ATUAKKAMIK nuannarinerpaasaqarpit? Sorliua? — Meeqqat ilaat uumasunut tunngasumik toqqaassagaluarput. Allat immaqa assiliartarpassualimmik piinnarusussapput. Taamaattunillu isiginnaarluni nuannersinnaavoq.

Atuakkalli pitsaanerpaat tassaapput Guutip ilumoortup kinaaneranik oqaluttuartut. Ataaserlu allanit tamanit pingaarneruvoq. Sunaasoq nalunngiliuk? — Tassa Biibili.

Sooruna Biibili taama pingaaruteqartigisoq? — Guutimeersuugami. Tassani oqaluttuarineqarami Guuti qanoq ittuunersoq uagutsinnullu qanoq ajunngitsunik iliorniarnersoq. Aamma tassani oqaluttuarineqarpoq Guutimut ikinngutaalerniarluta qanoq iliortariaqartugut. Guutimit allagarsiatsitut ippoq.

Guutip Biibili tamaat qilammi allassimasinnaagaluarpaa inunnullu tunniullugu. Taamaaliunngilarli. Maanili nunarsuarmi atuakkap annersaa kiffaminut allatsippaa. Tassanili allassimasut Guutimeersuupput.

Guuti qanoq taamaaliorsinnaagami? — Radio eqqarsaatigeriaruk. Radiomi oqaluttumik tusaagaangatta naluneq ajorparput oqaluttut allarujussuarmiittut, immaqalu allaat ungasissumiillutik. Fjernsyneraangattalu assit takusinnaasarpavut nunanit ungasissuneersut. Oqalunnerilu tusaasinnaasarpavut.

Allaat qaammammukartoqarsinnaavoq, tappavanngaanniillu nunarsuatsinnut tusarliisoqarsinnaalluni. Tamanna nalunngiliuk? — Inuit ungasissumiit tusarliisinnaappata, taava Guuti aamma taamaaliorsinnaassava? — Aap, soorunami taamaaliorsinnaavoq. Taamaaliortarsimavorlumi  radio fjernsynilu nassaarineqanngikkallarmata.

Angutip Mosesimik atillip Guuti oqaluttoq tusaasimavaa. Guuti takusinnaasimanngilaa, kisiannili Guutip nipaa tusaasinnaasimallugu. Tamanna pimmat inuit tusindilippassuit najuupput. Guutip qaqqarsuaq sajutsilerpaa, aamma innaallattalerpoq kallilerlunilu. Taava inuit paasivaat Guuti oqaluttoq. Ersisorujussuanngorpulli, Mosesilu oqarfigalugu: “Guuti uatsinnut oqalunniaqinani toqoqinagatta.” Kingusinnerusukkut Mosesip Guutip oqaasii allappai. Mosesillu allagai Biibilimi atuarsinnaavavut. — 2 Mosesi 20:18-21.

Mosesip atuakkat tallimat siulliit Biibilimiittut allappai. Taamaattumik Mosesimik allakkanik taasarpavut. Taannali kisimi Biibilimik  allattuunngilaq. Guutip angutit assigiinngitsut 40-t Biibilimik immikkut allatsippai. Taakkua tamarmik itsarsuaq inuupput, ukiorpassuillu ingerlapput Biibilip naammassineqarnissaanut. Tassami ukiut 1600-t ingerlapput. Naak angutit taakkua tamarmik immikkut allakkaluartut, aamma amerlanersaat imminnut naapinngisaannaraluartut, Biibilip immikkoortortai tamarmik imminnut ataqatigiipput.

Angutit Guutip allatsitut atugaasa ilaat tusaamasaapput. Soorlu Mosesi. Savanik paarsisuuvoq, kisiannili inuiannik Israelikkunnik siulersuilerpoq. Aamma Salomo — kunngiuvoq, taamanilu nunarsuarmi silatunersaallunilu pisuujunerpaavoq. Allaqataasulli allat taama tusaamasaatiginngillat. Soorlu Amosi, taanna figenequtinik nakkutilliisuuvoq.

Biibilimik allattut ilaat nakorsaavoq. Kinaasoq nalunngiliuk? — Lukasimik ateqarpoq. Alla akileraaruserisuuvoq. Matthæusimik ateqarpoq. Ataaseq ilinniagartoorujussuuvoq juutit upperisarsiornikkut inatsisaannik ilinniartitsisoq. Taassuma Biibilimik allattunit allanit allagai amerlanerupput. Atia nalunngiliuk? — Tassa Paulusi. Aamma Petrusi Johannesilu Biibilip ilaanik allaqataapput, taakkua aalisartuupput.

Biibilimik allattut ilarpassuisa Guutip kingusinnerusukkut iliuuseriumaagai allaatigaat. Qanoq ilillutik suli pinngitsut paasisinnaagamikkit? — Taamaaliorsinnaasimapput Guutip kingusinnerusukkut pisussanik oqaluttuussimammatik.

Taamani Jiisusi, Ajoqersuisorsuaq, nunami inuugallarmat Biibilip ilarujussua allanneqareersimavoq. Eqqaamasinnaassavat Ajoqersuisorsuaq qilammiissimasoq. Guutip iliuuserisimasai nalunngilai. Taassuma Biibilip Guutimeersuunera upperaa? — Aap, upperisimavaa.

Jiisusip inuit Guutip suliaanik oqaluttuukkaangamigit ilaannikkut Biibilimit atuffassisarpoq. Ilaannili issuaannartarpaa. Amerlanerusunillu Guuti pillugu oqaluttuaqqittaraaq. Oqarpoq: “Taassumanngalu tusakkakka silarsuarmut oqaatigaakka.” (Johannesi 8:26) Jiisusip  Guutimit sorpassuit tusartarsimavai; Guutimimi najugaqarsimagami. Sumimaajuna Jiisusip oqaasii atuarsinnaagivut? — Aap, Biibilimi. Allanneqarsimapput atuarsinnaaniassagatsigit.

Inuit Guutip Biibilimik allatsitai soorunami taamani oqaatsit atorneqartut atorlugit allattarput. Taamaammat Biibilip annersaa hebræerisut allagaavoq, ilamininngualu aramæerisut, ilangaatsiarujussualu grækerisut allanneqarsimalluni. Maannali inuppassuit oqaatsit taakku paasisinnaanngilaat, taamaattumillu Biibili oqaatsinut allanut nutserneqartarpoq. Ullumikkut Biibili imaluunniit ilaannaa oqaatsinut 2260-inut nutsigaavoq! Biibili Guutip inunnut tamanut allagaraa. Naak nutserneqaqqeqattaarlunilu allaqqinneqaqattaaraluartoq suli Guutip tusarliussaa atuarsinnaavarput.

Biibilimi allaqqasut uagutsinnut pingaartuupput. Qangarsuarli allagaagaluarluni,  kisiannili annersaa ullumikkut pisartunut tunngavoq. Oqaluttuarineqarpullu Guutip qanittumi iliuusissai. Ilaa pissanganaq? — Qilanaarutissaqaqaagut.

Biibilimi aamma takusinnaavarput Guutip qanoq inuunissarput kissaatigigaa. Tassani oqaluttuarineqarpoq suna eqqortuunersoq sunalu eqqunngitsuunersoq. Taakkua paasinissaat pisariaqartippat, uangattaaq pisariaqartippara. Tassani oqaluttuarineqarput inuit ajortunik iliortut, oqaluttuarineqarlunilu qanoq taakku ingerlasimanersut, ajornartorsiutiginikuusaat uagut pinngitsoorniassagatsigit. Aamma oqaluttuarineqarput ajunngitsunik iliortut, taakkualu qanoq ingerlalluarsimatiginersut. Taakkua tamarmik allagaapput ilinniarfiginiassagatsigit.

Biibilili tamaat atorluassagutsigu eqqaamasassaqarpugut. Tassa kia uagutsinnut tunniussimaneraa. Tunniussisoq kinaava? — Aap, Guutiuvoq; Biibili tamarmi Guutimeersuuvoq. Taava qanoq iliorutta silatusaarnerussava? — Silatusaarnerussaaq Guuti tusarnaassallugu oqaasialu malissallugu.

Tassa imaappoq Biibili atuaqatigiissutigisariaqaripput. Arlaannit allagarsigaangatta nuannaartarpugut, ilaa? Atuaqqeqattaartarpavut. Biibili aamma taamaassavarput, asannitsiginerpaasattaana uagutsinnut allagaa. Guutimit asannittumit allagaavoq.