Kauhanyo 2

Liñolo Le Li Zwa Ku Mulimu Ya Lilato

HA KU ni taluseze, ki ifi buka y’o lata hahulu kwa libuka kaufela?— Banana ba bañwi ne ba ka keta buka ye bulela za lifolofolo. Ba bañwi ne ba ka keta buka ye na ni maswaniso a mañata. Ku bala libuka zeo ku kona ku ba ko ku tabisa.

Kono libuka ze nde ka ku fitisisa mwa lifasi kaufela ki ze lu bulelela niti ka za Mulimu. Ye ñwi kwa libuka zeo ki ya butokwa hahulu ku fita ze ñwi kaufela. Kana wa i ziba yona buka yeo?— Ki Bibele.

Ki kabakalañi Bibele ha i li ya butokwa cwalo?— Ki kakuli i zwa ku Mulimu. I lu bulelela ka za hae ni ka za lika ze nde z’a ka lu ezeza. Mi i lu bonisa ze lu lukela ku eza kuli lu mu tabise. I swana sina liñolo le li zwa ku Mulimu.

Mulimu n’a ka be a ñolezi Bibele mutumbi kwa lihalimu mi kona ha n’a ka i fa batu. Kono n’a si ka eza cwalo. Nihaike ze n’e ñozwi mwateñi ne li zwa ku Mulimu, n’a itusisize batanga ba hae ba fa lifasi ku ñola buñata bwa litaba ze mwa Bibele.

Mulimu n’a ezize cwañi cwalo?— Kuli u utwisise mwa n’a ezelize cwalo, ki o mutala. Ha lu utwa linzwi la mutu fa wailesi, mutu ya bulela y’o u kona ku ba kwahule. Ha lu buha TV, lu bona batu ba ba mwa linaha ze ñwi za mwa lifasi, mi lwa kona ku utwa ze ba bulela.

Batu mane ba kona ku y’o fita kwa kweli ka ku itusisa lifulai za bona, mi ze ba bulela za konwa ku utwiwa fa lifasi. Kana wa ziba cwalo?— Haiba batu ba kona ku eza cwalo, kana z’a bulela Mulimu za kona ku utwahala ku zwelela kwa lihalimu?— Kaniti luli za  kona! Mi n’a ezize cwalo kale-kale pili batu ba si ka ba ni wailesi kamba TV.

Mushe ki mutu ya n’a ikutwezi Mulimu h’a bulela. Mushe n’a sa koni ku bona Mulimu, kono n’a kona ku utwa linzwi la Mulimu. Batu ba bañata-ñata ne ba li teñi ha ne ku ezahezi cwalo. Mane, fa lizazi leo, Mulimu n’a nyanganyisize lilundu mutumbi, mi ne ku na ni mishika ni mamonyi. Batu ne ba ziba kuli Mulimu n’a bulezi, kono ne ba sabile hahulu. Kacwalo, ba bulelela Mushe ba li: “Mulimu a si ke a bulela ni luna, lu ka swana lwa shwa.” Hasamulaho, Mushe a ñola litaba za n’a bulezi Mulimu. Mi zona litaba zeo za n’a ñozi Mushe li mwa Bibele.—Exoda 20:18-21.

 Mushe n’a ñozi libuka za pili ze ketalizoho za mwa Bibele. Kono n’e si yena a nosi ya n’a ñozi. Mulimu n’a itusisize banna ba ba bat’o ba ba 40 ku ñola likalulo za Bibele. Banna bao ne ba pilile kale-kale kwamulaho k’o, mi ne ku ngile lilimo ze ñata-ñata kuli Bibele i fezwe ku ñoliwa. Ee, ne ku ngile nako ya lilimo ze bat’o ba ze 1,600! Se si komokisa kikuli nihaike banna bao ba li ku ba ba bonane, ze ne ba ñozi kaufela za lumelelana hahulu.

Banna ba bañwi ba n’a itusisize Mulimu kwa ku ñola Bibele ne ba zibahala hahulu. Nihaike Mushe n’a li mulisana, na til’o ba mueteleli wa sicaba sa Isilaele. Salumoni n’a li mulena ya butali ka ku fitisisa ili ya n’a fumile ka ku fitisisa mwa lifasi kaufela. Kono bañoli ba bañwi ne ba si ba ba zibahala cwalo. Amosi n’a babalelanga likota za feiga.

Hape, yo muñwi ya n’a ñozi Bibele n’a li dokota. Kana wa mu ziba?— Ki Luka. Muñoli yo muñwi n’a li mutelisi. Libizo la hae ki Mateu. Mi hape yo muñwi n’a li caziba wa mulao, ya n’a ziba hahulu mulao wa bulapeli bwa Majuda. N’a ñozi libuka ze ñata za mwa Bibele ku fita muñoli ufi kamba ufi. Kana wa mu ziba?— Ki Paulusi. Mi balutiwa ba Jesu bo Pitrosi ni Joani, bao ni bona ne ba li bañoli ba Bibele, ne ba li mandui.

Buñata bwa bañoli ba Bibele bao ne ba ñozi ka za lika za n’a ka eza Mulimu kwapili. Ne ba zibile cwañi lika zeo mane li si ka ezahala kale?— Mulimu n’a file banna bao litaba zeo. N’a ba bulelezi ze n’e ka ezahala.

Jesu, yena Muluti yo Mutuna, ha t’o tahanga fa lifasi, kalulo ye tuna ya Bibele ne se i ñozwi kale. U si libali kuli Muluti yo Mutuna pili n’a pilile kwa lihalimu. N’a ziba za n’a ezize Mulimu. Kana n’a lumela kuli Bibele i zwa ku Mulimu?— Ee.

Jesu ha n’a bulelanga ni batu ka za misebezi ya Mulimu, n’a balanga mwa Bibele. Fokuñwi, n’a ba bulelelanga ze i bulela ku zwelela  fela mwa toho. Jesu hape n’a lu tiselize litaba ze ñwi ze zwa ku Mulimu. Jesu n’a ize: “Se ni utwile ku Yena ni si bulelela lifasi.” (Joani 8:26) Jesu n’a utwile lika ze ñata ku Mulimu kakuli n’a pilile ni Mulimu. Mi ki kai ko lu kona ku bala zona lika zeo za n’a bulezi Jesu?— Lu kona ku li bala mwa Bibele. Bibele mutumbi ne i ñolezwi kuli lu i bale.

Kaniti, Mulimu ha n’a itusisize batu kwa ku ñola, ne ba ñozi mwa lipuo ze ne ba itusisanga mwa miteñi yeo. Kacwalo, buñata bwa ze mwa Bibele ne li ñozwi mwa Siheberu, ze ñwi mwa Siarami, mi buñata bwa ze ñwi mwa Sigerike. Bakeñisa kuli buñata bwa batu kacenu ha ba zibi ku bala lipuo zeo, Bibele se i tolokilwe mwa lipuo ze ñwi. Kacenu, likalulo za Bibele za kona ku baliwa mwa lipuo ze fitelela 2,260. Nahana fela za teñi! Bibele ki liñolo leo Mulimu a ñolezi batu ko ba fumaneha kaufela. Kono ku si na taba kuli i tolokilwe hañata-ñata cwañi, ze i bulela li zwa ku Mulimu.

 Ze i bulela Bibele ki za butokwa ku luna. Nihaike ne i ñozwi kale-kale k’o, i bulela ka za lika ze sweli ku ezahala cwale. Mi i lu bulelela ka za lika z’a ka tuha a eza Mulimu. Ze i bulela z’a tabisa! I lu fa sepo ye tabisa.

Bibele hape i lu bulelela m’o Mulimu a batela kuli lu pilele. I lu bulelela ze lukile ni ze si ka luka. Wa tokwa ku ziba taba yeo, mi ni na na tokwa ku i ziba. I lu bulelela ka za batu be ne ba ezize lika ze maswe ni ze n’e ezahezi ku bona, ilikuli lu tokolomohe matata a n’a ba tahezi. Hape i lu bulelela za batu be ne ba ezize lika ze nde ni ze nde ze ne ba fumani mwateñi. Kaufel’a zona zeo ne li ñolezwi kuli lu tusiwe.

Kono kuli lu tusiwe hahulu ki Bibele, lu tokwa ku ziba kalabo kwa puzo ye ñwi. Puzo yeo ki ye li: Ki mañi y’a lu file Bibele? N’o ka alaba cwañi?— Bibele mutumbi i zwa ku Mulimu. Kacwalo, lu kona ku bonisa cwañi kuli luli lu ba ba butali?— Ki ka ku utwa Mulimu ni ku eza z’a bulela.

Kacwalo, lu tokwa ku ba ni nako ya ku bala Bibele hamoho. Ha lu amuhela liñolo ku zwa ku mutu ye lu lata hahulu, lwa kuta-kutela ku li bala. Ki la butokwa ku luna. Ki mona mo Bibele i lukela ku bela ku luna, kakuli ki liñolo le li zwa ku Yena ya lu lata ka ku fitisisa. Ki liñolo le li zwa ku Mulimu ya lilato.

Ka mizuzunyana cwale, ha ku bale mañolo a, a’ bonisa kuli Bibele kaniti luli ki Linzwi la Mulimu, le li ñolezwi ku lu tusa: Maroma 15:4; 2 Timotea 3:16, 17; ni 2 Pitrosi 1:20, 21.

[Maswaniso a fa likepe 17]

Lu ziba cwañi kuli Mulimu w’a kona ku bulela ni luna ku zwelela kwahule-hule?

[Maswaniso a fa likepe 19]

Banna be ne ba ñozi Bibele ba ki bomañi mabizo?

[Siswaniso se si fa likepe 20]

Ki lika mañi z’o kona ku ituta ka ku bala Bibele?