¿MAYQEN librotaj astawan gustasunki?... Wakin wawasmanqa animalitosmanta parlaj libros gustan, wakinmantaj ashkha dibujosniyoj libros. Chay librosta leespa kusirikusunman, ¿icharí?

Chaywanpis Diosmanta cheqa kajta yachachej libros, aswan sumaj. Chaykunamanta ujnintaj aswan sumajpuni. ¿Mayqentaj chay libro?... Chay libroqa Biblia.

¿Imaraykú Biblia aswan sumaj libro?... Dios qowasqanchejrayku. Bibliaqa Diosmanta, Dios sumaj imasta noqanchejpaj ruwananmanta ima willawanchej. Chantapis Diosta kusichinapaj imatachus ruwanata niwanchej. Bibliaqa Diosmanta uj carta jina.

Diosqa Bibliata cielopi qhelqapuwasunman karqa. Jinapis mana chaytachu ruwarqa. Payqa kay Jallpʼamanta kamachisninman yuyaycharqa Bibliata qhelqanankupaj.

¿Imaynatá chayta ruwarqa?... Entiendenaykipajqa kaypi tʼukuriy: radiota uyarispaqa karupi kaj runaspa parlasqankuta uyarinchej. Teleta qhawaspataj waj llajtasmanta runasta rikunchej, parlasqankutapis uyarinchej.

Runasqa cohetepi phawaspa killamanpis chayarqanku. Killamantapachataj kay Jallpʼaman mensajesta apachimorqanku. ¿Chayta yacharqankichu?... Runas chayta ruwayta atinku chayqa, ¿manachu Diospis ajinata ruwayta atinman?... Atinmanpuni. Chaytataj niraj radio, nitaj telepis kashajtin ruwarqa.

 Uj runaqa Diostapuni parlajta uyarerqa, payqa Moisés karqa. Diosta mana rikuspapis parlasqanta uyarerqa. Diosqa chay día uj orqota kharkaticherqa. Lliuj lliujkunataj, qhon qhonkunataj karqa. May chhika runas chaypi tantasqa kasharqanku, may mancharisqastaj, imajtinchus Dios parlamusqanta yacharqanku. Chayrayku Moisesman nerqanku: “Diosqa ama noqaykuwanqa parlachunchu ari, manachayqa wañurasqayku”, nispa. Moisestaj Diospa nisqanta Bibliapi qhelqarqa (Éxodo 20:18-21).

Moisesqa Genesismanta Deuteronomiokama qhelqarqa, nitaj payllachu Bibliata qhelqarqa. Bibliataqa 40 runaswan jina Dios qhelqacherqa. Chay runasqa unay tiempopi kausakorqanku.  Chantá, ¿mashkha wataspitaj Bibliata qhelqarqanku? Casi 1.600 wataspi. Wakin qhelqajkunaqa mana rejsinakorqankupischu. Jinapis Bibliapeqa uj yuyaylla tiyan. ¡Chaymá tʼukunapajqa!

Wakin qhelqajkunaqa may rejsisqa karqanku. Sutʼincharinapaj, Moisesqa ovejero kaspapis aswan qhepaman israelitasta kamacherqa. Salomontajrí rey karqa, tukuy runasmanta aswan yachayniyoj, may qhapajtaj. Wakin qhelqajkunataj mana may rejsisqachu karqanku. Paykunamanta ujnenqa Amós karqa. Payqa higosta tʼojsispa llankʼakoj.

Ujnin qhelqajtaj doctor karqa. ¿Yachankichu sutinta?... Lucas sutikorqa. Waj qhelqajtaj Mateo karqa, payqa aswan ñaupajta impuestota cobraspa trabajaj. Bibliaj aswan ashkha librosninta qhelqajtaj, judiospa leyesninkuta allinta rejsej. ¿Yachankichu sutinta?... Sutenqa Pablo. Jesuspa iskay yachachisqasninpis, Bibliaj wakin librosninta qhelqallarqankutaj. Ujnenqa Pedro karqa, ujnintaj Juan. Paykunaqa pescadores karqanku.

Bibliata qhelqajkunamanta ashkhasqa, imastachus Dios qhepaman ruwananta willarqanku. ¿Pitaj paykunaman chayta willarqa?... Paykunamanqa Dios willarqa.

Sumaj Yachachej Jesuspa tiemponpeqa, Bibliaj ashkha librosninña qhelqasqa karqa. Chantapis Jesusqa niraj Jallpʼaman jamushaspa cielopi tiyakorqa, yacharqataj imatachus Dios ruwasqanta. ¿Jesús creejchu Biblia Diosmanta jamusqanta?... Arí, creej.

Jesusqa Diospa ruwasqasninmanta runasman yachachishaspa, Bibliata leej. Wakin kutistaj Bibliata mana leespalla, umanpi japʼisqan versiculosmanta yachachej. Chantapis Diosmanta waj imastawan yachacherqa. Pay nerqa: ‘Diosmanta uyarillasqayta kay pachapi willashani’, nispa (Juan 8:26). Jesusqa Dioswan tiyakusqanrayku,  imastachus Dios nisqanta yacharqa. Jesuspa yachachisqantarí, ¿maypí tarisunman?... Bibliapi. Chaypi qhelqasqa kashan leenanchejpaj.

Diosqa runaswan Bibliata qhelqacherqa, paykunataj parlayninkupi qhelqarqanku. Chayrayku Bibliaj ashkha librosnin hebreopi qhelqakorqa, wakintaj arameopi, wakintaj griegopi. Kunanqa ashkha runas chay parlaykunata mana yachankuchu. Chayrayku Bibliataqa ashkha parlaykunaman tijrachinku. Bibliaj wakin librosnenqa, 2.800 kuraj parlaykunapi tiyan. Chay chhika parlaykunapi kashan, Dios tukuyman uj cartata jina qowasqanchejrayku. Biblia may chhika parlaykunaman tijrachikojtinpis, nisqanqa Diosmantapuni.

Bibliaj nisqanqa mayta yanapawasunman.  May unayña qhelqakojtinpis, kunan tiempo imaschus kashasqanta, qhepaman imaschus kananta ima willan. Chayta willawasqanchejqa may sumaj, uj suyakuytataj qowanchej.

Bibliaqa Diosta kusichinapaj imaynatachus kausakunatapis niwanchej. Yachachiwanchejtaj imachus allin, imatajchus mana allin kasqanta. Chaytaqa yachanapuni tiyan. Bibliaqa willawanchej mana allin imasta ruwaj runasmanta, imapichus tukusqankumantapis, mana paykuna jina pantanapaj. Chantapis willallawanchejtaj allin imasta ruwaj runasmanta, paykunata allin risqanmantapis. Tukuy chaytaj, yanapanawanchejpaj qhelqakorqa.

Biblia sumajta yanapanawanchejpajtaj, kay tapuypa kutichiyninta yachananchej tiyan: ¿Pitaj Bibliata qhelqachipuwarqanchej?... Arí, Dios Bibliata qhelqachipuwarqanchej. Chayrayku, ¿imaynatá rikuchisunman yachayniyoj kasqanchejta?... Diosta uyarispa, kamachisqantataj juntʼaspa.

Chayrayku Bibliata khuska leerinapaj tiempochakuna tiyan. Munasqa amigonchej cartata apachimuwajtinchej, kutin kutita leerinchej, may valorniyojpajtaj qhawanchej. Kikillantataj Bibliatapis qhawana, imajtinchus may munakuyniyoj Diosninchej uj cartata jina qowanchej, paypaj may munasqa kasqanchejrayku.