EMBO lilipi u hole unene momambo aeshe? — Ounona vamwe otashi dulika va tye ove hole omambo oo taa popi kombinga yoinamwenyo. Vamwe otashi dulika va tye ove hole omambo oo e na omafano mahapu. Omambo oo otashi dulika a kale mahafifa okulesha.

Omambo oo a denga mbada mounyuni aushe oyoo tae tu lombwele oshili kombinga yaKalunga. Ndele ope na embo limwe lomomambo oo li na ongushu li dule omambo makwao aeshe. Mbela ou shi shii kutya olilipi? — Embo olo olo Ombibeli.

Omolwashike Ombibeli ya fimanenena? — Omolwaashi oya dja kuKalunga. Ombibeli otai tu hongo kombinga yaKalunga nosho yo kombinga yoinima iwa oyo te ke tu ningila monakwiiwa. Otai tu lombwele yo osho tu na okuninga opo tu hafife Kalunga. Ombibeli oi li ngaashi onhumwafo oyo ya dja kuKalunga.

Kalunga okwa li ngeno ta dulu okushanga Ombibeli aishe ya wana po meulu, ndele te i pe ovanhu, ashike hasho a ninga ngaho. Nonande omadiladilo oo a shangwa mOmbibeli oaKalunga, okwa li a longifa ovapiya vaye vokombada yedu va shange Ombibeli.

Mbela okwa li e shi ninga ngahelipi? — Opo tu shi ude ko, natu ka tale kwaashi tashi shikula apa. Ohatu dulu okuuda ondaka yomunhu wonhumba koradio, ndele omunhu oo ta popi otashi dulika e li kokule neenghono. Ngeenge hatu tale o-TV, ohatu dulu okumona omafano ovanhu ovo ve li koilongo imwe i lili mounyuni, nohatu udu osho tava popi.

Ovanhu otava dulu okweenda oinano ile tava longifa oyeendifo yomewangadjo okuya komwedi, notava dulu okutumina ovanhu ovo ve li kedu omatumwalaka. Mbela owe shi uda nale? — Ngeenge ovanhu otava dulu okuninga ngaho, mbela Kalunga ita dulu okutuma omatumwalaka kombada yedu okudja meulu? — Nopehe na omalimbililo ota dulu. Osho Kalunga  okwe shi ninga nale nokuli nofimbo ovanhu va li vehe na eeradio nosho yo ee-TV.

Moses okwa li a uda Kalunga ta popi nonande ka li e mu mona. Opa li ovanhu omamiliyona eshi oshiningwanima osho sha ningwa. Efiku olo Kalunga okwa li a ningifa omhunda aishe i kakame, nopa li omingungumo noushelu. Ovanhu ova li ve shii kutya Kalunga okwa popya nova li va tila neenghono. Onghee hano, ova li va lombwela Moses tava ti: ‘Kalunga haye mwene a popye nafye opo tuha fye.’ Konima yaasho, Moses okwa ka shanga osho Kalunga a li a popya. Eendjovo odo Moses a li a shanga otadi hangika mOmbibeli. — Exodus 20:18-21.

Moses okwa shanga omambo Ombibeli atano opehovelo. Ndele haye aeke a li a shanga Ombibeli. Kalunga okwa li a longifa ovalumenhu 40  lwaapo va shange oitukulwa yOmbibeli. Ovalumenhu ovo ova li ko omido dihapu da pita, nosha li sha kufa omido dihapu opo va mane okushanga Ombibeli, omido 1 600 lwaapo. Osho shikumwifi oshosho kutya nonande vamwe vomovalumenhu ovo va shanga Ombibeli kava li ve shaafane, oinima aishe oyo va shanga otai tu kumwe filufilu.

Ovanhu vamwe ovo va li va longifwa kuKalunga va shange Ombibeli ova li va tumbala. Nonande Moses okwa li omufita woimuna, okwa ka ninga omuwiliki woshiwana shaIsrael. Salomo okwa li ohamba oyo ya li i na ounongo noupuna i dule ovanhu aveshe vopefimbo layo. Ndele ovashangi vamwe kava li lela va tumbala. Pashihopaenenwa, Amos okwa li ha shate eenghwiyu.

Omushangi umwe wOmbibeli okwa li ondokotola. Mbela ou shi shii kutya oye lyelye? — oLukas. Omushangi umwe vali okwa li omufendelifi, nedina laye oMateus. Omushangi umwe vali okwa li omupanguli, oo a li e shii nawa omhango yomalongelokalunga Oshijuda. Okwa shanga omambo mahapu Ombibeli e dule ovashangi vakwao aveshe. Mbela ou shi shii kutya oye lyelye? — oPaulus. Ovahongwa vaJesus, Petrus naJohannes ovo navo va shanga Ombibeli, ova li ovayuli veeshi.

Ovashangi vahapu vOmbibeli ovo ova li va shanga kombinga yoinima oyo Kalunga a li ta ka ninga monakwiiwa. Ndele oinima oyo ova li ve i shiiva ngahelipi ngeenge kaya li ya ningwa natango? — Kalunga oye a li e va pa ouyelele oo. Okwa li e va lombwela osho tashi ka ningwa monakwiiwa.

Eshi Jesus, Omuhongi Munene, e ke uya kombada yedu, okwa hanga oshitukulwa shinene shOmbibeli sha pwa okushangwa. Dimbuluka kutya Omuhongi Munene okwa li meulu fimbo ine uya kombada yedu. Okwa li e shii osho Kalunga a ninga. Mbela okwa li ngoo a itavela kutya Ombibeli oya dja kuKalunga? — Heeno, okwa li e shi itavela.

Ngeenge Jesus a li ta lombwele ovanhu kombinga yoilonga yaKalunga, okwa li he va leshele okudja mOmbibeli. Omafimbo amwe, okwa li ashike ha popi ta tofa osho sha shangwa mOmbibeli. Kakele kaasho, okwa li yo a honga ovanhu oinima ihapu kombinga yaKalunga oyo ya li inai shangwa natango mOmbibeli eshi a li kombada yedu. Jesus okwa ti: “[Eshi] nda uda kuye, ohandi shi tongo kounyuni.” (Johannes 8:26) Jesus okwa li a uda oinima  ihapu kuKalunga molwaashi okwa li a kala pamwe naKalunga fimbo a li ine uya kombada yedu. Mbela openi hatu dulu okulesha oinima oyo Jesus a li a popya? — OmOmbibeli. Aishe oye tu shangelwa opo tu i leshe.

Eshi Kalunga a li a longifa ovalumenhu va shange Ombibeli, ova shanga melaka olo la li hali popiwa efiku keshe. Onghee hano, oitukulwa ihapu yOmbibeli oya li ya shangwa mOshiheberi, imwe oya li ya shangwa mOshiaramia naikwao ihapu omOshigreka. Molwaashi ovanhu vahapu kunena kave shii okulesha omalaka oo, Ombibeli oya tolokwa momalaka amwe e lili. Kunena oitukulwa yOmbibeli otai dulu okuleshwa momalaka e dule po 2 260. Diladila ashike kwaasho! Ombibeli oi li onhumwafo oyo Kalunga a shangela ovanhu aveshe. Kashi na nee mbudi kutya oya tolokwa momalaka e fike peni, etumwalaka olo li li mo ola dja kuKalunga.

Osho Ombibeli tai hongo osha fimana kufye. Nonande oya shangwa oule wefimbo lile la pita, otai tu lombwele kombinga yoinima oyo tai ningwa  kunena. Natango otai tu lombwele osho Kalunga ta ka ninga monakwiiwa i li popepi. Osho tai popi kashi hafifa tuu! Otai tu pe eteelelo likumwifi li na sha nonakwiiwa.

Ombibeli otai tu lombwele yo kombinga yonghedi yokukalamwenyo oyo Kalunga a hala tu kale tu na. Otai tu lombwele kombinga yaasho sha yuka naasho sha puka. Fye naave otwa pumbwa okushiiva kombinga yaasho. Otai tu lombwele kombinga yovanhu ovo va li va longa osho inashi yuka nosho yo kutya oshike sha li she va ningilwa, opo tu dule okuhenuka omaupyakadi oo a li e va hanga. Otai tu lombwele yo kombinga yaavo va li va longa osho sha yuka nosho yo ouwa oo va li va mona. Oinima aishe oyo i li mo oya shangwa omolwouwa wetu.

Opo tu mone ouwa mwaasho hatu lihongo mOmbibeli, otwa pumbwa okushiiva enyamukulo kepulo lonhumba. Epulo olo eli kutya: Olyelye e tu pa Ombibeli? Oto nyamukula ngahelipi? — Ombibeli aishe ya wana po oya dja kuKalunga. Ongahelipi hatu dulu okuulika kutya otu li ovanaendunge shili? — Omokupwilikina kuKalunga nokulonga osho te tu pula tu longe.

Onghee hano, otu na okukala hatu longifa efimbo opo tu kale hatu lesha Ombibeli pamwe. Ngeenge twa yakula onhumwafo oyo ya dja kuumwe oo tu hole neenghono, ohatu i lesha lwoikando, molwaashi otwe i tala ko i li oshinima shi na ongushu. Sha faafana, osho naanaa tu na okukala twa tala ko Ombibeli ngaho, molwaashi oi li onhumwafo oyo ya dja kuumwe oo e tu hole neenghono. Ombibeli oi li onhumwafo oyo ya dja kuKalunga omunahole.