩ aameraga maũndũ marĩa megwĩkĩka.

Hĩndĩ ĩrĩa Jesu, Mũrutani Ũrĩa Mũnene aarĩ gũkũ thĩ, gĩcunjĩ kĩnene kĩa Bibilia kĩarĩ kĩandĩke. Ririkana atĩ, Mũrutani Ũrĩa Mũnene hau kabere aatũũraga igũrũ. Nĩ aamenyaga maũndũ marĩa Ngai eekĩte. Hihi nĩ eetĩkĩtie atĩ Bibilia yoimĩte kũrĩ Ngai?— Ĩĩ nĩ eetĩkĩtie ũguo.

Hĩndĩ ĩrĩa Jesu aaragia na andũ ũhoro wa maũndũ marĩa Ngai eekĩte, aathomaga Bibilia-inĩ. Rĩmwe na rĩmwe aameeraga ũrĩa yugĩte kuumana na maũndũ marĩa aaririkanaga. Ningĩ Jesu nĩ aatũmenyithirie maũndũ mangĩ maingĩ kuuma kũrĩ Ngai. Jesu oigire ũũ: ‘Maũndũ marĩa ndaiguire kuuma kũrĩ Ngai nĩmo ndĩraria gũkũ thĩ.’ (Johana 8:26) Jesu nĩ aiguĩte maũndũ maingĩ kuuma kũrĩ Ngai tondũ  aatũũraga hamwe na Ngai. Maũndũ macio Jesu aaririe-rĩ, maandĩkĩtwo kũ?— Thĩinĩ wa Bibilia. Maũndũ macio mothe maandĩkirũo nĩguo tũmathomage.

Hĩndĩ ĩrĩa Ngai aahũthĩrire andũ kwandĩka Bibilia, maandĩkire na rũthiomi rũrĩa rwaragio hĩndĩ ĩyo. Kwoguo-rĩ, gĩcunjĩ kĩnene kĩa Bibilia kĩandĩkirũo na Kĩhibirania, nakĩo kĩngĩ gĩkĩandĩkwo na Kĩaramu, na icunjĩ ingĩ ikĩandĩkwo na Kĩngiriki. Tondũ andũ aingĩ rĩu matiũĩ gũthoma thiomi icio, Bibilia nĩ ĩtaũrĩtwo na thiomi ingĩ. Ũmũthĩ icunjĩ cia Bibilia no ithomwo na thiomi makĩria ma 2,600. Ta wĩcirie ũndũ ũcio! Bibilia nĩ marũa Ngai andĩkĩire andũ othe mathome. O na gũtuĩka Bibilia nĩ ĩtaũrĩtwo na thiomi nyingĩ mũno, ũhoro wayo uumĩte kũrĩ Ngai.

Maũndũ marĩa Bibilia yugaga nĩ ma bata harĩ ithuĩ.  Bibilia yandĩkirũo ihinda iraihu mũno ihĩtũku. No nĩ ĩtwĩraga ũhoro wĩgiĩ maũndũ marĩa marekĩka ũmũthĩ. Ningĩ nĩ ĩtwĩraga ũrĩa Ngai arĩka ihinda rĩrĩa rĩũkĩte. Maũndũ marĩa yugaga nĩ matũkenagia mũno! Nĩ ĩtũheaga kĩĩrĩgĩrĩro kĩa magegania.

Ningĩ Bibilia nĩ ĩtwĩraga mĩtugo ĩrĩa Ngai eendaga tũkorũo nayo. Nĩ ĩtũteithagia kũmenya maũndũ marĩa mega na marĩa moru. Niĩ nawe, nĩ tũrabatara kũmenya ũndũ ũcio. Nĩ ĩtwĩraga ũhoro wa andũ meekire maũndũ moru na ũrĩa gwathiire, nĩguo twĩtheme mathĩna marĩa maamakorire. O na nĩ ĩtwĩraga ũhoro wa andũ meekire maũndũ marĩa magĩrĩire na maũndũ mega marĩa monire. Ũhoro ũcio wothe waandĩkirũo nĩguo tũgunĩke.

No nĩguo tũgunĩke biũ nĩ Bibilia, nĩ tũrabatara kũmenya macokio ma kĩũria kĩmwe. Kĩũria kĩu nĩ gĩkĩ: Bibilia yoimire kũ? We ũngiuga atĩa?— Nĩ ma, Bibilia ĩrĩ yothe yoimire kũrĩ Ngai. Kwoguo-rĩ, ithuĩ tũngĩonania atĩa atĩ tũrĩ ogĩ?— Na njĩra ya gũthikĩrĩria Ngai na gwĩkaga ũrĩa oigĩte.

Nĩ ũndũ ũcio-rĩ, nĩ tũrabatara gũcaragia kahinda ga gũthoma Bibilia tũrĩ hamwe. Rĩrĩa twanyita marũa kuuma kũrĩ mũndũ twendete mũno, tũmathomaga maita maingĩ. Nĩ tuonaga marĩ ma bata. Ũguo nĩguo twagĩrĩirũo nĩ kuona Bibilia ĩhaana tondũ nĩ marũa kuuma kũrĩ Ũrĩa ũtwendete mũno. Nĩ marũa kuuma kũrĩ Ngai ũrĩ wendo.