စာအုပ်​အားလုံး​ထဲမှာ ဘယ်​စာအုပ်ကို ကလေးတို့ အကြိုက်ဆုံးလဲ၊ ပြောပြပါ။— ​တချို့က တိရစ္ဆာန်​အကြောင်း စာအုပ်ကို ရွေး​ကြ​မယ်။ တချို့ကျတော့ ရုပ်ပုံများ​များ​ပါတဲ့ စာအုပ်ကို ရွေး​ကြ​မယ်။ ဒီလို​စာအုပ်တွေ​ဟာ ဖတ်​ရတာ ပျော်စရာ ကောင်း​ပါတယ်။

ဒါပေမဲ့ ကမ္ဘာ​ပေါ်မှာ အကောင်းဆုံး စာအုပ်တွေ​က​တော့ ဘုရားသခင်​နဲ့​ပတ်သက်တဲ့ အမှန်တရား​အကြောင်း ရေးထားတဲ့ စာအုပ်တွေ​ပါပဲ။ အဲဒီ​ထဲ​ကမှ တစ်အုပ်​ဟာ တခြား​စာအုပ်တွေ​ထက် အဖိုးတန်တယ်။ ဘယ်​စာအုပ်​လဲ၊ သိသလား။— သမ္မာကျမ်းစာ​ပဲ​ကွဲ့။

ကျမ်းစာ​ဟာ ဘာကြောင့် သိပ်​အရေးကြီးသလဲ။— ဘုရားသခင်​ဆီက ဖြစ်လို့​ပေါ့။ ဒီ​စာအုပ်​မှာ ဘုရားသခင်​အကြောင်း၊ တို့အတွက် ဘုရားသခင် လုပ်ပေးမယ့် ကောင်းတဲ့အရာ​တွေ​အကြောင်း ပါတယ်။ ဘုရားသခင် စိတ်ပျော်​အောင် တို့​တစ်​တွေ ဘာလုပ်​ရမယ် ဆို​တာ​တွေ​လည်း ပါတယ်။ ဘုရားသခင်​ဆီက လာတဲ့ စာတစ်စောင်​နဲ့ တူ​တာပေါ့။

ကျမ်းစာ​တစ်အုပ်လုံး​ကို ဘုရားကိုယ်​တိုင် ကောင်းကင်ဘုံမှာ ရေး​ပြီးမှ လူတွေကို ပေး​ရင်​လည်း ရတာပဲ။ ဒါပေမဲ့ အဲဒီလို မ​လုပ်ခဲ့ဘူး။ အကြောင်းအရာတွေ​ဟာ ဘုရားသခင်​ဆီက ဖြစ်ပေမဲ့ အားလုံးလိုလို​ကို ကမ္ဘာ​ပေါ်မှာ​ရှိတဲ့ မိမိရဲ့ကျေးကျွန်​တွေကို ရေး​ခိုင်း​ခဲ့​တယ်။

ဘုရားသခင် ဘယ်လို ရေး​ခိုင်း​ခဲ့သလဲ။— ဒါကို နားလည်ဖို့ ဒီ​ဥပမာ​ကို စဉ်းစား​ကြည့်ပါ။ ရေဒီယို​က​နေ တစ်ယောက်ယောက်​ရဲ့ အသံ​ကို ကြားရတဲ့အခါ​မှာ အဝေးကြီး​မှာ​ရှိတဲ့ လူတစ်ယောက်​ရဲ့ အသံ ဖြစ်နိုင်တယ်။ တီဗီ ကြည့်​တဲ့အခါ​မှာ တခြား​တိုင်းပြည်​က လူတွေရဲ့ ပုံ​တွေ မြင်နိုင်တဲ့​အပြင် အသံကို​လည်း ကြား​နိုင်တယ်။

လူသားတွေဟာ လ​ကမ္ဘာ​အထိ​တောင် အာကာသယာဉ်​နဲ့ ခရီးသွား​ပြီး အဲဒီကနေ ကမ္ဘာ​ဆီ​ကို သတင်း ပို့​နိုင်​သေးတာပဲ။ အဲဒီ​အကြောင်း သိတယ် မဟုတ်လား။— လူတွေ​တောင် ဒီလောက်​လုပ်နိုင်​ရင် ဘုရားသခင်​ကော၊ ကောင်းကင်​က​နေ သတင်း မ​ပို့ပေး​နိုင်​ဘူး​လား။— ပို့​ပေးနိုင်​တာပေါ့။ လူတွေမှာ ရေဒီယို​တို့၊ တီဗီ​တို့ မရှိ​ခင် ဟို​ရှေး​ရှေး​က​တည်း​က ဘုရားသခင်​က အဲဒီလို သတင်းပို့​ပေးခဲ့​တယ်​ကွဲ့။

 မောရှေ​ဟာ ဘုရားသခင်ရဲ့ စကားကို နား​နဲ့ ဆ​တ်​ဆ​တ် ကြားခဲ့​ရ​သူ ဖြစ်တယ်။ ဘုရားသခင်ကို မမြင်​ရပေမဲ့ ဘုရားသခင့်​အသံ​ကို ကြားခဲ့​ရတယ်။ အဲဒီ​အချိန်တုန်းက လူသန်းနဲ့​ချီ ရှိနေကြတယ်။ တကယ်​ဆို​ရင် အဲဒီ​နေ့​တုန်း​က တောင်​တစ်​တောင်​လုံး​ကို ဘုရားသခင် တုန်လှုပ်​စေတဲ့​အပြင် မိုး​လည်း ချုန်း​စေတယ်၊ လျှပ်စီး​လည်း လက်​စေခဲ့တယ်။ ဘုရားသခင် စကားပြော​နေ​မှန်း လူတွေ သိ​ကြ​ပေ​မဲ့ အရမ်း​ကြောက်​နေကြ​တယ်။ ဒါကြောင့် လူတွေက မောရှေ​ကို “ဘုရားသခင် မပြောပါစေနဲ့။ သေ​မှာ​စိုး​လို့​ပါ” လို့ တောင်းပန်​ကြ​တယ်။ နောက်ပိုင်းမှာ မောရှေ​က ဘုရားသခင် ပြောတာတွေကို ရေးမှတ်​ထား​လိုက်တယ်။ မောရှေ ရေးခဲ့တာ​တွေ ကျမ်းစာမှာ ပါတယ်။—ထွက်မြောက်ရာ ၂၀:၁၈-၂၁။

မောရှေ​ဟာ ကျမ်းစာထဲက ပထမ ကျမ်း​ငါးစောင်​ကို ရေးသားခဲ့တယ်။ ဒါပေမဲ့ ကျမ်းစာ ရေးခဲ့တာ မောရှေ တစ်ယောက်တည်း​တော့ မဟုတ်ဘူး။ ကျမ်းစာရဲ့ အစိတ်အပိုင်း​တွေကို ရေးသား​ဖို့ လူ ၄၀ လောက်​ကို ဘုရားသခင် သုံးခဲ့တယ်။ အဲဒီ​လူတွေဟာ ဟို​ရှေး​ရှေး​တုန်း​က အသက်ရှင်​ခဲ့​ကြ​ တယ်။ ပြီးတော့ ကျမ်းစာကို အပြီး​ရေး​ဖို့ နှစ်​အများကြီး ကြာ​ခဲ့​တယ်။ ဟုတ်​တယ်၊ နှစ်ပေါင်း ၁,၆၀၀ လောက်​တောင် အချိန်​ယူ​ခဲ့​ရတယ်။ အံ့သြစရာ​ကောင်းတာ​က အဲဒီ​လူတချို့ဟာ တစ်ယောက်နဲ့ တစ်ယောက် တစ်ခါ​မှ မ​တွေ့ဖူး​တာ​တောင် သူတို့ ရေးခဲ့တာ​တွေ​ဟာ သဘောချင်း အပြည့်အဝ တိုက်ဆိုင်​ကြ​တယ်။

ကျမ်းစာ ရေး​ဖို့ ဘုရားသခင် သုံးခဲ့​တဲ့​သူတချို့​ဟာ ထင်ရှား​တဲ့​သူတွေ။ မောရှေ​ဟာ သိုးထိန်း​ဖြစ်ခဲ့​ပေမဲ့ အစ္စရေး​လူမျိုးရဲ့ ခေါင်းဆောင် ဖြစ်လာတယ်။ ရှောလမုန်​ဆို​ရင် ရှင်ဘုရင်​လည်း ဖြစ်တယ်၊ ကမ္ဘာ​ပေါ်မှာ ပညာ​အရှိဆုံး​နဲ့ အ​ချမ်းသာ​ဆုံး​လည်း ဖြစ်တယ်။ တခြား​ကျမ်း​ရေးသူ​တွေ​ကတော့ အဲဒီလောက် မထင်ပေါ်ကြ​ဘူး။ အာမုတ်​ဆို​ရင် သဖန်း​ပိုးစာပင် ပြုစုသူ ဖြစ်တယ်။

ဒီ့ပြင် ကျမ်းစာ​ရေးသူ​တစ်ယောက်​က ဆရာဝန်။ သူ့​နာမည်ကို သိသလား။— လုကာ​ပေါ့။ နောက်​တစ်ယောက်က​တော့ အခွန်ကောက်​တဲ့​သူ ဖြစ်တယ်။ သူ့​နာမည်က မဿဲ​တဲ့။ နောက်ထပ် တစ်ယောက်က​တော့ ဂျူး​ဘာသာ​ရဲ့ ပညတ်တရား​တွေကို ကျွမ်းကျင်​တဲ့ ဥပဒေ​ပညာရှင်​ကြီး တစ်ယောက်​ပေါ့။ တခြား​ကျမ်းစာ​ရေးသူတွေ​ထက် သမ္မာကျမ်းစာရဲ့ ကျမ်းစောင်တွေကို ပိုရေးခဲ့တယ်။ သူ့​နာမည်ကို​ကော သိသလား။— ပေါလု​ပဲ​လေ။ ပြီးတော့ ယေရှု​ရဲ့​တပည့် ပေတရု​နဲ့ ယောဟန်​တို့​လည်း ကျမ်းစာကို ရေးခဲ့ကြတယ်။ သူတို့ကတော့ တံငါသည်​တွေ။

ကျမ်းစာ​ရေးသူ အတော်များများ​က နောင်​အနာဂတ်မှာ ဘုရားသခင် လုပ်​မယ့်​အရာတွေ​အကြောင်း ရေး​ကြတယ်။ မဖြစ်သေး​တဲ့ အကြောင်းအရာ​တွေကို ဘယ်လို သိ​ကြသလဲ။— ဘုရားသခင်​က အသိပေး​ထားလို့​ပေါ့။ နောင်တစ်ချိန်​မှာ ​ဖြစ်လာ​မယ့် အရာတွေ​အကြောင်း သူတို့ကို ပြောပြ​တယ်​လေ။

ကြီးမြတ်​တဲ့​ဆရာ ယေရှု ကမ္ဘာ​ပေါ်ကို ရောက်လာတဲ့​အချိန်​ကျတော့ ကျမ်းစောင် အတော်များများ ရေးသား​လို့ ပြီးသွား​ပြီ။ ကြီးမြတ်​တဲ့​ဆရာ​ဟာ ကောင်းကင်ဘုံမှာ နေ​ခဲ့​ဖူး​တယ်​ဆိုတာ မမေ့နဲ့​နော်။ ဘုရားသခင် လုပ်ခဲ့တာ​တွေကို ယေရှု သိတယ်။ ကျမ်းစာ​ဟာ ဘုရားသခင်​ဆီက လာတယ်​ဆို​တာ ယေရှု ယုံကြည်​ရဲ့​လား။— ယုံကြည်တာ​ပေါ့။

ဘုရားသခင်ရဲ့ လုပ်ငန်း​တွေ​အကြောင်း လူတွေကို ယေရှု ပြောပြတဲ့​အခါမှာ ကျမ်းစာထဲက​နေ ဖတ်ပြ​တယ်။ တစ်ခါတလေ​ကျတော့ ကျမ်းစာမှာ​ပါတဲ့ စကားတွေကို အလွတ်ပြော​ပြ​တယ်။ ယေရှုဟာ ဘုရားသခင်​ဆီကနေ တခြား​အကြောင်း​တွေ အများကြီး​လည်း ယူဆောင်​လာ​ခဲ့​တယ်။ “ကျွန်တော်​လည်း သူ့​ဆီက ကြားခဲ့​တာ​တွေကို​ပဲ ဒီ​လောကမှာ ပြန်​ပြောတယ်” လို့ ယေရှု ပြောခဲ့တယ်။  (ယောဟန် ၈:၂၆) ယေရှုဟာ ဘုရားသခင်နဲ့​အတူ ကောင်းကင်ဘုံမှာ နေ​ခဲ့​ဖူး​လို့ ဘုရားသခင် ပြောတာ အများကြီး ကြားခဲ့​ရတယ်။ ယေရှု ပြောခဲ့တဲ့ အဲဒီ​အကြောင်း​တွေကို ဘယ်မှာ ဖတ်​လို့​ရ​မ​လဲ။— သမ္မာကျမ်းစာမှာ​ပေါ့။ တို့တစ်တွေ ဖတ်ဖို့ ဒါတွေ​အားလုံးကို ရေးထားခဲ့တာ။

ဘုရားသခင်​က လူတွေကို ကျမ်းစာ ရေးခိုင်းတဲ့အခါ​ မှာ သူတို့​က နေ့စဉ်​သုံး​စကားနဲ့ ရေး​ကြ​တယ်။​ ဒါကြောင့် ကျမ်းစာ​အပိုင်း အများစုကို​ ဟီဘရူး​လို၊ တချို့​အပိုင်းကို အာ​ရ​မိတ်​လို၊ အတော်များများကို ဂရိ​လို ရေးခဲ့ကြတယ်။ အခုခေတ် လူ​အများစုဟာ​ အဲဒီ​ စကား​တွေကို မဖတ်​တတ်ကြ​တဲ့​အတွက် ကျမ်းစာကို တခြား​ဘာသာစကားနဲ့ ပြန်ဆိုခဲ့​ကြ​တယ်။ ဒီ​က​နေ့​ဆို​ရင် ကျမ်းစာရဲ့ အစိတ်အပိုင်း​တွေကို ဘာသာစကား​ပေါင်း ၂,၈၀၀ ကျော်​နဲ့ ဖတ်​လို့​ရ​နေ​ပြီ။ ဒီ​တစ်ချက်​တည်း​ကို​ပဲ စဉ်းစား​ကြည့်။ သမ္မာကျမ်းစာ​ဟာ နေရာတိုင်းက လူအားလုံး​အတွက် ဘုရားသခင်​ဆီက လာတဲ့ စာ​ပဲ​ပေါ့။ ဒါကြောင့် သမ္မာကျမ်းစာကို ဘာသာစကား ဘယ်လောက်များများ​နဲ့​ပဲ ပြန်ဆို​ပြန်ဆို သတင်း​စကား​က​တော့ ဘုရားသခင်​ဆီက လာတာပါပဲ။

သမ္မာကျမ်းစာ ပြောတာ​တွေ​ဟာ တို့​အတွက် အရေးကြီးတယ်။ ကျမ်းစာ​ဟာ ဟို​ရှေး​ ရှေး​တုန်း​က ရေးခဲ့တာ ဆို​ပေမဲ့ ဒီ​က​နေ့ ဖြစ်နေတဲ့ အကြောင်း​တွေ​လည်း ပြော​ထားတယ်။ နောင်​သိပ်​မကြာမီ​မှာ ဘုရားသခင် လုပ်​မယ့်​အရာတွေ အကြောင်း​တွေကို​လည်း ပြောပြ​တယ်။ ပြော​ထားတဲ့ အကြောင်း​တွေဟာ စိတ်လှုပ်ရှားစရာ သိပ်​ကောင်း​တယ်။ တို့​တစ်​တွေ​အတွက် အံ့သြစရာ မျှော်လင့်ချက် ပေး​ထားတယ်။

ဘုရားသခင်​က တို့​တစ်​တွေကို ဘယ်လို နေထိုင်​စေချင်တယ်​ဆို​တဲ့ အကြောင်း​လည်း ကျမ်းစာ​မှာ ပါတယ်။ အမှား​နဲ့ အမှန်​ကို ခွဲခြား​ပြ​တယ်။ ဒါကို ကလေးတို့ သိဖို့ လိုသလို တို့လည်း သိဖို့ လိုတယ်။ မကောင်းတာ လုပ်တဲ့​လူတွေ​အကြောင်း၊ သူတို့ ဘာ​ဆိုးကျိုး ခံရတဲ့​အကြောင်း​လည်း ပါတဲ့​အတွက် သူတို့ တွေ့ကြုံရတဲ့ ပြဿနာတွေကို တို့​တစ်​တွေ ရှောင်နိုင်​တာ​ပေါ့။ ပြီးတော့ မှန်​တာ​ကို လုပ်​လို့ ကောင်းကျိုး​ရတဲ့ လူတွေ​အကြောင်း​လည်း ပါသေး​တယ်။ ဒါတွေ​အားလုံး​ဟာ တို့​ကောင်းကျိုး​အတွက် ရေးထား​တာ​ကွဲ့။

ဒါပေမဲ့ ကျမ်းစာက​နေ အကျိုး​အများဆုံး ရ​ချင်​ရင်​တော့ မေးခွန်း​တစ်ခု​ရဲ့ အဖြေကို သိဖို့ ​လိုတယ်။ အဲဒီ​မေးခွန်း​က​တော့ ဘယ်သူက တို့​တစ်​တွေကို သမ္မာကျမ်းစာ ပေးခဲ့သလဲ။ ကလေးတို့ ဘယ်လို ဖြေမလဲ။— မှန်တယ်၊ ကျမ်းစာ​တစ်အုပ်လုံး​ဟာ ဘုရားသခင်​ဆီက လာတာ​ကွဲ့။ ဒီလို​ဆို​ရင် တို့​တစ်​တွေ တကယ်ပဲ ပညာ​ရှိတယ်ဆိုတာ ဘယ်လို ပြ​နိုင်သလဲ။— ဘုရားသခင့်​စကားကို နားထောင်ပြီး ခိုင်း​တဲ့​အတိုင်း လုပ်​ရမှာ​ပေါ့။

ဒါကြောင့် အချိန်​ယူပြီး သမ္မာကျမ်းစာကို အတူ​ဖတ်ရ​မယ်။ သိပ်​ချစ်တဲ့ လူတစ်ယောက်​ဆီက စာရ​ရင် တို့​တစ်​တွေ ထပ်ခါတလဲ​လဲ ဖတ်​တတ်ကြတယ်။ အဲဒီ​စာ​ဟာ တို့​တစ်​တွေ​အတွက် သိပ်​အဖိုးတန်တယ်။ ကျမ်းစာကို​လည်း အဲဒီလို သဘောထား​ရမယ်။ ဘာကြောင့်လဲ​ဆိုတော့ ကျမ်းစာ​ဟာ တို့​တစ်​တွေကို အချစ်ဆုံး ပုဂ္ဂိုလ်​ဆီက လာတဲ့​စာ ​ဖြစ်လို့​လေ။ မေတ္တာရှင် ဘုရားသခင်​ဆီက လာတဲ့​စာ​ပေါ့။