¿IMAMANTA willakuq qillqataq qawanaykipaq hina?... Wakin warmachakunapaqqa uywachakunamanta willakuqmi, wakinpaqñataqmi kuyayllapaq dibujochayuq kaqkuna. Chaykunamanta leeyqa sumaqmi ¿aw?

Alli-allin qillqakunaqa imam kaqtam Diosmanta yachachiwanchik. ¿Yachankichu Diosmanta alli-allin yachachikuq mayqin qillqa kasqanta?... Arí, bibliam.

¿Imanasqataq bibliaqa wakin qillqakunamantapas aswan allin?... Kikin Diospa rimasqan kasqanraykum. Bibliallam willawanchik Diosmanta hinaspa ñuqanchikpaq imapas sumaq kaqkuna ruwananmanta. Yachachiwanchiktaqmi Diosta kusichinapaq imakuna ruwananchikmantapas. Chaymi nichwan bibliaqa Diospa cartan kasqanta.

Diosqa atinmanmi karqa hanaq pachapi bibliata ruwaruspan runakunaman quyta. Ichaqa manam chaytachu ruwarqa. Diosqa kay pachapi kaq runakunatam kamachirqa yachachikuyninta qillqanankupaq.

¿Imaynataq chayqa karqa?... ¿Yacharqankichu radiokunapi hinaspa televisionkunapi rimamuqkunaqa karu-karu llaqtakunamanta rimamusqankuta?

Utaq, ¿runakuna killaman chayaruspa chaymanta kay pachapi kaqkunawan rimasqankuta?... Runakunallapas karupi kaqkunawan rimayta atichkaptinkuqa, Diosqa astawanraqchiki  runakunawanqa rimayta atinman ¿aw?... Diosqa chaytam ruwarqa radiopas hinaspa televisionpas manaraq kachkaptin.

Ñawpaq tiempokunapim Moises sutiyuq runa Diosta mana rikuchkaspanpas rimasqantaqa uyarirurqa. Hinaptinmi achka runapa qayllanpi rayopas tuqyaptin allpapas katkatatarqaraq. Chaymi kikin Dios rimamusqanta uyarispanku runakunaqa Moisesta nirqaku: ‘Diosqa amayá ñuqaykuwanqa rimachunchu, wañuruymankum’, nispanku. Chaymantam Moisesqa Diospa chayna rimasqanta bibliapi qillqarqa (Exodo 20:18-21).

 Moisesqa bibliapa qallariyninpi kaq pichqa librokunatam qillqarqa. Paymanta qipamanñam Diosqa yaqa tawa chunka runakunata kamachirqa bibliata qillqanankupaq. Biblia qillqaq runakunaqa yaqa waranqa suqta pachak watapim qispichirqaku. Paykunaqa manam riqsinakurqakupaschu. Chaywanpas qillqasqankuqa suma-sumaqtam tupan.

Biblia qillqaqkunaqa wakinmi allin riqsisqa karqaku, wakinñataqmi mana. Chaynam karqa oveja michiq Moisespas hinaspa Israel nacionta kamachiq Salomonpas. Salomonqa tukuy kapuqniyuq hinaspa yachaysapa runam karqa. Wakinqa Amos hina mana ancha riqsisqa runakunam karqaku. Amosqa chakra runa kaspanmi higos rantikuqlla karqa.

Bibliataqa qillqarqataqmi doctorpas, ¿yachanki sutinta?... Lucasmi. Qillqarqataqmi qullqita huñuq Mateo sutiyuq runapas. Karqataqmi Moisespa kamachikuyninmanta alli-allin yachaq runapas, ¿pitaq chay runa karqa?... Pablom. Bibliataqa qillqarqataqmi challwata hapiq Pedrowan Juanpas.

Bibliata qillqaqkunaqa ñam willakurqakuña qipa punchawkunaman imapas kananmantaqa. ¿Imaynatataq yacharqaku?... Dios willasqanraykum.

Allin yachachiq Jesuspa tiemponpiqa ñam bibliapa wakin qillqankunaqa ruwasqaña karqa. Jesusqa ñam yacharqaña manaraq kay pachaman hamuchkaspan bibliaqa Diospa ruwachisqan kasqanta. Chaymi bibliaqa Diospa palabran paypaqqa karqa.

Jesusqa Diospa ruwasqankunamanta runakunaman yachachispanmi bibliawan yachachiq. Chaymi nirqa: “Uyarisqay  kaqkunatam llapa runakunaman willakuni”, nispa (Juan 8:26). Jesusqa hanaq pachapi kachkaspanmi Diospa yachachikuyninkunamanta uyarirqa. Hinaptinqa, ¿maypitaq Jesuspa yachachikuyninkunaqa kachkan?... Bibliapim, chaymi leenanchik.

Bibliata qillqaqkunaqa kikinkupa rimayninkupim qillqarqaku. Chayraykum qillqarqaku hebreo, arameo hinaspa griego rimaykunapi. Kunan tiempopi chay rimaykunata manaña rimasqanchikraykum bibliaqa 2.600 masnin rimaykunapiña ruwasqa kachkan. Chayna achka rimaykunapi kasqanraykum mana iskayrayanchikchu bibliaqa kuyakuq Diospa cartan kasqanmanta.

Bibliapi willakuykunaqa ñawpa tiempopi qillqasqa  kaspanpas allinninchikpaqmi. Willakunmi kay tiempopi imakuna kananmanta hinaspa hamuq tiempopi imakuna kananmantapas. Hamuq tiempopi kawsakuyqa suma-sumaqmi kanqa.

Diosqa bibliawanmi yachachiwanchik imayna kawsakunanchikpaq, chaypim yachachiwanchik imam allin utaq mana allin kasqanta yachanapaq. Bibliaqa willawanchikmi allin ruwaq runakuna hinaspa mana allin ruwaq runakuna imayna kasqankumanta. Tukuy chaykunaqa allinninchikpaqmi qillqakurqa.

Chaymi allinta yanapachikunapaqqa pipa kasqanta yachananchik. Qampaqqa, ¿pipataq bibliaqa kanman?... Arí, Diospam. Hinaptinqa, ¿imatam ruwananchik yachayniyuq kanapaq?... Diosta uyarispam kamachisqankunata kasukunanchik.

Chaynaqa, imaynam kuyawaqninchik runapa cartamuwasqanchikta kusikuyllawanña leenchik, chaynam bibliata leenapaqpas sapa kuti tiempochakunanchik. Bibliaqa ancha kuyawaqninchik Diospa cartamuwasqanchikmi.